أنا وسيارتي لقاء حوار خفيف لال مسك الغلا...

[أميرة الغيم]

اخواني اخواتي
بمسك الغلا
اسعد الله اوقاتكم بالمسرات
عندي لكم موضوع ترفيهي خفيف
عن علاقتك بسيارتك

وللامانه الفكرة مقتبسة ...
أكيد كل واحد فيكم عنده مغامرات وأتوقع كلكم
تقريبا جربتوآ تسوقون السياره تحت السن القانوني .

يعني الحين ودنا نضحك بإجاباتكم بس الله يستر من
الحوادث 😅....


بسم الله نبدأ

س1 / كم كآن عمرك اول مره سقت السياره؟

س 2/ كم مره سرقت سيارة ابوك او اخوك ؟ وكم مره انكشفت وانجلدت ؟

س3/ كيف كان شعورك اول مره سقت السياره ؟
وكم سيارة بالخط خبطت فيها 🤩

س4/ اذا طلعت مشوار تحب تكون لحالك آو ضروري الشله تكون معك ؟

س5/ ليه اول ماتبدا تسوق اى مشوار تكون نشيط وتركب السياره قبل اهلك وبعد فتره
يكبر رآسك؟

س6/ مآهو نوع اول سياره سقتها ؟

س7 / مآهو نوع سيارتك الان ومـآهو لونها ؟

س8/ هل يهمك لون السياره وموديلها وماركتها


س9 / بعض الشباب مايحب يركب السياره الا اذا سمع كل اللى بالشارع صوت مسجله هل انت منهم ؟


س10/ وين كان اول مشوآر لك؟

س11 / كم مره سويت حادث / بعد الشر عنكم

س12/ اطرف وأسوأ موقف مر بك وانت بالخط

س 13/اطول سفره لك بالسيارة ( كم كيلو )

س14/للشباب/ هل انت ضد او مع سواقة المرأة

س15/ حصل مره احد شخبط بسيارتك ..أو كسر الزجاج ..
وش سويت؟
والسؤال بالعكس
حصل مره شخبطت في سيارة غيرك
او كسرت الزجاج؟



16/لو حصل مره وسقت و معاك حد وجلس يقلك لا غلط .. منا الطريق
لا مو منا ووو..كيف تتصرف؟
او طلع معاك حد وجلس يعبث بالمفاتيح وباغراضك الشخصية
شلون تتصرف؟


قبل النهاية / بكل صراحة كم مخالفة ارتكبت الى الان وهل سددتها ام لا ؟


وأخيرا ..
ممكن تصور لنا سيارتك؟
( لك الحرية بالقبول او الرفض)


بما أنه سُمح لنا بالسواقة ، فالموضوع مشترك
للشباب والصبايا ..

[أميرة الغيم]

طبعا انا برد هنا واجاوب
الموضوع مفتوح للجميع

[خياآل]

س1 / كم كآن عمرك اول مره سقت السياره؟
تسع سنوات وقف ابوي في البر وركبت مكانه على الطاره هوع هع الطريق ترابي ولفات , والسيارة تنحرف بسرعة واعدلها وتنحرف بالاتجاه الثانية واعدلها ويجيني كف على الراس من ابوي ويعتدل الطريق كان ماعاد فيه لفات ): عدلني كفه الله يرحمه هوع هع

س 2/ كم مره سرقت سيارة ابوك او اخوك ؟ وكم مره انكشفت وانجلدت ؟
كثير لايحصيها الا الله ! واكثر شيء كنت اسرقه سيارة عمالنا ! مرة تواعدت انا واخواني الصغار قلت لهم ابكشتكم زينون لنا بريق شاهي راعين كيف هوع هع ونطلع للبر واول مالفيت عن الطريق غرزت ونرجع كعابي للديرة والبريق راح انقاض من العطش هوع هع

س3/ كيف كان شعورك اول مره سقت السياره ؟
خوف وكفوف مافي شعور حلق شعري ابوي بكفه هوع هع
وكم سيارة بالخط خبطت فيها �� كان عند ابوي مرسدس مطلعها وكاله وسافر برى واخذت الفرصة وادخل بها الديرة القديمة في شارع ضيق وتنشب السيارة وارجع ريوس واصدم عمود الكهرباء ويروح الوقت بين الجدارن والعمود لين جانا واحد يعرف يسوق وطلعنا

