وان زعلنا من بعضنا مايخالف ..

[طاغي النظرة]

صباح الخير

حي الله كلن بأسمه

سجلت اليوم بالمدونات من اني ماني من عشاقها

لكن من كثر مايجول بخاطري من كلام حبيت اسطره هنا
سالفه اكتب موضوع والهدف مايسوى وتحرج الاعضاء بالرد
وبعضهم مايقراه لكن يستحي يمر ومايرد علوم قبايل تعرفون
واحيان نصير شغل طباين او شغل ضرات بالشامي
ترد علي ارد عليك ماترد علي ما ارد عليك :)
لكن الحق يقال الموضوع الهادف يجبرك على الرد بدون الالتفات للاسم >>> ماعلينا

المدونه ككتاب المذكرات نكتب فيه مانشاء لارقيب ولا حسيب الا ما يرضي الله ..

وبما اني شخص قريب للغموض
واحب الصالحين ولست منهم .
وااحب الشعار ولست بشاعر
واحب العشاق وتلميحاتهم وللأسف راسب بالحب
واحب الاجتماعات واكره العزله
واشجع على لم العائله
الا اني احيان يجيني حب العزله واسلي نفسي بالكتابه فحبيت اسجله هنا

ونرجع للمدونه ...

هي الاحتفاظ بأشيائي التى يستهويني الرجوع لها


وتسجيل زبده الخلاصه التي لاتستحمل أكتب موضوع عنها

وبس ...

وعلى بركة الله

[طاغي النظرة]

..

صباح الخير ..
شكرا لمن دعموني بالايك وعلقو على افتتاح المدونه ..
تبون الصراحه ..
كنت احسب اني في خلوه وان محد مهتم
وقلت بشطح بالمدونه واكتب ماطرالي
لكن من شفت فيه ناس بتقرا ما اكتب ..استحيت وجاني شعور ان خلفك مراقب خفي
وطرت لي فكره اني بلبس بشت واتعطر واصفصف الكلمات —
ياخي / شعور المراقبه يخوف :)

[طاغي النظرة]

https://i.imgur.com/7OeyT5f.jpg













































هذه دله ..
كيف العرب ..
واول مايقدم للضيف ..
نشربها صباحا مساء
في افراحنا وعزائنا ..
مابقي من عاداتنا الا هي ..

هل ياترى ستصمد لاخر الدهر
ام التغريب سيسحقها ويحل ستاربكس محلها ..


ولكن أجزم انها ستكون من التراث في الايام القادمه

متى نفخر بعاداتنا امام العالم
والى متى ننفصخ من ارثنا وشرفنا وعاداتنا

اسأله وأساله ولكن الجواب كالعاده تطور وحضاره
ولكن الامر مصداقاً لقول

رسولنا الكريم صلى الله عليه وسلم :
(لتتبعن سنن من قبلكم شبرا بشبر،وذراعا بذراع حتي لو دخلو جحر ضب لأتبعتموهم
قلنا يا رسول اليهود والنصاري قال فمن ؟)

فلسفه دله ...
تذكرت حاجه
الدله صنع باكستان
والبن مستورد من الحبشه
والهيل من الهند
والزعفران ايراني
والفناجيل صيني

الحطب عربي ..
[]

[طاغي النظرة]

..
اصنع بيومك أثر جميل .
صدقه ولو بالشيء القليل على طفل من اطفالكم
هديه بسيطه ..
لو تعمل قهوه لاختك او لأخوك
اقلها / ابتسامه

قَالَ صَلَّى اللهُ عَلَيْهِ وَ آلِهِ وَ صَحْبِهِ وَسَلَّمَ :
‏{ لا تَحْقِرَنَّ مِنَ الْمَعْرُوفِ شَيْئًا ،
‏وَلَوْ أَنْ تَلْقَى أَخَاكَ بِوَجْهٍ طَلْقٍ }.

[طاغي النظرة]

•

بيت شعر مروبع ( اي اربع عمدان )
خمس عشر ناقه
مائه وعشرين غنم وماعز ..
وايت ماء
هايلكس موديل 85
الاب مصلح
الام غزوى
البنت الاكبر جواهر
البنت الاصغر منها منيره
الولد عايد
الولد الاوسط ملفي
الولد اخر العنقود المدلل تركي
عائله بدويه بالثمانينات الهجريه تعيش بالبر
عايد يسرح بالابل للمفلا واماكن الرعي
جواهر تسرح بالغنم قريب من البيت
منيره وملفي ماسكين البهم ( صغار الغنم )
تركي المدلل صغير ومايبعد عن البيت مشاويره بين الاب بالرفه نصف البيت المخصص للرجال
وبين امه بالنصف الاخر من البيت ..
حياه بساطه وهذه يومياته كل يوم
اب جالس عند النار على قهوته ان جاه ضيف كان باستقباله وان لم يكن يكون جنب البيوت
ام تشتغل بترويب اللبن وخض الصميل واصلاح الدهن والزبده والاقط
وترتيب كل مايلزم للبيت
وقت الظهر يطلع الاب معه وجبه الغدا يذهب بها لراعي الابل وراعيات الغنم
وقت العصر مجيء الرعيان عايد ومنيره وجواهر
محرد اقترابهم من البيت يطلع الاب والام فالاب يتفقد الحلال هل هو شبعان او لا
الام تستقبلهم ويبدا شغل حلب الحليب وارضاع صغار البهم وتعزيل الغنم الحلابات
وهكذا حتى يصلون المغرب
تبدا فقره الراحه والترفيه
شبه النار
اجتماع الاسره
شرب القهوه والحليب
تبادل الحديث والقصص وهم في افضل سعاده
وقت الصلاه العشاء يصلون يتعشون ثم ينامون
لاهم الا متى ينزل المطر
ولا قلق ولا ارق ولاهم يحزنون ..
فقره الترفيه تكون اذا اتى لهم احد قرايبهم مع عائلته زوار
هنا تسعد العائله وكأنه يوم عيد
فالاولاد مع الاولاد
والام مع الام
والاب مع الاب
والبنات مع البنات
من الفرحه بالزوار يكون بالعاده عندهم مسجل للشرطان الغنائيه
يجلس البنات في منحى عن عائلتهم ومع فقره الرقص وبالعاده فنانهم المشهور
بدر الغريب او بطي البذالي
وحياه سعيده ونيسه رغم قساوه الظروف
لايعرفو من السياسه الا (الله يعز الحكومة )
ولايعرفو موضه المطاعم الا عند ابو فلان عشاء
ولايعرفون جوالات ماعدا مسجل ابو حجر

هذا حالنا اغلب سكان الخليج
حياه بمعنى الحياه حبيتها وتمنيت اعيشها ....

[طاغي النظرة]

٠

انتِ عيونك على العشاق سلطه من سما

[طاغي النظرة]

..
انخجل واحيان ما ابين غلاك
البدو رغم الشجاعه يستحون

[طاغي النظرة]

nullبعد 7 ايام
من البحث والتحري والتقصي واتباع الاثر والسؤال
عثرنا على (الحرشا ) ناقتنا الغاليه ..

https://i.imgur.com/j8XhOvR.jpg



























ومعها حوار قعود .. مع ان البدوي يحب ان تلد زوجته ولد
وإن تلد ناقته بكره ( بنت ) مضادات بتفكيرنا
الابل بالعاده اذا جاها المخاض تهرب عن راعيها وعن صاحباتها حتى تلد بعيد عن الناس والابل هربا بمولودها

فبعد ان نفقدها تبدا عمليه البحث
وتسمى ( ذاهبه )
من شاف الذاهبه الوضحى او الملحا او الصفرا عليها وسم كذا وكذا ...الخ

https://i.imgur.com/yIIVA5R.jpg
























فالعرب تغنو كثيرا بالذاهبه ...
فهذا الشاعر العلم صحن بن قويعان المطيري يقول

ياهل ام قليب وقلبي الغادي
‏ذاهبتنا عندكم ماذكرتوها
‏-
‏ماذكرتو ذاهبتنا يالاجوادي
‏يوم روح سرحكم ماعقلتوها

الاسم ذاهبه والمعنى في بطن الشاعر

وكذا شاعر الاندلس ناصر القحطاني
معنون قصيدته المشهوره اللي غناها خالد عبدالرحمن ( بالذاهبه )

فالذاهبه مربوطه بالبدوي اغلب الوقت ...

