نافذة إليّ [الأرشيف] - منتديات مسك الغلا

سحاب

04-13-22, 05:11 AM

السلام عليكم ورحمة الله وبركاته

أختكم الفقيرة إلى الله،، جتكم نازحة من منتدى غرام من بعد ما انقفل علينا أكثر من مرة واحنا مصرين الا نسجل فيه ثانية وثالثة << أبد ما في كرامة

كان ودي أجيكم في حال أحسن من كذا لكن كتب ربي إني ما أجيكم إلا منتوفة لا والأسوأ من كذا ان الي ناتفني أختي الصغيرة أبو سبع سنين،، والله ياهي نتفتني نتفة بنت كلب ما خلت فيني ريشة صاحية -_-

هذا سلمكم الله كنا في السوق،، وقالت تبغى ايسكريم رحت أجيب لها،، أنا جبت لها أبو كاس وهي قالت انها قالت لي انها تبي أبو بسكويت بس أنا ما سمعتها!!
قلت لها خلاص أنا قد قطعت فاتورة وأخذته أكليه ومرة ثانية أجيب لك أبو بسكويت

أخذته على مضض،، ويوم شافت عيال أختي معاهم أبو بسكويت ولعت وفكت حلقها ولا عاد سكرته🤦🏻‍♀️🤦🏻‍♀️

قالت:" دايما تهاوشيني اذا ناديتيني واتسيمخت والحين تسوين كذا،، قلك تعلميني وتربيني وانتِ عادك ما تربيتي"
أنا طبعا مبهوتة ومصعوقة ولا قادرة أرد😂💔

أخوي ماسك ضحكته غصب ويقولها عيب وش هالكلام أختك لازم تحترميها
قالت وهي معصبة والله ما أحترمها لين تصير عجوز🤦🏻‍♀️😂💔
مدري قصدها حجمي صغير وما يأهل انها تحترمني والا ايش سالفتها بالضبط بس أنا خلاص غاسلة يدي من الجيل الجديد وألسنتهم😭💔

سحاب

04-13-22, 07:43 PM

سؤال يا جماعة عشان أنا جديدة على المنتدى،، هو طبيعي في هالمنتدى إن أسماء الأعضاء الي أعطوك تقييم ما تظهر؟

شفت تقييمات وبعسست بعيوني أدور أسماء بس ماش انفقعت عيني ع الفاضي ما عرفت غير لقاليقو وهيام بس عشان كتبوا أسماءهم في التقييم!

+
الاقتباس من وين نجيبه؟ والله شكله يبي لي وقت على ما أتعلم عليه وأنا إنسانة كسولة��

المهم
اهلا شموخ نورتينا بطلتك البهيه،، انتي يلي كان لونك وردي ولا ذاكرتي غلطانه��
أهلين أهلين يا عزيزتي الي ما عرفت اسمك♥️ ،،
لا ذاكرتك صحيحة والله هذيك الأيام تنتفت تنتيف،، أحيييه ذكرتيني بذكريات مؤلمة ��

سحاب

04-16-22, 04:30 AM

يأثر فيني خبر الوفاة جددًا وخاصة إذا كان أحد أعرفه أو عرفته من قبل ..

وصلنا قبل يومين خبر وفاة (محمد) ولد صديق أبوي،، وأمه صديقة أمي ،، توفى بحادث وأوجعنا الخبر جددا

الكل متأثر أمي، أبوي، أنا، وإخواني .. البيت هادي وكأن العزا عندنا .. كل واحد منعزل في زاوية ومحد له خلق شي..

أقول في نفسي إذا كان هذا حالنا،، فكيف حال أمه وأبوه!! الله يصبرهم ويربط على قلوبهم ..

قال أخوي صرت أكره أفتح الفيس بوك،، كل ما جيت بانسى يذكروني فيه،، استغربت شلون رغم إن توه ٢٢ وقدر بهالشكل يملك قلوب الناس ويكسبهم!!
الكل منزل تعزية فيه من أصحابه لزملاءه في الجامعة لأصحاب أبوه للدكاترة الي درسوه،، حتى الي عرفوه من بعيد بس!!

تذكرت حديث الرسول"أقربكم مني مجلسًا يوم القيامة أحاسنكم أخلاقًا" ،، وفعلا كان محمد مثال وقدوة في الأدب والهدوء والاحترام وغاية في اللطف مع الكبير والصغير

الموت صعب على الأهل أكثر من المتوفي،، بالنهاية هو راح للرحمن الرحيم وفي أيام مباركة ونال حسن الخاتمة

لكن وش حال أبوه وهو أكبر عياله!! أبوي كل وقته يدعي له بالصبر وإن الله يجبر مصابه...