س4/ اذا طلعت مشوار تحب تكون لحالك آو ضروري الشله تكون معك ؟
لازم معززين وناس تطهبل وترفع بك مامديك تتغلب على التوتر الا بهم !وكم مرة انقلبنا وحنا نطارد الحصانيه يعني الثعالب عدوان الحياة الفطرية هوع هع زين ماسقنا في مدن والا كنا وفيات او اعاقات

س5/ ليه اول ماتبدا تسوق اى مشوار تكون نشيط وتركب السياره قبل اهلك وبعد فتره
يكبر رآسك؟
يمل الواحد

س6/ مآهو نوع اول سياره سقتها ؟
مرسيدس بنز وبعدها ددسن العمال والمفتاح ملعقه هوع هع

س7 / مآهو نوع سيارتك الان ومـآهو لونها ؟
افلاون ابيض

س8/ هل يهمك لون السياره وموديلها وماركتها ؟
مايهم اللون بقدر مايهم الموديل والماركة وانااحب اركب سيارت وكالة على الزيروا


س9 / بعض الشباب مايحب يركب السياره الا اذا سمع كل اللى بالشارع صوت مسجله هل انت منهم ؟
اول كنا كذا الله يتجاوز عنا والان نعظ اصابع الندم لكن العمر له دور


س10/ وين كان اول مشوآر لك؟
البر

س11 / كم مره سويت حادث / بعد الشر عنكم ؟
قشعات خفيفة بدون اصابات يمكن اربع خمس كذا ! وحادث بالثانوي صار فيه كسور وتنومت ثلاث شهور بالمستشفى وكانت بداياتي الشعرية يعني مافيه حاجة سلبية الا ولها جانب ايجابي

س12/ اطرف وأسوأ موقف مر بك وانت بالخط ؟
كان الطريق في نزله واهدي ابي الف يمين اوقف اصلي وتجي سيارة مسرعة من وراي ماشافني بحكم مكاني ! ويصدمني ! ثواني وتتصل امي تقولي وش فيك ! مدري كيف عرفت بلحظة سبحان الله احساس الام ! وقتها بكيت لين صفى راسي من هول الموقف ! كيف حست فيني ! الله يرزقنا بر والدينا احياء واموات

س 13/اطول سفره لك بالسيارة ( كم كيلو )
2000 كيلو وصلنا حدود تركيا

س14/للشباب/ هل انت ضد او مع سواقة المرأة ؟
انا مع قيادة المرأة المحتاجه أما اللي ماخذات القيادة نوع من المتعة فانا امقتهم وضدهم على فكرة وحدة من خواتي تسوق هي وبناتها الثنيتن لكن مالها اولاد ذكور وكل وحدة موظفه وايضا كل خواتي وامي معلمه السواقه في البر للحاجة ماني ضد متعة القيادة لكن في اماكن معينه ولوقت محدد الا في حالة المحتاج فالضرورة تحكمنا

س15/ حصل مره احد شخبط بسيارتك ..أو كسر الزجاج ..وش سويت؟
مرة وقفت سيارتي تحت شجرة جاري في الظل ماهو على بابه وكان فيه كم شجرة يقدر يوقف فيها هو ولا كان عنده الا سيارة وحدة يعني ماسويت له زحمة , المهم خدش سيارتي بمفتاح من الرفرف الامامي الى الرفرف الخلفي يعني كل جنب السيارة وتوني مطلع السيارة وكالة وربي بغيت احرق سيارته لكن هداني واحد من جيراني وقال هذا شايب ودائم يسوي كذا في اللي يوقفون عند بيته
والسؤال بالعكس
حصل مره شخبطت في سيارة غيرك
او كسرت الزجاج؟ الله يتجاوز كنا نكسر السيارات اللي تمر ديرتنا وخصوصا التريلات نهل قزازها ونفك الحبال اللي تربط الاعلاف وأل مايلف تطيح , كنا افات تمشي على الارض