خلال المسير مع ذاهبتنا توقفت دقائق حتى اجمع اعواد شجره الشيح لوضعها بالشاي
من افضل النكهات المضافه للشاي
فعندي انا افضله اكثر من البابونج
https://i.imgur.com/fSSasV7.jpg

https://i.imgur.com/VPxbQ5m.jpg

[طاغي النظرة]

.
لصلاه الفجر رغم قساوه الاجواء
اانشراح صدر
وسعه بال
وحب الحياه
ونسايم من نسايم الجنه
لايعلم قدرها نايم ومتكاسل

[طاغي النظرة]

على جال الغدير
وضحى
ونوف ( بنت الشيخ

يعبن قربهن من الماء
جاء لهن ولد عم نوف قرناس
السلام عليكن يابنات ..
نوف :وعليك السلام وش تريد
قرناس : اريد اسقي فرسي من الما واعبي الجود
نوف : انت منت جاي تورد الفرس انت جاي لشيء ثاني
قرناس : الله يسامحك يابنت عمي والله ماجيت ادور الشينه
نوف : بلى جاي تشوف البنيات ان مارحت والله لاعلم ابوي الشيخ واخليه يربيك
قرناس : خلاص يابنت عمي بروح اذا وجودي يضايقكم اجي وقت ثاني الله يسامحك تظنين بي
وضحى : علامك يانوف على قرناس ماقال شي خطا
نوف : خليه عنك ياوضحى اعرف حركاته ناس ماتجي الا بالعين الحمرا

لحظات الا ورجل غريب جاي للغدير
الغريب : سلام عليكن يالزينات
نوف : وعليك السلام ياهلا بالغريب
الغريب : بغيت شربه ماء
نوف : دونك الما ياهلابك وتمد له القربه ليشرب منها
الغريب : عاشت يمينك يالنشميه ( فنظره فأبتسامه فمحبه ..
نوف : يسلم عمرك انا بنت شيخ القبيله دونك بيت ابوي كد عليه وانت ضيفنا ياحياك الله

الغريب : يحي نباك مستعجل ولي رجعه ثانيه ان الله اعطاني عمر
نوف : ياحياك الله بكل وقت وقلبها ينبض عشقا

ذهب الغريب
وضحى : وش سر هالابتسامه والحفاوه بالغريب يانوف
نوف : هذا ضيف القبيله ولازم نكرة مع شوي سرحان
وضحى : ماكان هذا الاستقبال في قرناس ولد عمك

نوف لاتغثيني بذكرك اسمه ياوضحى وش جاب لاجاب !!!

ليه يانوف كذا !!!

حال المسلسلات الاردنيه
عاد اذا صار الغريب روحي الصفدي حتى حنا يالمتابعين ناقف بصفه وصف نوف !!!

بس مع احترامي للمسلسلات البدويه دائما ابن العم مظلوم فيها ...

[طاغي النظرة]

مذهب اي والله والمذهب غالي ونادر
من اربع سنين والروحه هي الروحه
علمي بها فوق جسر البحرين تتغادر
تبي المنامه زياره قبل تنكس الدوحه

[طاغي النظرة]

..

يسعد صباحكم ضيوفنا ..

بما اني صحراوي قح ..
واغلب يومياتي بر ومطارد نياق .
الا اني احب الزراعه والتشجير والورود ..
وشتل الاشجار البريه ..
عندي مكان حولته الا تشكيله من الاشجار بريه وعاديه ..

لاتنصدم اذا حصلت وره الجوري محتضنه الشيح

ولاتتعجب اذا صادفتك شجره ارطى متشابكه مع ورده اللوتس
هذا غير ورده القلف والمجنونه والمتسلقه وصباح الخير ( ترى هذا اسم نبته مزهره ماهو سلام )

بس تدرون وش نفسي فيه وحاولت اشتريها هي شتله ( الجاكرندا )
هذه اعجوبه بس خساره قليل وجودها بالمشاتل ..

يالله باخذ لكم لفه على نجاح بعض تشجيراتي ..

https://i.imgur.com/FLibooN.jpg
























https://i.imgur.com/RH83ISH.jpg
























https://i.imgur.com/PjbagS1.jpg

























https://i.imgur.com/GNsh63v.jpg






















https://i.imgur.com/If01jxN.jpg






















لكن تبون الصراحه ..
الخزامى تغرد لحالها خارج السرب

مجنون فيها وبريحتها وبمنظرها ..
لو ماهي موسميه كان كسيت المزرعه والبيت والحديقه كلها خزامى
ياحبي لها ..

https://i.imgur.com/bvn2t83.jpg


































ملاحظه (( ترى مو رومنسيه السالفه :)

لكن احب من كل مجال اخذ خبره ؛)

عاد من يفكني من جوليت ..
انه انت من ابحث عنه :(

[طاغي النظرة]

..


مره
روميو اهدى لجوليت ورده قطفها من الشارع وهو ماشي

ما خلت احد ماعلمته بالهديه ما امرحت بنت الحلال الا اهل الحي دارين بسالفه الهديه


وعمشى مهديها محماس ناقه تسوى 70 الف
وماعلمت احد حتى امها ..

تخاف من العين ام صنهات

مع العلم ابو ورده هذا الكل يبيه ..
وابو صنهات له الله

[طاغي النظرة]

...


((اقلطو للغدا ))

كان اهلنا اذا انتهو من صلاه الفريضه وعنده مناسبه
يقول لجماعه المسجد اقلطو للغدا ..!
لا اتصال ولا واتس اب
خلاص الخبر وصل الحاضر ويمسع به الغايب فكان المجلس يكض ويزدحم بالناس ..

اليوم تعزمه بالواتس والاتصال والسناب وتوصي عليه ومايجي ..
مابقى الا تطق عليه غرفه النوم !!!!

عاد اليوم عندنا غدا وبنخليه بالبر ...
وانتم مدعوين وبعطيكم الوصف ..

افرق من الزفلت عند لوحه 80
وامش تسعه كيلو تجيكم طلحه مكسوره خلها يمينك
واطلع مشرق مشرق لين تشوف رجم عواد قدامك
اكسر يسار وانص روضه مريزيقه واذا شفتها قدامك مابقى الا تطب فيها عاين للحدور وتشوفنا يسارك .
عندنا وايت وغرفه وبيت شعر وذودنا مغاتير ... عساك فهمت الوصف ..


عاد فرضنا صارت العزيمه للجنسين :
واستجاب الاعضا للعزيمه ... ماهي مشكله الشباب نقدر ناقف على الطريق وناخذ ونودي للموقع

والله واستعزمت العضوات بعد !!!
يللله نشوف كيف الوضع ...
ارسلت قيثاره بالخاص ترانا جايين بالطريق
انا وتاتيا وعطاء ومعنا احلام !!!
اخذناهم على طول للغرفه المجهزه للعزيمه ..
طبعا مافي اختلاط
الغرفه للبنات
وبيت الشعر للرجال
شوي الا الدكتوره ساريه من قطر ترسل وينكم وينكم ترى ماني ببعيده :)

والجودي ورماد احساس
وخفوق الروح واقفين بالمحطه يعبون بنزين ..

وسمو المجد والشله كلهن وقفو يتصلون..
ويالله سيطرنا على الوضع ووصلناهن للموقع ...

طبعا أمي الله يحفظها في حاله ذهول ..
من يوم قلت قيثاره وتاتيا وهي ماتدري وش هالاسماء
طبعا يوم قلت معهن الدكتوره قالت عسى محد مريض !!!!

طبعا ماقصرت امي قدمت لهن واجب الضيافه ..

لكن شلون تقنع عطاء انه تاكل المضير ( الاقط

وكيف اقنعت قيثاره ان تاكل الشعثا ( تمره مخلوطه بسمن بري واقط

وشلون خلت احلام تشرب حليب الابل

والا عاد الدكتوره شلون تحبب لها رشف رغوه حليب الابل( الرغاه )
وسمو المجد من يقنعها برشف مرقه الطلي وشرب شاي الشيح
اما عاد الجود ورماد احساس وخفوق تقول امي انه جازت لهن اكل الخواضه ( دخن مطحون ومخلوط بسمن )
هذه مقدمات دائما تقدم مع القهوه

الزبده انتهت ضيافه القهوه وقدمت صحون الغدا
خروفين على الصحون ووحواليهن طاسات حليب ابل طازج !!!

مافي ملاعق ولافيه صحون صغيره
مافيه الاضرب بالخمس انت وشطارتك يا تاكل ياتجوع :::

حبيت هالعزيمه ههههه

صباحكم رضا

[طاغي النظرة]

...
صراحه ماتوقعت هالصدا بالتقييمات..
توقعتها خربشه وتمر بسلام ...

لكن قسم انكم محزم مليان ..

بيض الله وجيهكم يالنشاما

ولاهنتن يالرباايع >>>> ( بنات )



شكرا من القلب ..

[طاغي النظرة]

..

اذا اردت عمل مشروع تجاري فما عليك الا ان تضخ عليه الاعلام
بالاعلانات والقنوات والفنسشتات والمشاهير
فيصبح على كل منبر وبمتناول كل شخص ويالله الربح ..

