كل يحوس ويحسب انه على خير
والخير ما هو فاله في كل الاوقات
عقيدنا ما هو على سنة ....... الزير
لا ماقف يرضيه ولا فيه.... وقفات
لا بد من يوم تقل ......... المسايير
ونزهد بشوفه مع قليل ... الزيارات
يا طيرنا ياللي تهج ....... المظاهير
ارفق بمظهور العشاير ..... وخلفات
بعض التحايا تستفز ...... الجماهير
وترمي بهم يا طيرنا ..... بالمتاهات
انشد مجرب لو هو في علمه اصغير
لا شك بينه والجهالة ...... مسافات
وحنا ترانا بالبشر عالم .......... غير
ما نحتفي في كلمة تجرح ... الذات
ان كان غيري يقبل الخبث . يا طير
مثلي ابد ما يقبل الموت ... لو مات
ولاني من اللي تشتريه ..... الدنانير
ولاني من اللي يشتهون .. الخفيات
اجيك بوجهك بالنصيحة . وتحذير
اما قبلت الراي والا .........سلامات
نترك لك الديرة ونترك لك .... الدير
وخلك مع اللي سجدته ..بالاشارات
خلك مع اللي بالملا يشبه ..... العير
تفرح بشوفه كنه شيخ ... البشاوات
وانا لي اللي يرزق الذيب ... والطير
اللي تكفل في ارزاق ...... وعطيات
ربي يدبرني بحسن ......... التدابير
ولا خاب من ربه يحيطه .. برحمات
نضرب بها ما بين ورد .... ومصادير
ونسعى بها سعي العزوم ... القويات
اعزوم ربع للمراجل .......... مداوير
ما هم من اللي يتبعون .... الخويات
وصلوا على اللي مبعثه ... بالتباشير
وعليه من الله ازكى قول . وتحيات
شفيعنا في يوم ضنك ...... وزمهرير
في ساعة كل يبيع ........... القرابات

القارظ العنزي