المساعد الشخصي الرقمي

مشاهدة النسخة كاملة : روحٌ هادِئة و نفسٌ لاترغبُ إلا بِالسلام .


الصفحات : [1] 2 3 4

روحَ
11-24-21, 04:09 PM
قد تدعي الهدوء
بينما في عقلك احتفال صاخب ..!


............



السلام عليكم

مساء النور =)

مدري كيف وشلون وصلت لـ هالمنتدى ! :MonTaseR_43:

أمس كنت حاسة بملل
وكنت أبي مساحة خاصة أكتب فيها ما يجول في خاطري
و فجأة قررت أبحث عن منتدى و وقع الاختيار على هذا المنتدى :110:

الغريب أني تقبلته على طول و هذا شي نادر :m42:

غالباً أثق في حدسي بنسبة ٩٠ ٪ في اختيار الأماكن والأشخاص
وأما الـ ١٠ ٪ هذي أجيب فيها العيد باختياراتي :icon10:

لكن إن شاء الله ما يخيب ظني هالمرة =)


المهم
تواجدي بيكون على حسب وقتي ومزاجي الحلو جداً:DsC00581:


وبس

أهلاً بكم في مدونتي :MonTaseR_1:

روحَ
11-26-21, 03:33 PM
من أمس وأنا أحاول أكتب كلمتين بس مو قادرة
ما أعرف ليش !
مع أني بالعادة أكون تلقائية
وعادي أكتب بدون ما أفكر كثير !

بسم الله .. مدري شفيني :)


المهم

شكراً على التقييم والترحيب
تسلمون ع الكلام الطيب .. ربي يسعدكم

وشكراً على اللايكات =)

منورين :MonTaseR_7:

روحَ
11-26-21, 06:02 PM
راقب أصحاب الطاقات العالية تجاهك
من الخطورة أن ينفروا منك ..
راقب أصحاب الطاقات النازلة
من الخطورة أن يحبون قربك ..
هذه مؤشرات دقيقة

د- صلاح الراشد

روحَ
11-26-21, 06:15 PM
مريت على منتدى قبل هذا
و كان لون الاستايل أسود
ما قدرت أتقبله أبداً
حسيت نفسي كأني داخله كهف مظلم
كان ودي أقولهم شغلوا الأنوار لو سمحتوا

طبعاً مالي دخل أصلاً بكيفهم
أنا بس أقول رايي :DsC00581:

ما أحب السواد
يحسسني أن المكان صغير وضيق
أحب اللون الأبيض لما يكون مسيطر
يعطيني شعور أن المكان واسع

لما شفت الاستايل الأسود تذكرت قصة " كهف أفلاطون "
مدري إذا في حد يعرفها ولا
بتحصلونها على اليوتيوب

حلوة القصة
تتكلم عن الحقيقة و الوهم =)

روحَ
11-29-21, 08:01 PM
الأشخاص الأجمل من بين الذين قابلتهم
هم أولئك الذين عرفوا الهزيمة والكفاح والعذاب والخسارة،
ووجدوا طريقتهم الخاصة للخروج من الأعماق السحيقة ،
هؤلاء الأشخاص لهم رؤيتهم وحساسيتهم وفهمهم للحياة ..
يملؤهم التعاطف والتواضع والبساطة، والقلق المحب العميق ،
الأشخاص الجميلون لا يأتون من لا شيء.
.
-إليزابيث كوبلر روس

روحَ
11-29-21, 11:16 PM
من يعرف إيهام الجماهير ، يصبح سيداً لهم ،
ومن يحاول قشع الأوهام عن أعينهم ، يصبح ضحية لهم .

روحَ
11-30-21, 06:53 PM
في معلومة تقول
إذا كرهت شيء و ركزت عليه راح تجذبه لواقعك
يعني مثلاً :-
شخص كان يكره نوع معين من البنات وما يحب صفاتها
و يقول مستحيل آخذ وحدة مثل هذي
وفي النهاية ياخذ وحدة مثلها وفيها كل الصفات اللي يكرهها
طبعاً هذا لأن هو مركز على الصفات اللي يكرهها

أنا لي وجهة نظر ثانية بعد
أظن أنك لما تحتقر أي شخصية
احتمال كبير أنك راح تُبتلى مثل هالشخصية
وبعدها راح تفهم ليش هي كذا
ولما تفهمها راح تتقبل اختلافها وما راح تكرهها

المهم
لما عرفت المعلومة اللي تتكلم عن " التركيز "
قررت أكتب كل الصفات اللي أحبها وأحب أنها تكون موجودة ف الناس
لأن الكتابة تساعد في موضوع التركيز
كان عندي دفتر وكتبت فيه كل الصفات
وبعدين نسيت موضوع الدفتر

ومرت الأيام و ظهروا ناس فيهم نفس الصفات بالضبط
ولما شفت الصفات تذكرت كل شي كتبته
سبحان الله
يعني موضوع التركيز طلع حقيقي

* ركز على الأشياء الحلوة وراح تجذبها
وإذا ركزت على الأشياء السيئة راح تجذبها

وبس
هذا من تجربتي =)

روحَ
12-01-21, 05:34 PM
ذكرتيني بوحده كانت دايما تقول مستحيل اتزوج واحد عنده كرشه(سمين) وسبحان الله تقدملها شخص جدا سمين ..واقنعوها فيه واقتنعت ..وفاقت وانتبهت بعد ما تم الزواج ..ممكن هذي القصه لها علاقه بموضوعك والله ..سبحان الله شي عجيب
بالضبط نفس القصة
هي ركزت على الشي اللي ما تحبه وجابته لنفسها :69:


أهم شي انتبهوا على الكلام اللي تقولونه
وحتى الخيال
التخيلات السلبية تصير حقيقة
ركزوا خيالكم على كل شي حلو وجميل وتحبونه فقط

شوفوا هالمقطع يتكلم عن الخيال
https://youtu.be/vrz_bl5IAn8

روحَ
12-01-21, 08:07 PM
"لا أحبّ المنافسة حتى وإن كنت أعرف جدارتي،
ولطالما كرهت الركض من أجل السباق،
وأحببت المشي من أجل الفوز برفقة نفسي."

روحَ
12-01-21, 08:25 PM
طلع موضوع التركيز أصعب مما كنت أتوقع
شوفوا فوق
كتبت " لا أحب المنافسة " :19:

الله يستر
شكلي بدخل في منافسة قريباً :MonTaseR_203:


بس صدق أحب أختار راحة بالي
وأحاول أتجنب المنافسات والمشاكل
يعني مالي خلق

روحَ
12-01-21, 10:35 PM
في يوم من الأيام كنت مشاركة في منتدى
وكان فيه ناس أشرار يضايقوني
يفسرون كلامي على كيفهم ويغلطون علي
وبعدين يعيشون الدور أنهم مظلومين ومساكين وأنا الشريرة
يعني نظامهم " ضربني وبكى سبقني واشتكى "

من كثر ما أذوني وتضايقت منهم
قلت يااارب يتقفل المنتدى أحسن >> قلتها وأنا معصبة والله
وشكلها كانت ساعة استجابة
ودعوة المظلوم مستجابة
وتقفل المنتدى على طول وإلى الآن بعده ما رجع

أهم شي أني ارتحت من الأشرار =)

ما يستفاد من هالقصة :-
كل شي ولا زعلي بعدين الدنيا كلها تقفل :MonTaseR_211:

روحَ
12-02-21, 01:07 PM
المعنى الصحيح لمفهوم غض البصر
https://youtu.be/WSDuJzMyL8c

المشكلة مو في النظرة
المشكلة في الطريقة اللي تنظر فيها
والطريقة اللي تفكر فيها

يعني في شخصين
واحد يحترم المرأة وينظر لها بنظرة محترمة
وما يركز ويدقق كثير ولا يروح تفكيره لبعيد
هذا راح يحترم المرأة كيف ما كانت لأن هو محترم

وشخص ثاني ما يحترم المرأة
ونظرته لها مو محترمة ويركز ويدقق وتفكيره يروح لبعيد
هذا عنده مشكلة في طريقة التفكير
وهذا حتى لو الوحدة متغطية بالكامل راح ينظر لها بنفس النظرة
وحتى لو قدامه طفلة بعد يشوفها بنظرة مو محترمة وممكن يتحرش فيها
وكلنا شفنا وسمعنا قصص صح ولا ؟

من وجهة نظري
لازم يكون في قوانين صارمة تمنع الإساءة للمرأة
وتجبر مثل هالفئة أنهم يحترمونها
لأن لما يكون في تساهل في القوانين
راح يكون في عدم إحترام وتمادي وأذية

وبس

روحَ
12-02-21, 01:16 PM
حتى المحبين في فرق بنظرتهم للمرأة
واحد لما يتكلم عن اللي يحبها يقول كلام عادي ومحترم
لأن ما يشوف المرأة جسد فقط
يشوفها إنسانة وروح وعقل ومشاعر ويحترمها

والثاني يوصفها بطريقة مو محترمة
وكلامه قليل أدب وغزله فاحش لأن يشوفها جسد فقط

روحَ
12-02-21, 03:12 PM
مرة سمعت كلام عجبني وأحس أنه صح
الكلام يقول أنه في " خيط غير مرئي " يربطك بأشخاص
يمكن يكونون قريبين أو بعيدين
لكن يمكن أنت بعدك ما قابلتهم
وفي يوم من الأيام راح تقابلهم
وراح يكون لهم تأثير عليك
ممكن يغيرون نظرتك لأشياء ويعلمونك أشياء
وممكن يكونون السبب في تغييرك للأفضل

هذول الناس لما تشوفهم من أول مرة تحس كأنك تعرفهم
وشكلهم مألوف وكأنك شايفهم بمكان بس ما تدري وين
ولما يتكلمون تحس كأنهم يقصدونك
وكأن كلامهم موجه لك أنت بالذات
وكأن الكلام رسالة وصلت في الوقت المناسب وكنت تحتاج تعرفها وتفهمها

بعضهم راح يوصل لك الرسالة وبعدها يختفي من حياتك
وبعضهم راح يمكل معاك للآخر ..

