عرض مشاركة واحدة
قديم 06-01-21, 02:40 AM   #9
متأمل

الصورة الرمزية متأمل

آخر زيارة »  02-13-24 (08:16 AM)

 الأوسمة و جوائز

افتراضي



ً
ً

بداية تطمني لان الاعراض اللي ذكرتيها
بسيطة وسهلة وتقريباً موجودة عند الكثير

علاجك نفسي فيما ارى لانك تعانين
من عقدة نقص وتظنين الجميع
افضل منك واحلى منك واقوى منك

ممكن تعرضتي لصدمات نفسية وانتي صغيرة
او كنتي تشاهدين افلام رعب او مقاطع مخيفة

اعراضك شكلية مو عضوية وهذا شيء مطمئن

مشكلتك تحتقرين شكلك ومو راضية عن نفسك
وعندك جلد لذاتك قوي لدرجة صرتي حساسة
وتتحسسين جداً من اي شيء

تحسين الناس يشوفونك اقل منهم
ويشوفونك مريضة نفسياً
والكل يتهرب منك وصرتي منعزلة عنهم
وحتى المناسبات ما تحضرين لها وتكرهينها
واكثر وقتك لحالك واذا جلستي مع اهلك
تتنرفزين من اي كلمة وتتحسسين
وتزعلين بسرعة وتشكين بكل كلمة
ولو حتى ما كانت تعنيك
وباي حركة تشكين وتفسرينها بانها تعنيك
حتى لو سكتوا تشكين بسكوتهم

واصبحتي توسوسين لدرجة التخيل
تشوفين خيالات وتسترسلين معها
ونومك كوابيس مزعجة وغير منظم
يعني يقضتك اكثر من نومك

شهية الاكل عندك قليلة
واذا شفتي اهلك مستانسين
تنعكس عندك الاوضاع
وتنقلب نفسيتك هم وغم وحزن
تطالعين بكثرة لقصص الحزن والموت
واذا سمعتي بان فيه احد مات
تتخيلي بانك اللي بعده
او احد صار عنده مصيبة
تربطينها باوهامك وتعتقدين
بان راح تجيك نفس المصيبة
ويمكن تصل فيك الوسوسة
الى الوضوء والصلاة
بحيث تعيدين الوضوء اكثر من مره
واذا دخلتي دورة المياة - تكرمين والقراء -
تطولين فيها من غير سبب

ً

طبعاً اللي قلت مجرد توقع
ومو بالضرورة يكون مطابق
للواقع اللي تعيشين ..

عموماً تحتاجين الى فصل الخيال عن الواقع
والتفريق بين الحقيقة والوهم والتوهم
وتحتاجين تبتعدي عن التفكير الداخلي مع نفسك
يعني لازم تطنشين اي فكرة سيئة او غير واقعية
مو كل فكرة تجي براسك تسترسلين معاها
طنشيها وتناسيها وانشغلي عنها باي شيء

حساسيتك تجي من عقدة النقص
اللي تحسين فيها ونظرتك الدونية لنفسك

ً
لابد تدربين على الكلمات الحيوية
والتفاؤلية والمشجعة والمطئنة

كلمي نفسك بصوت عالي
وقولي انا انسانة قوية ردديها دائم
وقولي انا انسانة سوية وطبيعية واجتماعية
وما ينقصني شي وكل اللي احسه بس اوهام
وكلها من الشيطان لانه ما يبغى لي الخير

وقفي امام المرآية وناظري لشكلك وانتي مبتسمة
وتكلمي بصوت مسموع وقولي انا حلوة وجذابة
وملامحي سحرية وكلي على بعضي اجنن

خليك شجاعة وواجهي افكارك
وواجهي شكلك وواجهي حساسيتك وخوفك

ازرعي في نفسك الثقة بان مافي شي ينقصك
وكل الناس فيهم عيوب اكثر منك بس ثقتهم تغطيها

اسالي نفسك ليش انا حساسة ؟
ليش انا عصبية ؟
ليش انا اتوهم اشياء غير صحيحة ؟

وجاوبي نفسك بنفسك ..
لا تتركين الصوت الداخلي يجاوب عنك
" الصوت الداخلي هو حديث النفس"
جاوبي انتي بصوت مسموع
وطبعاً تكوني لوحدك
عشان ما احد يقول انهبلت
لانهم ما يدرون بانك قاعده
تبنين شخصيتك وتتدربين
لذلك خليك لوحدك وخذي راحتك

قولي انا حساسة لاني انسانة
من لحم ودم ولي مشاعر واحساس
فطبيعي اكون حساسة مو متبلدة
او جماد او ما احس
بس يمكن عندي شوية تحسس
وهذا حله بسيط :
باني ما اركز على اي كلمة
ولا افسر اي موقف واطنش

وانا نعم عصبية وعصبيتي
تجي من اشياء ما تعجبني
وغير منطقية ولا تناسبني ولا تروق لي
وهذا طبيعي بس لازم اخفف عصبيتي
واهدي نفسي وافلها وافرفش
واي شي ما يعجبني عادي اطنش
او مو لازم اعصب عليه
المهم عندي نفسيتي اريحها واسعدها

قولي ممكن اتوهم اشياء غير حقيقية
واوسوس وهذا سببه جلوسي لوحدي
والاسترسال مع الخيالات والهواجيس
والاستماع لحديث النفس والشيطان
او يمكن من كلام الاقارب وغيرهم
ونقدهم لي وتركيزي على كل كلامهم