واذا كتبت لك خاطره او قصه او موضوع
فما عليك الا ان تنتظر ..
فاذا علق عليه الشطرنج فانت بالطريق المستقيم

واذا علق عليه عاشق الحريه فانت في مرحله تطور اكثر

اما اذا فصلته الدكتوره ونشرته واضافت عليه ونقلته لمدونتها
فمبروك لك الشهره وتسليط الضوء

الدكتوره كقناه الجزيره ( التعليق منها صفقه اعلاميه


الكل لهم بصمه وتعجبني لكن هالثلاثي لهم قراءات داخل النصوص

[طاغي النظرة]

واكرم الناس مابين الورى رجل
‏تقضى على يده للناس حاجات

نعم الرجل من اختصه الله بهذه الميزه ( قضاء حاجات الناس )

ليس المال وحده يقضي الحاجه
احيان اتصال تليفون منك يقضي حاجه
توقيع منك يقضي حاجه
واسطه منك تقضي حاجه

فلا تبخل بوجاهتك وقدرك امام محتاج طلبك لأمر ما

[طاغي النظرة]

!

والله أني كل ماشفت بالعتمه قمر
اتخيل وجهك الزين لامنه ضــحك

[طاغي النظرة]

تقول : أحبك موت ياميت النار
افهم قسم بالله غثيت كبـــــدي
قلبي يبي منك سواليف واشعار
وقلبك يخاف إن المغاتير تغدي

ميت النار / شتيمه بطريقه مهذبه
هي قالت :)

[طاغي النظرة]

..
سبحان من خلق وفرق ..

البعض اعطاه الله موهبه الشعر
والبعض اعطاه الله موهبه النقد
والبعض اعطاه الله موهبه الروايات
والبعض اعطاه الله الحس الفكاهي
مجرد يكتب حرف غصب تضحك له
تمنيت هالصفه لما لها محبه من الناس وشخصيه مقبوله من الجميع
قليل من يتقنها لكنها من اجمل الصفات ..
شكرا لمن يملك الفكاهه واسعدنا بها ..

[طاغي النظرة]

ليه !!
ليه تفكيري خلاهم عائله ..

https://i.imgur.com/APODzbm.jpg

[طاغي النظرة]

تمخطري كل ماهب النسيم ..
ماكنك الا عرف العاديات الجوامح ..


https://i.imgur.com/EVK5Wul.jpg

[طاغي النظرة]

...
ليه كل ماجــــيت لفراشي بنــــــــٰـــام
جاتني كل الطــــــواري سوا متراكمه
اتذكر ضحكه ابوي في وسط الزحام
واتذكر كم خذا الـــــــموت روحٍ غانمه
والهنوف اللي خذت قلب المولع سلام
من ثمان سنين غابت والمشاعر هايمه

[طاغي النظرة]

الدكتوره / اعجوبه مسك
سبحان من جعل لها القبول في قلوب من عرفعها ...

وسبحان من جعلها تعطي ولاتاخذ ..

لاتريد شهره ولاتريد ثمن ولاتريدك اعجاب .
اذا اعجبها نص لاحد الاعضاء ..
اخذته لمدونتها وبدت بتحليله وتفصيله واضافه لمساتها عليه
لاتريد شي !!!
ولكنها اشباع لرغبتها في النقد ..

لكنها تحب وانا واثق لاخوانها ماتحب لنفسها ..

تمنيت اني شاعر صدق حتى اسجل اعجابي بهذه النادره الفريده من نوعها

لي اكثر من عشر سنوات بالمنتديات وجميع السوشل ميديا ..

لكن مثل الدكتوره مامر علي ..

ان تمعنت بكتباتها وجدت ثقافه عاليه ..
ان تابعت اسلوبها تجد اسلوب شخص واعي ناقد فاهم لكل ماحوله

وان حاولت تحرج ثقافتها بالاسلوب البدوي تجدها فاقت صاحب الشأن ..

انا في حيره معها ..

هي دكتوره او فيلسوفه

هي بدويه او حضريه

هي بنت او مسنه

هي صراحه مشكل من الثقافه والادب والتاريخ والمروءه وكل ماهو نبيل ...

هي ماشاء الله وتبارك( اعجوبه مسك )

الله يعز قطر اللي انجبت مثل الدكتوره ..

اي صح وش ارتباط قطر بجده ..
ثاني حاله تمر علي ..
قطريه وصديقتها المفضله من جده ..!!!

[طاغي النظرة]

..
ماجيت ادور حــب وتشبيك وإعجاب
ولا جيت ناقصني حـــــنان وعواطف
جيت اكتب الصفحات بشعور واعتاب
واحط لي بين العــــــــوارف مــــواقف
وامزح مع النشــــمي وتلعات الارقاب
واليا زعلـــنا من بعــــــــض مايخالف

[طاغي النظرة]

زهير بن أبي سلمى ..
شاعر جاهلي وصاحب احد المعلقات (قصيده معلقه بجدار الكعبه قديماً

كانه يمدح شخص اسمه هرم بن سنان
وهرم هذا سيد من سادات الجاهليه
وصاحب الفضل في وقف حرب داعس والغبراء بين عبس وذبيان هو والحارث بن عوف
واعطى الديات للقتلى حتى قالو 10 الاف بعير ..

فزهير بن سلمى مدحهم واسرف في مدح هرم بن سنان

فنذر هرم ان مهما شعر فيني زهير او حتى سلم علي او صبحني الا اعطيته

فأنحرج الشاعر زهير ان سلم حصل على عطاء وان مر ولم يسلم كان فيه تجاهل لهرم

فهو لم يكن طماعا للعطا بل كان منصفا لأهل المروءه ..

فقادته الحيله اوالدهاء أن يسلم على الناس ويبلغ السلام هرم بن سنان ولكن بدون توجيه مباشر

فأتى ذات مره الى مجلس القوم وفيهم هرم بن سنان فقال :

أنعموا صباحاً غير هرم / وخيركم استثنيت

وحالي كحال زهير ...

فمساء الخير ال مسك غير الدكتوره /

[طاغي النظرة]

..

ياشبيه صويحبي / حسبي عليك


غبتي ومع الايام غابت طواريك ..
وجاني شبيهك بالحلا مسفهاني
يابنت شيخ العرب ماني بناسيك
لكنها ظروف وزمان ومــــــكاني

[طاغي النظرة]

..
حرب البسوس
بين ابناء العمومه بني ربيعه وائل وتغلب
اشعلت نارها امرأه وراح ضحيتها الاف من القتلى والقطيعه والظلم !!والضحيه رجال

مجنون ليلى ..قيس

شاعر وسيد في قومه عرضت له ليلى وعشقها مثل الناس
المسكين طار عقله وهي تزوجت عروه بن الورد . ويقولون جابت عيال وبنات !! الضحيه رفيقنا

نصر بن حجاج
يقال : انه شاب وسيم عايش بالمدينه ..
في اخر الليل عمر بن الخطاب يعس بين الاسواق ويسمع صوت امرأه تنشد شعرا

هل من سبيل الى خمر فأشربها / او من سبيل الى نصر بن حجاج

وبالصباح استدعى عمر ذالك الشاب
فوجده وسيم صاحب شعر فامر بحلق شعره وهو مايدري ماذا فعل من جريمه
فلما حلق شعره زادت وسامته اكثر
فنفاه عمر الا البصره للأ تفتن به النساء

ابتعدو عن عداوه النساء وممحبتهن ايضا ..

ان عشقتك جننتك
وان عادتك دمرتك ..

بس ماننكر ان حرب داحس والغبرا كان خلف صلحهم امرأه

بالخير. قريبات وبالشر اقرب ..
دمتم سالمين

[طاغي النظرة]

.

‏مـهما وصـلنا من تـطور حـضاري
‏ مافيه آجـمل من حـياه الـبداوه



https://i.imgur.com/EglFzWW.jpg

[طاغي النظرة]

هل سألت نفسك يوما ..

أانت مرغوب بين الناس
او منبوذ ..

فلا يغرك احيانا حب والديك لك او الثناء لك ..

فالوالدين فطرياً مادحين مادحين
وحابينك حابينك لو كنت فرعون ..

لكن
هل / نظرت لصداقاتك هل هي دامت لوقت طويل

هل / نظرت لأقربائك يسألون عنك وهل يزورونك ان تعبت
هل /ياقفون معك اذا اصابتك مصيبه ..

هل / انت محبوب عند زملائك بالعمل

هل / فيه احد بالدنيا يحب يفضفض لك يحدثك عن متاعبه وهمومه

طيب / هل لك حبيبه تبيع الدنيا لعيونك ..

طيب / هل اهل المسجد يفتقدونك اذا غبت يوم

طيب / هل في احد يتسلف منك اذا مسته ضائقه

طيب / هل انت مخلص للوطن وتبيع الناس لأجله ..

طيب / هل انت من يفعل المعروف بالبهائم وبكل كبد رطبه

طيب / هل انت ممن يحافظ على الاشجار ونظافه البيئه

يابن الناس اذا مافيك شي من هالخصال / كافينا شرك ..

