سحايب شماليه

[سحايب شماليه]

https://youtu.be/f05a73fZlRM


لمحبين الهجيني الشمالي :0741:

[سحايب شماليه]

انا من محبي الصباح والورد
وصباحك وكل لحظه في حياتك هنا وسرور وحيااه ياسحايب..




آمين وياك يارومااانس
صباحك مو بس ورد صباحك خير وتباشير وبستان ورد
من اختك سحايب

[سحايب شماليه]

السَّلامُ عَليكَ حيًّا فِينا لا تَموتُ أبدًا
نُحبُّك، ونُحبُّ مَن يُحبُّك
اللَّهُمَّ صَلِّ وَسَلِّمْ وَبَارِكْ على نَبِيِّنَا مُحمَّد ..

[سحايب شماليه]

سحايب شماليه..
اخو جوزه يهديك ويهدي احباب رومانس هالمقطع..

[url]https://youtu.be/de37eflmnzk[/url



رومااانس
سلمت ونعم فيك وماعليك زود ياولد وائل
ونعم فيهم جميع اللي مهديه القصيده عنزي
والشاعر اللي كتب القصيده عنزي
وابن لغيصم اخو جوزه يستاهل

[سحايب شماليه]

انا صاحيه من الفجر والحين جالسه بالمنتدى اقرقر :iqf03163:
ومطنشه ان الليله بيجوني ضيوف طبخ ونفخ وكرف
وغسيل مواعين اذا تذكرت غسيل المواعين تجيني كتمه هههههههه
المشكله فيني طبع شين كريمه بزياده يعني مواعين زياده ههههههه
ودي اصير بخيله بزياده بس خلاص طبع اذا ماحست المطبخ
يصير ضميري يأنبني يقول كثري كثري طبخ وحوسه :icon10:

[سحايب شماليه]

تصدقين ياسحايب اكتشفت اكتشاف غريب .
ثلاث ارباع المنتدي " حضارم" و"غمد"..!



مافيه شمالي الا
سحايب..
النايفه..
امل " حقت العزله"..
علي مزاجي

وبس



ونعم فينا يااهل الشمال
النايفه توي اعرف منك انها من اهل الشمال
انا اقول ليش احبها هالبنت

عاد فديتهم طيبين اهل الجنوب جيراني ثلاثة ارباعهم من الجنوب
وكل ديارهم عرفتها منهم غمد وزهارين وقرني وشمراني وشهراني
واحمري وعسيري وصار بيننا تبادل ثقافات ولهجات :icon10:

[سحايب شماليه]

بقوم اشوف اشغالي بعد الصلاة

إلى هنا تنتهي فقرتي الصباحيه
نلتقي على خير

[سحايب شماليه]

افا وأنا بنت ابوي وش العلم
غبت كم يوم رجعت إلا اخونا روماانس موقوف
عسى ماشر ليش ؟!
اذا فيه اختلاف بين الاعضاء عادي يتصالحون
الأخوان بينهم يتزاعلون ويتراضون
فما بالك اعضاء من جميع المناطق والدول
أنا ماني عارفه ايش السبب لتوقيفه !!
يمكن فيها اشياء مااعرفها لكن ماتوصل لتوقيف النهائي:MonTaseR_203:

[سحايب شماليه]

مـا عنـدي لـ كشـف النـوايا مرونه
‏من طاب فالجنّه ومن خاب فالنار

‏أعـامـل الـعـالـم بـ مـا يـظـهـرونه
‏و اتـرك خوافيـهم لـ عـلّام الاسرار

لشاعرها

[سحايب شماليه]

الشعُور إن رمضان قرب يمليك راحة نفسيه وسعاده ..
اللهم بلغنا رمضان وحنا بـ أحسن حال
واعنا على صيامه وقيامه وحسن عبادته ..

انتهت فقرتي ان شاءالله نلتقي على خير
وبعض الناس اللي موقفين راجعين
لديارهم سالمين غانمين :icon10:

[سحايب شماليه]

يا هـاجسي غـنّ طاروق الشعر غنّه
‏الحـق عـلى مابقى ولا العمر .. فاني

‏ياصدري اصبر على صبري على الونّه
‏ياطول صبرك علي وشين ماجاني

‏يلج فيك الحزن .. واخفييييه ، واكنّه
‏واذا بغيت اشتكي ماطاوع لسـاني

‏انا الذي لو ظـروف الووقت حـدنّه
‏يموت مايشتكي لفلان .. و فـلاني :)

[سحايب شماليه]

هناك قلم يحرر وآخر يقرر..قلم يبرر وآخر يحاول أن يمرر..
قلم أمير وآخر أجير..قلم أسير وآخر مستفز..
قلم يفزع وآخر يعزف..قلم مدهش وآخر قاهر..
قلم متطور وآخر متورط..قلم ممتع وآخر معتم..
قلم يبعث الضوء وآخر ينفث السوء تعددت الأقلام والحبر واحد...
فأحرص علي إختيار نوع القلم لتحفظ ماء وجهك..


راقت لي …

[سحايب شماليه]

تقضيتوا فوانيس ومواعين لرمضان
أنا عن نفسي ولا شيء لحد الآن :icon10:
يمكن اقضي صحون وملاعق بلاستيك لين اخر رمضان ياكلون فيها
بس يمكن اكشخ اول يوم و بعدها بلااااستيك :iqf03163:
خلاص تعبت من غسيل المواعين يوم يجي العيد إلا يديني
مثل يدين العجوز اللي عمرها 100 عام قلت لهم مصيركم
تاكلون ببلاسيك يضر مايضر مالي شغل فيكم اجل اجلس
بالمطبخ اغسل لين يجي صلاة العشاء خير والله
هذا شهر عباده مو جلسه بالمطبخ و بين المواعين :23:
انا عندي اطبخ كل شيء عادي بس مواعين لا وألف لا ..

الله يبلغنا رمضان وحنا بااحسن حال
ويتقبل منا صيامنا وقيامنا وصالح اعمالنا

[سحايب شماليه]

انا قريب منك افتحي الباب جايك ،!
هذا اخوي يوم كنت عندهم وقت الإجازات اذا جا العصر او بعد صلاة العشاء
اتصل علي وقال بمرك جايك انا افتقد الآن هالشيء وانا بعيده عن اخواني وخواتي ..
أنا الآن مثل الشجره اللي منزوعه من جذورها وانا بعيده عنهم
جد البعد عن الاهل غربه مهما كنتِ مبسوطه إلا أنك فيكِ شيء ناقص
انا الوحيده اللي بعيده عن اهلي الباقين كلهم قريب من بعض بنفس المدينه والحي
زمان اذا شفت مقطع عن مدينتي طلعت دمعتي واجلس اتذكر
كل شيء اهلي اجدادي خوالي وخالاتي الحي والميت منهم واتهيض
عشان كذا دائم ابحثوا ازواج لخواتكم وبناتكم يكونون قريب منكم سكنهم ..
وانا استغرب من البعض يحبون يتزوجون ويبعدون عن اهلهم واخوانهم
هل بينهم خلل او مشاكل لاجل كذا يحبون يبتعدون عنهم
بس سبحان الله الدنيا فيها الناس اجناس وطبايع وفيهم الغثيث والسمح
واللي يحبون اهلهم واللي يكرهون اهلهم ..


