المساعد الشخصي الرقمي

مشاهدة النسخة كاملة : المحال


letk t7s
09-19-19, 03:54 PM
جاني واحد قال : بسأل كم سؤال
وقبل يسأل قلت : أنا ماني خبير !
قال: جاوب بس , يا ولد الحلال
وكل كلمه حطها .. فبيت صغير
قال نبدي : شنهو تعريف المحال..؟
قلت :
خل الكلمه
ف الشطر الأخير ..!

القهر : إن شفت دمعات الرجال
والوطن : ( إنسان ) .. متغير كثير
والطفل : لعبه على شاطي الرمال
والأمل : إحساس في عين الضرير
الوفا : قلبين .. يجمعهم حلال
والرجل : اللي على أهله يغير
والرجا : لا قلت : للواطي تعال
والفشل : مدري .. ولكنه مرير
الشعر : في وقتنا .. بدر وطلال
وكان أول : حيل يعجبني جرير ..!

والغلا : إحساس إلى حد الخيال
والعشق : لا شفت معشوقك تطير
والجفا : إعكس مفاهيم / الوصال
والوصل : يعني تأكد فيك خير
والعقل : تسفه أقاويل الجهال
والجهل : إن قلت عن نفسك كبير
والخطر : لا صار ما عندك مجال
والبلا : إن صرت معدوم الضمير
والعجب : لا صرت تسأل منهو قال
والتعب : إن كنت تبحث عن مصير
الغنى : بالنفس ما هو راس مال
والفقر : من كان .. بأعماله فقير

يكفي يكفي .. أسئله إنهي الجدال
ويالله علمني عن .. السر الخطير
ما أبي تضرب لي في غيرك مثال
قول : عنك وإعتبر سرك في بير

جات طعنه من جنوبك والشمال
يعني وضعك بين من حولك خطير

صاحبي وإن ضاقت بعينك ليال
لك فرشت القلب مفروش الحرير

في بلاد الحلم .. ممنوع العقال
والمصيبه الشعب ما أختار الأمير

وما ألومك .. كان شديت الرحال
دام بيتك جرح / وفراشك حصير

هذا تعريفي إلى كلمة : محال
شي ودك فيه ولا يمكن يصير ..!

أعد النجوم
09-19-19, 10:07 PM
جميل جدا

يعطيك العافية

التاج
09-19-19, 10:12 PM
رائع اعجبتني

letk t7s
09-20-19, 03:47 PM
اشكر لكم مروركم ي حلوين .

شاعر رومانسي
03-25-21, 12:48 PM
كل الشكر لكـِ ولهذا
الطرح الرائع الجميل
الله يعطيكـِ العافيه يارب
خالص مودتى


SEO by vBSEO 3.6.1