منتديات مسك الغلا | al2la.com - عرض مشاركة واحدة

**عمرو 2** · 07-20-12, 12:27 PM

دموع الندم

ابويا وامى ماتوا من سنين
وانا من يوم ما ماتوا نفسى ازرهم
واخفف لوعة القلب الحزين
بدمعه من عيونى فوق قبورهم
واقرلهم سورة عم وياسين
تنور بيها فالجنه قصورهم
نويت لما النهار يطلع عليه
راح اتوكل على رب البريه

وقمت بسرعة جهزت الزياره
وحطتها ف شنطه ورجعت اجرى
وقلت لجوده بواب العماره
ياجوده عاوز اصحى الصبح بدرى
ياجوده اوعى تنسى خد سيجاره
اديك بتصحى عبد العال وقدرى
ووصيته ليلتها ميت وصيه
وهو يقوللى حاضر من عنيه

وقبل الفجر ما تظهر بشايره
كنت باركب من المحطه
وجنبى واحده ست وواد صغير
معاها سبت مليان وشنطه
سمعت الاكس صفر بقول
دلوقتى فين قالت ف طنطا
نزلت وسبتها تسافر وهيه
مسافره رايحه اسكندريه

ولما وصلت بيتنا ف ميت تمامه
دقهليه تابع مركز دكرنس
قابلونى اخواتى عبد الله وسلامه
وابراهيم ومختار والحاج مؤنس
هللوا مرحب الفين سلامه
نهارنا فل بوجودك ونرجس
واهلا ثم سهلا والتحيه
ومرحبتين وليه الغيبه ديه

قعدت شويه اتسامر معاهم
وهم فرحانين بوجودى بينهم
وفت الكل فى ساعة صفاهم
ماحدش درى بخروجى منهم
ورحت اوفى دين اللى لولاهم
ما كنت وعمرى ما راح اوفى دينهم
قعدت اقرأ من القران شويه
واوهبهم لأروحهم هديه

وقبل ما يجى الليل بأوهامه وظلامه
كنت بخرج من الارافه وعند بابها
سمعت واحد بيشكى من الامه
ويذيد من ملام نفسه ويعاتبها
وبيهنها وانا سامع كلامه
يقول يانفس ملعونه ورديه
مافيش يوم ينتهى من غير خطيه

تنامى عن صلاتك والعباده
وليل نهار فى دور اللهو قاعده
وتكلى حق عبد الله وسعاده
ودول يانفس عاوزين المساعده
وعند الحق انكرتى الشهاده
بعين جامده وكل الخلق شاهده
جرالك ايه يانفس جهنميه
كده يا نفس تكلى لحمه نيه

معاكى المال وترميه فالقمار
وعالستات وفشرب الخمور
قعدتى تصرفى ليل نهار
واهلك محتاجين حق الفطور
وتتباهى لحد المال ما طار
عملك ايه بقى حب الظهور
وصحابك لما عرفوا ان التكيه
خلاص خلصت فرحوا فيه

انا جبتك هنا فى دى الارافه
عشان تتعبدى باقى حياتك
مدام تعرفى ان المسافه
قريبه حتكفرى عن سيئاتك
اصل الدنيا دى دار ضيافه
وفالاخره تفيدك طيباتك
وتبقى العيشه فالجنه هنيه
ويشفع لك ابو الطلعه البهيه

انا واقف قريب منه وسامع
وشايفه لما قام علشان يصلى
يقول يارب انا فالعفو طامع
وادى دموع الندم تشهد بذلى
وعفوك يا اله العرش واسع
على العاصى وع المذنب تملى
صلى لله ركعتين تحيه
وقعد بقرأ من القران شويه

لما الشخص ده صلى وسلم
وجلس يختم صلاته
وصلى على النبى الهادى وسلم
وفتح المصحف يقرأ آياته
وقفت بسرعه قدامه اسلم
ادارى منى فى عباته
وقللى يا أخى ابعد شويه
انت جى تتجسس عليه

ابعد عنى و سيبنى لحالى
انا باعبد الاه العالمين
تركت الخلق من واطى لعالى
وجت هنا عاشرت الميتين
اذا اتكلمت كلمه لا ابالى
ماهيش راح تتنقل ينقلها مين
وانا مرتاح فالوحده ديه
اجوع اشبع ماحدش دارى بيه

قلت يا اخويا حقعد معاك
ونبقى اصحاب وناكل من عرقنا
هوايا اصله حيوافق هواك
عشان من طينه واحده احنا اتخلقنا
وحكون لك خادم امين
قال لى اتفقنا
قعدنا سهرانين ليله هنيه
فى طاعة ربنا صاحب العطيه

وبان نور الفجر والقمرناطط
على غصنه وغنى لليمامه
وجه جوده بأديه الاتنين يخبط
وقاللى مش راح تسافر ميت تمامه
صحيت وفضلت من غيظى اعيط
ياريت افضل كده ليوم القيامه
عمرو الجندى