المساعد الشخصي الرقمي

مشاهدة النسخة كاملة : وهلمّ جرًا


Control
12-29-21, 12:52 PM
-




السلام عليكم،

الصراحه اشتقت للتدوين ف المنتديات، الواحد احيانا عنده هروج ماينفع يقولها لا بتويتر ولا بسناب ولا غيره.. موب لسبب معين بقدر ما إن الواحد صار عنده شخصية معينة يظهرها للناس ولازم يحافظ عليها.. فكان الحل عضوية جديدة في منتدى جديد ، واخترت تلقائيا اسم Control لأن اتوقع ان هذا اكثر شي احتاجه حاليًا بحياتي، اني آخذ زمام التحكم في المرحله الجايه.
و أتمنى والله اني استمرّ وما يغلبني الكسل عن الكتابه هنا، أتوقع التنفيس مهم جدًا لي حاليًا، أول كنت أدون لأجل المتعة فقط.. بس الحين تمرّ علي مواقف وأفكار أشعر فعلًا اني محتاج أسجلها وأكتب رأيي فيها، والصراحه فكرة تمبلر ومواقع التدوين على الانترنت ماحازت على اهتمامي، انا والمنتديات بيننا عيش وملح ونعرف لبعض، فإن صملنا على هالمدونة خير وبركة،، وان غلبنا الكسل والتسويف يكفي شفنا وجوهكم الطيبة

كنا نقول ان هجرة الناس لتويتر و السوشيال ميديا عمومًا شي إيجابي، لكن انا اكتشفت ميزة مهمة في المنتديات ما حصلناها بتويتر: "الانسلاخ".. و بتعبير أبسط أقدر أقول الفرص الثانية، بتكلم عن تويتر على سبيل المثال بحكم إنه بالنسبة لي يبقى سيد المنصات على مر السنين لأسباب كثيرة؛ للناس اللي زيي اللي يستخدمو حساب شخصي باسمهم وفيه معارف شخصية، صعب جدًا انك تطلع من الشخصية اللي انت رسمتها على مدار سنين طويلة. وحتى لو فكرت تسوي حساب جديد مثلًا، تحتاج وقت انك توصل لنفس الجمهور السابق ولما توصل له ما راح تعرف تتواصل معه بنفس الطريقة. لكن ف المنتديات كل هذا محلول بضغطة زر؛ عضوية جديده واسم جديد و تلقى نفسك بثوب جديد أمام نفس الجمهور. وبدون مثاليه كلنا نحتاج أحيانا نطرح آراء ونتكلم في مواضيع وأمور ما تتماشى مع الكاركتر اللي راسمينه لأنفسنا على منصة تواصل معينه، ومادري الحقيقه ليش لما أقول الجمله ذي لأي أحد يحسبني أقصد أمور ومواضيع "مش كويسه" !
وعمومًا أنا خطتي للتغلب على كل هذا العكّ تأسيس برنامج إذاعي أو بودكاست، اتكلم فيه بشكل مباشر منّي للناس دايركت وبدون تعديل ومسح وتنقيح.. والصراحه هذا حلم قديم للأسف لسا ما تجرأت أبدأ في تحقيقه، واتوقع أهم سبب هو خوفي إني ما أوصل لطبقة الناس اللي أنا احب اتكلم معاهم وآخذ وأعطي، انا انسان احب الكلام عموما، لكن كحال أغلب عباقرة العصر؛ صعب ألاقي الطبقة اللي تستاهل تسمع. أوفر شوي ؟ ماعلينا :icon10:

الحقيقه اني اشتقت لجو المنتديات عمومًا، مع إني كنت اتّهم ظلمًا إني راعي مشاكل وكانت تستفزني بعض الأشياء.. لكن لها متعة لوحدها، أهمها متعة استخدام يوزرين متناقضين اللي ما يقفطها إلا إداري شاطر *غمزه بريئه* .. وعموما الواحد يقدر يسوي كل شي عشان يغير شخصيته، يغير اسمه وصورته وبياناته، إلا أنه يغير من أسلوبه و ألفاظه و تعابيره في الكتابه.. احس انه شي شبه مستحيل، فلذلك عزيزي القارئ ان كنت تعرف صاحب هذه السطور من حياة سابقة: استر ما واجهت
بنهاية هذي المقدمه اكتشفت ان لياقتي في الكتابة انخفضت كثير، كان المفروض ما تاخذ اكثر من ٥ دقايق