حتى وانا اكتب كرهتك ...

[طاغي النظرة]

https://i.imgur.com/4IVaRCi.jpg

[طاغي النظرة]

..


قصتي مع منتدى القبيله ...
!

!

[طاغي النظرة]

بدايه ..

جأنا رابط اكتروني وموضح فيه انه منتدى القبيله ..

وجانا اتصالات من المدير نريد دعمكم للنهوض بهذا الموقع لنضع لنا اسم على ال**** العنكبوتيه
لاظهار كل مايخص القبيله..
طبعا انا اصغر العائله ومحد مهتم بالانترنت الا انا
دخلت الموقع ..
كأننا داخلين حفل زواج او حفل تخرج
مجرد ماتسجل دخولك بالموقع

المدير يجيك يرحب ويهلي
والمشرفين ثنين طايرين فيك
والمراقب منزل فيك ترحيب
مابقى الا يجيبون لك مبخره عود !!!

اي ماقلت لكم
ترى بعض المراقبين مايعرف للمنتدى
لكن حطوه مراقب عشانه رجال محسوب ومن كبار عايلتهم
يعني المحسوبيه موجوده !!
لكن وش يسوي المدير لازم كذا حتى يكبر المنتدى وتكثر الدعوات

شوي شوي كبر الموقع زاد الاعضاء كثرت المواضيع ..

صار له صدى طيب وكل شاعر نزل له قصيده بالموقع ومفتخرين به وانه داعم اعلامي للقبيله ..

شوي الا تسجل بنتين بالموقع ..

واحده مثقفه وصاحبه اطلاع بالشعر والادب

الثانيه حقت العاب كل يومها بالالعاب ومواضيعها فرفشه ..

هنا القبيله تحركت ودافع الغيره اشتعل ..

كيف بناتنا يسجلن مع الرياجيل ..ويناقشن ويخالطن طبعا كلام الكبار حنا يالصغار عادي ..

سجلن النشميات على حيا ومستحى وخجل

ويسولوفن مع بعض ويضحكن مع بعض وحنا مانكلمهن ومايكلمنا تعرفون عيب ومايجوز ..

حسيت انهن اسيرات مو عضوات من كثر الانظار عليهن
ملفاتهن تلاقي الزوار الوف مؤلفه ..

مشى الحال على كذا بدأن بالردود على الشعار وعلى كتاب وبدا اللعب بالالعاب ..

صار شعارنا ماعد يبون ردودناولاعاد يبون منا شي
يبي هالبنت ترد رد مرتب ومزخرف وتاخذ القصيده وتبروزها وتزينها

ياخاينين يالشعار ...

فيه قسم مهمل من الرياجيل قسم الخواطر
كان هن يبدعن فيه وحنا نراقب من بعيد يجي الرد رسمي كانك مقابل وزير >>>> جفاف ياكافي

مده ليست قصيره صرنا اخوان وبناتنا ومعنا والوضع اصبح عادي


شوي الا يسجل معنا شخص باسم قبيله اخرى >> معاديه لنا

الصراحه الولد مرتب ويكتب خواطر وصورته الرمزيه جميله
حاط صوره ممثل مزيون مع كلمات منمقه

حنا الله يرحمنا حاطين صور شيبانا >>مغبرين

الولد بدا ينزل قصايد غزل
وردوده على مواضيع البنات فيها نوع من الغزل المبطن ..

زعلو الجماعه هذا وش مدخله بيننا ويكلم بناتنا >>>

ويحاولون بالمدير الا تلغي حسابه وتقفله >>> حسيت انهم ساكنين في بيت

الرجال حصل مضايقه وجفا من الربع وترك المنتدى ..

وبعده بمده دخلت بنت متسميه باسم قبيله ثانيه > القبيله هذه مصدر انتاج المزايين

الصراحه كلنا حبيناها المشرف والمدير والشاعر والعضو الجديد

تخبرون ضيفه عندنا وصاحبه خواطر جميله

كانو الاخوان يسرقون الردود من منتديات اخرى ويلصقونها بموضوع البنت على بالك تعبنا بالرد عليك وانها اعجبتنا الخاطره
وهم والله مايعرفون وش قالت ..
بس كانت صورتها الرمزيه تجنن ..


الزبده مالكم بالطويله تاريخ القبيله اهملناه
وصرنا حنا وشعارنا بقسم الالعاب مع الربعات ...

عدي لعشره واهدي ورده لمن تحب

وش يعجبك بالعضو اللي قدامك >>> هذا الموضوع كنت احبه :)

كلها كم شهر تهاوشو الاعضاء والمراقب فصل والمدير ابتلش فيهم ..

وانتهت ذيك الايام بحلاوتها

وطلعت شموخ نجد ولد

ونجديه طلع ولد خاله المدير

والسنافيهطلع واحد يطقطق

وياحب مالك خلف ...

[طاغي النظرة]

!

من يصاحب كلب ...

ويجعله ونيسه وجليسه حتى بغرفه نومه ..

كيف رضيت نفسك بالنجاسه والوصاخه ..

تقليد الغرب / اوصل المستغربين الى المشي بدون تمييز
وينك عن حديث المصطفى صلى الله عليه وسلم

إذا ولغ الكلب في إناء أحدكم فليغسله سبعًا إحداهن بالتراب”.

[طاغي النظرة]

..

على كثر ما اقرا للشعار ..

الا اني استمتع لهولاء مع اني احفظ الكثير

لكن تبقى وسميه العازمي ( عابره سبيل ) رحمه الله

خالد المريخي

وعيد حطاب العتيبي

وعبدالله بن عون العتيبي

وسحلي العواي المطيري رحمه الله ..

من المفضلين عندي ودأئم اترنم بقصائدهم ..


لكن يبقى شعر عابره سبيل مأثر فيني

اقرأو عنهم / وخاصه وسميه

لعل قبر يضم رفات وسميه / يسقيه وبل المطر ...

[طاغي النظرة]

...

في داخلي روح شايب /
حاولت اتخلص منها لكن للأسف ظلت هي المسيطره على تصرفاتي

لكنها لم تصل الى اني اطفي اللمبات :)

فلو سألتني /عن اي الفتاوي تاخذ بها قلت لك ابن باز وابن عثيمين !!

مع الاحترام لمشايخنا الموجودين ولكن يظل هالثنين علامه فاصل بين الحق والباطل عندي

فلا يكثر كلامهم وسيم يوسف ولاعدنان ابراهيم ولاعبدالعزيز قدري فأنا مازلت متمسك بهذان الامامين رحمهم الله ..

فلو سألتني/ عن اهم لاعبين تعشقهم قلت لك ماجد عبدالله والهريفي وصالح النعيمه والثنينان هولاء ايقونه الرياضه في بلدي

فليعذرني الشلهوب والسهلاوي وياسر القحطاني .. فأن لازلت متمسك بهم وانهم سبب نهضه الرياضه السعوديه

واذا سالتني / من يطربك فمن غيره محمد عبده طلال مداح وفهد بن سعيد .وخالد عبدالرحمن
فأسف يا ياوعد وياموضي الشمراني .. اذني لاتتحمل سماعكم ..

واذا سالتني / من الاعلاميين المحببين لك فغالب كامل وماجد الشبل وحامد الغامدي

عذرا داوؤد الشريان وحمود الفايز احس بغثيان احيان .....!

واذا سألتني اي الممثلين تفضل / فمحمد العلي ومحمد الطويان وسعد خضر يامال الجنه يالميت والصلاح للحي
هؤلاء من اظهرو السعودي وتقاليده وعاداته فشكرا لكم

عذرا ناصر القصبي وعبدالله السدحان حديثا وياشباب بومب // انتم خارج الطريق السعودي

واذا سالتني من تسمع للقرآن وائمه الحرم فمحمد بن سبيل والسديس
عذرا الكلباني اذني مازاالت عاشقه لهولاء

هذا غير محبتي لبيت الشعر وبيوت الطين والحياه القديمه

ماقلت لكم اني شايب وتفكيري ثمانيني ..

يالله طلعنا من المدونه بطفي اللمبات

[طاغي النظرة]

...

دق قطرات المطر بالنافذه ..
تجعل الحال والمكان والاجواء رومنسيه !
حتى البوح يكون شاعري
والخيال يسرح بنشوه غراميه طاغيه ..
كنت بكتبها لحظه بلحظه وشعور السعاده التي اشعر بها ..
اسطرها عذبتاً كالمطر وفواحةً كالزهر الممتلىء طلاً وقطرات ماء

لكن شخير الزملاء قال لي قف ..
فالعصافير بردانه ونحن من يطرب اذنيك بهذ الجو ..

قربو لي وسادتي ..

فالزين مايكمل !!

[طاغي النظرة]

!!