اللي يختفي يعني خلاص رسالته انتهت
ركز على الناس الجدد والرسائل اللي بتوصلك منهم
وخذ اللي يناسبك وينفعك وكمل طريقك ..

روحَ
12-02-21, 09:05 PM
اليوم مستانسة جداً
لأن جيراننا فرحانين
عندهم احتفال وفعاليات
حبيت أجوائهم
وأحس مشاعر البهجة وصلت لين عندي

أحب أشوف ناس فرحانين
طاقة السعادة عالية اليوم

أنا قاعدة في بيتنا
بس أشاركهم الفرحة وجدانيا وكذا :icon10:

روحَ
12-04-21, 07:05 AM
حلو لما تكون نظرتنا للعالم نظرة طفل صغير بريء ولطيف
ما أحب تفكير الكبار غالباً معقدين وتفكيرهم سطحي
>> على أساس أني صغيرة 🙂

صح أني مو صغيرة بس تفكيرهم يجلطني
في بعض الأشياء مو كل شي
أحس يعقدون المواضيع وهي بسيطة وسهلة
الحياة أبسط من كل هالتعقيدات !

من أمس وأنا زعلانة وأحس قلبي مجروح 💔
وما عرفت أنام من الصداع اللي جاني
ما أحب أحد يعاملني بدفاشة 🥺

أنا عادي ممكن أتقبل الكلام حتى لو مو نفس رايي
وما أكره ل مثل هالاسباب ولا أحقد
لكن ما أتقبل الأسلوب القاسي أبداً 😕

روحَ
12-04-21, 12:33 PM
أبي أتكلم عن موضوع " الدفاع عن النفس "

بسم الله .. نبدأ التفلسف :icon10:

الوضع الطبيعي لما أي إنسان يتعرض للخطر
سواء رجل أو امرأة أو صغير أو كبير
راح يحس بالخوف ويرتفع هرمون الادرينالين
وبتصير عنده شجاعة مو طبيعية وبصير يدافع عن نفسه بكل قوته
لأن يمكن تكون المسألة حياة أو موت
ف لازم ينقذ نفسه بأي طريقة

هذا الوضع الطبيعي صح ولا لا ؟

ل هالسبب أنا أشوف شي طبيعي و ضروري أن المرأة والطفل
يتعلمون كيف يدافعون عن نفسهم على حسب قدراتهم
لأن الرجل يمكن ما يكون موجود دايماً عشان يدافع عنهم

اللي يتعرض للخطر وما يدافع عن نفسه
هذا مو طبيعي
ما يصير يستسلم للضعف وينهزم وينتظر غيره يساعده
نحن مو في الجنة
نحن في الدنيا
والدنيا فيها ناس مفترسين
وإذا لم تكن ذئب أكلتك الذئاب
ف القوة شي ضروري ومهم
والقوة ما تغلي الرقة ولا اللطافة ولا الحنية

حتى الرجال فيهم اللي يكون قوي بس رقيق القلب ولطيف
مثل شخصية عمر بن الخطاب رضي الله عنه
كان قوي وهيبة مع هذا قلبه رقيق

أنا مو إني مع هالشي
لدرجة التشبه بالرجال ويصير عندك عضلات ولا أني ضد

أنا مع الحل الوسط فقط .. =)

روحَ
12-05-21, 08:57 PM
تدرون أحس أن لقاح كورونا فيه شي مو طبيعي
من خذته وأنا مو طبيعية
أكثر شي أحس ب ضبابية في التفكير وتشتت
ولخبطة في النوم
حتى طاقتي مو نفس قبل

مدري إذا في حد مثلي ولا بس أنا ؟

> عندي مواضيع أبي أتكلم عنها
بس التركيز صاير صعب :69:

روحَ
12-06-21, 08:56 AM
ما يعجبني التشدد الزايد
خير الأمور الوسط
نقدر ناخذ من الغرب الأشياء اللي تنفع ونطنش الباقي
بس مو أننا نرفض كل شي وما نعطي نفسنا مجال نجرب حتى
عادي نجرب بعض الأشياء ونشوف إذا تناسبنا ولا
أهم شي نكون مقتنعين في النهاية

إذا كان الشخص متشدد جداً
لازم يمر بتجارب مع الناس المنفتحين بزيادة
وبعدها راح يصير متفهم ويختار الحل الوسط

والمنفتحين بزيادة راح يتعلمون شوي من المتشددين
ويصيرون يحطون حدود وضوابط لكل شي

وبكذا راح يصير في توازن
دايماً هذا الشي اللي يصير بكل مكان وكل زمان
وهذا الشي اللي ألاحظه

روحَ
12-06-21, 12:59 PM
خمسة تجاهلهم ولا حرج :
1. شخص يرى مصيبته ابتلاءً، ومصيبتك عقوبة!
‏2. شخص يرى خطأه اجتهاداً يؤجر عليه، وخطأك ذنباً تعاقب عليه!
‏3. شخص أخطأ عليك، وانتظر اعتذارك!
‏4. شخص عفوت عنه، فظنك تخافه!
‏5. شخص تغافلت عن إساءاته، فظنك مغفلاً!

روحَ
12-06-21, 01:34 PM
لفت انتباهي هذا الكلام

فِ بريطانيا
‏هرب طالب من مدرسته ,
‏فاستقالت المديرة معتبرة أن هروب الطالب برهان فشلها !

‏كم شخص ينبغي أن يستقيل ..؟

~~~~

من وجهة نظري
كان لازم تحاول تعرف من وين المشكلة
و شنو الخطأ اللي لازم يتصلح
مو تستقيل على طول !
الاستقالة في مثل هالحالة = ضعف و استسلام

كيف بتصير مديرة ناجحة إذا ما واجهت المشاكل وفكرت بحلول ؟!

روحَ
12-06-21, 05:45 PM
الحمدلله اليوم صرت أفضل
وتركيزي صار أحسن وطاقتي رجعت

شربت شاي مع قرفة
وعلى طول لاحظت تحسن

مع أني ما كنت أعرف أنه يفيد
ومو دايم أشرب شاي مع قرفة

بس اليوم فجأة جاء على بالي
وشفت نفسي رايحة المطبخ وأبي شاي مدري ليش
بس الحمدلله نفع

الظاهر أن ضعف التركيز والتشتت
له علاقة بنقص المعادن
لأن سمعت قبل أنت المعادن إذا نقصت أو زادت
تأثر على الذاكرة والطاقة و المزاج وكل شي

القرفة فيها فيتامينات ومعادن

وبس
حبيت أكتب تجربتي يمكن حد يستفيد =)

والله أعلم

روحَ
12-07-21, 08:56 AM
في أشياء أحس أنها بديهية وما تحتاج نقاش طويل عريض
يعني مثلاً
الحين الإنسان لما يغض بصره
يغض بصره عن الشي المكشوف ولا عن الشي المغطى ؟
أكيد المكشوف
لأن لو كان مغطى ما بتكون في حاجة لغض البصر أصلاً

لكن مع هذا في النهاية أقول
كل حد يسوي الشي اللي مقتنع فيه
لأن يمكن في بعض الدول ما عندهم قوانين تحمي المرأة
ما عندهم وعي وفكرهم مو راقي
ف لازم المرأة تحمي نفسها وتتغطى بالكامل
لو تلبس درع حديدي بعد يكون أحسن يمكن حد يقتلها
لأن المرأة عندهم دايماً مستهدفة وشغلهم الشاغل

ما عندهم هدف في الحياة غيرها

روحَ
12-07-21, 04:32 PM
لما أي شخص ينجرح وينزف
صعب يكون على طبيعيته ويتغير على طول
يعني يتشتت و يتلخبط وتصرفاته تكون مو طبيعية
لأن تركيزه كله يصير على الجرح
حتى لما يتكلم كلامه ما راح يكون مرتب
وراح يبين أنه مرتبك أو يمكن يفقد قدرته على الكلام


نفس الشي لما يتعرض للتعنيف
معادن الجسم تتلخبط ويصير فيها نقص أو زيادة
وهالشي يغير الشخصية ويفقدها اتزانها
ويمكن يصير الشخص قاسي جداً أو بارد جداً وما يهمه شي

ل هالسبب أنا ما أحب اللي يعاملوني بقسوة
ويقولون عشان مصلحتك
مدري أي مصلحة ؟!
يعني تأذي الشخص وتقوله أنا أبي مصلحتك !

مثل بعض المعلمين اللي يضربون الطلاب
يحسبون نفسهم يبنون وأصلاً قاعدين يهدمون ..

روحَ
12-07-21, 10:10 PM
لاحظت أني في المنتدى نفس بيتنا
في البيت ما أطلع كثير من غرفتي
وفي المنتدى ما أطلع كثير من مدونتي
أحب الهدوء والانزواء
مع كتبي ودفاتري و أقلامي وأفكاري
وكل أشيائي الحلوة :zz:

بس عادي اللي يبي شي يجي غرفتي
وتصير غرفتي مقر الاجتماع :2:

وعندي أختي الصغيرة معاي بنفس الغرفة
طبعاً لأنها تحب تنشب فيني و ما تعيش بدوني :l:
دايماً أقولها هذي غرفتي أنا ما أتنازل عن ممتلكاتي
تقول خلاص انسي الموضوع صارت غرفتنا مو غرفتك وحدك :dddas:

بس مع هذا تعجبني وتضحكني
كأنها وزارة الترفيه وعندها كل المواهب :0741:

أنا أحس كأني وزارة العدل :MonTaseR_158:
لأني دايماً أحب أدافع وأحب العدل
خاصة الأطفال أكثر شي أدافع عنهم
آخر شي يقولون لي أنتِ مدلعتهم بزيادة
المشكلة أنهم يكسرون خاطري بسرعة إذا زعلوا أو بكوا :69:
عندهم واسطة قوية
كل شي منهم مقبول وعادي وما أزعل منهم

مرات أقول يا حظهم ياليتني بمكانهم

>> أصلاً عادي :DsC00581:

روحَ
12-08-21, 06:50 AM
احتفل بندوبك ، راقبها وهي تبرأ ،
لا تخشى ملاحظة الناس لها ،
لا تخشى من الحديث عنها إذا لزم الأمر
وشاهدها بعد ذلك وهي تتحول إلى ثقة دائمة
وقوة خاصة تطوعها في أيامك المختلفة

روحَ
12-08-21, 07:10 AM
إذا عندكم أي مشكلة تكلموا لا تسكتون وتكتمون
يمكن في حد يقدر ينفعكم
وإذا محد نفعكم يمكن يدعيلكم بظهر الغيب
وتنحل مشكلتكم

أنا لما تكلمت عن مشكلة التركيز والتشتت
" همس" قيمتني وقالت يمكن يكون من نقص الحديد أو فيتامين دال

ذكرتني بمعلومة كنت أعرفها بس نسيتها
الحديد إذا نقص ينقص معاه معدن الصوديوم
وإذا الصوديوم نقص يصير ما عندي طاقة
وبعد لما الصوديوم ينقص يرتفع البوتاسيوم ويسبب تشتت ولخبطة

معدن الصوديوم والبوتاسيوم لازم يكون بينهم توازن
إذا ما كان في توازن يصير عندكم مشاكل في المعدة

القهوة ترفع معدن الصوديوم
لكن إذا ارتفع بزيادة يسبب ألم في المعدة
لا تكثرون من القهوة

واللي عندهم نقص حديد ما تصلح لهم القهوة
لازم يركزون على الأكل اللي يرفع الصوديوم إذا كان ناقص و يبونه يرتفع

المهم
أنا شفت مقاطع ل " الكوتش هدى"
وهي اللي تتكلم عن علم المعادن

روحَ
12-08-21, 09:59 AM
اللي عندهم نقص حديد مثلي
خذوا حديد والتزموا فترة لأنه ما يرتفع بسرعة
ولأن حتى لو كنتوا محافظين على صلاتكم
وتسون أنواع العبادات بتحسون نفسكم تعبانين و ما عندكم طاقة
وما فيكم حماس
لما تاخذون الحديد ويرتفع على طول بتحسون بطاقة ونشاط وحيوية
ونفس الشي فيتامين دال

~> اسألوا مجرب :خجول:

روحَ
12-08-21, 10:03 AM
عش عفويتك تاركاً للناس إثم الظنون
ف لك أجرهم ولهم ذنب ما يعتقدون

~

روحَ
12-08-21, 11:12 AM
أعماهم الله عنك وعن جمالك وطيبِ
‏خصالك ، حتّى يفوز بكِ الأجدر ..