أمنيتي دائمًا وأبدًا إني أكون أول الراحلين من أهلي،، إذا وفاة الغريب الي عرفته بس في طفولتي أثرت فيني هالقد شلون أهلي؟! وأنا وفاة جدي وجدتي الله يرحمهم ما تجاوزتها بسرعة أبد وللحين إذا ذكرتهم يمرني نفس الحزن...

أخيرا .. أعتذر جددا من التقييمات الي ما رديت عليها،، هذا أنا ياخذني الحزن لزاوية وأنعزل عن الكل،، حتى الواتس وبقية البرامج أفتحها وأقفل بدون لا أرد ولا حتى أفتح الرسايل ..

سحاب

04-18-22, 09:07 PM

تصدقون إني أمس دخلت المنتدى وكتبت شي وانشغلت في نص السالفة وماعاد لقيت وقت أكملها ونسيت،، ويوم دخلت اليوم تذكرت ،، تصدقون والا نا تصدقون؟ :(

بابكي أنا بابكي خلاص،، الوقت يمضي بسرعة مخيفة أحس اني مش لاحقة على أي شي وجدولي الي كنت حاطته في أول الشهر اختبص وتخربط 😭

المهم سالفة أمس ما بخليها في خاطري باكملها اليوم بأثر رجعي😁

يستفزني جدًا تهميش الأطفال والتاس الي تحسهم شي ثقيل على النفس!! وخاصة في موضوع صلاة الأطفال في المسجد.

أنا من بداية رمضان وأنا صابرة على بعض الحريم في المسجد ال ييطردون الأطفال أو يفرضوا عليهم انهم يروحوا آخر صف حتى لو كانوا جايين بدري وأقول شهر خير يا بنت لا تجرحي صيامك ولا تتجادلي معاهم،،

لين اليوم صار موقف خلاني أتفجر عليهم،، طبعًا بما إنهم فارضين على الأطفال انهم يصلون آخر صف صرت أروح مع أختي في الأخير لسببين : الأول إني أبيها تتعلم الصلاة بالطريقة الصحيحة وأنا أدري انها اذا صلت لحالها جنب بقية الأطفال بتخبص معاهم،، والثاني انه هي نفسها ما تحب تصلي وحدها جنب الأطفال لازم أنا أو أمي جنبها،،

وفي أثناء ما احنا نصلي جت واحدة متأخرة ولأنها ما تبي تصلي جنب الأطفال راحت جاية وتجر أختي من مكانها جنبي وتوقف تصلي معاها!! خير خير!!

ولعت وأنا أصلي قسم بالله اقهرتني،، مو عشانها أختي بس،، لا عشان التصرف نفسه مستفز،، اذا انتِ جاية آخر الخلق تراه مو ذنب الصغيرة!!

خلصنا التراويح والوتر وانفجرت فيهم،، يعني ما انفجرت حرفيا حاولت أضبط أعصابي شوي،، قلت لهم احنا ما جينا نتجادل ولا نبي نجرح صيامنا بس يعني وش مشكلتكم مع صلاة الأطفال!!

قالوا السنة ان الأطفال في الأخير ومن هالكلام،، طيب اذا كان الترتيب هذا سنة فتعليم الأطفال الصلاة فرض والفرض مقدم على السنة،، ثم إن الطفل ما يتعلم لحاله ولا يتعلم من طفل زيه لازم جنبه أحد كبير يعلمه،،

قالوا ازعاج وفوضوية قلت لهم انتوا سببتوعا لان طفل وجنبه طفل طبيعي بيصير ازعاج بس لو كل طفلة جنب أمها تعلمها الصلاة وتضبطها اذا سوت ازعاج ما كان حصل هالفوضوية،،

كرهوا الأطفال في المساجد وفي الصلاة،، وآخرتنا نتحلطم من جيل احنا كنا سبب في تكوينه،، ويطلع معانا إما طفل كاره للصلاة وكاره للمسجد،، أو طفل ما يعرف أحكام الصلاة لانك تركته يصلي لوحده في آخر صف،، أو طفل مستهتر بالصلاة لأنك كنت تحسسه إن صلاته مو مهمة!!

وما ادري ليه الناس صارت تعتبر الأطفال عبئ مو بس عيال الناس حتى عيالهم نفسهم،، يا أختي إنتِ بدال ما تطردي الطفلة من المسجد علميها الصلاة الصحيحة حببيها في الصلاة وبدال صلاوة التراويح الي ما ركزتي فيها اليوم او يمكن فاتت عليك حتى بيصير أجر هالطفلة كل ما صلت من يوم علمتيها لغاية ما تموت في ميزان حسناتك وبدال هالصلاة الي فاتت عليك كسبتي أضعاف أضعافها..