هاكم ورده :MonTaseR_2:

Control
12-30-21, 01:51 PM
-



خلونا نتفق ان رسالة ايداع الراتب هي ثاني أحلى رسالة في الدنيا .. " الأولى نعلمكم عليها بعدين " :icon10:

كل فترة اختبارات اجباريًا الأجواء ترجع الواحد كم سنه ورا لأيام الدراسة، والصراحة استغرب من أي شخص يتجرأ ويقول "ياليت أيام الدراسه ترجع" .. أشك في قواه العقلية بأمانة يعني،
مهما كانت متعتك أيام الدراسة أيًا كانت مرحلتها إلا ان حياتك الحقيقه ماتبدأ إلا بعدها، تبدأ اذا اشتغلت حتى لو في مجال غير تخصصك.. كمية التجارب والدروس اللي يمرّ فيها الطالب مهما تراكمت وكثرت تظل في النهاية بالنسبة لي مجرد حبر على ورق.. مجرد مدخل ولا بوابة تدخلك للعالم الحقيقي. هي أساسيات وقاعدة تحاول تثبتها وتحسن ترتيبها لأنك بتبني حياة وعُمر عليها.. ومافي شخص عاقل في نص الطريق يتمنى يرجع لمرحلة الأساسيات!
في الجامعة كنت اقول ان سنين الجامعة غيرت شخصيتي تماما، وصقلتني وشكلت القالب اللي بعيش فيه حياتي خلال الأربعين سنة القادمة إذا ربي كتب لي عمر.. خلصت وتخرجت و توظفت واكتشفت ان كل هذا مجرد كلام.. الانضباطية و الالتزام اللي كان الطالب يشعر فيه وهو يحضر ع الوقت ولا يسلم المطلوب منه ع الوقت ما تساوي شي أمام انضباطية والتزام تساوي فلوس. والصراحه تعبت في هالناحية لأني أساسًا ما أشوف اني كنت طالب منضبط، أغلب مسيرتي الجامعية كانت على شفا جرفٍ هارٍ..

/

سؤال اليوم؛ ليه الناس وأنا منهم عندنا هوس و رغبة دفينة اننا نشوف الشي اللي مفروض مانشوفه؟ شي متخبي عنّا لسبب ما، لو ماندري عن وجوده ما راح تتأثر حياتنا بشي أساسًا.. لكن بمجرد إنّا ندري انه موجود بس اللي سواه ما يبغانا نشوفه! هنا يصير الهدف السامي للحياه خلال الأربع وعشرين ساعه القادمه إنا نشوف هالشي ونعرفه و نعرف تفاصيله.. عادي تلاقي شخص غير مهتم بالفنان اصلا حريص يسمع "البارت المحذوف" من أغنيه، مشهد محذوف مسرّب مدته ٩٠ ثانيه مشاهداته تكون أكثر من مشاهدات الفيلم نفسه.. هل نحن ملاقيف بالفطرة؟
اكتشفت الآن اني احتاج هالمدونة أكثر مما كنت أعتقد، كانت الكتابة عندي سهلة وأصابعي تسترسل تلقائيا وبسهولة أرتب أفكاري في جُمل وأكتبها و حتى لو جاتني فكرة في وسط السطر أقدر أضيفها وأكمل.. الحين صفّ الكلمات صار أصعب وبين كل سطر وسطر لازم أتنح شوي

نراكم لاحقًا ، ويكند سعيد

:MonTaseR_11:

Control
01-05-22, 11:04 AM
-



السلام عليكم ، هابي نيو يير :icon10: ..