ماعندي سالفه بس قلت اخربط شوي
واللي جالسين تحت الـ 11 حياكم الله منورين والله الحته :MonTaseR_11:

[سحايب شماليه]

الله يطول بعمرك يـ سحايب
والامر سهالات
...
المهم النية الطيبة والذكر الحسن
ماعادا ذلك كلن وهقواته


..
لما كل الناس تبيعك خلّك متفائل كونك الأكثر مبيعاً
كاتبها مبدع

اللهم آمين وعمرك اطول يـ أمل
انشهد قلتيها المهم النيه الطيبه وانت صح ماعليك من احد

المقوله الاخيره رهيبه

[سحايب شماليه]

باقي ثلاث ايام عن موسم الخير
‏شهر رمضان اللي عسى الله يعيدة

‏تسامحوا عن كل زلة وتقصير
‏ترا حياة الناس ماهي مديدة

‏والمخطي اللي ما يسوق المعاذير
‏ماهو مبشر بالحياة السعيدة .

[سحايب شماليه]

مبارك عليكم شهر رمضان
أسأل الله الكريم أن يجعلنا وإياكم من صوامه وقوامه
وأن يمن علينا وعليكم بالقبول والرضوان
وأن يكتب لنا ولكم ولوالدينا وأحبابنا العتق من النار
وأعاده الله علينا وعليكم أعواماً عديدة ..

[سحايب شماليه]

دخول سريع لاجل اهنيكم بشهر الخير والبركات
اليوم صاحيه بدري وخلصت اكثر شغلي باقي شويات
واخلص باقي لي خلية النحل واللقيمات وانتهي من الطبخ :x150:
طبعاً فشلة خطة الصحون البلاسيتك رحت البارح وشريت صحون جديده
وكنسلت سالفة البلاستيك الله يعين على الغسل والكرف :crying:

[سحايب شماليه]

مساء الرحمة والعافية والمغفرة

دعاء مريح لقلبي وقلبك :

‏اللهم اجبر خاطري جبرًا أنت وليه ..
فإنه لا يعجزك شيء في الأرض ولا في السماء
ربي أشرح صدري وأرح قلبي وأزح من قلبي كل خوف يسكنني
وكل ضعف يكسرني وكل أمر يبكيني ولا تفجعني في مستقبلي
ولا في نفسي ولا في باقي أهلي ولا تُعسر أمري وأفتح لي أبوابي المغلقة.

[سحايب شماليه]

رساله لمن يعاني الألم ..
اطمئن:

‏هذا الطريق الطويل سوف ينتهي يوماً
‏وهذا الألم سيزول حتماً، وهذه الأيام ستمضي ولن تعود،،
وهذا الكسر الذي في قلبك
سوف يجبره الله تعالى إن الله على كل شيء قدير.

[سحايب شماليه]

اللهم في هذا الصباح أفرح قلوبنا وأغسل أحزاننا وهُمومنا
وأغفِر ذُنوبنا وخطايانا واشفي مرضانا
وأرحم أمواتنا إنك على كُل شيءٍ قدير

صباح الخير

[سحايب شماليه]

اعتنوا بِطهارة قلوبكم ونقاءها

إلّا من أتى اللّه بقلب سليم قلبك أعظم شي ستقابل به ربك فاعتن به.

[سحايب شماليه]

اللهُّم اجعلنا في العشر الأواخر من رمضان ممن غفرت لهم ،
ورضيت عنهم ، وحرمتهم النار ، وكتبت لهم الجنه نحن ومن نُحب.

اكثروا في هذهِ الايام من قول :
اللهم إنك عفوٌ كريمٌ تُحب العفو فأعفُ عنّا
‏
صباحكم ابتسامه وسعادة دائِمة

[سحايب شماليه]

دخلت قبل قليل مدونة اخينا رومانس
الله يذكره بالخير ويسعده وين ماكان
مضى على حظره حوالي شهر ان شاءالله يرجع
ويعم السلام والوئام بين قلوب جميع الاعضاء :y2o01875:

[سحايب شماليه]

البارح كانت عندي مراجعه للمستشفى بالخبر
ياخراشي يالزحمه كنت ناويه بعد المستشفى نروح السوق
اخذ كم غرض على الماشي بس شفت الزحمه هونت غيرت الوجهه للبيت
ما أحب الزحمه وخاصه زحمة الشوارع والسيارات يجيني توتر وضيقة خلق
افضل جلست البيت على الطلعات اللي فيها زحمه إلا للضروري اطلع

انا سبحان الله عكس بعض الناس اللي يحبون الطلعات برمضان
احب جلسات البيت دائماً برمضان إلا لزيارات الخفيفه وصلة الرحم فقط ..

[سحايب شماليه]

لا تضيّع فـ الحياه الا الحياه
‏خلها باب لدخول الاخره

‏ولا تخلي دنيتك عثرة حصاه
‏عش ليومً بعد موتك ذاخره

‏الزمن لا بد يبلغ منتهاه
‏والبحر تاليه مرسى باخره

‏وكان دمعك ما يبل الا ثراه
‏كل عظمً في ضلوعك ناخره

‏الحياه بكبرها شفت الحياه !؟
‏ثقب ابره / عند باب الاخره ..


سلطان الاسيمر

[سحايب شماليه]

اللهم أيام من فرط سعادتها تعكس على وجوهنا أثارها.


صباح الخير والسعاده والبهجه لِـ أرواحكم

[سحايب شماليه]

عـــيــدكـــم مـــبـــارك
كـل عـام وأنـتــم بــخــيــر :x117:

ادري متأخره :icon10:

[سحايب شماليه]

اليوم جاتني الصيحه والصداع مسك راسي
حذفت كل الصور بجوالي بالغلط :28:
باقي شويات من الصور الاخيره حزنت صور قديمه
ومحتفظه فيها من زمان وذكريات لها اختفت بلمحة بصر :بكى:

[سحايب شماليه]

‏صباح الخيرات يا أهل مسك الغلا
أتمنى لكم أياماً زاهيه يحفها الحُب والجمال و الرضا
وأتمنى أن تكون الأقدار السعيدة في طريقكم دائماً :نبض:

[سحايب شماليه]

صلوا على من جاء بالهُدى لنهتدى به
‏اللهم صلِّ وسلم على نبينا محمد..

[سحايب شماليه]

ولدي قبل ساعه صحى من النوم وقلت له
يالله بسرعه غسل وبجهزك للمدرسه انصدم وبعيونه الصيحه
مشت عليه يحسب اليوم دراسه رحمته يوم شفته زعل
قلت لا لا اليوم عطله الجمعه عاد ولدي مايحب المدرسه يقول ازعاج
العيال يطفشونه من اصواتهم بالفصل قلت علم الاستاذ يهاوشهم
قال علمته وهاوشهم بس مايسمعون كلام الاستاذ مزعجين :iqf03163:
قلت بقلبي عزتيله الاستاذ منكم ابو الازعاج والمسكين متحملكم :MonTaseR_125:
عاد ولدي مسوي نفسه الهادي بالمدرسه وهو مزعجني بالبيت الله يصلحه
بس والله معركه كل صباح مايبي يروح للمدرسه متعقد من ازعاج الاولاد
يقول يصدع راسي من اصواتهم هالولد طالع لي يحب الهدوء :icon10:
بس والله بصراحه الله يكون بعونهم المعلمين والمعلمات من ضغط الحصص
وازعاج الطلاب والطالبات ومشاكلهم اللي تخوف خاصه هالجيل
ما يحترمون معلمينهم ولا معلماتهم سوى بنات او اولاد ..

