اليوم 8 مارس 2020
الموافق 13 رجب 1441




صحيت الفجر على صوت المنبه اللي ضابطته 5:55 بالضبط
وأخذت لفه عالنايمين اللي وراهم دوامات كلهم (( يلا قوموا تأخرتم )) < عشان تفجعهم ويصحوا بسرعه
طبعاً بنتي الكبيره طبعها ما تصحى الا وهي معصبه
وتمشي وتخبط الأرض بقوووة برجلها زعلانه
صرنا نسميها قودزيلا
قودزيلا هذا ديناصور يجي في فيلم واذا مشي يهز الأرض ودايماً زعلان ههههههههههه

وبعدها عالمطبخ جهزت فطورهم وفسحتهم
ورجعت شيكت عاللي ماعندهم دوام كيف نايمين كويس والا شويا ويطيحوا من السرير!
بنتي الصغيره نايمه جوا بيتها
( امس اشتريت لها بيت على قدها وانبسطت فيه وفرشت لها فراشها هناك عشان تعيش الجو )

رجعت بعدين عند النونو لأن نومه خفيف يصحى مع أي صوت
فطبيعي يصحى معاهم كل صباح


مرت ساعه بالزبط ودقت عليا الشغاله
طلبتها عشان حيجوني الجيران بكرة
قلت اخلص شغل اليوم وبكره اشبع نوم واستقبلهم بروقان
والنونو مو رااااضي ينااام
المشكلة دحين عالساعه 11 حيجيه النوم وتصحى اخته تستلم المناوبه
وبعد ما اخلص منها ترجع الثانيه من المدرسه وانا لسى ما سويت الغداء

No break !

مسويه ريجيم من راسي هذي الايام
افطر بعد الظهر
واتعشى اخر الليل
ومافي ولا وجبات ثانيه
مع رياضه 3 مرات بالاسبوع
ان شاء الله يزبط وما يسببلي ارهاق


أستأذنكم ..
بلف على كم قسم بالمنتدى أشوف أخباركم