أعالج لوعة المغـرم وتكبـر لهفـة المشتـاق
بحسن ارضاي اسوق اخطاي اقدم رجل وافهقها
اهوجس من طلوع الشمس الى ماغيبة الاشفاق
ولاادري في ظلام الليل رجلـي وش يوافقهـا
ابصبر واتصبّر مار اظـن الصبـر ماينطـاق
لقيت الصبر مر.. ولو ينوش الكبـد يحرقهـا
الا ياكامليـن المعرفـة سلـك الغـرام دقـاق
الـى صـاب القلـوب الله يعافينـا يخرّقـهـا
انا لي صاحب خده ورى الشيله كمـا البـراق
بعرض المزنه اللي مثل شمس الظهـر بارقهـا
خلقها الله وزيّـن خلقهـا واخلاقهـا الخـلاق
قليل ٍ جنسها ..فـي جيلهـا سبحـان خالقهـا
لها عين الى لدّت بها ..تذبـح بهـا العشّـاق
بها وصفين من عنق المهاه..وطـول عاتقهـا
الى ماشفتها ضاقت بي الدنيا وصدري ضـاق
وانا لو الهوى لـي كـان عينـي ماتفارقهـا
أحب مشاهد الغالي عسى ماهوب حـب افـراق
ولو راحت معه في مغـرب الدنيـا ومشرقهـا
الى جا الليل ماشفته يزيـد بصـدري الدقّـاق
معـه روحـي بسلـك العنكبـوت الله معلّقهـا