~~~

دايماً اللي ما يناسبوني يصير بيني وبينهم تنافر
أما اللي يناسبوني حتى عيوبي تصير عندهم مزايا

أنا أميل للعفويين أكثر شي
اللي ما يهمهم يثبتون للناس أنهم متواضعين
لأنهم يعرفون أن اللي يعرفهم ويحبهم
ما راح يفسر الثقة غرور ..

هذول أفهمهم بسرعة وبكل بساطة
ويفهموني بسرعة بدون شرح وكلام
وما أحتاج أبرر تصرفاتي لهم ..

روحَ
12-08-21, 11:18 AM
https://youtu.be/f18NvZ1xixk

تعجبني هذي البنت عفوية وصريحة وبريئة

في حد يزعل من هالبراءة ؟ :icon10:

بصراحة ما عندهم نظر اللي يزعلون :MonTaseR_112:

روحَ
12-08-21, 01:05 PM
" الإنسانية فوق كل شيء"
حتى الأنظمة والقوانين عادي نكسرها إذا الهدف إنساني
وفي الإسلام
" الضرورات تبيح المحظورات "
ليش؟
لأن نحن بشر وعندنا عقول ومشاعر وأحاسيس
مو مجرد روبوتات تطبق القوانين والأنظمة
بدون تفكير ولا احساس ولا شعور

أي شي يخليك مو إنسان ماله علاقة بدين الإسلام
هذا الدين بيكون من تأليفكم

مثال :
لما تشوف إنسانة تحتاج مساعدة
ويمكن أنت الوحيد اللي يقدر يساعدها
بتتركها بحجة أنها غريبة عنك
ولا بتساعدها لأن يمكن تموت لو ما ساعدتها ؟

الشعور الطبيعي والفطري
أن أي رجل لما يشوف إنسانة تحتاج مساعدة
راح يحس أنه يبي يساعدها وينقذها بأي طريقة
حتى لو أنكر هالشي وتجاهل شعوره

لكن بعض العقول مبرمجة أنه ما يصير تساعد
وهذا بسبب تأثير أفكار الغير وعاداتهم وتقاليدهم

المهم
أنك تبي تساعد
هذا الشعور ما بتحس فيه على الفاضي
بالعكس ما حسيت فيه إلا لأنه صادق
ويدل على أنك إنساني وشخص معدنه أصيل

ف ساعد اللي يحتاج إذا قدرت ولا تتردد
أهم شي النيه
وإذا الله يعرف نيتك محد يقدر يأذيك
أو يتهمك بشي مو فيك
لأن الله بيدافع عنك ويظهر براءتك

وبس والله
من زمان ودي أتكلم عن هالموضوع =)

روحَ
12-08-21, 01:16 PM
https://4.bp.blogspot.com/-hhHdLdKPPO0/W-nXjm7utJI/AAAAAAAABjY/F531CWstfeAt0j3wJ8WtzhHsVdhs2IeKwCLcBGAs/w1200-h630-p-k-no-nu/4462988_max.jpg

:dunno:

روحَ
12-08-21, 04:00 PM
تخيلوا لو أقولكم لا تاكلون ولا تشربون
واعتمدوا على الصلاة والقرآن فقط عشان تحصلون طاقة

هل هذا الكلام منطقي ؟ :m9:

طيب ليش في القرآن مكتوب " كلوا واشربوا "؟
لأن حتى الغذاء مهم للطاقة
أصلاً أول شي لازم تهتم بالغذاء و تاكل صح
وتعطي جسمك احتياجاته عشان تقدر توقف وتصلي

روحَ
12-08-21, 04:16 PM
معدن الزنك يخلينا عاطفيين
أنا ما أكثر من اللحوم والأسماك اللي تحتوي على معدن الزنك
ل هالسبب مو عاطفية كثير يعني مشاعري مو جياشة
أحس أني أغلب الوقت متحكمة بنفسي

شفتوا كيف حتى أن الغذاء يسوي كنترول للمشاعر :MonTaseR_212:

روحَ
12-08-21, 05:01 PM
من الصحابية التي دافعت عن الرسول صلى الله عليه وسلم في معركة أحد ؟

لم يشترك من نساء المسلمين في تلك المعركة إلا امرأة واحدة هي أم عمارة نسيبة بنت كعب النجارية الخزرجية فلما رأت النبي في أرض المعركة قد تكالب عليه أعداؤه من يمنة ويسرة رمت القراب التي كانت تسقي بها جرحى المسلمين، وأخذت تدافع عنه. فقال الرسول عنها: «"ما رأيت مثل ما رأيت من أم عمارة في ذلك اليوم، ألتفتُ يمنة وأم عمارة تذود عني، والتفت يسرة وأم عمارة تذود عني"» * وقال لها النبي في أرض المعركة: «"من يطيق ما تطيقين يا أم عمارة ؟! سليني يا أم عمارة"» قالت: «"أسألك رفقتك في الجنة يا رسول الله"» قال: «"أنتم رفقائي في الجنة .