[سحايب شماليه]

ياصاحبي لايحبطك جور الحياة
‏ولا تضايق وأمر ربي من سعه

‏ولا تعيش العمر كله في شتات
‏استرجع الي راح منك واجمعه

‏اللي ماينفع نفسه بعز وثبات
‏والله مايلقى اللي بعمره ينفعه

‏مستقبلك ماله شغل بالذكريات
‏اللي شراك اشره ومن باعك بعه

‏وان قفلت في وجهك الأربع جهات
‏اختر جهه غير الجهات الاربعه

الشاعر سعود الطاثوب

[سحايب شماليه]

منوره اختنا سحايب شماليه ..
ليت كل الاعضاء في نقائك وادبك...
تلفتين النظر في حضورك وفي غيابك..
اتمنى ماتعلقين على السطر اللي تحت :
حنا في ابتلاء مع الموسوسين..
وما للمبتلى الا الصبر والتجاهل الين الله يدحرالشر



حياك الله اخوي رومانس النور بوجودك
الله يرفق قدرك ويعلي شأنك هذا من طيب اصلك
لا بعلق :icon10:
الموسوسين كثروا وبكل مكان الله يكفينا الشر
لكن انا اطبق المثل هذا بكل حذافيره هنا وبحياتي الواقعيه :icon10:

إمْشِي عِدِلْ يِحْتارْ عَدُوَّكْ فِيكْ!

وهذا بعد زياده من كيسي ابعد عن العيب والحرام
راح يرتاح ضميرك ومخك وترضي ربك ونفسك
وبعدها لو شوشتك منفوشه وتركب الجمس الحمر
وتشغل بطي البذالي يالله من طشاش بلقاع رشاش :iqf03163:
ماعليك من احد ولا احد له شغل فيك عيش جوك وانا اختك ههههههههه
:556751:

[سحايب شماليه]

الزوار اللي تحت السبعه وش عاجبكم بالمدونه
ماعندي محتوى هادف ههههههه كله ثرثره وفضفضه :ياعبيط:
على العموم مشرفيني وحياكم الله امسكوا :MonTaseR_2:

[سحايب شماليه]

اذا اراد الله وكتب بكرا بالليل عندي دخول للمستشفى تنويم
لاجراء بعض الفحوصات الطبيه قسطره تشخيصيه للقلب
ويارب يكون خير بصراحه متخوفه الدكتور يوم شرح لي حالتي
قلت له طيب لو ماسويت القسطره اللي قلت لي رفع راسه
ونظر لي نظرة اللي مشفق علي وفيه الضحكه شكله قال بينه وبين نفسه
هذي بتهج هجيج مابعده هجيج خرج ولم يعد ههههههههه
بس كان صارم ماعنده تفاهم تنويم يعني تنويم
عاد مافيه احد خبرته من اهلي خفت ينشغلون علي
وهم بعيد عنا ويسافرون بس وحده من خواتي خبرتها
لاني كنت بسالها عن القسطره لانها قبل سوت قسطره
وبعدها عملية فتح قلب وكنت معها مرافقه وعارفه الاحداث
والاشياء اللي مرت فيها الله يحفظها يارب
دعواتكم لي ان يطلع ماعندي شيء وسليم هالقلب
اللي الله اعلم بحاله واحواله

[سحايب شماليه]

اللهم شكراً وصبراً وحمداً على كل حال وكل شعور

‏صباح الخير والورد …

[سحايب شماليه]

بعض المواقف والاحدث اللي تحدث لك بالحياة
تغير لك نظرتك للحياة وللأشخاص ..
فـ الحمدلله أني محاطه بـ اشخاص كـ الجواهر والدرر
فقد يظهرون لي بمواقفي الصعبه كالبلسم على الجرح
اللهم احفظهم لي واسعدهم بالدارين يارب العالمين ..
فتشوا عن هؤلاء الاشخاص واضيفوهم لحياتكم
لِأنكم لابد أن يأتيكم يوم و تحتاجونهم ..

[سحايب شماليه]

من طابت نيّته طيّب الله حياته
‏الله يبعد عنّنا كل نيّة قبيحة …

[سحايب شماليه]

مدري اقول مساء الخير او صباح الخير :MonTaseR_98:

ياشين اذا تلخبطت عندك اعدادات النوم يصير الفيس كذا :105:
نمت نومه مااحب وقتها وصحيت والآن ادور النوم ماقدرت اصيده :SnipeR101: :icon10:

[سحايب شماليه]

ابيات اعجبتني

حاول تخلي جلستك عند العرب ركعة وتر
خفيفةٍ تقضي لزومك اذا … صليتها
وحاول تخلي كلمتك عند العرب ليلة قدر
كلٍ يدورها ولا يدري متى … توقيتها
وحاول تخلي كلمتك وقت العتب رشة عطر
‏يفطن لها المخطي ولا تندم اذا… رشيتها


لشاعرها ،،،

[سحايب شماليه]

من باب الأدب استمع للبشر جيداً
أما من باب الاحتياط فلا تصدق كل ما يقولون ..

‏جبران خليل جبران ..

[سحايب شماليه]

اللهم في هذا الصباح ارزقنا الرضا والقناعه بِما قسمت لنا
واجعلنا من الشاكرين لِنعمك علينا ..

صباح الخير

[سحايب شماليه]

يُقال :

إختر من تزرعهم في أرض قلبك بدقة..
لأن إختيار البـذور أسهل من إقتلاع الأشجار..

[سحايب شماليه]

مساء الخير والعافيه

انا صايره هالفتره ماادخل قليل اساسا انا قليل ادخل
والحين بزياده ماادخل ماغير جالسه بالبيت ضيوف داخله وضيوف طالعه
ابي وقت لنفسي مافيه يالله هانت باقي شويات وافضي لنفسي
يالله ان شاءالله يروح ضيوفي الليله بدري واحاول ادخل هنا

شكرا لكل من قيمني وسأل عني :نبض:
واعتذر للي مارديت عليهم بالخاص مااقدر ارد مشاركاتي قليله :icon10:
المفروض يعطوني درع على ثباتي على تاخري بالمشاركات هههههههه

[سحايب شماليه]

صباح الخير
كنت اتابع بتويتر قبل شوي مساحه بتويتر
عن الذكريات وماضينا والحنين للماضي وذكريات الثمانينات
بس طلعت منها شيء جميل ويالله على الذكريات
ترجعك للماضي وكأنك موجود وتعيش اللحظه
عاد المضيف واللي يدير الحوار الرائع عبدالله حمود الرشيد
والله محتاجين دائماً لمثل هذهِ الحوارات لاجل الترويح عن النفس
تعبنا من الحوارات اللي كلها جديه ومشادات
وربما تكون آخرتها مماسك شوش هههههههههه

[سحايب شماليه]

هالصباح ودي امسك خط طويل سفر واشغل شيلة
ياهل الموتر اللي بأول القاع غبر بس مشكله الحين مافيه ربيع
ولا فياض تو وبله تنثر مافيه إلا الحر والغبار مع هالصيف :icon10:

