أنا عاقل ما بين الناس إلا في الهوى مجنون
إذا حبيت أغيِّب عقلي وأمشي ورا احساسي


ولا أهتم بامر الناس ولا فيني وش يقولون
كلام الناس ما شلته ولا عمره ملا راسي


نصايح مالها قيمة وإذا جت عندهم يقفون
يبرر كل واحد فعله بعذر الزمن قاسي


أنا في وادي العشاق هايم والجنون فنون
أساساً مكتفي عنهم غني حتى بوسواسي


يرون إن الهوى شيطان وشيطاني بها مفتون
من أول نظرة حبتني وهي تجري بأنفاسي


أحبك حُب لو وزِّع يكفِّي كل أهل الكون
ولكني اختزلته فيك أنتِ يا بعد ناسي


بكل إحساس حبيتك عشقت الشكل والمضمون
وأبحرت بتفاصيلك وبك أشغلت هوجاسي


خذيني بين يدَّينِك أنا بالشوق لك مسكون
وضميني إلى صدرك وأطفي شوقي القاسي


أنا لك من عمر مشتاق أبي وقتي يمر بهون
وقولي لكل من يسأل أظنه ضمني ناسي


دخيلك طوِّلي عناقي وسيبيني كذا محضون
أبي أروي ينابيعي وأحيي يابس غراسي




سُهيل