مشكلتي هنا

[مشكلتي]

السلام عليكم ورحمة الله وبركاته
هنا بعرض مشكلتي واتمنى محد يجرح او يعلق تعليق سيئ
انا بنت ابلغ من العمر 28 سنة ودايما افكر بنفسي ومستقبلي
الحمدلله ع قدر من الجمال ومصليه واخاف ربي
كنت ابحث عن وظيفه وكنت شاغله بالي اني احصل وظيفه
قدمت ف عدة اماكن .. وفي يوم من الايام جاني اتصال
رديت قالو انتي فلانه قلت ايه ومقدمة ع وظيفة كذا وكذا قلت اي
المهم قالي ارسلي هويتك واوراقك ع الواتساب
رسلت هويتي واوراقي
لما شاف هويتي اعجب فيني
حاول يتواصل معي وانا اصده
وكلامي معه كان بخصوص الوظيفة
وهو يحاول يتقرب وانا طبعي حاد وانسانه اخاف ربي
كنت اعصب واتهاوش بس بنفس الوقت كنت محتاجه له
المهم بعدها من بعد الاخذ والعطي
قلبي بدا يلين
طبعا هو مالك للمستشفى اللي قدمت فيه
ومعاه شركات وخير وربي اعطاه من النعم
وابوه مسؤول كبير ف الدوله
انا كنت اشوف هالاشياء عائق بيني وبينه
المهم حبيت بعدما قالي انا ابيك بالحلال
كان كل يومه مشغول طوول الوقت وهو مشغول
حتى مانحصل وقت نكلم بعض ،
احيانا يخليني معاه ع الجوال بس فعلا كان مو فاضي من الصباح ل الليل
قلتله هذا الوضع بيستمر بعد الزواج ووعدني ان يرتب كل شي
وان هو الحين يتعب عشان يرتاح بعدين
المهم تواصلت معاه بنية نتزوج
بس دايما اخاف ربي يغضب علي اني متواصله معاه
ودايما اقوله هالكلام وهو يحلفلي انه بيجي بيتنا ويخطبني من اهلي
طبعا حاليا لنا 4 شهور من تواصلنا
المهم بديت احبه اكثر من حبه لي
كان يعصب من ابسط شي ، لدرجة بدا يغلط عليي وبدا يحط بلوك
يكذبني بمشاعري وبكل مرة مع الرغم احيانا توصل للاهانه انا اللي اعتذر
كنت اعذره واقول مضغوط ومايحس بكلامه لان بطول يومه مشغول واحيانا يمرض من كثر الشغل
وهالشي من لما عرفته وهو مشغول
بدا يعصب مني يبي ارسله كل الوقت
يبي اخبره كل التفاصيل احسه بدا يدور ع اي شي عشان يعصب
بدا يقول انا مو مهتمه وهو يتعب بالمقابل انا م اهتم
طبعا انا ابي احد يرسلي يشتاق لي
ابيه يرسلي هو بالاول ابي يتصل فيني
بس هو يبي هالاشياء مني فقط بحجة انه مشغول
اخرر شي كنت اكلمه وعصب مني ع شي تافه جدا جدا
قلت انت كل الوقت معصب وانا صابره ومتحمله قالي تمام لا تصبري
قلت تمام قال الله يحفظك
ومن بعدها مارسلت ولا رسل
مر يوم ورسلتله وكنت اعاتبه
ما رد ، قلت تتطنشني ليش
قالي يا بنت الناس احنا مايصير نتواصل
بيتكم واعرفه ولما اقرر اخطبك بجي بيتكم



الحين انا تركته وابتعدت عنه بس قلبي متعلق فيه
احاول اكثر صلاتي واخشع فيها واحاول اقرا قران واستغفر عشان انساه ،، بس انا م اعرف هل هو يبي يخطبني وصادق بهالشي ؟؟؟
وكيف اعرف اذا هو صادق ؟؟؟ بنفس الوقت ما ابغا اذل نفسي واساله وبنفس الوقت م ابغا اعيش بوهم يجي يخطبني ومايجي
لحد يقولي انسيه ولا تفكري لان الكلام سهل
وانا ابيه ع سنة الله ورسوله

[M.ahmad]

هذا الرجل يحتاج علاقه مؤقته يتسلى معها ووجدها فيك على طبق من ذهب بعد أن زودتيه بمعلوماتك الخاصه

فلو كانت نيته صافيه لكان وضفك أو تقدم لك من أول إسبوع أو أول شهر

ولكن نصيحتي لك أبتعدي عنه لأنك الآن تلعبي معه بالنار وقد يبتزك بالمعلومات التي لديه في أي لحظه إذا حسك تنوين عدم تركه في حاله .

[سعود .]

