السلام عليكم جميعا

أنا متزوجة لي سنة و 8 شهور في البداية أول شهور كان زوجي كويس معاي ومثالي ومثل ما أريده ..
بس بعد فترة من زواجنا تغير تعامله معي وصار يهتم بأشياء ثانية وأنا ولا على البال ..
أنا مو من النوع اللي يسأل وين رايح ومنين جاي
ولا من النوع الثرثار اللي أزعجه بكلامي
بس أحب أسمع وأحب إنه يحكيلي ويتكلم معاي
و للأسف أغلب الوقت برات البيت مع أصحابه ويهتم بالغير ويجي تالي الليل ويقول تعبان أبي أنام وأخليه ع راحته .. أحيان جد ينام وأحيان يمسك الجوال ويتابع بالواتس حتى لو ما كان يراسل

لي 3 أيام قررت ما أكلمه غير للضرورة أبي أشوف اذا راح يبدي شوية أهتمام
أقسم بالله 3 ايام وما تعدى كلامنا 10 كلمات
بس أدق عليه وأقول جيب معك كذا اذا جاي
وجه لوجه ما تكلمنا ولا سأل ليش ما تكلميني
ولليوم مستمره على هالوضع معه وأشوف إذا رح يحاول يبادر ويسأل ويهتم
على حسب علمي مو مقصرة معاه بشيء وأتزين له وأحاول بكل ما أوتيت من قوة أكون مهتمة به وألبي له طلباته

بس هو ما يهتم بي ولا يتكلم معاي
ويزعجني دايم بسيرة الزواج إنه رح يتزوج علي
واذا سألته ليش بتتزوج ومين تبي تتزوج

يقول أبي أتزوج كذا بس عشان الكل صاير يتزوج الثانية
وعادي مش مهم مين راح أتزوج حتى لو تختارينها لي أنتي
يعني مافي أحد ع باله

لنا سنة و8 شهور متزوجين ولا نعرف عن بعض الا شوي
لان ولا مرة جلسنا سولفنا مع بعض وحاول يتعرف علي زين او عطاني مجال اني أسأله عن نفسه ويجاوبني

حاولوا تساعدوني .. زوجي موب شين بس أبي حل معه وأبيه ينطيني شويه أهتمام ..
وأبي حل معه للصلاة أحيان يصلي واحيان يترك وأحيان كثيرة يتأخر بالصلاة