أنا احب اتفرج فعاليات رأس السنه، بكل أنواعها سواء الاحتفالات الرسمية ولا فعاليات السوشيال ميديا أو البرامج والحلقات الخاصة.. ومنها أشوف تعامل الناس مع هالمناسبة..
لكن في شي دايم استغرب منه ؛ اللي هو موضوع البداية الجديده أو new year new me .. ليش؟ إذا انت عندك هدف أو غايه تبغا تحققها أيّا كانت، ليش مربوطة بتاريخ معين؟ هو مجرد رقم في التقويم ماله أي أثر حسّي ولا معنوي ع الحياه، عشان كذا كل نهاية سنه ألاقي الناس تقول والله ماحققنا أهداف السنة الماضية، طبيعي! لأن رسم الهدف والخطة كانت مجرد نشوة وقتية، راح حماسها و أثرها مع نهاية أجواء راس السنة.
أظن ان الأهداف أو الرغبات الحقيقية هي اللي نشعر إننا نحتاج نبدأ ف تنفيذها الآن، أي شي معلّق لوقت لاحق أو نقدر نتقبل فكرة تأجيله لتاريخ مميز فهو شي غير ضروري في أنفسنا، أو ماعندنا نية وحرص لتحقيقه أساسا، لكن مجرد ترويح عن النفس قلنا إنا بنبدأ نسويه في تاريخ ١/١.. وطالما هو يحتمل التأجيل حتى ١/١ فهو قابل جدًا للتأجيل كمان شويه، وأنا الحمدلله ما أحط اهدافي بتاريخ ١/١ لأنني أساسا محترف في التسويف ولا أحتاج لأرقام وتواريخ تعلّمني شغلي :icon10:
عموما، الحمدللّه على سنة سترنا فيها الله ورزقنا الصحة والعافية، و ان شاء الله أعوامًا سعيدة قادمة


سمّو :MonTaseR_11:

Control
02-26-22, 12:30 PM
-



السلام عليكم ..

الصراحة مريت بشهرين غريبة جدًا، انحطيت ف مواقف كنت اضحك ع الناس اللي تنحطّ فيها، واضطريت إني اتصرف تصرفات كنت استغرب من اللي يتصرفها تحت ذريعة "الاضطرار" !، المواقف هذي الشهرين ما انولدت من العدم، كانت نتاج قرارات كثير انا اخذتها غلط، وان كانت نواياي سليمة أو كنت أقنع نفسي إني أتقبل أسوي الشي الغلط الحين عشان الصورة الكبيرة والمحصلة النهائية تكون صح. لكن انقال لي ان ما ينفع أحد يكب عليك زيت ونار تحت ذريعة "أبغا أدفيك"، والصورة بحد ذاتها أساسا مزعجة للي يفكر فيها فما بالك باللي يعايشها.
كنت أحكم على أشياء كثير تمرّ حولي، أنتقد أشخاص وقرارات ومواقف أنا دوري فيها كان دور المتفرج وما أدري الناس اللي داخل هذا الموقف ليش تسوي كذا و ايش دوافعها، وحتى لما أسمع دوافعهم ممكن أستتفهها بشكل أو بآخر أو أستتفه القرارات هذي، لكن على ما قيل اللي يده في المويه غير اللي يده في النار .. أتوقع أول شي راح أحكيه لأي احد يطلبني نصيحة مستقبلًا: لا تبرر قرارك الغلط أنه بيحقق محصلة نهائية أو صورة عامة صح.. لأن ممكن انت ما تلحق أصلا توصل الصورة النهائية اللي انت تبغاها، و ف النهاية تبقى في مواجهة قرار كارثي أخذته بلا نتيجة تذكر. لكن الحمدلله على كل حال


"يكتم الإنسان غضبه في قلبه، ويظن أنه اختفى،
فيظهر فجأة في الوقت الخطأ، وللأسباب الخطأ، وللناس الخطأ..
إنها رذيلة عدم خوض المعارك في وقتها"


.


SEO by vBSEO 3.6.1