انتم مثلي ..

على النك نيم ( الاسم )
وعلى الصوره الرمزيه
وعلى الأسلوب الكتابي .

يجسد خيالي تلك الشخصيه على حسب ماشاهده ..

فبعض الاعضاء لا ارادي ..
اجد شخص راقي وسيم وهادي

والاخر اجد مدخن عصبي متنفرز

والثالث عايش في مزرعه ويكتب خواطره

والرابع شايب شاعر راعي مواجيب


اما الاخوات..

فمنهن المزيونه الانيقه

ومنهن العصقوله النحيفه

والاخرى مدري ليه صنعها خيالي مربربه ( دبه ) قصيره اعذريني خيالي جابك كذا

والاخرى رقيقه ماتحب الازعاج

اما الاخيره تكتب وعيالها مزعجينها باين من اسلوبها

ليه كذا خيالي صنفكم /
من يفكني لو ذكرت اسماء كان الدبه شنت هجوم ..


الا انا وش صنفتوني اذكروها بالتقييم راح اشوف وجهات النظر حول شخصيتي وكيف خيالكم صورها لكم

[طاغي النظرة]

https://i.imgur.com/zJH5IQR.jpg
























يامرحباا ومسهلا ..

الصراحه نظرتي لك .. كنت انظر لمرأه عندها اولاد حزينه بعض الشيء ومع ذلك تقاوم بالمزح ..

يعني يوم اشوفك بالالعاب كنت اظن رماد احساس والجودي من جيل اولادك ..
مدري ليه الاسم وداني انك كبيره بالسن هههه :)

اما صفاتي / والله انك قربتي شوي جبتي المواصفات 60٪

[طاغي النظرة]

https://i.imgur.com/ZQlmcnS.jpg






ياهلا وغلا ..


والله حبيت شخصيتي بنظرك اجل خلاص ماني معلمك خلها كذا بنظرك اجمل ههههه

اما الطباع الحاده بالعمل فلاوالله ولافخر بل اني اسهل مما تتصور ومتعاطف كثير مع زملائي

اما المعضل. ياليت ههههه

والصريح .. لا احب المجامله


للاسف شخصيتي ماجبت منها حتى 10٪
بس حبيت خيالك ههه

[طاغي النظرة]

https://i.imgur.com/WndYaGB.jpg
















ياصباح الخير ..


:(

وراه كذا خيالك مارتبني مثل اللي قبلك ..

مشكله اللي من نفس البيئه يكشف اوراقك هههه

وقت العصريه عند الابل صحيح اصير اشعث اغبر ..

اما غيره فاجتهد بالاناقه ترى ماروح للمسجد الا متعطر وكاشخ. /.

غيري هالنظره فيني برمجي خيالك / بحط صوره العرض جواد العلي يمكن افتك من الاشعث هههه

هلابك منور

[طاغي النظرة]

https://i.imgur.com/QfXiAFF.jpg

































مرحبابك ياهلا ..

عصبي شوي على موقف فقط اعصب شوي لكن انسىء ...

ملتزم / ياليت لكن الحمد لله مو هذاك الفاسد ... لكن عندي اخطاء
ويمكن لاني احب ما اكتبه شكل شرعي دائما هذا ما احب ان اكتب مايرضي الله وانور حتى لو كنت مو من الملتزمين لكني احب الصالحين ولست منهم ..

بالعكس جدا حريص بالاهتمام لكن اتغافل احيان

بعض الصفات لاتنتمي لي .. تحليلك اخذ من شخصيتي 30٪ الباقي ماهو فيني



اما شخصيتك في نظري / صاحبه موضه وصحيه بالاكل ماجاء بخيالي انك متينه ابد ولانحيفه لكن كعارضات الازياء هذا ما ذهب به خيالي

تهتمي بالاتكيت
متحرره بزياده
حساسه بقوه تتاثري في اي كلمه
انتقامك قوي توصل للخط الاحمر ..

ماتحبي التجمعات الهدوء طبعك : متأثره بالافلام :)

يمكن يصدق خيالي يمكن لا هههه

[طاغي النظرة]

....

ليه بعض الجماعه هنا ..

متصورني ساكن بيت شعر والناقه مربوطه بالخيمه ..

واكلي حليب وتمر مع قرص جمري :)

يحسسوني اني العصريه اكتب لهم وانا متكي فوق ظهر ناقه ...

وراكم رحتو بعيد

مايدرون اني قاطف ورد من زراعتي وجايبه لامي ..

ومتقهوي عندها وناكل حلا بسبوسه . وشوكلت سويسري ( شكلاطه لغتنا :)

ونتكلم عن الاقتصاد العالمي
وتأثيره على غلاء كيس القهوه
وعن سياسه بايدن في استغلال الدول !!

وعن روايه احلام مستغنامي



حسيت بريحه حطب من يخاطبوني !! :)

الا وش رايكم بالشوكلت مع الاقط يصلح معفوس او لا ...!!!

[طاغي النظرة]

https://i.imgur.com/Go7UuU7.jpg

























ياهلابك ومرحبا ...

انتِ خطيره ( شكلك من الجيران ..

ماشاء الله عليك وعلى قراءه خيالك يعني اصاب 99 ٪

بس حبيت الشيخ ...

ترى قبل ادخل المنتدى البس بشتي. واحط عود البخور على الطاوله جنبي ههههه

لا مابي هالشيخه. لكن حواليها ...
وفعلا المزح موجود في يومي واميل له لكن بحدود
فعلا احب البداوه وطاريها لكن لو تعطيني وتقول اسكن البر كان قلت لك لا
من ذاق طعم الحضاره صعب يخليها ..


اشكرا جدا على هذه ااقراءه يابنت الشايب

[طاغي النظرة]

الشامخه البروّق
واللي يمينها بسباسه ( بس باس )( مدري من سماهن

https://i.imgur.com/WaNOPpP.jpg





















































المعنى الحقيقي للمثل ( ضاقت عليك الوسيعه )


https://i.imgur.com/gYuuqMO.jpg

[طاغي النظرة]

..

https://i.imgur.com/xiYjOfz.jpg




















مرحبابك ياهلا وغلا ..

يابعدي مامن ذرابه لكن مقابل شرواك راح يكون الاستقبال حار

والله اني اردى اخواني ..

انت مدحت ماقدر اقول صح عليك هههه

لكن تحليلي لك ...

بدوي
وشاعر وشاعر فاخر واذا ما شفتك في مدونه المزون وشاعريتك مسيطره ماكون افهم ..

منت حطاب غدرى. حطاب الغدرى ياخذ الطيب والردي اما انت من دخلت المنتدى وانا اشوف حروف موزونه وشخص واثق ومحترم
وفيه خجل بدو وشهامتهم

ولي مع وقفه اخرى في خواطرك المستعجله بمدونتك // راقتلي كثيير

[طاغي النظرة]

..

ياصباح الخير يالوجه البـــشوش
وياصباح النور ياكــــــل الحلا
شوفتك عندي كما شوف الرشوش
لاكسا الارض سيله ودرج بالفلا

[طاغي النظرة]

https://i.imgur.com/MjPy9WE.jpg






















صباح الخير ..

اهلا اهلا بالعراب وبالشخصيه الفذه والعقل والتفكير المبهر ...

والله اصبت بالتحليل المذكور 100 ٪
وعندي فراسه فيك انك صااحب الرقم الصعب
وصاحب النظره البعيده ..

وتحليل للشخصيات يثبت عن عمق مفكر ودارسه عقول ..

اما تحليلي عنك كتسجيد شخصيه وليست تجسيد فكر فانت اقف احتراما لفكرك

فدائما يشدني اسمك وفكري يحللها

اما الشخصيه الجسديه فهي بين انشتاين وبين الممثل السوري عابد فهد ( صاحب شخصيه جساس )

صاحب جلسه فكريه وتامل على كرسي متواضع بالبلكونه امامك كاس شاي وزقاره لاتفارقك هههه

اما بالفكر فانت اقرب للفلاسفه ومفكرين الاندلس هذا هو انطباعي عنك وتحليلك بفكري


شكرا يااصيل على كرم الحضور

[طاغي النظرة]

https://i.imgur.com/SSn9Vta.jpg


يسعد مساءك ..

اولا الله يجملني بعين من يعرفني ..
وانا والله اظن في نفسي اقل مما ذكرتي ..

والله يجعلني مما ذكرتي
اما اخر فقره/ الشاعر فأخطأتي الحدس

ولا احب هالصفه ابد ابد
انا احاول مجرد محاولات تخطي وتصيب واحيان الوزن مكسور

اما البر فهذه سياحتي
مع اني اغلب الاوقات منصوفه بر وبحر لكن يظل البر هو المفضل


حبيت مشاركتك وماهره بالتخمين وقرأه الشخصيه اعطيتيني 95٪

شكرا الك مدد ..