مدري لين متى واحنا فاهمين ديننا بشكل أعوج ومدري لين متى بننشئ أجيال بشكل خاطئ ونرجع نتحسر ونقول ايش ذا الجيل!!

سحاب

04-19-22, 02:45 PM

باقولكم سر يا بنات بما إني توني خلصت أسوي الحلا😁
أول شي كوني ذكية واختاري الأشياء الي بيمدحونك عشانها يعني حلا أو أي شي ينأكل وخلي المواعين لأختك😁😂

ثاني شي إذا أخذتي طريقة حلا لا تسوينها نفسها في كل مرة،، غيري فيها ولو شي بسيط مثلا بدلي نكهة الشكولولاتة ،،او ضيفي لوتس أو أي شي من هذا القبيل بعيدا عن الإضافات المريخية

واعتمادا على إن الرجال عندهم حاسة تذوق قوية ما شاء الله>> استنتجت النظرية من اخواني بس مدري اذا كل الرجال كذا والا لا بس اخواني ما شاء الله فعلا حاسة تذوقهم قوية أنا عن نفسي إذا سويت شي وبتأكد من كمية الملح فيه أخلي أخوي يذوقه ما أذوقه أنا🙂💔

المهم راح يركزون أكيد على النكهة الجديدة في الحلا ويحسبونه حلا جديد واسمتعتي عزيزتي بالمدح😁♥️👌

سحاب

04-20-22, 01:21 AM

احييك ياشيخة 😌 ياختي حسيتك تصرخي باذني وانا اقرا الموقف😆😆 طبعا انا لقلق🚶

ههههههههه يستاهلون والله الي يصارخ عليهم،، يعني الله سبحانه قال" وأمر أهلك بالصلاة واصطبر عليها" قال(اصطبر) وما قال اصبر لأن أمر الصلاة مو هين وتعويد الطفل عليها وتحبيبه فيها مو شي سهل،، وبعض الناس كذا ما تجي الا بالصراخ شسوي لهم أنا!! ههههههههه

+
أشكر لك يا لقلوقتي كثيرا ذكر اسمك لأن الظاهر أنا ما بوصل لعدد المشاركات المطلوبة الا بعد عمر طويل😂💔

سحاب

04-20-22, 11:06 PM

أحس بإحساس(الأبكم) وأنا آخذ اليوم أول جولة في المنتدى ولا أستطيع التقييم أو الإرسال☹💔

بس والله انشرح صدري لما دخلت ولقيت الوضع مرتب لون الخط والترتيب والرمزية😂😂💔

لا مو أنا ،، أنا كسولة زي ما عرفتوني دائما وأبدا،، التغيير سوته فاعلة خير فديتها 😂♥️

سحاب

04-21-22, 03:02 AM

الله يعينك ودي اضيف لك مشاركات من عندي هههه...\\\وهم

اييه والله ياريت☹💔،، ما في عندهم نظام الصدقة؟😁💔
+
حياك الله وهم نورتي وأسفرتي ياقلبي ولو متأخرة😍♥️

شخشوختي يازين مدونتك بس

وانتِ مصرة على دلع شخشوخة الي أصلا مدري من ضاحك عليك وقايلك انه دلع🚶‍♀️💔
هيومة قلبي شرايك تغيرين الدلع بما انا غيرنا المنتدى وتسذا🙂💔
وعيونك الزينة والله😁♥️

سحاب

04-22-22, 01:35 PM

بس لعيونتس نغيره سمسومتي ها شلوني عجبتك ولا نغير ��
معلش يا هيامي ولكن تم تقسيم تقييمك إلى قسمين القسم الأول ويفضل ستره ههههههههههه والقسم الثاني سدحناه ،، سمسم سمسم يا شيخة ومالو؟ كل شي منك حلو،، الا شخشوخة طبعا😁

هههههههههههه فااااطس ضحك على اسم الدلع .. الصراحه ما ينفع بريال هههههه / اخوك رايق
من حقك تفطس والله كان ودي أرقع بس مالها ترقيعة🙂💔
بس خلاص غيرنا اسم الدلع😁
وحياك الله أخوي رايق في مدونتي المتواضعة^^
______________

كم مرة وردت في القرآن وعود إبليس ووعيده بأن يغوي بني آدم؟؟
"قال فبما أغويتني لأقعدنَّ لهم صراطك المستقيم"،،"قال أرأيتك هذا الذي كرمتَ علي لئن أخرتنِ إلى يوم القيامة لأحتنكن ذريته إلا قليلا"،، "قال فبعزتك لأغوينهم أجمعين" ،، وغيرها وغيرها كثيير!!

