لا يروح تفكيركم بعيد
الله يستر هههه


اقول /

ليلة خميس وجالسن فوق كورنيش
صوت الهوى مزمار والموج مرواس

أشرب من بحور الشعر والسهر عيش
والدمع حبر أزرق على خد قرطاس

البال ضايق والخواطر مطاريش
سارح بفكري بين سجة وهوجاس

أسبح بحورن ما سبحوها الطواوييش
القلب فبحور الهواجيس غطّاس

أمسك زمام الفضفضة بالمناقيش
وأستعذب الآهات وآقول لا بأس

ليا انهمر غيم المزون المراهيش
يشرب زلال أمطارها حضن كرّاس

وفي لحظتن هدّت جميع التشاويش
سِمَعتْ صوتن يشبه لصوت الأجراس

لدّيت أفتّش حولي الدرب تفتيش
والعين ثارت كنّ فالجفن مقباس

شفت الغزال الفارع أخت الشوابيش
العيطموس أنثى القمر بنت الألماس

تسحب خطاويها على السّيف بشويش
لا واااعذاب اللي لمحها من الناس

مرصّعة بأغلى الحُلِي والدناديش
ممشوقة الأرداف والقدّ ميّاس

وقْفَتْ على حدّي تجرّ اللواليش
الله وأكبر كنّ بعيونها أمواس

من شفتها حسّيت بالفكر تشويش
وتزاحمت في صدري آهات وأنفاس

قلبي فصل نبضه مثل فصلة الفيش
ومن ضيعتي قمت أضرب أخماس بأسداس

تنبش جروح القلب ياخوك تنبيش
كنها تصبّ الموت من فوّهة كأس

ضحكاتها للقلب همسة وبخشيش
يطيب منها من شكى الضيم والبأس

عيون سوداء ناعسة والهدب جيش
وجفون كسلانة وحجّانها أقواس

درّة حلا دانة سحر فتنة وطيش
الزين كاسيها من الرأس للساس

لعطورها مفعول صاروخ تحشيش
والملح والسكّر بها صعب ينقاس

مانيش راهي جسمها العذب مانيش
إلا من إيديها ومن ناعم لباس

كاشت على زين الغنادير تكويش
في حسنها وفي وصفها مالها أجناس

حتّيش لو صديت بالعين حتّيش
وشلون أصدّ بقلب ضايع وحسّاس

قالت تعال نطيش ونطيش ونطيش
ونعلّم العشاق وش معنى الإحساس

ونعيش عشاق ومجانين ونعيش
أجمل فصول الحب شاعر وريماس

ونُروي العروق الذابلات المعاطيش
إلى متى وعروقنا صُفر يبّاس

وقًفْتْ صامت مندهش شبه درويش
بنك المشاعر للأسف حاشه إفلاس

بنج العقل مخنوق في قبضة الشيش
ما عاد هي لحية رجولة ونوماس

قالت سكوتك قول لي يا حلو ليش
صمتك ترى طوّل وأنا في رجاء ناس

بين الذهول ولحظة الصمت قلت أيش
قالت عسى ما شر وشفيك محتاس

احذر ترى الطاووس ما يفيده الريش
فرصة وجاتك من ذهب ماهي نحاس

قلت اسمعي صمتي مهو زود تطنيش
حالي غصن يابس ونظراتك الفأس

قالت ظلام الليل تصحى الخفافيش
ولولا الفعل والذكر ما عاش جسّاس

قلت العفو ربعي رجالن مداغيش
ونال القصيّري المجد بالدرع والطاس

قالت على أصل وفصل رأسك يشيش
وقدم الجمال اليوسفي ميّت إحساس

قلت أرحبي يا أم الثمان المباهيش
يا سارقة قلبي على غير مقياس

لبّيش يا سيد الغنادير لبّيش
يا درّ يا ياقوت يا لُول يا ماس

تكفين ضمّيني على الصدر بشويش
من ضمّتك تجلى عن الصدر الأتعاس

وحوشي على كل المعاليق تحويش
يالعيطموس أنثى القمر بنت الألماس

ولك الحنايا كل أبوهن مفاريش
تمخطري فيهن من الساس للساس

أجمل صُدَف عمري على شط كورنيش
الله يعيدك كل ما هبّ نسناس

ليل الهوى ذعذع على ساحل الطّيش
وتعانقت صدق المشاعر والإحساس

طابت لنا السمرة مع آبو عكاريش
وكأس الهوى ذقناه كأسن ورى كأس

آخر كل امن قالته مقدر آعيش
إلا معك يا شاعري عذب الأنفاس

قالت حبيبي موعد فراقنا ليش
في صدرها عبرة وفي عينها إنعاس

طالبك لا تسافر وتتركني آطيش
والهمّ يحضنّي معا كل وسواس

وادعتها على ضجيج المغابيش
على وعد بزيارة أخرى ومجلاس

من شاف حالي بعدها قال ما يعيش
جثة أمل صلّى على قبرها اليأس


|| سراب الشعر ||