سقى ايام الشتاء والربيع والأجواء الحلوه

[سحايب شماليه]

استغرب من بعض مفسرين الاحلام كيف يفسرون احلام بعض الاشخاص
هل هو علم بزياده او انهم يستعينون بااشياء اخرى لدقة التفسير
وفيه اسأله يسألها للي شاف الرؤيا استغرب كيف يعرفها
مو لدرجه هذه بصراحه البعض من المفسرين يخوفون لدقة التفسير
هل هم يستعينون بطرف ثاني خاصه اللي اشوفهم بالتك توك :x37: :icon10:

لكن كلام هذا مو عن المفسرين الموثوق فيهم ومعروفين بتفسيرهم
وتدينهم واخلاقهم وصدق تفسيرهم للرؤيا

[سحايب شماليه]

ادخلي مزرعه برسيم ولفلفي فيها كنك في ربيع


وانا داخله الآن حصلت هالتقييم متت ضحك :iqf03163:
ياربي طيب قول مزرعة نخل او حمضيات او عنب او فراوله
عاد جالسه اتخيل نفسي بوسط البرسيم :icon10:
واخذ صوره سلفي مع البرسيم كأنه عشب وجو ربيع هههههههههه


اضحك الله سنك ياللي ارسلت هالتقييم

[سحايب شماليه]

احياناً المجاملات تغث وخاصه اذا صرت بقروبات الجماعه والقرايب
اذا قلت الصراحه وابديت الرأي تهاوشت معهم وان سكتت قالوا ليه ساكته
وان طلعت من القروبات قالوا فيك شيء ليه طلعتي
ياربي اكره شيء عندي قروبات القرابه جالسين فيه كأننا مطاوعه ههههههه
الكل يجامل ويظهر نفسه مدين وماعندي زلات وهم اكثرهم غلط بغلط
بس نغمض العيون عن الغلط لأجل حفظ الود والقرابه بيننا
ومتأكده اكثركم عنده نفس الشيء لأجل كذا كلنا داخلين هنا
بنكات مستعاره لاجل ناخذ راحتنا بزواي المنتديات
نعبر ونتكلم براحتنا وبدون تزييف وتصنع بعيد عن عيونهم
اللي تدور الزلات وماكأنهم من لحمنا ودمنا وتربطهم بيننا وبينهم صلة رحم

مادري ليش كتبت هالكلام لكن جد منغثه من كثر القروبات
ولا لي حيله اطلع منها بيجيبوني من شوشتي :MonTaseR_49:

[سحايب شماليه]

كلك غلا – مهندس الحرف مساعد الرشيدي الله يرحمه

كلك تعالي غلا … والا ارجعي كلك
بعض الغلا منك مايستاهل الجيه
طالت وانا في رجا ليتك .. وياعلك
أوراق بالذاكره .. واوراق منسيه

مابل ثوبك مطر شوقي ولا بلك
لوعلتك من سحاب الروح وسميه

ليه امشي الدرب دامه مايوصل لك
تخاف رمضا الضياع اقدام رجليه

يابنت تو الهوى ماصرت انا خلك
للحين .. مازالت الصوره رماديه

ومازال بغض الغموض الشره يحتلك
وشلون انا اعشقك واحبك على النيه

اشوفك هناك قدامي .. ولا ادلك
صعب الكتابه ليا صار الورق ميه

إن كان شمسك تساومني على ضلك
ماعاد ابي منك لا شمس .. ولا فيه

اما تعالي لقلبٍ .. فز لك كلك
والا اتركيني ماابي لك بالهوى جيه

[سحايب شماليه]

سحايب ...
شوري عليك اطلعي من قروبات الجماعه اللي عندتس واي واحد يحاول يقنعتس ترجعين طقيه حظر وريحي راسك..
انا حاليا قروبات اصدقاء واقارب وعمل اما الجماعه زي ماقلتلتس اللي حاول يتلفسف علي ويقنعني ارجع طقيته حظر ..
هذا وقد بلغ عددهم 8 واللي ماعطيته حظر حياء منه وفي نفس الوقت ماسمعت كلامه طقني حظر وقد بلغ عددهم اربعه..
يعني الحمد لله طلعت فايز 8 مقابل 4 هههه





ياهلا اخوي روماانس
شورك وهداية الله لكن انتم يالرجال احسن من النساء كلامهم وتعاملهم :shutup:
لكن حنا يالنساء غير طبايع الرجال كثيرات ثرثره وبربسه وتفلسف :69:
واصلاً القروبات مااقدر اطلع منها متشابكه ببعضها وعدة قروبات :icon10:
لكن صرت اتجاهل واطنش الكثير منهم ولا ادخل بعض القروبات
إلا اذا نامت الناس بالليل وهجدوا سكنهم مساكنهم يارب
احسن شيء انك قدرت تعطيهم حظر وترتاح منهم وتفوز عليهم 8 :icon10:

[سحايب شماليه]

هلا باللي لفاني يا هلا به
عدد دقات قلبي في غيابه
هلا باللي بعد والشوق جابه
عليم الله قلبي ما سخى به
عليم الله قلبي ما سخى به


تذكرون هالأغنيه القديمه لأحمد الجميري
اهديها لنفسي بمناسبة عودتي هنا :icon10:

مساكم سعاده :ah11:

[سحايب شماليه]

الاخت سحايب شماليه مثل مدرس العربي تكتب علي سطر
وتترك عشر يوم هنا واسبوع غايبه...

هلا بك اخوي رومانس
توني اهدي نفسي اغنيه اشوى الحمدلله فيه احد فاقدني هنا :icon10:
والله مدرس العربي اشوى مني على الأقل يخلص درسه وبكرا ينط بالفصل
على طلابه بدرس جديد لكن أنا اغطس ولا ارجع إلا بعد نص شهر ههههههههه
عاد انا مالي غير مسك اكتب فيه وبرامج هالتواصل اللي اخذت كل وقتنا
ومشاغل الحياة اشغلتنا لكن ماشاء الله البعض دايم متواجدين هنا
كنت قبل سنوات طويله شعله نشاط بالمنتديات فرفره فيها
لكن خلاص حالياً طفيت الظاهر كبرت :icon10:

[سحايب شماليه]

ههههه ياجوك ياشيخه..
ودي احط لك يامرحبا مليار بالزين..
تصدقين تأكدت الان ان حرارة الجو مالها علاقه بالمزاج اهل الجبيل
مع حرارة جوهم وغازات مصانعهم هذا هم مروقين اسم ربي عليهم ههههه



يازين اللي يرحب ويهلي تذكرني باهلنا بالشمال
ايه ماله دخل اسم ربي علينا يااهل الجبيل هادين ورايقين حتى لو حرارة الجو ألف
والمصانع تنفث علينا دخاخين لكن جونا عليل وخواطرنا طيبه وسمحه :icon10:

[سحايب شماليه]

الفن الاصيل القديم اجمل من الآن
من التراث الاصيل الكويتي بدون موسيقى
المولع قام يلعب شايل فنه وجيله

https://youtu.be/jQlR_TIq_Uw

[سحايب شماليه]

عليك الضمير يحن ياماضيٍ قد راح
‏معاك اجمل ايام العمر مع لياليها

[سحايب شماليه]