وهذي حلها بعدم الجلوس
مع نفسي كثير وان جلست
انشغل باي شي بس يكون شي مفيد
يعني اسمع مقطع تلاوة لشيخ صوته جميل
بس ابتعد عن مقاطع ذكر الموت والنار والعذاب
او اشوف مقطع مسلي مضحك او طبيعي جميل
او مقطع جاد يتكلم عن التفاؤل وعن السعادة
وعن بناء الشخصية وكيف نزرع الثقة بانفسنا
او اكتب او ارسم او اقرأ قصة جميلة او مفيدة
او اروح اطبخ او اكنس او ارتب .. المهم انشغل

ً

انتي لازم تزرعين في ذهنك
بانك افضل من غيرك واجمل واميز
وعندك من المواهب الكثير

لا تحتقرين نفسك وتضخمين غيرك ..
لا والف لا
انتي مافي شي ناقصك ابداً
الا نظرتك لنفسك

لا تربطين اللي حاصل عندك
بالماضي وبانك من صغرك وانتي كذا
وتسلمين نفسك للاوهام والوساوس

اذا فرحتي بشي خلي فرحك متوسط
لان المبالغة في الفرح
ممكن تنقلب الى نكد
واذا تكدرتي من شيء كذلك
خلي كدرك متوسط
لا تبالغين في التكدر وتتبعين عواطفك
اخلطي العقل بالعاطفة
في الحزن والفرح
خلي عندك قانون توقعات
بان مافي مستحيل وكل شي يتغير
وطبيعي بس المهم انظري للايجابيات
في كل امر حتى لو كان مؤلم او محزن
فحتى المحزن لك عليه اجر

وتذكري الحديث :

" مَا يُصِيبُ الْمُسْلِمَ مِنْ نَصَبٍ
وَلاَ وَصَبٍ وَلاَ هَمٍّ وَلاَ حَزَن
وَلاَ أَذًى وَلاَ غمٍّ، حتَّى الشَّوْكَةُ
يُشَاكُها إِلاَّ كفَّر اللَّه بهَا مِنْ خطَايَاه"

لذلك كل امرك خير واجر
مهما اعتقدتي غير ذلك

تفاءلي دائماً واذا قلتي كيف اتفاءل !
اقول لك تعلمي وتدربي على التفاؤل
يعني خلي ظنك بالله حسن
وبان كل امر فيه خير كثير


انتي طبيعية ومثل اي انسانة
ولك مشاعر واحساس وطبيعي تبكين
وطبيعي تزعلين وطبيعي يتعكر مزاجاك
وطبيعي تفرحين وطبيعي تجيك خيبات
وطبيعي تعصبين وطبيعي تشكين

اللي مو طبيعي
الافراط في اي حالة تجيك
والبقاء في محيطها والمبالغة فيها



نصيحتي لك :

حافظي على الصلوات الخمس في اوقاتها
حافظي على اذكار الصباح والمساء " ضروري"
حافظي على قراءة صفحة وحدة من القران يومياً

ابتعدي عن اي شيء فيه كدر
ومزعج وعن اي شي فيه حزن

لا تجلسي مع نفسك كثير
ولا تستمعي للوسوسة
ولا تحللي كل شي
ولا تدققي وخليك مطنشة

واي شيء تحسين فيه كدر
او كلمه حسيتي فيها نقد
او استهزاء او انتقاص
لا تسمعيها وتناسيها

ابتعدي عن الاشخاص
المثبطين والمتشائمين
والمنتقدين اهل النفسيات المعقدة
واحتكي بصديقة تساعدك وتعينك

تابعي مقاطع التدبر القرانية
ومقاطع زيادة الايمان
والمقاطع اللي ترفع معنوياتك

لا تقارني نفسك بأحد ..
اكرر ابتعدي عن المقارنات

كل انسان وله خصوصيته
وظروفه ووضعه وطبعه
فلا تقارني نفسك بأحد ابداً ..

ركزي !!!
لا تقارني نفسك بأحد
لان كل واحد مختلف عن الاخر



ابتسمي اذا هاجمك الصمت
والوساوس لانها مرتبطة مع بعض
اقصد اذا سكتي جتك الوسوسة
ولا تقولي ليش ابتسم !
انتي بس ابتسمي على طول
بمجرد يجيك الهوجاس
وطبعا راح يجيك صوت
من داخلك يقول ليش تبتسمين !
ردي وقلي كذا مزاج وما لك علاقة فيني
انا مبسوطة ومرتاحة .. واقطعي الارسال عنه
اقصد لا تسترسلي مع الصوت الداخلي نهائياً


عليك بالدعاء
ثم الدعاء
ثم الدعاء
في كل سجدة وبكل وقت
قولي يارب يارب يارب
وانتي موقنة وواثقه بالله
تعلقي بالله وابكي بين يديه
وقولي يارب مالي غيرك
يارب انت الوحيد المنقذ
عليك توكلت وفوضت امري اليك


اخيراً ..

هذا اللي اقدر اقوله لك الان وهناك الكثير
ولكن باذن الله تأخذي كل الردود بجدية
وتطبقين اللي تقدرين عليه مستعينة بالله

ويبقى تشوفي نفسك ولا تعيشي على الاحزان
والدموع والعواطف لان ما راح تستفيدي الا التعب



اسال الله ان يشفيك
ويسعدك ويعينك



ِ