السلام عليكم
بكتب كذا من دون مقدمات ولا شي
انا يا حبايب والله بنت نقية وتقية وتخاف ربها ومو انانية ابدددا
اسمي حنان
عمري 21 وحابة اجيب لكم قصتي من البداية عشان ما تلوموني
قبل سنة تقريباً اختي نقلت لشقة قريبة من بيتنا
وقامت دوم تدعيني عندها مرة نروح السوق ومرة نقعد بالبيت نسولف
ووقت نروح السوق يودينا ريلها وكان في مزح خفيف بيني وبينه حتى قدام اختي يعني مافيها شي
وبعد تقريباً شهرين شفت نظراته لي تتغير رغم ما في بيننا حوارات طويلة
بس كذا وقت يطالعني احس بشي
وواستمرت بيننا نظرات
وما اخفيكم انا كمان كنت احس بشي تجاهه
وكذا لين صرت ميتة عليه اروح عند أختي بس عشان اشوفه
وهو دايم يفتح لي الباب احسه يترياني
بس والله ما اظهر له اي شي ولا ابي شي يتم بيننا لان بالنهاية هذي اختي وانا اجازف بحياتي وحياتها
وصرت دووم افكر فيه واقول هو يحبني مثل ما احبه؟
بعدين انفض الافكار من راسي واقول لالا انتي بس تتخيلين
الين اجا ذاك اليوم الي سالني فيه ابن اختي عمره 10 قايل: ممكن اعرف ابوي ليش يحبج
تلبكت حزتها وقلت له عيب الي تقوله مايصير
رغم كنت قادرة اقول له عتدي اصلا انا مثل أخته بس الخوف يدل ع الحب
مرت الايام وقررت ابطل اروح عسب أنسى بس مافي فايدة
اختي دوم تتصل وتزعل اذا ماييتها
والعيد الي مر تلاقينا انا وياه بالصدفة وكنت بدون شي
قسم لو احد شاف نظراته بيقول زوجته
تلبكت وشردت
طبعاً استمرينا كذا والمشاعر تزيد لين صرت مجنونة وشوي وبعترف له
وصرت ارفض اي خطيب يتقدم لي بسبته

عقبها قررت اكافح هالشي وارفض كل اتصال من اختي
واتعذر لها ان انا مشغولة أو اي شيء ونجحت
وصار الي شهر ما رحت عندها
وخلال هالشهر ريلها دوم يتصل ع تلفوني ومن ارد عليه يقول ابي ا كلم امج ماترد من رقمها
ووسط المكالمة اسمع امي تقول له حنان بخير الحمد لله
احسه يتصل عسب يتطمن علي
والي قلب علي حالي انو اختي البارح يتني
تبكي وتشكي لي ان ريلها صاير بارد تجاهها ويتجاهلها وان له اسبوع مو نايم عندها
تخيلوا تقول لي حاسه ان في بقلبه بنت حرام
قلبي ماعاد يتحمل من امس وانا ابكي مدري ع حالي او حال أختي أو حالنا
احبه وودي اصير حلاله بس هالشي بيكون فيه طلاق لاختي وانا طبعاً مب انانية لهالدرجة
ومن ناحية اختي احبها ومستحيل افرط فيها وقلبي يعورني عليها حييييل

ما ادري وش اسوي ووش ذا الحب الكبير من دون اعتراف
تعبانة
وابي مساعدة وحلول تكفون لا تلوموني
يكفي الذنب الي انا حاسة بيه