بسم الله الرحمن الرحيم

الله يصبحكم بالخير

بعلمكم وشلون تسوون قرص الجمر او البعض يسميه الجمري

طبعا قرص الجمر من اسمه كان وما زال يسوونه غالبا بطلعات البر او احيانا بالبيت بطريقته الاصليه وهي انه يدفن بالجمر حتى يستوي وهالطريقه لها طعم خاص ولها مذاق خاص
وهالقرص من الاشياء والاكلات اللي راعي البر والطلعات ما يستغني عنها بكل طلعه لازم يكون للقرص نصيب منها

الان تغير الوضع وصار الناس يتفننون بطريقة عمل القرص وصار نادر اللي يدفنه بالجمر
يستخدمون صاج يعني يتجنبون انه يكون فيه من اثر الجمر شي او بعض التراب

لان تنظيفه من الرماد والتراب متعبه جدا حتى تتاكد مية بالمية انه نظف


هلحين حتى بالفرن اي واحد يقدر يسويه
وربات البيوت تقدرين تسوينه وتفاجاين فيه الاسره او الزوج

اهم شي طحين بر الطحين الابيض ما ينفع ابد والشغله الثانيه لازم يكون بدون خميره لا تظاف له اي خميره
فقط عجين بر وماء ويعجن وتكون العجينه ثقيله شوي ما تكون طريه

ولازم تحطون ببالك ما تكون العجينه كبيره تكون بعد ما تفردونها تكون رقيقه شوي علشان تستوي كامله من برا وداخل

تفرد مثل طريقة البيتزا بالضبط وتحط بالفرن او على صاج لين تستوي


نجي لفرد القرص وهذي المرحله الثانيه

بعضهم يحب ياكل ناشف كذا مع حليب او بدون قديما كانت الاشياء غير متوفره الان الحمدلله كل النعم متوفره الله لا يغير علينا ويرزقنا شكر نعمته

الفلاد يكون باكثر من خيار

يفرد مع عسل ويفرد مع سمن ويفرد مع تمر

انا حقيقه جربته بكلها الذهم واطعمهم خلطت عسل وسمن مع بعض يطلع لذيذ بشكل غير طبيعي

الفرد هو انك تفتت القرص كامل بحيث اكبر قطعه تكون بجم اضفر الاصبع
وتحطه بقدر على نار هاديه وتظيف اللي تحب التمر او العسل او السمن او زيت الزيتون
وتفكر باستمرار وتظيف على حسب مزاجك والكميه اللي تحب

وبعد ما تشوفه تماسك مع الاظافات تقدمه وتسمي بالله وتاكل
جربوه مع سمن وعسل وانتم تشربون الحليب
راح تدعون لي



ومدتم بكل ود