ليت هذا الكذب شخصٍ يعترف لا صدق
كان ما فيه داعي للعتب والكلام
إيه يجرح لساني هالزمن لا نطق
لأن ماهو أبد في حاجة للملام
كن بعض البشر مشية غرابٍ نعق
ضيع خطاه في درب القطا والحمام
ما بقى في وجيه الناس ذرة عرق
ولا بقى في قلوب الناس عشق و غرام
ليه صارت مشاعرنا كلام و ورق
ليه صارت نوايانا تحب الظلام
من سرقنا ومن منا غفل وانسرق
من خذانا معه في معمعة هالزحام
ليه تشكي ضمايرنا السهر والأرق
من حكى في مسامعها وعيا ينام
ان بغينا البكى فينا بكانا شرق
وان سكتنا تهل قلوبنا من غمام
آه يا وقتنا اللي لك حنين و عبق
ليتك تعود فينا قبل نصبح حطام
قل لنا وش حصل فينا وش اللي فرق
ليتك تمر يالماضي مرور الكرام
لا يهمك عتبنا كان تبغى الصدق
والله إن البلا فينا وكل الملام