مساء الخير اخباركم تقبل الله منا ومنك صالح الاعمال بعشر ذي الحجه
من ارض الشمال وجو الشمال وجبال الشمال بحايل سحايب تحييكم
الحمدلله اليوم الصباح وصلت ديرتي حايل لي سنه ماجيتها
من عيد الاضحى العام فيه اشياء تغيرت بحايل والله اشتقت لها
يازينك ياديرتي واهلك عاد طبعاً وصلت البيت وعلى الظهر حطيت راسي ونمت
وتوي اصحصح وجوالي ماسكت رسايل ومكالمات بس مطنشه من التعب
كنت مواصله مافيه نوم وطول الطريق صاحين انا وعيالي
بس وصلنا وين السرير عاد الحمدلله وصلت بيتي إلا نظيف
قبل فتره زارني اخوي بالشرقيه واعطيته مفتاح البيت
لاجل يجيبون شركه تنظفه له سنه مغبر البيت كح كح :icon10:
بس علمتهم بنجي قام بالواجب عساني ماانحرم من اخواني وخواتي :نبض:
والمهم اني هربت من جو الجبيل الصناعيه حر ورطوبه ماينجلس فيها
خاصه شهر يوليو واغسطس وسبتمبر النحشه عاد جاراتي يرسلون لي
يقولون رحتي وخليتينا زعلانات :icon10: وجاراتي بحايل يرسلن مبسوطات
اني جيت خاصه اللي جنب بيتي بس اجي سحبتني معها كل مشاويرها
طلعات استراحات وعروس وتمشي وتعرفني على قرايبها وكل وحده نقابلها
تعزني معزه خاصه وهي غاليه علي هي كبيره بالسن وزوجها طيب وكرم حايل
كله مجتمع فيه وزوجته بعد طيبه حيل الحمدلله ربي رزقني بجيران سوى بالجبيل
او حايل كلهم يتنافسون بالطيب والكرم
خلصت بربرتي لي ساعات عشان اكتب هالبربره اشغلوني بالمكالمات والرسايل
ماقدرت اكتب ويالله عاد اخليكم اذا فضيت دخلت واذا مادخلت اعرفوني
اني ناشبه بطعس او جبل من جبال حايل :iqf03163:

[سحايب شماليه]

صباح الخير :x117:

لكل اعضاء مسك الغلا
كل عام وأنتم بخير عيدكم مبارك
أعاده الله علينا وعليكم أزمنة مديدة وعساكم من عوادة :ah11:

[سحايب شماليه]

انا الآن جالسه افرفر بالمنتدى والليله عندنا عشاء
وضيوف بس جهزت كل شيء الفجر والحين مالي خلق
ادخل المطبخ واستقبل الضيوف شكل بيجون وانا عين مفتحه وعين مغمضه
يالله اقوم اروح المطبخ قبل يجيني النوم :icon10:

[سحايب شماليه]

صباح الخير
شلون الطيبين هنا اخباركم مع عيد الأضحى والعزايم والطلعات
أنا استغفر الله من اول ماخلص يوم العيد وأنا مريضه وعيالي مرضى
حراره وترجيع بس متسدحين ولا ابي اطلع ولا اروح بس بجلس بالبيت
اهلي وجيراني يعزموني وبس جالسه بالبيت والليله معزومه والعزيمه خاصه لي
بس اذا شفت مااقدر بسحب على العزومه اشين سفره بحياتي هالسفره
ودي ارجع للجبيل حتى لو حر ورطوبه بس انتظر نتعافى ونرجع
واهج برا حيث الخضره والطبيعه الخلابه وناس مااعرفها ولا تعرفني

[سحايب شماليه]

وصلني اهداء تحديداً من قرية زيرمات السويسريه
شيلة عزفة العود فايز العتيبي كلمات عناد الشيباني
تفوز كلماتها ابدع فيها الشاعر ..
لا يروح تفكيركم بعيد الاهداء من بنت خالتي بسويسرا
من قبل العيد وهي مسافره تقول مابي ارجع لين يروح الحر
انتم متخيلين مسافره لسويسرا ومعها بقل اقط ههههههه
كل يوم تحط الدله وبريق الشاي وتتقهوى في الطبيعه الخلابه
وتصور لي الاقط يازينك يابنت خالتي متمسكه باصالتها :icon10:

[سحايب شماليه]

مشاركاتي 261

باقي لي 239 عشان اقدر ارد على اللي بالخاص
انتظروا السنه الجايه ارد عليكم
طيب ليش يامديرنا لازم اوصل 500 مشاركه عشان اقدر ارسل خاص :(
طيب مافيه عروض وتخفيض :iqf03163:

[سحايب شماليه]

الضيوف الـ 4 اللي جالسين بمدونتي ياهلا فيكم :MonTaseR_98:

[سحايب شماليه]

يحكى أنّه كان هناك رجل حكيم يأتي إليه الناس من كلّ مكان لاستشارته.
لكنهم كانوا في كلّ مرّة يحدّثونه عن نفس المشاكل والمصاعب التي تواجههم
حتى سئم منهم ..
وفي يوم من الأيام، جمعهم الرجل الحكيم وقصّ عليهم نكتة طريفة
فانفجر الجميع ضاحكين ..
بعد بضع دقائق، قصّ عليهم النكتة ذاتها مرّة أخرى،
فابتسم عدد قليل منهم ..
ثمّ ما لبث أن قصّ الطرفة مرّة ثالثة، فلم يضحك أحد..
عندها ابتسم الحكيم وقال: -
"لا يمكنكم أن تضحكوا على النكتة نفسها أكثر من مرّة،
فلماذا تستمرون بالتذمر والبكاء على نفس المشاكل في كلّ مرة؟!"

مايستفاد من القصه السابقه لا تكرر نفس شكواك على الناس
ولا تكرر تذمرك من حياتك او اي شيء يخصك للناس
لكن دائماً اتجه إلى الله وبث شكواك عليه واطلبه العون والمساعده
فـ هو القادر على حل جميع مشاكلك وهمومك وارحم بعباده من خلقه ..
فـ سبحان الله البعض مايملون ولا يتعبون من تكرار وترديد نفس الموال

[سحايب شماليه]

انتهت جولتي ماقبل الفجر بروح اكل علاجي
حاسه رجعت لي الحراره وحلقي يألمني حيل
الله يشفيني ويشفي عيالي يارب

[سحايب شماليه]

يقول ابن القيم رحمه الله:_
مهما بلغ تقصيرك في العبادة، فلا تفرط في حسن الخلق،
فقد يكون مفتاحك لدخول أعالي الجنة، ‏أتظن أن الصالحين بلا ذنوب؟!
إنهم فقط:
استتروا ولم يُجاهروا، واستغفروا ولم يُصروا،،
واعترفوا ولم يبرروا، وأحسنوا بعدما أساؤوا .. ‏
‏قيل ﻷحد السلف: كيف أنت ودينك؟
‏فقال: تمزِّقهُ المعاصي، وأرقِّعهُ بالإستغفار. ‏
ما أبلغ السؤال، وما أعمق الاجابة.!
عطر الله صباحكم وايامكم بالاستغفار وذكر الرحمن ..