تحليلي عنك /

شخصيه هادئه مكس بين حضاره وبداوه

تحبي الشعر بقوه ولا استبعد شاعريتك

تحبي الغموض
لاتحبي التجماعات
لك رفاقه خاصه ماتحبي تعدد الصداقات وخاصه عن طريق النت
عندي حدس ان اساوبك اسلوب معلومه ::

[طاغي النظرة]

https://i.imgur.com/ssn9vta.jpg


تحليلي عنك /
عندي حدس ان اساوبك اسلوب معلومه ::


( عندي حدس أن اسلوبك اسلوب معلمه !!!

وش هالخطاء المرير

...

الاملاء : مع انها الماده الوحيده اللي اخذ فيها الدرجه كامله طول العام
الا ن العجله بالردود تحرق ما تعلمته ..

رجعت لردودي اقراءها لقيت المعاني التي لاتفهم والاخطاء التي لاتغتفر ...

تباً للعجله )

[طاغي النظرة]

https://i.imgur.com/gullLFB.jpg



















































يالنايفه كولي وخوذي من الرزق ماجاك
ثم اطربي انتي وانا والطافحه والاميره

[طاغي النظرة]

في مرحله المتوسطه...
كان مجتمع بلدتي محافظ على الصلاه وخاصه رمضان
ويرغبون الاولاد لها مع فقرات قراءه الاحاديث بعد صلاه العصر
ويحثون على فعل الخير بالشهر الفضيل .. والتراحم وافطار الصائم

ويحثثون اكثر واكثر على تحري ليله القدر وانها ليله تجاب فيها الدعوات وتحقق فيها الامنيات

فكنا نصلي التراويح والقيام مع ان القيام يتعبنا كأطفال لانها تطول فيها الركعه والسجود
فكنا نصلي رهبه من والدينا والمجتمع

جاء في بالي تحقيق امنيه ..
فكنت اصلي معهم وبالسجودً خاصه اطلب من الله ان املك دراجه دباب

فكان الدباب غير معروف لنا بالمجتمع ولكنني كبرت الحلم اللي على قدي
مع ان الكبار يطلبون الجنه وسعه الررق وصلاح الذريه والبركة بالمال
اما انا حلمي كبير في تخيلي ..

طلبت من الله في ليالي العشر ان يحقق الله لي هذه الامنيه ..
مع اني الان اعتبره دعاء عبثي ولكن فضل الله لايحصى وان اذا سالت فسال الله ..


بعد هذه الدعوات والالحاح فيها ..
تحقق الحلم بعد اربع سنوات تقريبا
فاتاني دباب شريته بثمن بسيط فتذكرت تلك السجده !!!!

فاللهم ياواهب الملك لقد حققت لي حلمي البسيط
فاللهم حقق حلمي الكبير رضاك والجنه

وان تحفظ لنا اواطننا واوطان المسلمين
وان تجمع كلمتنا على الحق يارب العالمين ..

لاتستهينون بالدعاء

فوالله مادعيت الله بشيء الا تحقق

[طاغي النظرة]

..

يسعد صباح وقلب من يحب به اقرباءه

ويسعد حال من يذكر جميل اعدائه

ويسعد ضمير من يتغاضى عن اخطاء غيره

ويسعد حياه من يفعل الخير بدون اذن او ثمن

ويسعد ذلك الانسان الذي يعلمني اخطائي

[طاغي النظرة]

..
يارب عطفً منك قبل نزعه الروح

انك على درب الهدايــه تهدينــي

[طاغي النظرة]

..

لك الله ياقلب ٍ
من احداث الايام مكلوم ..


سنه سنتين ثلاث ..!
مهما محت السنين الوجوه !!
تبقى المشاعر كما هي
مع كل ذكرى ماضيه تدمع لها العين ويحزن لها قلب ..

رحم الله وجوه لاتفارقنا


جتني رساله ماهي اية رساله

صورة للغالينن عليـــنــا تـــــوفو

[طاغي النظرة]

..
الله يرزقني الصبر على الكتابه والردود ..

ناس تكتب صفحات ومجلدات باليوم ومستمعه ومحتواها مفيد

وانا اكتب سطرين تجيني ضيقه وملل >>> تهقون منظول

مامثل سمو المجد في عزلتها تنام اسبوع بالمدونه
ثم تكتب لها اربع سطور
نصهن اعجاب بدكتورتها بالكليه والدكتوره

والنص الاخر مراقبه من يدخلون مدونتها ..

مع انها صاحبه طرفه ومعلومه لكن حايشها كسل الجماعه

اما الفيلسوف
وجودي
والدكتوره
تاتيا
فالله ربي وربكم .. وعسى ما انظلكم ..

تقول طابعاات عندهم طاقه للكتابه الله يرزقني روقانهم

للمعلوميه مايمر يوم الا امر على كتاباتهم / يستهويني طرحهم

واصلو نثر ابداعاتكم فأنا بما تكتبون معجب

[طاغي النظرة]

.

اليوم شغلنا الوايت حق الابل حتى نجيب ماء

طبعا له شهر واقف ايام الربيع

وبما ان العصافير وقت تبييضها ماخلت شي بالوايت ماعششت فيه

حتى الشكمان تدخل فيه وتعشش وتبيض

هذه النوع من العصافير متطفل بقوه حتى عينك لو تحصل عشش فيها

الزبده شغلنا الوايت الا من كل جهه صوت فراخ

ويطلعهن العامل لي وابتلش فيهن

حطيتهن البارح بصندوق وعششته وضبطته لهن على امهن تجيهن

جيت اليوم الا هن كل واحد بمكان بالارض الحي مسكته والميت راح

دريت ان الانسه العصفوره زعلت وفعلت هالطريقه انتقام حتى في فراخها

بما انني تسببت بتفريق العائله الكريمه

اظطريت اني اجيبهن معي للبيت واسوي لهن رعايه

الناس ترعى ايتام اوادم
وانا بلشت بأيتام العصافير

هذهن اول تصوير وبوافيكم اخر اخبارهن ...بعد ما اعطيهن اسماء!!

https://i.imgur.com/XedUWX1.jpg

[طاغي النظرة]

https://i.imgur.com/Is4CybN.jpg































صباح الخير يالجميع اولاً !!

ثانياً اعفوني من وصف شاعر وأديب ليس تواضعا
لكنها حقيقه لا املك هالصفتين ..
وكثير يضايقني يوم اقراهم جد جد اتضايق

الشعر له ناسه هم ادرى في بحوره ومعانيه اما على مستوى منتدانا كالقارظ وحطاب والضاوي وباقي الاخوان
انا ما املك هالميزه اذا كتبت بويتات فهي اشبه مايكون حروف متساقطه على طريق ورتبتها

اما الاديب فهذه صفه ما انكر اني اسعى ان امتلكها لنفسي لا ان تقال لي لكنها ليست فيني

هذه تقال للشطرنج وتاتيا والدكتوره فهم اصحاب عقول تحمل كنوز من المعلومات المتنوعه والثقافات العالميه!!

لكن احيان تعظيم المدح يكون مردوده سلبي وينقلب الى تريقه ( حاشاكم ان تكون هذه نيتكم

لكن حقيقه انا اتضايق من هالصفات يعلم الله

ويمكن تكون هي سبب توقفي عن مواصله موهبتي بالكتابه عامه.

داخلين ع الله تعفوني منها !!!

قولو طاغي قولو يالعضو

لاتحدوني اتقمص دور ابو جندل في مسلسل عوده عصويد

كان جندل ينادي ابوه ياشيخ يبوه

فقال له ابوجندل ..

ياشين لاتقول ياشيخ يبوه
قل يايبه ياعساف يازفت !!!

هنا رد جندل وقال لا يايبه لاتحدني على شي ماودي اقوله هههه !!

صباحكم رضا وطاعه رحمن
ووبلغنا اللهم وياكم رمضان ..


اما اليتامي / ففاديات روسكم .. سافرت عنهم والعامل ما احسن تغذيتهن

حاولنا نعوضهن اليتم لكن حالهن كحال المستجير من الرمضاء بالنار ...

[طاغي النظرة]

..

كل عام وانت ال مسك بخير

ومبروك عليكم الشهر ..

الله يجعلكم ممن صامه وقامه

[طاغي النظرة]

كل عام وانتم بخير اعضاء منتدانا

ومن العايدين والفايزين يامسلمين في كل ارض

ومن العايدين والمنتصرين يافلسطين

وكل عام وحنا وانتم بخير

كل عام وانتم للروح اقرب

[طاغي النظرة]

..

اليوم صلينا العيد بمسجدنا
بالعاده مسجدنا صف ونص اذا امتلى ..
لكن اليوم غير
ثلاث صفوف ونص من غير النساء
بعد طلعنا لاحظنا عجائز طالعات من المسجد ..

الناس متعطشه للمساجد بعد وباء كرونا وتخوف الناس والحجر والتباعد ..
شعر الناس بتقصيرهم وتفريطهم ..
واليوم شفنا استقبال الناس لشكر الله في هذا اليوم

فاللهم لاتحرمنا عفوك وعطفك علينا

اللهم اننا تهاوننا في عبادتك
فاللهم قليل عفوك يمحي عظيم ذنوبنا ..

[طاغي النظرة]

!!
عندما سأل الشيخ صالح الفوزان
عن التخوف من المستقبل وعدم التفأؤل

قال مستقبلك الاخره ضع مستقبلك فيها
الدنيا سوف تتركها ماهي لك انت فيها عابر سبيل !!!
لو انها عند الله شيء كان ما اسقى غيها عاصي شربه ماء

والله انه صادق
نزعل ونتضايق ونتهاوش ونكد ونشقى واخرتها مودعينها راحلين

ومالك فيها من شقاك الا كفن لاو وبعد على حساب الخيريه وفاعلين الخير ماهو من مالك ...

والورثه بكره اخذين شقاك ومبذرينه

تخيل واحد من عيالك بكره وراث منك مليونين ورايح يطيرها سياحه ويشتري فيها قط بعشرين الف
والا سياره بثلاث ميه الف وانت خلك بقبرك لاحد متصدق ولاحد باني لك مسجد !!

فكرت فيها زين

اجل خلاص تصدقو واعفو وسامحو وعيشو حياتكم ..!

ابو ملايين ان بغيت رقم حسابي حاضر !؟

[طاغي النظرة]

https://i.imgur.com/Qc4OiGe.jpg


استراحه محارب .!!

[طاغي النظرة]

..

مره كنت جالس في مزرعتنا على طاوله مستديره صغيره
ومقابل لي صاحب السمو الملكي الامير سلطان بن عبدالعزيز ( رحمه الله )

ووكيل اعماله قحطاني !!


كنا نسولف بكذا موضوع ثم اراد الله يرحمه ان يكرمني بأعطائي قطعه ارض بالجنوب

فقل لوكيله اكتبها له الارض الفلانيه فأنا حز بخاطري بعد مكانها فبيني وبينها فوق الالف كيلو

فلمح رحمه الله ناظري وكأني لم اهلهل بالفرح
فقال نشتريها منك بدل ماتتعب بنقلها ومشاوير
ففرحت صراحه ..
فقال باربعه ملايين
قلت اتمها خمسه
قال ماتسوى
قلت انت كريم وانا استاهل

فقال خذ الخمسه ( لابارك الله فيك او زي كذا حولها بننبره مزح هههه

انا صراحه الاربعه مليون تكفي وراضي فيها

ولكن طلبت هالمليون زياده لاعطيه خواتي الست خاص لهن بدون اخواني وامي
لانهن متزوجات لكن هذه اللحظه جن في بالي ونويت ان افرد شي خاص لهن !!

رحمه الامير سلطان بن عبدالعزيز رجل الخير والايادي البيضاء





من يفسر لي هالحلم
حلمت فيه برمضان اللي امس :) ؟!!

[طاغي النظرة]

..

الحلقه الاخيره من مسلسل يوم اخر ..
وخاصه وفاه خالد :(

هاليوم ما انساه كل ما اتذكره ترجع بي الاحداث له

في يوم الحلقه الاخيره
توفى رئيس نادي النصر الامير عبدالرحمن بن سعود

وهذا احبه بقووه واعشق ناديه

وفي يوم الحلقه الاخيره زواج ولد خالتي ..

تدرون رحت للزواج شوي ثم رجعت اتابع المسلسل

هالمؤلفه والممثلين ابدعو في تصويرهم للقضايا حتى شاركناهم كمتابعين وتاثرنا معهم

مع اني غير مهتم بالمسلسلات لكن هالمسلسل الله يسامحهم كسرو قلبي فيه

الله يرحم عبدالرحمن ويوفق ولد خالتي
ويسامحك يالمقله والكواري خربطتو مشاعرنا بذيك الليله !!

تحبون هالمسلسل ::

طيب وأنا ( بصوت خالد او خلوود كما يناديه ابوه
رحم الله عبدالعريز الجاسم

[طاغي النظرة]

..


ببيع البدواه وحياه الشقى والذود

وحتى الخزامى والشمطري ونواره

من صار نص التواصل اهل منقود
وكلن يبي يكسب من البدوان معياره

شريت اربع عصافير بيض وسود
وبحط بالصاله بيانو وقيثـــــاره !!

وياريم اشتري للربايع براقع سود

ولا يالبخاري انطح الغاره بغاره

[طاغي النظرة]

السعاده طرقها شتى ..
ولكن : افضلها يهب الله لك شخص يجلي الله به همك
ويسعد الله به عينك
لايريد سوى اسعادك ..

[طاغي النظرة]

!!!

من كثر ماترسل مشاريه واعتاب
وأنا وخمـــولي زايد الطين بله
الله يستر لاتجــيني على الباب
وتلعن طــريق الحب دقه وجله

[طاغي النظرة]

!!

تقول يابن الناس ابك انت وشفيك
ابك انت ماتفهم معنى الهوا والعلاقه
ليه ثمان اشهور المح لـــك واناديك
والا انت علمك بين وايـــت وناقه :)


وحي الخيال ترى !

[طاغي النظرة]

تدرون ليه شخصيه السيده المصريه اقوى من الرجل

يقال : انه ايام وقت حرب موسى مع فرعون ..
غرق الفراعنه عند انفلاق البحر عن موسى
وكان فرعون معه صفوه القوم من الفراعنه والساده
فغرق وغرقو معه

بقيت الفروعونيات الاميرات والعمال ( الخدم )

فتزوجن الفرعونيات خدامهن ..

فكان الخادم لايستطيع رفع الصوت على زوجته ..
هيبه الاميره على الخادم تدرجت الى وقتنا القريب ..


اياك تتزوج اميره .. حتى لو حبتك !!

تراك بكره تمسح البلاط :)

[طاغي النظرة]

..

(((يقول ابن مسعود : رضي الله عنه وأرضاه
‏لا تسألنّ أحدًا عن ودّه إياك ولكن انظر مافي نفسكَ له
‏فإنّ في نفسه مثل ذلك إنّ الأرواحَ جنودٌ مجنّدة

‏وقيل عن ابن عثيمين :
‏القلوبُ لها تعارفٌ وتآلفٌ وإن لم تنطق الألسُن

‏وإليكم أرق الوصف لابن القيم : والقلب يشُمّ رائحة القلب ))

فعلا ان الارواح جنود مجنده !

ماتعارف منها أتلف وماتناكر منها اختلف ..

اغلب الاحيان تحب شخص وترتاح له بدون ان تكلمه او حتى تعرفه ..
مجرد ان القيت نظره على وجهه او اطلعت على كتاباته او حتى سمعت صوته
لا اراديا ترتاح لهذا الاسلوب او الشخصيه ..

كثير من المشاهدات تمر علينا تجد انك ترتاح للفنان هذا وتحب الشيخ هذا
وتكره ذاك الممثل من شكله واسلوبه
وتكره ذالك الشيخ حتى لو هو رجل دين لكن قلبك وعقلك لايتقبله

هي مجرد احاسيس لاحول لنا ولا قوه في توجيهها ..

فمهما حاولت جاهدا ان تكسب ود شخص فالله اعلم انك لاتستطيع اذا قلبه نافرا منك

هي الارواح تحب من تحب وتكره من تكره
فالعقل هو من يساير الامور وينظر مره اخرى للاشخاص بتمعن واطرق اخرى لتقبل به ..

فلسفه صباحيه / قد اخطىء وقد اصيب

[طاغي النظرة]

..

عندما ارى خطا ..

يصيبني غضب واريد ان اصحح ذلك الخطا بأي طريقه

بعد مايخفف غضبي اريد ان انصحه يغيره

عندما يخف الغضب اكثر اتجاهله

عندما يخفف اكثر واكثر ااتذكر اخطائي فاخجل من نفسي وامضي كأني لم ارى ..

ليست شجاعه !! ولكنها عدم الحيله ..

فالنهي عن المنكر واجب ..

فأنه عنه حتى لو كنت تعمله ..

لو النصيحه مختصه لاهل الصلاح فالكثير من البيوت ستفتقد للنصح والقياده الصالحه

ولكن الدين النصيحه !!

انصح وامض في سبيلك ..

[طاغي النظرة]

!.
هل ضعنا !

او الضياع جأنا وضيعنا :.

لا الناس ناسني.
ولا التراب حتى ترابي !!

القلوب قست
والعيون اشبحت
والافواه بكل ستر تفوهت ..

لكل تافه اتباع !

ولكل ناصح اعداء !

[طاغي النظرة]

!