للان انصدم انه رغم غزارة القصص التي تُروى
والأحداث التي نراها بسبب تلك القصص المشبوهه
إلا أن هناك يقع فيها وكأنها سيحدث معه العكس
اتفق مع كلام احمد لو كانت نيته الزواج لطرق الباب
أما ماكان قبلها فهي مجرد تسليه
وبما ان لديك ضمير صحو جل من لايخطئ
استغفري ربك واغلقي الباب حتى ولو عااد
لاتتواصلي معه إلا بعد ان تتم الملكه وتكوني حلاله
فالحمدلله انتهى الموضوع دون فضائح
اسأل الله ان يرزقك بالزوج الصالح
ويستر عليك .

[أمَل]

وعليكم السلام ورحمة الله وبركاته
هلا فيك أختي..
بداية قبل يدق جوالك بلغيه يجي يدق الباب..
نظام التعارف ذا مردغ البشر ولاعبن بعواطفها...
دام البداية كذا النهاية واضحة
الإنسان الذي يتبع عواطفة يفقد قيمته..
كان يتسلى مرحلة إعجاب بمظهرك
صدقيني لو سحبتي عليه من البداية
كان وصل لبيتكم...
دامك ع قدر من الدين تمسكي بكرامتك..
والحمد لله وصلت هالعلاقة لـ المنحنى
تجاوزي الموضوع وصاحبة
https://youtu.be/gYvtT8ByRjc
إستماع ممتع:MonTaseR_98:

[ومضة]

الخلاصة الشخص ده بيسلي وقته
بالعقل كده هو ماشاء الله ظروفه الحمد لله
مش تمنعه من الزواج وهو لو غرضه الحلال من الاول كان جه خبط علي باب بيتكم وطلبك بالحلال
لانه يخاف عليك انما هو استسهل وغرضه تسليه لا اكثر

[العـ(احمد)ـالمي]

للأسف انتي كنتي خفيفه معاه وواضح انك مش من نوعه
لذلك حب انه يتخلص منك باي طريقة وانتي انجرفتي خلفه
بحجة انك محتاجه له حتى يوظفك ويتزوجك والا كيف يطلب
منك هويتك ومعلوماتك الشخصية وهو ماعرف سيرتك؟
واضح انه يلعب بمشاعرك واعتبريه صفحة قديمة واطويها
ربي يعوضك بخير منه

[خياآل]

اللي هذه اوله ينعاف تاليه
هذا شخص لاعاب ماهو حق زواج
والعلاقة اللي تنبني على كذا تنهدم بسرعة لان الشكوك تقضي عليها
خليه يظف وجهه وربي يعوضك خير منه بلا حب بلا نيلة &

[مسكك الغلا]

الهوية موجود لها بوستر يخفي الوجه اساسا ماله حاجه يشوف الوجه
من الاساس انتي غلطانه مرسله هويتك وماغطيتي الوجه .. الا اذا ماتتغطين عاد هذا شي ثاني ..

صفحة وانطوت وانسيها نهائيا
اللي بيخطب يسأل عن ولي الامر

[هـمـس]

..








وعليكم السلام ورحمة الله وبركاته

بصراحه المشكله نرفزتني شوي :MonTaseR_166:

اعتبري كلامي من اخت لأختها عزيزتي السائله

الى متى والبنات يصدقون الأوهام والأكاذيب؟

الى متى وانتوا فريسه لأصحاب النفوس الضعيفه،؟؟

ليش تتعلقون في سراب؟؟

ترا اللي يبغاكم يدل باب بيتكم تعبنا واحنا نكرر نفس هالجمله

عزوا أنفسكم واحترموها ليه تسوون بأنفسكم كذا

كلام أفلام هذا والله ما ينفعكم

صاحبة المشكله اقطعي علاقتك بهذا الشخص الحين

لو يبغاك مين ماسكه؟ يدل بيتكم

واصلا اغلب اللي يبدون بعلاقات زي كذا غير جادين

ماخذين الوضع تسليه وتضييع وقت ولعب في بنات الناس

زي ما قلت فوق اقطعي علاقتك عنه مباشره ما تدرين بكره ايش ممكن يطلب منك

او يعلقك زياده واخرتها يقولك باي باي

اهتمي بنفسك واشغلي وقتك بما ينفعك

وترا اللي يقولون لك الزواج عن حب احسن من التقليدي ما عندهم سالفه

الحب نفسه يشتكي من افعال بعض ابناء ادم

والله انقهر على حال بعض البنات

المشكله انتي مو صغيره عمرك 28 سنه يعني تعتبرين ناضجه

اتركي العاطفه وتصرفي بالعقل حافظي على نفسك

العابثين كثير وعلقي قلبك بالله فقط

الله يصلحك ويهديك وبنات المسلمين










..

[روحَ]

" عزيزتي :
الساعي إليكِ حلالاً لن يخونه دربه
سيسوقه الله لعقر دارك
مجروراً من قلبه !"