[سحايب شماليه]

يقال :
التغابي أو التجاهل من أجل راحة البال ،
دلالة واضحة على الذكاء العالي لدى الشخص ،
وكأن الشخص يقول "
أعلم كل شيء ولكن لا أسمح لأي شيء بأن يعكر مزاجي !"

نعم هذا ما امارسه بحياتي التغابي بعد ماعجزت عن مجابهة بعض البشر
مع اني افهم كل شيء لكن من اجل راحتي اتغابى واغمض عيني
عن كل شيء لا يعجبني ولا لي قدره على تغييره ابتعد عن مصدر الاذى
لاجل راحتي وعدم المشاحنات والعداوات فالحياة قصيره
ولا اريد ان يضيع عمري بتغيير طبائع بعض البشر فهم خلقوا هكذا
ولا يغير الله طبائعهم إلا بـ أمر منه وحدهُ ومتى اراد ذلك ..

قلت هذا الكلام لاني صادفت بحياتي ناس اشكالهم اشكال بشر
لكن طبائعهم طبائع الثعالب يتظاهرون عكس مايبطنون
كفانا الله شرهم وخبثهم فهم موجودون بكل مكان ومجتمع وعائله ..

[سحايب شماليه]

تصدقون هذي ثاني مره اروح لديرتي حائل اجازه واصاب بِالكورونا
انا وعيالي وزوجي منعزلين عن العالم اللي حولنا الحمدلله على قضاءه وقدره
لكن فيه شيء يحزن ويضحك والله الشيء اللي يحزن اني وعيالي
معزولين بالبيت وبوقت اجازه والناس متجمعه ومناسبات
والشيء اللي يضحك ان ولد خالي تزوج قبل البارح ولا حضرنا زواجه
لأننا متكرونين والمشكله المعرس واهله متكرونين وعازمين الناس من زمان
واكثرهم عارفين لكن ماهمهم اهم شيء الوناسه يبون الطرب والوناسه
مو هنا المشكله المشكله العروس المسكينه بيعطيها ولد خالي كورونا طازجه
ياحظها الشين والله رحمتها ليلتهم متكرونه اللهم لاشماته ياولد خالي
واحد من اخواني راح لزواجه وعارف انهم فيهم كورونا والكل حضر هههههههه
ويعرضون العرضه الحائليه ومبسوطين اهلاً اهلاً كورونا:MonTaseR_158:
اصلا تلعب معهم بالسيف كورونا بالزاويه وتضحك على هبالهم :iqf03163::icon10:

[سحايب شماليه]

إنا لله وإنا إليه راجعون
‏توفيت قبل أمس بنت خالتي الله يرحمها ..
‏دعواتكم لها بالرحمة والمغفرة والرضوان .
‏اللهم اغفر لها وارحمها وارضَ عنها وأسكنها فردوسك الأعلى
برحمتك يا أرحم الراحمين …

سبحان الله ماكان فيها شيء كان عندها عشاء بالبيت
واجتمعوا عندها خواتها وسوت عشاهم واخر الليل قبل الفجر
تعبت وقالت لبنتها وديني المستشفى وبالطريق توفت
ماوصلت المستشفى يارب ترحمها موتها فجيعه لنا
خاصه ان اخوها ولد خالتي قبل رمضان توفى وهي لحقته لدار الحق :eiwp:
واللي حزني زياده اني ماقدرت اروح اعزيهم لاني لس تعبانه
بس كلمتهم وعزيتهم وصاروا خواتها بنات خالتي هم اللي يهدوني
ماقدرت امسك نفسي من الصيحه خنقتني العبره مااحب هالمواقف
الله يبعد عنا الأحزان ولا يفجعنا بغالي يارب
وترحم جميع امواتنا واموات المسلمين ..

[سحايب شماليه]

اللهم في يوم الجمعة :
أجبر قلوب الفاقدين وكسر المشتاقين وتولهم يالله بلطفك وعنايتك وحنانك،،
وارزقنا وارزقهم من اليقين ماتهون به علينا مصائب الدنيا،،
واكتب لنا ولهم لقاء أبدي لا ينقطع في جنتك يا أكرم الأكرمين …

[سحايب شماليه]

كن على طبيعتك ولا تهتم لرأي الناس
لقد خلقك الله على ما أنت عليه لحكمة ..

[سحايب شماليه]

اعضاء مسك يالله تمسيهم بالخيرات والمسرات

نطوى سنة مرت بها هموم وافراح
ونبدا السنه هذي عساها سعيده

جعل الهموم اللي من العام تنزاح
ونلقا السعاده في سنتنا الجديده

لشاعرها ..

[سحايب شماليه]

معظم أجواء السعوديه اليوم ماشاءالله امطار وخير وبركه
الله يجعلها امطار خير ورحمه للبلاد والعباد ..

[سحايب شماليه]

يا حلوها المرحلة اللي ما تعاتب أحد
‏من طاب طيبه عليه ومن شان شينه عليه


أنا الآن وصلت لهذهِ المرحله :icon10:

[سحايب شماليه]

يُقال :
ليس عليك تبرير كل شيء، ولا تنشغل بتشكيك أحد ،،
من يحبك يعرف الخير فيك، ومن يبغضك لن تستطيع أن ترضيه .
‏وتأكد أنك مهما فعلت لن ترضي الجميع أبدًا ..

[سحايب شماليه]

صباحكم كرائحة القهوة والبخور وألوان الورود المُزهره
صباحكم الأشياء المشرقة واللحظات التي تخلق فينا روح البهجة

ونقول صباح الخير مع انه قرب وقت الظهر :icon10:
عوده بعد انقطاع شهرين :MonTaseR_11:

[سحايب شماليه]

قبل سنوات مضت من عمري بالمنتديات كنت شعلة من النشاط
مااخلي قسم ماادخله واناقش وارد على كل شارده ووارده
وعندي طولت بال وتحمل وخاصه قسم النقاش والاخباري
وخاصه اللي تخص القضايا الاجتماعيه اللي تخص المرأه وجيل الشباب
لكن الآن فقدت الشقف والدخول بالمناقشات ماتحمل خلاص
كل شيء له وقت وله طاقه لان احيانا بعض النقاشات تدخل فيها بمتاهات
وبعض النقاشات عقيمه وتسبب بعض العداوات او التحسس بين الاعضاء
خاصه انها تحدث من خلف شاشات ولا تعرف هالأشخاص من اي نوع هم من البشر ..
كنت زمان بمنتدى وفيه بقسم النقاش موضوع وكنا نرد ونعلق على الموضوع
وكان فيه واحد ردوده مره تجذب و عقلاني ونقول عنه حكيم ورزين ويالهُ من نابغه
بعد فتره عرفته طلع من الجماعه وزوجته بنت عم امي وبعيده عنه كل هالصفات السابقه
ياربي كيف من خلف الشاشات ننخدع بأشخاص لو نعرفهم على طبيعتهم
كان لجمناهم وسدينا افواههم وقلنا انتم آخر من يتكلم بالفضيله والحكمه
والعقل والاتزان انتم حثاله المجتمع وتخدعون البعض بكلماتكم البراقه
صدق المثل اللي يقول ماكل مايلمع ذهب
لكن احيانا يقولون اخذوا الحكمه من افواه المجانين :icon10:

اهل قسم النقاش لاتزعلون انا قلت البعض
والبعض والنعم فيهم ونستفيد منهم ونتعلم

مايستفاد مما سبق لاتنخدعون بـ اشخاص خلف شاشه وكيبورد
مادري وش خلاني اكتب هذا الآن
المهم لاتشدونها حيل بالنقاشات وآخرتها يشطب على نكاتكم
على شيء مايسوى ولا راح تصلحون العالم :icon10:

[سحايب شماليه]

مساء الخير :67:
لا أحد يمتلك حياة كاملة ولا قلباً خالياً ولا رأساً خفيفاً من الأعباء
ولكن هناك من يسأل الله راحة البال ثم يتوكل عليه ..