اصيح للطير وصياحي على غيره
على عيون العرب كني على طيري

[طاغي النظرة]

..
مشكله اللي يقوم الفجور

وهو عند ناس يطولون بالتصفيره ..

طيب نبي قهوه !!
طيب وين كلامكم ..
ياضيفنا لو زرتنا لوجدتنا / نحن الضيوف وانت رب المنزل

طيب حطو باب خارجي للمطبخ عشان اضبط قهوتي وانتم بنومكك!!

[طاغي النظرة]

...
يا أهل الشعر بالله ماعندكم حل
للعاشق اللي فز قلبه لمزيون
غيدا لعوب اتقول وتطول وتحل
والعاشق المسكين ضايع ومديون

[طاغي النظرة]

..
في حالها بنت العرب ولحالها

تفرق عن الجيل الاول وهالجيل

كل البنات المترفات اقبـــــالها

راحن هبا عند منسوع الجديل

[طاغي النظرة]

...
كثره اعدائك / لايدل على نجاحك !!

هذا يدل / على انك تدبل الكبد يابن الحلال


حكمه اليوم !!

[طاغي النظرة]

!

كفي عن اللوم والتأنيب واقتصري
فالهجر والبعد والحرمان يكفينا ..

قصيده لحجاب بن نحيت رحمه الله
يجاري فيها نونيه ابن زيدون في معشوقته ولاده بنت المستكفي ..

ابدع المنشد بأنشادها ..
اذا سمعتها ترجع بي الاحداث للاندلس !!

مع ان اللحن حزين الا اني لا امل من تكرارها !!

اسمعوها يامحبي الفصحى !!

[طاغي النظرة]

!!

اذا هن مزايين والجمال رباني /

مين اللي رفع قيمه المكياج !!!

الزبده / ان صفه الجمال مقرونه بالرجل
فالجمال يوسفي ..!!

والكيد لهن..

[طاغي النظرة]

ومن العايدين

ومن الفايزين

[طاغي النظرة]

!!

لست صالحاً ، ولا ادعي المثاليه ..

فأنا المستور اخطاءه !!

لطف الله بي ستر عيوبي !!

[طاغي النظرة]

..

لو تغلى قســـم بالله ثم والله العظيم ..

والا اقول :قم تدلل ياغلا وافعل ماتشاء

[طاغي النظرة]

https://i.imgur.com/SIV3WEg.jpg







































اربع ميه جتني مع صن بيلوت
‏سجيت لأفرشها وانا كنت ناوي

‏ضيعت مني يا إريش العين كبوت
‏وسرقت قلب على الرجم عاوي

[طاغي النظرة]

https://i.imgur.com/fxA0lnh.jpg

[طاغي النظرة]

https://i.imgur.com/6sStFdO.jpg

حتى الاكواب دلعوها !!

[طاغي النظرة]

اختل بيت الحب وانهد وانهار
‏واصبح غباره طايرٍ كنّه طْحين


https://i.imgur.com/DNmt4pl.jpg

[طاغي النظرة]

.
يآآ حــــب ..

مالي فيك غير الشقا !!

[طاغي النظرة]

من كثر ما اسمع عن حقوق المرأه

وكثره التنازلات عن حقوق الرجال لصالحهن

يخيل لي ان نساء هالناس وخاصه المسلمين يعيشن تحت ظل السياط
والنوم تحت النجوم بلا غطا .. حتى حرك شعور ذلك الغربي ان يسعى لاستراد حقوقهن

حتى العباءه والستر والعفه اصبح في نظر الغربي وعملاءه سلطه اجباريه من قبل الرجل ولا كأنها شريعه دينيه

من كثر مانسمع عن حقوق وحقوق خيل لي ان يجبرونا على الحمل والرضاعه عنهم !!

لكن تذكر ياخونا المسلم مهما تنازلت وتنازلت لن يرضو
فعش بكرامه واعتزاز بدينك خير لك من ان تعيش لادنيا ولا اخره

وانتي يا اختنا وش بلاك اشغلتي العالم بحقوقك

مايكفي ان اكثر الدول استيراد للذهب والمكياج والعطور هي الدول العربيه والمسلمه

اللهم احفظنا واخواتنا من الانحلال والفتن

[طاغي النظرة]

اصبحنا واصبح الملك لله ..

اللهم اكفنا شر من به شر !!!

https://i.imgur.com/OdjPneL.jpg



































https://i.imgur.com/cZ8ecdm.jpg

[طاغي النظرة]

https://i.imgur.com/de6sL8j.jpg






























هذا ماضينا ولانخجل ..

اذا افتخر رعاه البقر ببقرهم نفتخر بغنمنا

اذا افتخر رعاه اللاما والترحال وسط صعوبه العواصف الثلجيه

نفتخر بشديدنا خلف ابلنا النايفه وشعاع ومضيحه خلف الجمل هدلان ولا نخجل

على جال ضونا نسمر ونشرب فناجيل كيفنا صنعناه بايدينا ونففخر
اذا افتخر صاحب كاس الستار بوكس بقهوته التي تستخرج من فضلات الفيل والزباد

نعم عرب ومسلمين ونفخر
مننا نبي الهدى راعي الغنم ..
نعم نفخر كخير امه اخرجت للناس ..

نعم نفخر حتى لو تكالبت علينا الامم واغرونا بثقافاتهم ..

ملاحظة / الصوره ليست لي لكنها اعجبتني

[طاغي النظرة]

https://i.imgur.com/BhRroyR.jpg








































كتبت الحرف لجل انسى ..هموم البارحه واليوم
لقيت الهم في حرفي تربع يوم خطيته تربع يوم خطيته
يقولون الملا ظالم وانا بلسانهم مظلوم

وانا المشتاق والموعد على بالي تناسيته على بالي تناسيته

رسمت احلى معاناتي ولوحاتي سما وغيوم
‏وليلٍ طالت دروبه.. ولكنّي تحدّيته !!

‏وقلبٍ ماشكى الفرقا.. وعينٍ تشتكي للنوم
‏إذا كان العمر جيّه.. فـ عزّ الله ماجيته!!

‏عزّ الله ماجيته!!

احبك ياشقى باكر احبك يافرح اليوم
‏كتبت الحرف لجل انساه ولا ادري .. ؟

‏كيف خطيته"
https://i.imgur.com/aEGcVRo.jpg

[طاغي النظرة]

مانجبره من عافنا ؟
ماينجبر !!

[طاغي النظرة]

بين الحلال الوضح ومعاتب البيض

ضعنا وضيعنا حــقوق التواصل

[طاغي النظرة]

في راس طعسٍ من هل العشق مدهول..
‏أمسيت كنّي في الجزيره "لحالي"

https://i.imgur.com/L4G1cdN.jpg

[طاغي النظرة]

/
مايحزن بخاطري ..
ويقرب الدمعه ..

الا مقطع فديو من الذكريات وتشوف لك فيه غاليٍ ميت

[طاغي النظرة]

/

ورزقكم بالسماء وماتوعدون !

لو توكلنا على الله حسن توكله .
لرزقنا كما يرزق الطير تغدو خماصا وتروح بطانا

ارفع يديك
واسجد واركع
واخلص نيه الرزق لربك

سترى ونرى العجب العجاب

[طاغي النظرة]

!
لاتبخل بنصيحه !
حتى وأن لم تكن تعملها !

وانهى عن المنكر /

حتى لو بيدك الكأس الأشعلا .

[طاغي النظرة]

!!

اصدق المحبين / الفقارى

لاهي تطمع بماله

ولاهو يطمع بجمالها

مجرد ان تعلقت قلوبهم ببعض فالكل منهم يطمع بمشاعر الاخر

عندما كانت المشاعر لها قيمه !!

ككثير وعشقه لعزه

ويقال ان عزه لاتملك من الجمال شعره كانت قصيره سمرا ولكن الحب جملها بعين كثير

حتى ان الخليفه عبدالملك بن مروان ساله مالذي شغفك بعزه وهي ليست جميله وفي النساء من هو افضل منها

فقال له جواب افحمه / قال مثلي كمثل االناس الذين بايعوك خليفه عليهم وفيهم من هو افضل منك


وكما قالت ام كثلوم / هل رأى الحب سكارى


اتوقع الحب مرض يغيب صاحبه عن العقل وينقاد خلف مشاعره

فهذا قيس (مجنون ليلى ) ارسله ابوه لبيت عمه ياتي بنار منهم ليشعل ناره

فاتى عمه وطلعت له ليلى وطلب منها نارا فاتت بها ووقف يحادثها والنار احرقت ملابسه ولم يشعر !!
مع ذلك باعته ليلى وتزوجت عروه بن الورد واخونا قيس الحبيب فقد عقله ومايمسكونه اهله الا بالحبال

[طاغي النظرة]

!

مدري الزمن ماهو زمان النشاما
والا الظروف بحكمها ضيعتهم