مو لازم تسوين شي عشان تحافظين عليه
إذا صادق راح يعرف كيف يوصلك لأن الله راح يعلمه كيف يوصل

وإذا كان كاذب عطيه ضربه على راسه عشان يتأدب
ويبطل يلعب بمشاعر البنات

>> أمزح ههههه

بس يعني قصدي كوني حازمة وكذا لا تصيرين طيبة بزيادة

[حفيد الأكابر]

ببساطة دوسي على قلبك
وإحفظي ما تبقى من كرامتك
وتذكري أن الحقيقة دائما مؤلمة

[كشمش]

.. واتمنى محد يجرح او يعلق تعليق سيئ




.. وانا اتمنى ان ما يستخف بعقلي

معليش، .. القصة فيها متناقضات - وعشان احسن الظن فيك -
ما تمكني ان اخدها على محمل جد
.. واحتراما لك، اكتفي بما كتبت .. واحجم عن التفصيل

[عطر النَّدَى]

أهلا بك عزيزتي

كان يعصب من ابسط شي ، لدرجة بدا يغلط عليي وبدا يحط بلوك
يكذبني بمشاعري وبكل مرة مع الرغم احيانا توصل للاهانه انا اللي اعتذر
كنت اعذره واقول مضغوط ومايحس بكلامه لان بطول يومه مشغول

يغلط عليك ويعمل لك بلوك !
وانتِ لم تلغيه من قاموس الأحياء !
وكل ماخطر على بالك تقرين عليه سورة يس
هو حفظ كرامتك قبل الزواج حتى يحفظها بعد الزواج !
هل سألتي نفسك اذا هذا الشخص متزوج أم لا ؟!
يوجد العديد من الرجال المتزوجين
لكن معندهمش مشكلة من التسلية !
كما يقول المثل : المكتوب باين من عنوانه !
وعلى حسب كلامك رغم ضعف شخصيتك أمامه
الا انك تخافين ربك
ربما كانت غايته أسوء مما يخطر على بالك !
لما لا تعتبرين ما حدث معك
حماية لك من رب العالمين !
هناك قصص تشيب الراس من شدة فظاعتها !

بس انا م اعرف هل هو يبي يخطبني وصادق بهالشي ؟؟؟
وكيف اعرف اذا هو صادق ؟؟؟

سأرد على أسئلتك بسؤال !
بما أنه ختم كل أنوع الصفع في تعامله معك !
هل تنتظرين منه لكمة الضربة القاضية
لتستفيقي من غيبوبة حبك له ؟!
مهما أشتد ألمك ومهما بلغت درجة حبك له
نفسك وكرامتك بالمقام الأول
هذا الشخص عرف بأنه اصبح نقطة ضعفك
ومهما فعل بك ستعتبرينه أهم من كرامتك
والرجل الذي لا تشعرين بأنه نقطة قوتك
ألغيه غير مأسوف عليه
يوما ما سيقع في شر أعماله
ربك كبير
وسأختم كلامي بسؤال ؟!
هل ترضين لنفسك زوجا يهينك ويقلل من كرامتك
ويعتبرك مجرد أنثى بلا كيان ولا يليق بها أن تكون ذات مقام ؟!

[جديلة ورد]

من طريقة كلامه معك واضح انه ماعنده نية يتقدم لك
ع الاقل لو خطبه بس مايضره لو يفضى وقت معين ويروح يطلبك
لكن هذا الشخص ماعنده نية زواج نهائياً مع الاسف
ابعدي عنه قدر المستطاع ولاتواصلين معه لين يجي يطلبك
لان معلوماتك عنده اذا صادق بيجيكم بس حاولي تبتعدين عنه حتى لو تشتاقين له
لاتتواصلين معه لانه نصاب من الاخر
اصبري واضغطي على نفسك كثري الحوقله وادعي ربك يصبرك ويتوب عليك
تكفين حاولي تبتعدين عنه لان جد مو صادق معك لكن انتي معميك الحب وتحسين انه صادق

[جرح كبير]

خذيها قاعدة الرجل اذا أحب المرأة يدير المستحيل لأجلها ومايفرط فيها ثانيه......والرجل الي يفرط في المرأه هذا مايبيها ولا يحبها اصلا

ترضي تعيشي مع رجل ما يبيك ولا يحبك؟ اكيد ماترضي ......خليك قوية تكبري وتنسي واهم من كل هذا قوي ايمانك وجددي توبتك

[*** سُهيل ***]

لا أشك أن هذا الشخص صياد ماهر

ومحترف جدا ..

البداية هو اللي يتقرب ويلح

وكل ما تسلل لحياتك وبدأت تأخذين خطوة للأمام

نحوه كان هو يأخذ خطوة للخلف

فأصبحت أنت من يبحث عنه وهو من يتهرب

وهذا طبيعي لأن حياتك كانت خالية قبل أن يدخلها

فلما دخل حياتك وسيطر على تفكيرك وشغل وقتك

أصبحت تفتقدينه وتشعرين بفراغ كبير

فتضطرين للمبادرة والسؤال والتنازل والاعتذار

ولن يكتفي بهذا ولن يتوقف عند هذا الحد

ولأنك تخافين الله نصيحتي لك ابتعدي

اخرجي من حياته

فإن كان صادقا فيما أوهمك به فسيأتي ليطرق الباب

فإن لم يفعل ولن يفعل فاحمدي الله الذي أنقذك وأهلك منه

والله يستر عليك ويهديك للصواب