سافر بقلبي وغيب ولا تسافر بعيد
.... أزبن ضلوعي ليا جا الليل تمسي بها
ماعاد يمديك تسري جا ورى البيد بيد
.... نوخ اركاب الغلا تعبت مناديبها
تعال و احي العروق الذابلات الهميد
.... انعش حنايا الضلوع اللي عوى ذيبها
لو غربة الشوق طالت شاب حرف القصيد
.... والروح شوفك وقربك هي مطاليبها
روحي وقلبي ضيوفك يالغزال الشريد
.... وضيوف الاحباب في حكمة معازيبها
ذابت عليك المشاعر بين قاف و وريد
.... نور السعادة طفى توحش سراديبها
العمر تنقص سنينه وانت حبك يزيد
.... واحلام عمري معك تقبل وتقفي بها
غربة زماني حزينة والمواصيل عيد
.... سود الليالي ترى الفرقى عذاريبها
صدق الليالي عنيده بس راسي عنيد
.... و الله ما ذل نفسي في هناديبها
يالليل دوك العذاب وهات صبح جديد
.... تعبت اعدي واحول من مراقيبها
ماكل حي تمنى يوصل اللي يريد
.... متى الليالي معك تصفى مشاريبها
يامنتحي عن عيوني منك وش استفيد
....تعال ضم الضلوع اللي عوى ذيبها