روحَ
12-08-21, 05:50 PM
أهم شي ركزوا في الكلام
قال " رأيت "
يعني شافها

شافها ولا ما شافها ؟:MonTaseR_166:

روحَ
12-08-21, 09:43 PM
:MonTaseR_166::MonTaseR_166:
^
هذا الفيس شفيه كذا كأنه يبي يتهاوش ؟
ترا ما أبي أتهاوش لا تتحمسون
أنا أقول وجهة نظري فقط
بس اخترته كذا لأن شكله يضحك :icon10:

روحَ
12-08-21, 10:17 PM
نرجع لكلامنا عن المعادن
معدن الصوديوم مسؤول عن الطاقة والحيوية
والنشاط والشجاعة والمبادرة والجرأة وخفة الدم

يعني إذا حسيتوا دمكم صاير ثقيل ارفعوا معدن الصوديوم


أنا شكلي بدرس علم المعادن :s:

عجبني وأحسه سهل :MonTaseR_172:

روحَ
12-09-21, 12:14 AM
عندي شي صار من زمان و أحس أنه حماية من الله
في المواقف الصعبة والقوية ما أتأثر ولا أحس بشي
بس المواقف العادية أتأثر
لما قلت للدكتور قال عادي تصير و هذا حماية من الله
لأن يمكن أنتِ قلبك ما يقدر يتحمل الصدمة القوية
ويمكن تموتين لو كنتي تتأثرين

دكتور ثاني قال يمكن عندك شريان صغير مسدود في العقل
وهذا هو السبب البرود وعدم التأثر في المواقف الصعبة
وأحس كلامه صح

سبحان الله
هذا الشريان الصغير المسدود
هو اللي يحميني من كل الصدمات القوية حتى اليوم
>> ما ودي أعالجه عاجبني الوضع =)
يقولون سوي حجامة للرأس بس خفت وما سويها حتى الآن
أحس تعور والصور اللي شفتها ما تشجع :19:

رب ضارة نافعة مثل ما يقولون
والحمدلله أنا كنت راضية ومتأقلمة مع الوضع
أهم شي ما أتضايق كثير :MonTaseR_212:

روحَ
12-09-21, 06:18 AM
صباح الخير :MonTaseR_205:

بتكلم عن موضوع " النقاب "

أذكر مرة قرأت كلام لـ شخص يقول
أن النقاب يبرز جمال العيون و يخلي التركيز على العيون أكبر
يعني لما تلبسونه كأنكم تسوون إغراء بعيونكم
عكس لما تكون الوحدة محجبة ما يكون التركيز كبير على العيون
وما يبرز جمال العيون
لما قرأت هالكلام حسيت بشعور سيء جداً و تقرفت
رحت أدقق وأشوف شكلي وأنا بالنقاب
هل صدق يبرز جمال العيون ولا ؟
لأن ما كنت مفكرة ب هالشي ولا جاء على بالي
و لأن نظرتي مو كذا أبداً
بس لما ركزت شفت أنه فعلاً يبرز جمال العيون

أنا قبل ما تعمقت بموضوع النقاب وأحسبه واجب
بعدين عرفت أنه مو واجب هو فقط عادات وتقاليد

وبس

روحَ
12-09-21, 07:20 AM
# المكياج والزينة

المكياج نوعين
نوع يخفي العيوب فقط لكن ما يبرز الملامح
ومافيه زينه ولا يلفت الانتباه كأنك مو حاطة شي

والنوع الثاني المكياج اللي يبرز الملامح
مثل لما نحط كحل و روج وغيره
هذا اللي فيه زينة

وبس

يعني فرق بين هذا وهذا

روحَ
12-09-21, 08:49 AM
في الصفحة الأولى لما تكلمت عن الطاقة
كنت أقصد الطاقة الروحية ما أقصد الطاقة الجسدية
لكن بعض الناس مدري كيف فهموا
الله يهديهم

عادي تكون طاقتك الروحية عالية حتى لو أنك مريض
و شخص ثاني جسده قوي وصحته زينه
لكن طاقته الروحية ضعيفة
وهكذا ..

روحَ
12-09-21, 10:21 AM
أسلوبي مو عاجبك لا تتعامل معي
كلامي مو عاجبك لا تكلمني
شخصيتي تستفزك تجاهلني
تحكم في نفسك مو فيني

~~~

أستغرب الصراحة
ما يحترمون حدودي وينتظرون مني أحترم حدودهم
عفواً .. بس طالعوا نفسكم
من البداية تدخلتوا وتكلمتوا عني وكلامهم فيه سوء ظن و مؤذي
أنا ما بدأت بشيء .. أنا رديت فقط ووضحت

" من تدخل فيما لا يعنيه لقي ما لا يرضيه "

أنا واضحة وكلامي واضح وقصدي واضح
ما أحب أرمي كلام من تحت لتحت وأعيش دور الملاك
لأن هذي خباثة :26:

روحَ
12-09-21, 10:51 AM
سأل غلام رجلاً حكيماً : ما هي الشجاعة ؟
فقال: أن لا تنتقم ممن أساء إليك بل تتحمل وتصبر
فبصق الغلام على وجه الحكيم ليختبره ،
فمردغه الحكيم بالتراب وضربه ضرباً مبرحاً وداس عليه ..

فقال الغلام للحكيم :
قسم بالله كنت عارف أنك كذاب
😂😂😂😂

روحَ
12-09-21, 11:09 AM
https://g.top4top.io/p_2169yx1yo0.jpeg

روحَ
12-09-21, 11:53 AM
أحد الفلاسفة صرخت عليه زوجته 😡
‏ثم رشت عليه الماء الذي كان بيدها
‏من شدة غضبها

‏فقال : ما أجملك 😍
‏ترعدين و تبرقين ثم تمطرين !


^ ما شاء الله عليه ذكي
و عنده قدرة عجيبة على امتصاص الغضب :icon10:

روحَ
12-09-21, 01:09 PM
أنا اللي أعرفه أن الشي اللي يختلفون عليه العلماء
ما يجوز نحرمه
ومستغربة كيف في ناس تحرم بكل ثقة
ما شاء الله فجأة صرتوا تفتون من راسكم !! :MonTaseR_166:

طيب خلونا نتكلم بالمنطق
الحين الرجل يقدر يغض بصره في الحج والعمره
وما يقدر يغض بصره في الأماكن الثانية ؟ !!

طيب شنوو الفرق مو هو نفس الإنسان ونفس العقل ؟؟
يعني إذا اختلف المكان شنو راح يفرق :MonTaseR_112: ؟؟
كأنكم تقولون أنه بلا عقل وما يقدر يسيطر على نفسه
إلا لما يكون في الحج والعمرة

إذا تبون تسون الشي سووه بس لا تحرمونه على غيركم وتسبونهم

واللي يحشون فيني ويغلطون
شكراً عطيتوني حسناتكم :DsC00581:

روحَ
12-09-21, 01:32 PM
في فرق بين العورة والجمال
الوجه ممكن يكون جميل بس مو عورة

إذا كنا نغض البصر لأن الوجه عورة
طيب ليش الرجال ما يغطون وجههم
وليش لازم نغض بصرنا بدون ما يغطون الوجه ؟
مو الجمال كله في الوجه ؟

بتقولون لأن المرأة ما تتأثر بجماله وعادي
أقولكم غلطانيين
تذكروا قبل فترة لما انتشرت مقاطع الولد اللي اسمه "هيرين كاميرون "
كثير بنات تجننوا عليه بسبب جماله
طبعاً لأنهم ما غضوا البصر

ليش محد قال أنه لازم يغطي وجهه عشان ما يفتن البنات؟

روحَ
12-09-21, 02:19 PM
المهم نغير الموضوع
خلاص اكتفيت من الكلام عنه :670:


~~~~


أحب القصص القصيرة
وأكثر قصة تعجبني هي قصة " الكوخ المحترق"
دايماً أتذكرها لما أمر بظروف صعبة
تشجع على التفاؤل وحسن الظن