16/لو حصل مره وسقت و معاك حد وجلس يقلك لا غلط .. منا الطريق
لا مو منا ووو..كيف تتصرف؟
عادي انا ريلاكس مااتشنج
او طلع معاك حد وجلس يعبث بالمفاتيح وباغراضك الشخصية شلون تتصرف؟
مافي شيء اخبيه واخاف احد يطلع عليه اغراضي عاديه
الف شكر سماء على الحوار الشيق

قبل النهاية / بكل صراحة كم مخالفة ارتكبت الى الان وهل سددتها ام لا ؟


وأخيرا ..
ممكن تصور لنا سيارتك؟ جهازي مايدعم الصور
( لك الحرية بالقبول او الرفض)


بما أنه سُمح لنا بالسواقة ، فالموضوع مشترك
للشباب والصبايا ..

[خياآل]

نسينا نجاوب السوال الاخير
المخالفات 3500 وسددتها قبل عشر ايام
ويابلادي كم على شانك ..كم على شانك قعدنا مطفرين هوع هع

[أميرة الغيم]

ياهلا والله بحطاب
راده لك ولاجاباتك
بعلق عليها

[مالي صبر ياناس]

اسئله محرجه ^_^ ههههه

[مالي صبر ياناس]

س1 / كم كآن عمرك اول مره سقت السياره؟

يمكن كان عمري 18

س 2/ كم مره سرقت سيارة ابوك او اخوك ؟ وكم مره انكشفت وانجلدت ؟
يووه


س3/ كيف كان شعورك اول مره سقت السياره ؟

خايف لان السياره كان مرتفعه

وكم سيارة بالخط خبطت فيها ��

لا الحمدلله قت سليمه :(


س4/ اذا طلعت مشوار تحب تكون لحالك آو ضروري الشله تكون معك ؟
غالبا احب اسافر لوحدي لو معي الوالده تزين الامور

س5/ ليه اول ماتبدا تسوق اى مشوار تكون نشيط وتركب السياره قبل اهلك وبعد فتره
يكبر رآسك؟
لان الواحد يمل من مشاوير الاهل وكثرتها وزحمه الشوارع

س6/ مآهو نوع اول سياره سقتها ؟
مازدا

س7 / مآهو نوع سيارتك الان ومـآهو لونها ؟
برادو اسود ^_^ كان عندي اكورد دمرتها

س8/ هل يهمك لون السياره وموديلها وماركتها

يهمني تكون مريحه وسريعه


س9 / بعض الشباب مايحب يركب السياره الا اذا سمع كل اللى بالشارع صوت مسجله هل انت منهم ؟

احيان حسب المزاج ^^

س10/ وين كان اول مشوآر لك؟

المطار تخيلو :(


س11 / كم مره سويت حادث / بعد الشر عنكم

غير محدود

س12/ اطرف وأسوأ موقف مر بك وانت بالخط

مره رحت المدينه مع الشباب وطفرت هناك وعشان ارجع الرياض كديت بالسياره هههههههه

س 13/اطول سفره لك بالسيارة ( كم كيلو )
لبنان


س14/للشباب/ هل انت ضد او مع سواقة المرأة

مالي دحل علي قوله مشعل

س15/ حصل مره احد شخبط بسيارتك ..أو كسر الزجاج ..
وش سويت؟
والسؤال بالعكس

انا متسامح ^_^

حصل مره شخبطت في سيارة غيرك
او كسرت الزجاج؟
مره صدمت لكزس واهلها مايدرون وانحشت وبعد فتره اعترفت لهم جيراننا هههه



16/لو حصل مره وسقت و معاك حد وجلس يقلك لا غلط .. منا الطريق
لا مو منا ووو..كيف تتصرف؟
كل يوم وكل مشوار يطلع لي واحد فاهم بالطريق

او طلع معاك حد وجلس يعبث بالمفاتيح وباغراضك الشخصية
شلون تتصرف؟

ازبن كل اغراضي لاطلع معي شخص


قبل النهاية / بكل صراحة كم مخالفة ارتكبت الى الان وهل سددتها ام لا ؟

حسبتها قبل فتره طلعت حوالي 18 الف بس اخر سنه من بعد كورونا الحمدلله ماعاد في مخالفات :يحيى::يحيى: