على ذِكْر الرَّحيل المر وعودة خاطري مكسور
أحس إني من الداخل سكنِّي واحدٍ غيري


أنا ما هو أنا .. هذا شعور وذاك كان شْعور
رحل كل الشعور اللي جمعني فيك ياطيري


حياتي يوم غبتِ غاب عنها لو بصيص النور
ظلام الكون من حولي سرق مني مشاويري


أسير الذكريات الماضية .. من حاضري مذعور
لأني فاقد اللحظة وعايش في أساطيري


أحاول لك أرجعني وأبني للوصال جسور
ولكن كيف أوصل لك إذا عيَّت مقاديري


طريق الوصل ما بيني وبينك للأسف مبتور
وكل اللي توقعته لقيته عكس تقديري


صخب دنياك لا يمكن يعيش بعالمي المهجور
عجزت أغير الواقع وأخرج من محاذيري


حياتك أشبه بمسرح وأنا فيها رجل مغمور
وأدوار البطوله ما تمَاشَى وِفْق تفكيري


مملة عيشة الأضواء .. وأنتِ عالمك مشهور
وهج شمسك وأضوائك يحطِّم فِي ديجوري


أنآ أبسط من الشهرة ولآ أقدر أعيش الدور
تعذَّرت بظروفي بس ما فادت معاذيري


أقدِّر لك قناعاتك ولا جا منك أي قصور
وكل اللي حصل ما بيننا باسباب تقصيري





سُهيل