هذي هي القصة
https://youtu.be/gRn2kI8fyac

روحَ
12-09-21, 03:59 PM
الخضر عليه السلام
قتل الغلام وخرق السفينة
مع هذا كان رجل صالح مو سيء
# بس_أقول

~~~~~

كل شيء يحدث لـ سبب لا نعرفه
وعسى أن تكرهوا شيئاً وهو خير لكم

:MonTaseR_11:

روحَ
12-09-21, 05:46 PM
أنا أكثر وحدة أقول أني خوافة
وآخر شي لما أسوي الشي أنصدم من قدراتي

بس لازم في البداية أسوي دراما
وأقول صعب وما أقدر وما أعرف وأتدلع
و ياربييي لا تضغطون علي :MonTaseR_210:

نفس أيام المدرسة
إذا رحت الاختبار وأنا خايفة ومتوترة
أجيب العلامة الكاملة
وإذا ما كنت خايفة أنقص علامات
مدري ليش

مرات الخوف ينفع

روحَ
12-09-21, 09:00 PM
في فرق بين الحياء والخجل
كل البنات ممكن يستحون من بعض المواضيع
وفي بعض المواقف
بس مو كل بنت خجولة

الخجل مشكلة
يعني مثلاً :-
أنا كنت خجولة
وما أطلع أتكلم في الإذاعية المدرسية
لأن ما تعودت و أتوتر وأخاف
وحتى الآن نفس الشي بعدي ما تعودت على هالشي
ما أحب أشوف ناس كثير مركزين علي وأنا أتكلم

بس في بنات غيري عادي عندهم
ما يخجلون وفيهم جرأة
ويطلعون في الإذاعة ًيتكلمون

أحس الناس دايماً يخلطون بين الحياء والخجل
مدري ليش !

روحَ
12-10-21, 05:02 AM
https://i.pinimg.com/564x/41/86/09/418609d04cb05b8b108e7ec9c536633b.jpg
إذا ما تغير الفكر مافي فايدة من القوانين والأنظمة

قبل فترة شفت مقطع وحدة لابسة عباية بس منزلة الحجاب
و كثيير شباب يلحقونها
معقولة ولا واحد فيهم عنده عقل !

روحَ
12-10-21, 05:32 AM
كلمة خمار جاية من كلمة خمر
والخمر حجاب للعقل
يعني الخمار حجاب للرأس مو الوجه

وبس

روحَ
12-10-21, 06:34 AM
ما أحب لما كلامي يتفسر عكس اللي أقصده :23:

روحَ
12-10-21, 07:22 AM
و ما أحب أثق ثقة عمياء في دراسات غيري
لأن الإنسان مو معصوم وممكن يغلط
لازم أفكر وأتأكد

قبل فترة قرأت دراسة تقول
أننا ما نقدر نشوف شخص في الحلم
إلا إذا كنا شايفينه بالواقع

بس هالكلام مو صحيح
لأني شفت ناس في الحلم
وأنا مو شايفة شكلهم بالواقع

مو كل دراسة نصدقها

روحَ
12-10-21, 07:53 AM
وجهات النظر تختلف
و مو كلنا نشوف الأشياء بنفس النظرة

أذكر زمان تكلمت عن هالموضوع
بس مو مشكلة بتكلم مرة ثانية

https://www.universemagic.com/images/2016/07/8377_2_or_1469704823.webp

لو قلت ماذا تشاهدون في هذه الصورة ؟

يمكن أغلبكم بتقولون " جبل "

بس شخص ثاني ممكن يتعمق ويقول
أشوف " قوة - ثبات - شموخ - صلابة - هيبة "

وشخص ثالث ممكن يقول أشوف " آية من آيات الله "

وأنا أقولكم أشوف " نور "

لأن كل شي جميل أشوفه نور
وكل شي مو حلو أشوفه ظلام

مو بس الصور حتى الكلمات
أحس بعضها نور وبعضها ظلام وهكذا
وأحب دايماً أركز على النور بكل شي
وأتجاهل الظلام
أصلاً لما أركز على النور ما راح أشوف الظلام
وراح أتضايق منه

وبس والله

روحَ
12-10-21, 03:53 PM
"يقول أفلاطون : لا تصير عين
البصيرة حادة إلا إذا ضعفت
عين الجسد ."

روحَ
12-11-21, 11:17 AM
كل كلمة كتبتها هنا
ما أتراجع عنها أبداً أبداً

يعني مافي فايدة
لأني متأكدة من كلامي

وأصلاً في النهاية بتعرفون إني أقول الحقيقة
حتى لو طال الزمن

>> واثقة :DsC00581:

روحَ
12-11-21, 11:48 AM
لما الإنسان يشك بكلام غيره خاصة اللي مختلفين عنه
هذا شي طبيعي جداً
لأنه ما يصير يصدق أي شي على طول بدون ما يفكر
الشك راح يخليه يفكر ويبحث ويتأكد بنفسه
وفي النهاية بيوصل للحقيقة

وهذي المراحل كلها أنا مريت فيها قبل
وبكثير مواقف ومع كثير ناس
يعني عادي جداً
فكروا وحللوا وابحثوا
ولا تسوون الشي إلا إذا مقتنعين فيه

روحَ
12-11-21, 04:12 PM
أعرف سبب أغلب مشاكلي وأعرف حلها
بس مالي خلق أحلها مشغولة جداً
وأبي مشاكلي تعتمد على نفسها :26:


عادي أتكلم مرات
لأن أحب أشوف قدرات غيري
وكيف يفكرون وكيف وجهة نظرهم :MonTaseR_212:


بقولكم مثال
مشكلة الخجل من الجمهور
سببها أن لما كنت في المدرسة
المعلمة صرخت علي قدام كل البنات على غلط تافه
كنت مسوية بحث وعطيتها
وعند اسم المعلمة كتبت ( ف. ن ) > يعني اختصار لإسمها
وهي ما عجبها هالشي وصرخت علي واعتبرت هالشي عدم احترام
مدري ليش فكرت ب هالطريقة مع أني ما كنت أقصد :69:

طبعاً هالموقف أثر علي وصرت أتوتر
ولما أبي أتكلم قدام ناس كثير ما أقدر وألخبط

وأعرف الحل
لازم أركز على الكلام اللي بقوله
وما أركز على الناس ولا أهتم لرايهم
و عادي أتقبل أني ممكن أغلط وما أفكر أن هالشي عيب
وأقنع نفسي أني مو لازم أكون كاملة أو مثالية
وأن حتى الناس مو كاملين وعندهم أخطاء مثلي

وبس :MonTaseR_31:

روحَ
12-11-21, 05:52 PM
مهما حصل لا تسمح
لأحد يخرب حياتك ..

أنت كبير وتعرف
تخربها بنفسك ...🙂

روحَ
12-12-21, 10:35 AM
في شي أحب أسويه إذا كنت أبحث عن إجابة ل سؤال
أو معلومة ما أعرفها أو حل لمشكلة

أروح المكتبة
وأمر على كل الأقسام
وأتأمل وأشوف عناوين الكتب
والكتاب اللي يلفتني عنوانه من أو نظرة
على طول أختاره
أحس بشعور كأن الكتاب يكلمني
ويقولي اختاريني أنا
وأنا أصدق هالشعور وعلى طول أختاره
وفي النهاية يطلع هذا هو الكتاب المناسب
وألقى فيه كل المعلومات اللي أبيها

صرت أشوف الكتب مثل أصدقائي وأحبهم
بصراحة حلوة صداقة الكتب
يعلمونك بس ما يفضحونك
كل شي يكون سر بينك وبينهم
والحلو أن المعلومات تكون عميقة وواضحة

هذي الطريقة تعجبني

وبعد شي ثاني أحب أسويه
أفتح المصحف وأنا مغمضة عيوني
وأشوف أي سورة بتطلع لي وأقرأ هذي السورة
أو أني أشوف أي آية لفتت انتباهي أكثر شي
من أول نظرة لما فتحت المصحف
وأعتبرها رسالة
وصدق أحس كأنها رسالة جت في الوقت المناسب
يعني إذا كنت متضايقة مثلاً
تطلع لي آية تشجعني على التفاؤل وهكذا :MonTaseR_212:


جربوها يمكن تعجبكم :2:

روحَ
12-12-21, 02:51 PM
إذا أذيتكم أو جرحتكم بأشواكي
لا تبكون وتعيشون دور الضحية
واجهوا نفسكم واعترفوا بأخطائكم
يمكن أنتو مو عارفين تتعاملون معاي
أو مو قادرين تفهموني وما عندكم خبرة
يمكن بسبب سوء ظنكم
أو يمكن عندكم أحكام مُسبقة
وتتوهمون أشياء وتصدقونها
أو يمكن عندكم معتقدات وأفكار سلبية جذبتني لكم

أو يمكن بسبب ذنب سويتوه ونسيتوه
أو يمكن ظلمتوا إنسان بريء

أهم شي تذكروا
أنا ما أحب أبدأ بالغلط .. أنا أرد فقط
وحتى لو حد غلط علي بدون ما أسوي شي
أرد عليه .. وبعدين أفكر يمكن خيرة
أو يمكن عشان أبعد من البداية لأن مافي توافق بيننا
وأركز على الناس اللي تتفق معاي .. وبس

ما يصير كل مرة تحطون العيب فيني
وتنسون نفسكم :26:

روحَ
12-12-21, 04:53 PM
همس - متأمل - رايق - الفيلسوف


شكراً لكم :MonTaseR_7:


بس حبيت أشكركم لأني استفدت منكم :110:

روحَ
12-12-21, 09:47 PM
عجبني راي همس لما تكلمت عن وظيفة المرأة
صدق وين المشكلة إذا تبي تتوظف
يعني ليش الله عطاها مواهب وقدرات ؟
بالعكس بتنفع نفسها وغيرها
وإذا زوجها تركها أو شي عندها وظيفتها
ما بتحس بالضعف وأنها محتاجة للناس
أهم شي تعرف كيف توفق بين البيت والعمل
ويكون العمل مناسب لها

أصلاً أهم شي رسالتها في الحياة مو الزواج والعيال
لأن كل شي ممكن يروح بأي وقت
و ما راح يبقى لك إلا نفسك