وكم ورد من تحذير الله لنا من اتباعه؟؟
"ولا تتبعوا خطوات الشيطان إنه لكم عدو مبين"،، "الشيطان يعدكم الفقر ويأمركم بالفحشاء والله يعدكم مغفرةً منه وفضلًا والله واسعٌ عليم"،، "ومن يتخذ الشيطان وليًا من دون الله فقد خسر خُسرانًا مبينًا" ،، وغيرها وغيرها كثيير!!

والطبيعي أنه إذا عرفت عدوك،، وحقده عليك،، وكيده وحرصه على أن يوقعك،، تحذره وتكرهه وتكون مهتم جدًا بأنك تفشل مخططاته!!

_فماذا لو أن كُل هذا لم يُذكر؟!
فما أوسع رحمة الله!! فإذا كنا بعد التذكير والتحذير والتكرار مازلنا نقع ونخطئ ونزل!!

فالحمد لله كما ينبغي لجلال وجهه لا نحصي ثناءً عليه ..♥️✨

سحاب

04-25-22, 06:11 PM

أنا ومن كسلي ما قرأت قوانين المنتدى وشروطه،، والظاهر اني لازم اقرأها وأتفقه فيه لأني مضيعة مرة :/

الحين تقييم وما نقيم وقلنا ماشي ،، رسايل وما نرسل وقلنا معلش،، بس خيار الاعجاب مرات ما يظهر لي بعد!! ليش طيب لييش أبكي أنا والا أبكي؟؟
يسروا ولا تعسروا يا جماعة وش الداعي لهالقانوين كلها!! -_-

سحاب

04-27-22, 02:00 PM

اظن لما توصل مشاركاتك ٥٠ تنفتح لك التقييمات وايضا لما توصل ال ٥٠٠ الرسائل بعد تنفتح عندك ،، اما اللايكات غريب وضعها ليه ما تظهر !!\\وهم

صحح عليك يا وهم😍👌،، دخلت شفت مشاركاتي واتضح انه أمس كانت المشاركة الخمسين وفعلا لقيت التقييم مفتوح وأخيرًا،، ورحت بكل حماس باقيم الناس وأتكلم ولكن مثل ما يقول المثل جت الحزينة تفرح ما لقتلهاش مطرح💔 كل ما جيت باقيم يقول خلل في المعلومات ولا يرضى يكتب أي شي😭

ههههه اولا حياك الله بين اهلك والثانيه الله يجبر بخاطرك من اختك. تحملي الشكوى لله
الله يحييك عزيزتي♥️،، اي والله الله يجبر بخاطري ،، يعني أنا فعلا حبيت كل شي في المنتدى مواضيعه وأهله والانضباط القائم الا سالفة التقاييم المحجوبة ذي،، يعني الواحد شلون يتكلم مع باقي المجتمع هنا؟؟ بالتخاطر مثلا-_-

_______

أرسلت لي صديقتي مقطع يوتيوب وتقولي صح هذا زميلنا؟
فتحت المقطع قلتلها الا والله هو!!
المقطع كان عبارة عن مقابلة تلفزيونية قصيرة معه،، يسألونه عن وضع اللاجئين في هولندا،، وكيف تهرب وإيش الي خلاه يجازف بحياته ويتخذ هالقرار..

لما كان يدرس معنا عرفنا انه تهرب لهولندا عن طريق بيلاروسيا،، ويومها استغربت وقلت لصديقتي كيف الواحد ممكن يخاطر بحياته وهو يدري انه ممكن يموت قبل لا يوصل حتى!! الله يقول" ولا تلقوا بأيديكم إلى التهلكة"! قالت الله أعلم ما تدرين يمكن شي أقوى من الموت!!

زميلنا طلع إعلامي،، اعتقل لمدة أربع سنين،، صدر في حقه حكم إعدام،، طلع من المعتقل في صفقة من صفقات تبادل الأسرى،، خرج بانزلاقات في العمود الفقري وأمراض في الكلى من آثار التعذيب!!
سافر مصر على أساس يتلقى العلاج،، ولأن حكومتنا(قاتلها الله) غير مسؤولة ماقدر يغطي نفقات العلاج!!

سمع وقتها عن اللجوء لهولندا والتهرب عن طريق بيلاروسيا وبنفسية إنسان طالع من المعتقل محكوم عليه بالإعدام ظلم وافتراء ينتظر الموت في كل لحظة ولا يدري متى راح ياخذونه للساحة،، فشيء طبيعي انه يستسيغ الفكرة!!