اسأل الله لكم راحة البال والسعاده التامه لِـ ارواحكم الطيبه :67:

[سحايب شماليه]

من مدونة الاخت سحايب...واقول
الكتابه وانا اخوك فالمنتديات فرصة تعطى للشخص لكي يتخلص من تفاهته و سخافته التي هو عليها في الحياة اليومية الواقعية.
هنا عنده الوقت الكافي للمراجعه والتنقيح وانتقاء مايريد بعيد عن الحوارات المباشره فالحياه الواقعيه والتي تستنفزفه فيتفوه بالحماقه وبما
هو عليه فعليا ...!
يعني حبيت اوضح هالنقطه ولا انسي طبعا...
ياحسين انا عيني سهيره ماتذوق المنام ..
السطر اللي فوق مال ابو اومه علاقه فالرد لكن كما سبقت الاشاره اليه هالشطر يجي معك ويروح معك هههه


وبس

هو صحيح انه لما يكون جالس امام كيبورد وشاشه
ويتحدث بما يريد ولا احد يعرفه يعطيه راحه واسترسال بالكلام
ويمكن انه يتمنى ان تكون هذي اخلاقه الاساسيه بالواقع
لكن الظروف تجبره يكون بصفات معينه لكن هذا يعتبر ابو وجهين
وش ذنبنا اننا نعتبره اخلاق ومهذب ونظن ان هذا الشخص هو نفسه بالواقع
و ماهو لابس قناع التزييف ويمثل علينا الطيبه والرجوله والاخلاق
وهو من جنبها على العموم كل واحد ينام على الجنب اللي تريحه
بس لاتنخدعون بالكلمات الرنانه والمنمغه
الحمدلله اني من خلف الشاشات وايمنها وايسرها
انا سحايب هنا وبالواقع لكن اني متحفظه قليلاً ..

اساسا ماانسى اغنية ياحسين :icon10:
احكيلك قصه مره من المرات امي الله يرحمها وخالتي
وقريباتهن متجمعات بالعيد ويغنن ومشتطات بالرقص
وجا الشطر اللي يقول وامشي وادور خيمته ياحسين بين الخيام :MonTaseR_25:
خالتي ردت تقول ياعل ماله خيمه قليل الخاتمه ههههههههههه
تقصد زوجها ولد عمها متزوج عليها :PV503112:
ماكملوا رقصهم من الضحك عليها :iqf03163:

الـ 7 اللي تحت ارحبوا تراحيب المطر
حياكم الله منورين مدونتي البيت بيتكم ومحلكم :MonTaseR_2:

[سحايب شماليه]

توسَد الغيم ، يا احساسي النادر
‏مكانك الغيم دون الغيم لاترضى ..

[سحايب شماليه]

بعض الابيات كأنها تصف المشهد وحالتك !

صحّت الذكرى : طعوني
‏والفرح عابر سبيل !
‏.
‏من متى نامت عيوني ؟
‏والسهر باله طويل !


لسلطان المسما

[سحايب شماليه]

صباح الأمل بـ الله والطمأنينة في ظله والثقة بما عنده
اللهم اكتب لنا الخير في هذا الصباح :Dl3:

صبحكم الله بالخيرات :MonTaseR_222:

[سحايب شماليه]

‏أحمد حلمي قال عبارة صادقة جدًا ومعبرة وهي :
‏سنك في البطاقة غير سنك في المرايا
غير سنك مع حد بتحبه ،، غير سنك وأنت فرحان
غير سنك وأنت زعلان ،، جوا عمرك عمر تاني ..

الراجل ده بيقول كلام زي الفل :MonTaseR_61:

[سحايب شماليه]

قسم بالله اذا دخلت ببعض البثوث في التك توك
يجيني شد عضل بالقلب وغثيان من اللي اشوفه واسمعه
خاصه اللي يبثون عن التعدد وزواج المسيار مادري وش هالتفاهه فيهم
يستغلون المطلقات وبعض البنات اللي كبروا وماتزوجوا ليش يسترخصونهم
هم ماعندهم خوات وبنات ويمكن يمرون بنفس الظروف
المشكله اكثرهم اللي يبون التعدد شياب وماهم قادرين
يعطون الزوجه الاولى حقوقها الشرعيه كيف بيتزوج ثانيه
سواء مسيار او معلن والمر والادهى يقولون مهرهم غالي
واحد منهم يقول ليش الاباء يرفعون المهر نبي المهر يكون قليل
مثل 500 ريال او ألف هل هذا يعقل ليه هو شاري له اسطوانة غاز !
هالاشخاص مرض على مجتمعنا يخربون البيوت ببثوثهم المدمره
المهر حق من حقوق المرأه الشرعيه سواء مرتفع او قليل ولا احد يساومها عليه
هم اذا ارادوا السفر والتمشي صرفوا اللي وراهم ودونهم
على تمشيه كم يوم ويرجع او اشترى سياره ودفع فيها الشيء الكثير
وهي قطعة حديده فما بالك بزوجه تعيش معها العمر كله وتحفظ عرضك
ومالك وتنجب لك الاولاد وتربيهم لك ..
ولا ويجيك بعد واحد سوسه نخره بالعظم يدعوا للزواج من برا بلدك
هذا سالفته سالفه يبيلهم جلسات علاجيه هالاشخاص لانهم مغسول مخهم ..
والعجيز الحكيمه سحايب تقول حكمه اسمعوها
اذا اكلت اكل من زرع ارضك واللي ياكل من برا ارضه
راح يجيه بالتالي تلبد بالمعده وعصر هضم ..
حتى البنت اللي ترغب بالزواج من برا بلدها تسمع للحكمه

عاد فيه اشخاص عندهم ظروف خاصه انهم يتزوجون من برا
لكن اللي ماعنده ظروف ليش تروح برا بلدك وتتزوج
الحمدلله ان دولتنا الله يعزها تمنع الزواج من برا
إلا بعض الاشخاص يسمح لهم

كتبته الآن بلهجتي وبدون مراجعه لاحد يدقق لاني تعبت :icon10:

الوكاد لو حقين البثوث بعضهم يتم مراقبتهم
لانهم خراب على المجتمع والعوائل
صحيح فيه بعض البثوث اصحابها نستفيد منهم ونتشرف بمتابعتهم
لكن البعض دمار وخاصه ان الصغير والكبير يتابع هالبرنامج

[سحايب شماليه]

‏الله يجعل الأقدار الحلوة ترافق دروبنا دائمًا ..