https://youtu.be/Ib-VJ3DDHr8
حلو هالمقطع
يتكلم عن الهدف من العلاقات

روحَ
12-13-21, 05:50 AM
ولو أني انا ما اشوف نفسي ان كلامي البسيط فيه فائده عظيمه


بالعكس أنتِ أكثر وحدة استفدت منها وأنتِ ما تدرين
لما أرسلتي التقييم
تقييمك جاء في وقته كأن الله جابك في الوقت المناسب
لأن ماكان في تركيز أبداً
ولما خذت الحديد على طول رجع تركيزي
ورجع نشاطي .. الحمدلله
لا تحسبون أي شي تسونه صغير =)

روحَ
12-13-21, 06:16 AM
مستغربة من شي
صح أن أختي معاي بنفس الغرفة
بس قاعدة أتأثر فيها بشكل مو طبيعي
إذا كانت سهرانة تبي تذاكر
ما أعرف أنام أبداً حتى لو حاولت
وحتى لو كنت نعسانة
لازم هي تنام أول
و إذا مرضت على طول أمرض
اليوم صحيت الفجر وأنا حاسة برد وأرجف
وعلى طول سمعت صوتها
ولفيت وجهي بشوفها
وكانت تقول تحس بغثيان وبرد
حسيت فيها وأنا نايمة
ولما صحيت تأثرت زيادة وصرت أرجف أكثر
مدري شنو كلت أمس
شكلها مخبصة في الأكل وتعبت

بس الحمدلله صرنا بخير

ترى أنا وأختي دايماً نختلف
ودايماً اللي يشوفنا يحسبنا نتهاوش
بس في مثل هالمواقف نتأثر جداً

أنا مقتنعة
العلاقات القوية ما تتأثر بالخلافات
بالعكس تصير أقوى

روحَ
12-13-21, 06:38 AM
دايماً تقولي
إذا الناس زعلوك أو ضايقوك ما لك غيري
وفي النهاية بترجعين لي أنا
تعجبني واثقة هههه

وصح كلامها هذا اللي يصير=)

روحَ
12-13-21, 01:12 PM
الزوج والزوجة اللي مالهم خلق يهتمون بأطفال
لا تجيبونهم للدنيا من الأساس
لأن الطفل إذا ما عطيتوه الحب والاهتمام والحنان
وما لبيتوا كل احتياجاته
راح تصير مناعته ضعيفة وبتهجم عليه كل الأمراض
وما راح يطلع من هالدائرة بسهولة
ويمكن ما يطلع منها أبداً
يعني كأنكم رميتوه في البحر وهو ما يعرف يسبح
" أطفالكم أمانة " اهتموا فيهم صح

>> يقهرني هالموضوع جداً :26:

روحَ
12-14-21, 01:06 PM
اهتماماتي كثيرة ل درجة كنت دايماً أحتار
وما أعرف شنو أكثر شي يناسبني و ممكن أبدع فيه بدون ما أحس بالملل
لأني دايماً أجرب أشياء وبعدين أحس بالملل وأبحث عن شي ثاني

المهم
كنت دايماً أسأل نفسي هالسؤال
" شنو أكثر شي يناسبني ؟ "

وبعد فترة
شفت حلم
في الحلم كان في شخص مجهول
شافني أسوي شغلة وعجبته
وسألني .. أنتِ تعرفين الهندسة الإلكترونية ؟
قلت له : لا ما أعرف
قال : أنتِ تناسبك الهندسة الإلكترونية

طبعاً أنا ما أعرف ولا شي عنها
بس واضح أن كلامه صح ولا ما كنت بشوف هالحلم

الحين أسأل نفسي
كيف بتعلم الهندسة الإلكترونية ؟
ومين هم المعلمين الطيبين واللطيفين اللي راح يعلموني ؟

وإن شاء الله أوصل وأعرف كل شي =)

وبس

على فكرة أنا نمط شخصيتي istp
يعني اللي نفس نمطي
يمكن أنتوا بعد تناسبكم الهندسة الإلكترونية =)

روحَ
12-14-21, 01:37 PM
من مدونة سمو المجد
اوقات أحس إن بيني وبين الصداع
قصة
بس ماعرف تصنيفها طبعاً
مابقول التصنيف
ويصير مرتبط فيني دايماً ..

حقيقي
بدون أي سبب
تبدأ عيني اليمين
بعدها اذني اليمين
بعدها كل راسي جهة اليمين
ومتى يخف .!!!
لمن اصحى تاني يوم
حتى المسكن م يدي نفع ..


عندي نفس المشكلة

وعرفت السبب
الصداع من كثرة التفكير
وتحسين بالألم بجهة اليمين
لأنك تستخدمين الجزء الأيمن من عقلك أكثر من الجزء الأيسر

وبس =)

روحَ
12-14-21, 01:44 PM
https://vm.tiktok.com/ZSefT3VGh/

هذا الاختبار يقولكم إذا عقلكم أيمن ولا أيسر

طبعاً أنا واضح أن عقلي الأيمن هو اللي مسيطر :DsC00581:

روحَ
12-14-21, 04:09 PM
https://l.top4top.io/p_2174d3kko0.jpeg (https://top4top.io/)

روحَ
12-14-21, 05:06 PM
الطفل = صفحة بيضاء
هو ما يعرف شي
بس يشوف أمه وأبوه ويقلدهم
ويحب يجرب ويكتشف كل شي بكل حواسه
ولما يحاول يقلدهم ويسوي مثلهم
ويكون ردهم أنهم يوقفونه بكلمات مثل :
" ما تقدر - أنت صغير - ما تفهم - اقعد مكانك وأنت ساكت - لا تسوي شي "
راح يصدق هالكلام ويصير مو واثق بنفسه
وما راح يؤمن بنفسه وقدراته وبيكون دايماً خايف ومتردد ويشك بنفسه
وبينسحب ويهرب دايماً من أي موقف وبيصير انطوائي

يمكن يتغير لما يكبر ويكتشف قدراته
ويمكن يتعقد و يبقى عنده شك حتى لو عرف قدراته
يعني حتى لو الناس شايفين قدراته هو ما يشوفها
وحتى لو يمدحونه ما يصدقهم وما يثق في كلامهم

لأن أمه وأبوه هم الأساس و ما عطوه الثقة
ما علموه كيف يؤمن بقدراته
كيف راح يصدق الناس !

المهم
ترى عادي لو كان الطفل ما يعرف
خلوه يجرب ويغلط حتى لو غلط أكثر من مرة
ف النهاية بيتعلم
ولما يصير يعرف بيساعدكم و راح يخفف العبء اللي عليكم
ما بتحسون أن المسؤولية كلها على راسكم
وما بتحسون بضغط كبير ولا بتجيكم أمراض
بالعكس بتعيشون مرتاحين ..
وكل حد له دوره سواء كان صغير أو كبير ..

روحَ
12-14-21, 05:58 PM
أحب أعامل الناس حسب أسلوبهم
يعني مثلاً .. الجميلة " سمو المجد "
لاحظت عليها تحب تفيد بمعلوماتها
ف حبيت أفيدها بالمعلومة اللي أعرفها
لكن هذا ما يعني أني أعلم منها !
ولا يعني أني أنا اللي أعرف كل شي وهي ما تعرف !!

بالعكس لما شفت كلامها حسيت عقلها أكبر من عمرها بكثير
وعجبتني مدونتها وشخصيتها

وإذا هي شافت كلامي وحست أني مسوية نفسي أعلم منها
ف أنا أعتذر لها قدام الكل وعادي جداً ما عندي مشكلة =)


المهم
فكووونا من سوء الظن
نحن هنا نفيد ونستفيد
اللي عنده معلومة حلو أن يقولها .. ليش يكتمها ؟

يمكن تنفع وفي ناس تحب تستفيد
والمعلومة اللي ما تنفعك تنفع غيرك

وبس والله
هدووا أعصابكم الدنيا ما تسوى
وخذوا هالوردة :MonTaseR_1:

روحَ
12-15-21, 08:11 PM
لما أكون جالسة بمكان
وتكون في شخصية وحدة فقط تنتقدني
على كل حركة وكل كلمة وباستمرار وبدون توقف
نفس الشخص اللي يوجه لك ضربات متتالية
عشان تتعب وتضعف وتطيح

وباقي الناس عادي يتعاملون بشكل طبيعي جداً

هذا شنو يعني ؟؟!

طبعاً واضح شنو يعني صح ولا ؟ :icon10:

روحَ
12-15-21, 10:26 PM
صح أني أحب الأطفال وأرحمهم
لكن الحين لو أشوف طفل
يمكن أركض وأهرب منه هههه

صاير عندي اكتفاء
عندنا بنات صغار في العائلة
مافي أولاد > أصلاً أنا أفضل البنات أكثر
بس شاركت بالاهتمام فيهم
وتعلمت الأشياء اللي ما كنت أعرفها عنهم
وحتى سمعت كلمة ماما وكل شي
>> ناقصني آخذ شهادة هههه

الحين أحس صار كل شي عادي
يمكن اللي ما عندهم أطفال يحزنون ويبونهم أكثر =)

روحَ
12-16-21, 12:15 PM
قاعدة أحط لايكات
بس يظهر كأني مو حاطة لايك
مدري وصلتهم اللايكات ولا ؟

روحَ
12-16-21, 05:25 PM
بصراحة بالنسبة لي
أنه يكون كل شي عادي أحسن من أنه يكون عندي تعلق
يعني مثلاً لو وحدة عندها تعلق بالأطفال
ودايماً تحلم وتتمنى أنه يصير عندها أطفال
وتشوفهم سبب سعادتها
وبعدين الواقع يجي عكس اللي تتمناه
أكيد بتنصدم وبتحزن كثيير


ف من البداية يكون الشي عادي أحسن
يعني لو صار حلو
ولو ما صار عادي الحياة مستمرة

إذا على الأحلام والخيال وكذا
أنا عندي أحلام أكبر من كوكب الأرض
بس لو ما تحققت عادي
لأني عارفة الواقع حتى لو كنت أتحلطم
الحلطمة بس كذا لأن أحب أعبر عن شعوري
لكن مو يعني أن هذا الشعور راح يستمر للأبد
أكيد راح يتغير وأعيش وأكمل الحياة عادي ..

روحَ
12-18-21, 04:42 PM
