يعني ماكـن اللـي بسنـي يعشقـون
والا اعترافك لي خطـا .. وانـت زليـت

كنك .. وكـن اللـي معـك مايعرفـون
اني على عهـدك معـي .. يـوم قفيـت

ماهو غريـب اللـي معـك يستغربـون
بس الغريب.. انـك جحـدت وتناسيـت

سجيـت مـن دوار مبنـى التلفـزيـون
اول ماشفتـك فيـه وش انـت سويـت

لديـت لـي بعيونـك الخـرس بالهـون
ورفعـت جامـة سوبرمانـك وعديـت

فتنتنـي بـك ليـن قفـيـت مفـتـون
من شافنـي قـال الولـد رايـحٍ تيـت

من خلفتـي ضيعـت ويـن الدركسـون
واشغل الماء .. وامسحه ..وافهق السيت

لـو موتـري محركـاتـه يحـسـون
في ذمتي .. ان قد يخلط الماء مع الزيت

وقفـت وصفيتـو مـع اللـي يصفـون
وحولـت فـي ذاك المحـل وتقهـويـت

واللـي معـك .. ماحولـو يتقـهـوون
سبحـان ربـي .. مثـل مانـا تمنيـت

ابيعهـا مابيعهـا.. ابلـيـس ملـعـون
ماجا على بالـي سـوى قـول ياليـت

وجه حسن .. زايد دلع .. زايـد عيـون
يعني ساعة شفتك على طـول.. وليـت

وشفتك ومن شافك كذا صـار مجنـون
اكذب عليك ان قلـت لـك مااستجنيـت

سويـت مثـل اللـي الملقـف يسـوون
ماتعرف ارقامي .. لكـن كيـف دقيـت

جانـي رقـم واقـول وش ذا التليفـون
ومدري وش اللـي فـز قلبـي ورديـت

وطلعتـي مـن بيـن ثلثيـن ملـيـون
غلطت في الثلثيـن بـس المهـم جيـت

كلمتني والصـوت مـدري وش يكـون
كلمة ( الو ) تسوى لها .. اربع مية بيت

وعلمتنـي مـن غيـر ذولاك يــدرون
انـي اعرفـك وتعرفـنـي وسجـيـت

هـو الـذي يعرفـون مثلـك يسجـون
الا قـول انـي يـوم غبـت استخفيـت

ولعتنـي والوقـت مـن غيـر مامـون
خـذك ولا خــلا ولا عــاد خلـيـت

الا القصيد.. وضيقـه البـال.. وظنـون
الظن فـي صـدري سـواة الدينا ميـت

والحين تسألني متى .. و كيف .. وشلون
الحين تـوك تسـأل اشلـون حبيـت .؟