تصبحون على خير

[سحايب شماليه]

صباح الخير ..
‏لكل من استيقظ وقلبه لا يحمل إلا الحب والإحترام والخير لمن حوله ..
‏صباح النعم الجميلة من الله .. والتي يعجز التفكير عن إدراك روعتها وشكرها ..
‏الحمد لك ربي والرضا بما قسمته لنا ..
:
عوده بعد غياب مع ان مافيه احد افتقدني
لكن مشتاقه لجدران المنتدى فقط مو لكم
لان مافيه احد افتقدني :icon10:

[سحايب شماليه]

يُقال ان أصحاب الشخصيات المستقلة :
هم اشخاص يعتمدون بأغلب شؤون حياتهم على انفسهم
ولا يحبون ان يطلبون مساعدة أحد ..
‏هذه الشخصية تعرف بعدم قدرتها على المجاملات ،
كما أنهم لا يستطيعون تقديم التنازلات على حساب كرامتهم
لأجل الحصول على مصلحه من أحد !
‏الحياة ستعلمهم الكثير من الدروس .!

[سحايب شماليه]

جوالي هاليومين عباره عن مقاطع وصور عن امطار حائل
و انا جالسه طبعاً مقهوره واتحلطم ابي اروح لهم
لكن هالعطله ماراح اقدر اسافر لهم جالسه بالشرقيه
والقلب سافر لهم مع الطيور الطايره :MonTaseR_203:

[سحايب شماليه]

مساءكم سعادة وهناء وأجواء جميلة..
مساءكم ليالي واجواء شهر ديسمبر المحبب لقلبي
كم اعشق هذا الشهر من فصول السنه
عشقي لهُ يضاهي عشقي لفصل الربيع
الله يديم علينا هالأجواء الجميله

اخباركم اشتقت لكم نفر نفر
هاه شبيتوا الضو وجلستوا جنبه وانتم تستمعون
لصوت الحطب وهو يطقطق من قوة لهب النار
لا يكون شربتوا حليب بالزنجبيل او شاي كرك ومابقيتوا لي :icon10:
شكل فاتني هنا الكثير من الفعاليات وأنا غايبه :MonTaseR_98:

[سحايب شماليه]

يقول الشيخ المغامسي :

‏من يعاني من تعثر أمور حياته و يخشى من شيء فليردد
"اللهم ياولي نعمتي و ياملاذي عند كربتي
أجعل ماأخافهُ و أحذره برداً و سلاماً عليّ
كما جعلت النار برداً و سلاماً على إبراهيم"


تصبحون على خير

[سحايب شماليه]

ابطيت ياريح المطر حي جيتك
وحي الشعور اللي بجيتك جانا

اهداء لنفسي :icon10:

صباح الخير والفل والكادي :MonTaseR_11:

[سحايب شماليه]

صايره نادر ماادخل المنتدى ويفوتني الشيء الكثير
حتى اللي يقيموني مارديت عليهم من زمان
احس مالي وجه بعد هالفتره ارد عليهم :icon10:
المشكله اني ماادخل غير مسك الغلا عندي حب وولاء له
انا من النوع إلا ماكتب إلا بمنتدى واحد اذا ارتحت له
مااعرف اروح واكتب فيه نفس اللي اكتبه هنا
خلاص طبع فيني واستغرب من اللي يكتب هنا
ويروح لموقع آخر ويكتب نفس اللي كتب هنا :icon10:
ودي كل يوم ادخل هنا واتابع كل مايكتب هنا
لكن أنا يالله ادخل هنا يوم واغيب شهر :eiwp:
صاير وقتي ضيق بس ان شاءالله الايام الجايه مااغيب واجد
:نبض: :نبض:

[سحايب شماليه]

انا شبيت الضو وسويت حليب بالزنجبيل بس ابطيتي علينا وشربته عاد معليش نسوي لك غيره هههههه.. الله يسعدك تسلمين ع دعواتك وعسى الله يحقق كل امنياتك


بالعافيه عليك عاد يالله أنا جيت ابي الحليب :icon10:
لا يكون بعد شربتيه مره ثانيه ولا انتظرتيني ههههههه
اللهم آمين وياكِ

[سحايب شماليه]

لا تثق كثيراً بمكانتك في قلوب الناس
تستيقظ الناس كل يوم بمشاعر مختلفة ،،
تتغيّر نظرتهم بإستمرار، تتقلّب عواطفم في لحظة ،،
قد يتخلون عنك لأتفه سبب ، قد يحبوك حين تكون بقربهم
لكن ما إن تغيب عنهم يوم أو إثنان
حتى تجدهم قد نسوك أو إستبدلوك بآخرين،،
صديقي الناس مراحل وليست بيوت، قد تطول مرحلة عن الاخرى
لكنك في نهاية المطاف ستعود إلى منزلك وحيداً…


راقت لي …

مساء المحبه وليالي ديسمبر البارده
يازين أيام وليالي الشتاء :Dl3:

[سحايب شماليه]

سأل أحدهم جلال الدين الرومي
‏ نراك تقرأ وتكتب كثيراً فماذا عرفت ؟
‏قال :
‏عرفت حدودي ..

[سحايب شماليه]

إلى هنا وتنتهي جولتي برحاب مسك
ان شاءالله اعود غداً :MonTaseR_11:
يارب مااطلع كذوب وارجع هنا مو اغيب شهر :icon10:

[سحايب شماليه]

ياربّ أنت المعين وبك النفس تستعين ..

صباح الخير :Dl3:

[سحايب شماليه]

سحايب شمالية منورة
فديت الطلة
عاد ع طاري اللي يكتبون
بـ أكثر من منتدا
ذولي حتى مشاعرهم متعددة الاستخدام

المهم لاعاد تبطين والله انك ملح المكان


هلا بك ياشمعة الدار
والله ضحكتيني بتعليقك على متعددة الاستخدام :icon10:
بعتبره تنمر على مشاعرهم هالصباح :iqf03163:
بحاول مااغيب ودخولي هالوقت اعتبره انجاز :wed16:
لبا روحك وقلبك :Dl3:



يؤسفني اقولك اني شربته وللمره الثانيه ههههه



ماتفقنا كذا صايره بخيله حتى كوب الحليب طمعتي فيه :icon10:
طيب جغمه خليلي هههههه :MonTaseR_148:

شكلي معاد بسوي لك معاي !


خلاص هونت مابي اخاف اشرق فيه :icon10:


يازينك انتي .. البرد وليالي ديسمبر مانحبه ولا نبيه ! يسعدلي روحك


الزين انتي بس الشطر الاخير ماهو حلو :icon10:
ليه ماتحبين شهر ديسمبر ياختي هو فيه احسن منه :MonTaseR_153:
ويسعدك يافراشة المنتدى :Dl3:



صباحك سعادة وسرور وتباشير .. أثلج صدري مرورك الله يسعدك


وصباحك هنا وسرور ..
من دواعي سروري الله يوفقك ويحفظك

[سحايب شماليه]

ماعرفتك وانتي داخله يومين ورا بعض؟؟ اعترفي هل انتي سحايب الاصليه صاحبة المعرف؟؟

.. يسعد صباحك


ههههههههههه
لا مو سحايب شماليه معك المتهكره سحايب الجنوبيه :icon10:
شفتي شلون شهر ديسمبر حلو
حتى اعداداتي تهكرت وصرت ادخل الصباح :iqf03163:

وصباحك سعاده هنوده:67:


صباح النور غاليتي منورة المكان بوجودك


صباحك فرح وسرور
بوجودك النور الله يسعد قلبك اختي عطاء دائم