مرات الطعنة تجينا من شخص ما نتوقعه

أمس كنت جالسة بهدوء وسلام
فجأة جتني طعنة براسي
ولا هذي بنت أختي اللي عمرها سنة
واقفة وراي و قاعدة تمشط شعري بالشوكة
وشكلها تحمست وصارت تمشط بعنف :دموع الورد:
أنا تعورت وهي فرحانة وعاجبها الوضع
ولا كأنها مسوية شي

>> براءة متوحشة :icon10:



المهم
انتبهوا من البراءة الزايدة :DsC00581:

روحَ
12-19-21, 04:39 PM
ترى خلاص سامحت بنت أختي " لولو الصغيرة "
تصالحنا ونسيت موضوع الطعنة 😇🤍

هي مسكتني من يدي
وسحبتني >> يعني تقولي يلا نطلع
وطلعنا نمشي مع بعض
ولعبتها وضحكنا واستانسنا :icon10:

ولأنها غيرت جوي وفرحتني
قررت أسامحها ❤

اللي يفرحوني أسامحهم عادي
واللي يضايقوني وينكدون علي أنكد عليهم
النظام نظام 😌👌🏻

روحَ
12-20-21, 09:31 PM
" التغيير صعب في البداية
و فوضوي في المنتصف
و رائع في النهاية ".

روحَ
12-20-21, 10:56 PM
تدرون أني لما أروح مكان عام
مثلاً مطعم
وأشوف فيه نساء
وأشوف الرجال يقومون و يطلعون برا و يروحون بعيد
عشان النساء ياخذون راحتهم وما يتضايقون
أفرح جداً ويعجبني هالشي
بصراحة ذوق وأدب ولباقة وإنسانية

الحين .. بيصير شي لو كلهم يصيرون ذوق ؟! :19:

روحَ
12-22-21, 01:11 PM
لما الواحد يقول " محد فاهمني "
كيف يفكرون بعض الناس ؟
يفهمون أن هذا الشخص عنده خصوصيات
وعنده أسرار ولازم يكشفونها
بعدين يقولون شوف نحن فاهمينك وعارفين
خصوصياتك وأسرارك

بس طبعاً الشي اللي يسوونه مو صحيح أبداً
الخصوصيات اسمها خصوصيات عشان تبقى خصوصيات
ومحد يتدخل فيها
والأسرار اسمها أسرار عشان تبقى أسرار

اللي يقول " محد فاهمني "
قصده محد عارف يتعامل معاي صح
وبالطريقة اللي تسعدني وترضيني

يعني أما تتعاملون معاه بالطريقة المناسبة
أو تتركونه في حاله لأنه مو مجبور يستحملكم
أنتوا بعد مو مجبورين تتعاملون معاه وتأذونه أو تأذون نفسكم
لأنكم مو عارفين تتعاملون معاه صح

تقدرون تبعدون بكل بساطة
و تروحون عند الناس اللي يشبهونكم
وتريحون راسكم ..

وبس :34:

روحَ
12-22-21, 04:58 PM
لما أروح المكتبة
أحس كأني في عالم ثاني أو كوكب ثاني
وأحب أبحث وأكتشف الكتب الحلوة
اللي فيها معلومات تفيدني
>> دايماً أقول أبي أروح كوكب ثاني
بس مافي إلا المكتبة
يلا أهم شي أتخيل أني في كوكب ثاني وأعيش الجو
>> أصلاً الخيال يجمل الواقع :26:

من يومين رحت المكتبة اللي في دبي مول
وأول كتاب لفت انتباهي من عنوانه
كتاب " التشويش خلل في أحكامنا "
كلمة التشويش هي اللي لفتت انتباهي أكثر شي
وعلى طول خذت الكتاب وقلت هذا هو اللي أبيه

عن الكتاب
تخيّل أنّ طبيبين في المدينة نفسها يشخّصان أمراضًا مختلفة لمرضى حالتهم متطابقة، أو أنّ قاضيين في المحكمة نفسها يصدران أحكامًا مختلفة تمامًا بحقّ أشخاص ارتكبوا الجريمة نفسها. تأمّل لو أنّ مراقبي سلامة الغذاء يصنّفون المطاعم المتماثلة تصنيفًا مختلفًا- أو أنّ معالجة الشركة لشكاوى العملاء تعتمد على الموظّف الذي يصدف أن يردّ على الهاتف. تخيّل الآن لو أنّ قرار الطبيب نفسه، أو القاضي نفسه، أو المراقب نفسه، أو مندوب الشركة نفسه يختلف بين الصباح والمساء، أو بين الإثنين والأربعاء. هذه أمثلة حول التشويش: التباين في الأحكام التي ينبغي أن تكون متطابقة.
في كتاب التشويش، يوضّح دانيال كانيمان وكاس ر. سنستين وأوليفيه سيبوني الآثار الضارّة للتشويش في العديد من المجالات، بما في ذلك الطبّ والقانون والتنبّؤات الاقتصاديّة وسلامة الغذاء وإطلاق السراح بكفالة والعلوم الجنائيّة والقرارات الإستراتيجيّة وتقييم الأداء واختيار الموظّفين. حيثما كان هناك حكم، هناك تشويش. غير أنّ الأفراد والمنظّمات يغفلون عنه في معظم الأحيان. ومع ذلك، يمكننا بقليل من العلاجات البسيطة الحدّ من التحيّز والتشويش وبالتالي اتّخاذ قرارات أفضل بكثير.
بالاعتماد على أحدث النتائج في علم النفس والاقتصاد السلوكيّ، وعلى البحث الدؤوب والثاقب نفسه الذي جعل كتّاب التفكير، السريع والبطيء، وكتاب النغزة، من الكتب الأكثر مبيعًا في قائمة نيويورك تايمز، يشرح كتاب التشويش، المليء بالأفكار المبتكرة، كيف ولماذا يكون الناس عرضة للتشويش في إصدار الأحكام- وما يمكننا فعله حيال ذلك.

لما قرأت الكلام
عرفت أن هذا هو الكتاب المناسب
وأخذت كتب ثانية بعد
بس بعدين يمكن أتكلم عنها =)

روحَ
12-25-21, 12:43 PM
الشخصية العنيدة والمتمردة ليش موجودة في هالحياة ؟
أول شي العناد والتمرد ردة فعل
لما يكون في تحكم وسيطرة راح تكون النتيجة عناد وتمرد

حتى بتلاحظون
اللي أسلوبهم تحكم وسيطرة وطول الوقت أوامر وتوجيهات
و كأنهم مثل الأستاذ اللي ماسك مسطرة وعلى كل غلطة يضرب

دايماً يكون في حولهم شخصيات عنيدة ومتمردة
الشخص العنيد والمتمرد
موجود عشان يعلمك أن أسلوب التحكم والسيطرة ما ينفع ولازم تغيره

ولما تغيره ما بتشوف عناد ولا تمرد بالعكس
بتشوف طاعة وتقبل واهتمام وحب وكل شي حلو ..

وبس 😇

روحَ
12-25-21, 04:27 PM
تخيلوا أروح أزور مريض وأكلمه عن الأمراض
مسكين بيموت

وتخيلوا أروح عزاء وأتكلم عن الموت والأموات
مساكين اللي رايحة أعزيهم
بيحسون بضيق وكآبة وحزن أكثر من قبل ..:19:

مو كل الناس تعرف تتكلم وتواسي
تذكرت المثل اللي يقول
" الحي يحييك والميت يزيدك غبن " :MonTaseR_54:


مرات أروح المستشفى
وأنا مو حاسة إلا بأعراض عادية
بس لما أروح يطلعون فيني كل الأمراض
ويعطوني أدوية وش كثرها
فجأة أصير موسوسة وتصير فيني أعراض ما كانت موجودة
وأحس كأن خلاص باقي حبة وأموت :MonTaseR_121:

ولما أقعد مع أختي الصغيرة تقولي كلمتين فقط
" أنتِ مافيك شي .. أنتِ مافيك شي " وتكرر هالكلام
وعلقي يصدق ويصير مافيني شي

صرت لما يعطوني أدوية آخذها كم يوم فقط
وبعدين أنسى الأدوية
و أتجاهل المرض وأعيش بشكل طبيعي كأنه مافيني شي
أحاول أقنع عقلي ب هالشي
والحمدلله أصير بخير بدون أدوية
وأكثر من مرة جربت هالطريقة ونجحت

مرة حضرت محاضرة وكانوا يتكلمون عن العلاج بالتأثر على العقل الباطن
كان في مرضى كل يوم يسمعونهم كلام إيجابي
بعد فترة صاروا بخير وتشافوا من المرض حتى اللي كان مشلول تعافى
لأن العقل الباطن تأثر وصدق الكلام

مرات الكلمة الطيبة تكفي وتغني عن الأدوية والعلاجات الصعبة والمعقدة ..
وبعض الكلمات تجيب الهم والمرض

ل هالسبب إذا تبغي تتعافى ابعد عن الناس اللي يحسسونك أنك مريض
وأقعد مع الناس اللي يعاملونك كأنك إنسان طبيعي ومافيك شي =)

روحَ
12-26-21, 05:51 PM
أراد إخوة سيدنا يوسف أن يقتلوه ( فلم يمت ) !!

ثم أرادوا أن يمحى أثره ( فارتفع شأنه ) !!
ثم بيع ليكون مملوكا ( فأصبح ملكا ) !!
ثم أرادوا أن يمحو محبته من قلب أبيه ( فإزدادت ) !!

( فلا تقلق من تدابير البشر
فإرادة الله فوق إرادة الكل )

روحَ
12-26-21, 05:58 PM
الشخص العفوي والتلقائي
ليش موجود في الحياة ؟

عشان يعلمك تحسن الظن في الناس
وما تصير شكاك وموسوس وتسيء الظن وتدخل في نوايا الناس

والشخص الخبيث ليش موجود ؟
عشان يعلمك تكون حذر وما تثق في كل الناس ثقة عمياء

روحَ
12-26-21, 06:19 PM
على طاري الثقة
ودي أتكلم عن هالموضوع شوي

خواتي دايماً يقولون لا تثقين في الشغالات بزيادة
وكوني حذرة ومن هالكلام
أحسهم متأثرين بالقصص اللي يسمعونها عن الشغالات
ويخافون ويفكرون أن كلهم نفس الشي
بس أنا أشوف العكس و ما أحب أتوقع الشر بالعكس أتوقع أنهم طيبات
وأحسن الظن والحمدلله دايماً أشوف هالنوع
طيبات وأمينات وصادقات
ويسوون الشغل بضمير وحتى ما أحتاج أعطيهم أوامر
يعني صدق اكتشفت أن القوة مو بالتحكم والسيطرة
ولا برفع الصوت وأسلوب الأمر أو السب
القوة بالاحترام واللطف واللين
لما أحترمهم يحترموني ويخدموني بعيونهم وما يقصرون
ولما أقدرهم حتى لو بيني وبين نفسي
بدون ما أظهر التقدير أشوفهم يقدروني ويحترموني

أهم شي من البداية نختار صح
أنا أختارهم لما أشوف الصورة و من أول نظرة
أقول هذي شكلها طيبة
أختي تقول أنتِ وش دراك أنها طيبة ما شفتي إلا الصورة
أقولها يبين من الشكل
وفي النهاية يطلع كلامي صح وتكون مثل ما قلت

لما شفت شغالة أختي من أول مرة ما ارتحت لها
الحين أختي رجعتها ما تبيها
>> لسانها طويل وترادد وأختي استحملتها كثير وصبرت
وما تحب ترد عليها و بعدين رجعتها
عشان كذا أقول أهم شي نختار صح
ونحسن الظن وبعدين بنشوف الإحترام وكل شي حلو

روحَ
12-27-21, 08:23 PM
اليوم كنا طالعين
خواتي راحوا محل الملابس
وأنا ما كنت أبي شي من محل الملابس
قلت لهم أبي أروح المكتبة
بس تأخروا وأنا مليت خلاص أبي أروح المكتبة
بعدين فكرت أروح بنفسي
طلعت من محل الملابس ومشيت
وأنا ما أعرف الطريق ولا أدري وين المكتبة
لأن هذا المكان ما أعرفه زين وعادي أضيع
بس مع هذا سبحان الله
مشيت في الطريق الصحيح بدون ما أضيع ولا شي
مع أن الطريق كان طويل شوي
و وصلت وشفت نفسي قدام المكتبة مدري كيف
>> قلبي دليلي وصلني للمكان الصح

الحمدلله زين أني وصلت
وبعدين رجعت لكن من طريق ثاني ولقيت خواتي

أحب لما نضيع وبعدين ندور على بعض
أحس كأني في لعبة المتاهة
وعادي أستانس وأنا في الطريق وأستمتع بوقتي
" يقولون المتعة الحقيقية تكون في الطريق مو لما نوصل "
هالمرة مشيت وحدي ف المتاهة لأن كل مرة ما أكون وحدي
يعني نكون اثنين وندور على الباقي

في ناس ممكن يتضايقون لما يضيعون
بس أنا لا
بالعكس مرات لما نضيع
نوصل لأمكان حلوة ونكتشف أشياء حلوة
ويمكن نقابل ناس حلوين يعلمونا وين الطريق
ويمكن نصير أصدقاء
عكس لما نخطط و نروح لأماكن محددة ومعروفة
ما راح نكتشف أشياء جديدة وما بيكون في مغامرات

المهم
أنا أحب كل شي أسويه يكون فيه وناسة
كأني ألعب لعبة
>> أصلاً الحياة لعبة والشاطر اللي يفوز فيها =)

روحَ
12-27-21, 10:38 PM
يقولون " من تعلم لغة قوم أمن مكرهم "
عجبني الكلام
بس أنا ما أشوف اللغة يعني لغة الكلام فقط
في لغات ثانية بعد
مثل لغة الإشارة ولغة العين ولغة الجسد ولغة الصمت وكثير غيرها
ف حلو لما نتعلم لغات ثانية
أشوف هالشي يفيد
أهم شي نفكر كيف بنستفيد من هاللغة

في الحرب مثلاً
حلو يكون في لغة محد يفهمها غيرنا " يعني مثل الرسائل المشفرة "
عشان محد يعرف خططنا > يعني الأعداء ما راح يقدرون يفهمونا

وبعد في معلومة عرفتها من زمان
الأطباء لما يتكلمون مع بعض عن المريض وهو موجود
لازم يتكلمون بلغة ما يفهمها
لأن مرات في أشياء ما ينفع أنه يعرفها بسرعة
لأنه يمكن يتعب نفسياً لو عرف
وعادي بعدين لما تتحسن حالته يكلمونه وهكذا

وفي ناس صعب يتعلمون لغتنا
مثل الأطفال أو كبار السن
ف عادي لو تعلمنا لغتهم عشان نتواصل معاهم

وحتى اللي يدعون الناس للإسلام
أكيد راح يدعونهم بلغتهم
يعني كيف ندعوهم بلغتنا ما راح يفهمون
>> عشان كذا في ناس يتعلمون لغات ووظيفتهم الترجمة

وعادي الأجانب بعد ما يدخلون الإسلام بيتعلمون لغة القرآن أكيد
وحتى بعضهم لما يخالطون العرب يتعلمون عربي عادي
شفت كثير تعلموا عربي =)

>> بس حبيت أقول وجهة نظري
لأن سبحان الله كل حد يشوف الموضوع من زاوية مختلفة =)

روحَ
12-27-21, 10:49 PM
على طاري اللغات
من فترة بنت أختي لولو الصغيرة ما تتواصل إلا بحرف " السين "
كل شوي تقول " سيسي - سا سا - س س " > تحاول تتكلم

>> أهم شي أني فاهمة لغتها ههههه

مو كل مرة نفس المعنى >> كل سين لها معنى مختلف
وعلى حسب طريقة النطق و لغة الجسد ولغة العين ونبرة الصوت

مرة يعني أنها جوعانة
ومرة تبي تلعب
ومرة بس كذا تناديني > اسمي فيه حرف السين
ومرة تنادي أختي الصغيرة > هي بعد اسمها فيه حرف السين
ومرة تبي تنام
ومرة تبني أعطيها شي
وهكذا ..

أهم شي التواصل والتفاهم
>> أحسها صارت تحبني لما فهمتها
لما تشوفي تفرح كثير وعيونها تصير قلوب قلوب :MonTaseR_43:

روحَ
12-29-21, 10:33 AM
قال أحد السلف :
لو رأيت أحد إخواني ولحيته تقطر خمرًا لقلت ربما سُكبت عليه !
ولو وجدته واقفًا على جبل وقال : أنا ربكم الأعلى لقلت يقرأ الآيه !
يقول ابن القيم :" والله إن العبد ليصعب عليه معرفة نيته في عمله ،
فكيف يتسلط على نيَّات الخلق "

روحَ
12-29-21, 01:36 PM
هل يجوز للطبيب النفسي
أنه يشخص حالة شخص
ما طلب منه تشخيص ولا راح عنده ولا قاله عالجني ؟
وهل يجوز يتكلم عن حالته قدام الناس ؟
ماهي أخلاقيات الطب النفسي ؟


أدري في ناس يتكلمون بشكل عام عن علم النفس
والطب النفسي
وأنا ما أقصد هالنوع
أقصد النوع اللي يتكلم عن ناس معينين ويفضح أسرارهم

أخوي الكبير يعمل في المستشفى
وأذكر مرة كنا نتكلم عن هالموضوع
وقالي ممنوع يتكلمون عن حالة المريض قدام الناس
ولازم يكون فيه خصوصية بين الطبيب النفسي والمريض

>> الخصوصية منعدمة عند البعض :)

روحَ
12-29-21, 11:06 PM
هذاك اليوم لما رحت المكتبة
اشتريت رواية " رامي السهم "
جميلة هالرواية وعجبتني جداً فيها حكم ودرر
تعلمك كيف تصير مثل رامي السهم في الحياة
وكيف تصوب على هدفك بدقة وبراعة


من قبل هالرواية وأنا أسوي مثل هالشي أصلاً
لما أحط في بالي هدف
أتخيل نفسي مثل رامي السهم
وكأني ماسكة القوس والسهم وأصوب ع الهدف
وأهم شي ما أستسلم ويصير عندي إصرار مو طبيعي
حتى لو ما نجحت من أول مرة عادي أجرب أكثر من مرة
أهم شي أصوب ع الهدف في النهاية

>> أجيبه يعني أجيبه :35:

روحَ
12-29-21, 11:08 PM
https://b.top4top.io/p_2189wx8lb0.jpeg (https://top4top.io/)
- اقتباس من الرواية

روحَ
12-30-21, 09:48 AM
https://youtu.be/bVG5eIhReTs

أهمية وضع النوايا :MonTaseR_212:

على فكرة
كلمة هدف ونية أفضل من كلمة أمنية وحلم
لأن تردداتها أعلى
إذا قلت أتمنى أو أحلم يمكن ما يتحقق الشيء
ويبقى مجرد أمنية وحلم

لكن لما أقول هدفي أن ...
أو أنوي أن ...

كذا بشوف نتيجة
الكون مسخر لنا بس لازم نحدد شنو نبي
ولازم تكون الأهداف والنوايا واضحة وما يكون عندنا تردد
يعني مو كل شوي نغير راينا
>> اللي يغيرون رايهم كل شوي يسببون إرباك للكون
يعني الكون يقولك أنت شنو اللي تبيه بالضبط حدد لو سمحت

يعني ما يصير تقول هدفي أشتري سيارة لونها أسود
وبعدين تغير وتقول لا لا أنا هدفي أشتري سيارة لونها أبيض
لازم تحدد إما أبيض أو أسود
وتحدد اسمها وكل التفاصيل والمواصفات اللي تبيها وهكذا ..


كتاب " اسأل تعط "
حلو فيه أسرار حلوة :2:

أنا جربت الكلام اللي فيه وجذبت أشياء
والحين أخطط لأشياء أكبر :reading:


SEO by vBSEO 3.6.1