وفعلا تهرب مع مجموعة من الناس،، عانوا من البرد والجوع والخوف،، قطعوا ****** خلال ثلاثة أسابيع علشان يوصلون للحدود الهولندية،، وحاليًا هو قدم طلب لجوء وينتظر النظر في وضع..

وآآآه من جوااا القلب وبكل حسرة،، لما البلد الي مفروض تكون الأمان لأهلها تنقلب جحيم!! لما تكون حرية الرأي والتعبير والنطق بالحق جريمة توجب عليك الإعدام،، لما ابن البلد يضطر يختار ما بين الموت والموت!!

دعواتكم في الأيام المباركة من هذا الشهر لليمن بأن يردها ربي لأحسن حال،، وجميع بلدان العرب والمسلمين المنكوبة وأن يرد كيد الكائدين في نحورهم ،، ولعلها ليلة القدر فلا تنسونا ..

سحاب

04-28-22, 11:30 AM

انشقي يا أرض وابلعيني😭💔

خبصت تخبيصة قوية☹

ههههه اولا حياك الله بين اهلك والثانيه الله يجبر بخاطرك من اختك. تحملي الشكوى لله

جاني هالتقييم وبما انه ما كان يظهر عندي أسماء الي أعطوني تقاييم فتوقعته من وحدة من الصديقات في المنتدى ،، ولكن لما ظهرت الأسماء طلع انه من أخوي طاغي النظرة😭😭
باموت من الاحراج😭😭😭
أعتذر منك أخوي والله ولكن قوانين المنتدى الي الله يسامح من اقترحها 💔

سحاب

04-29-22, 04:37 AM

استعدادنا للعيد هالمرة من نوع آخر،، وحلاوة العيد من نوع فاخر جدا ،، حلاوة العيد عبارة عن أحلا توأم شفتهم في حياتي😍😍♥️ ،، زوجة اخوي ولدت وجابتهم لنا وأخيييرا بعد انتظار تسعة أشهر😍♥️
كلنا مبسووطين واحساااس رهييب أول ما شفناهم،، صغااار بالحييل كأنهم بِسَس😍♥️
يشبهون بعض والاثنين يشبهون أخوي ،، وانا ما عندي شغلة غير إني أطالعهم مفتونة بكل تفاصيلهم حتى بكيهم سجلته وكل شوي أسمعه😂♥️
أرسلته بعد لاخواني وفطسوا ضحك،، أصواتهم صغيرة وبكيهم يضحك😂😂♥️
الله يحفظهم ويقر عين والديهم فيهم ويجعلهم من خيار عباد الله♥️

سحاب

05-01-22, 07:17 PM

مهما قالوا لك ان خشمك مسدود بسبب اللحمية،، واللوز منتهية صلاحيتها بعد ولازم تطلعهم،، لا تصدق، لا تصدق، لا تصدق

والسبب انه بعد العملية راح يصير الزكام أقرب لك من أنفاسك،، إذا تعرضت لهواء بارد زكمت،، واذا تسبحت بمويا باردة ولو شوي زكمت،، واذا تغير عليك الجو بعد زكمت

وتدرون وش الي ما أحبه أكثر من الزكام نفسه؟؟ السخونة وانا أبد ما تجيني سخونة زي باقي الأوادم،، سخونتي دايما داخلية..

وما أعرف اني مسخنة الا اذا حسيت ببرودة وقمت أتنافض وعظامي يتكسرن وعيوني توجعني ورقبتي بعد،، ولكن وقتها أكون خلاص قد بلغت من السخونة عتيا💔

خلاصة القول حافظوا على خشومكم وحلوقكم من عبث الدكاترة،، ولا تصدقون ان العملية كويسة ابدا مو كويسة ولا تصدقوا بعد انها سهلة تراهم كذاابيين،، وكل عام وانتوا بخير وصحة وسلامة بعيدا عن الزكام

سحاب

05-07-22, 10:11 PM

أحب إني أحتفظ بذكرياتي الحلوة،، وأحب أدور ذكريات حلوة في عز الضيقة،،

هذا كان أول عيد بدون أنيسنا أخوي وصديقي ،، وهو من الأسباب الي خلت عيدنا هذا كئيب نوعا ما بالإضافة للضيوف ثقال الدم،،

ما علينا خلونا نجي للشي الحلو
https://f.top4top.io/p_23189ltl70.jpg (https://top4top.io/)
هذي الذكرى الحلوة في عيدي هالمرة،، (أنس) أخوي الي عمره ما خذلني أو خيب ظني دايمًا موجود إذا احتجته،، نتفق جدًا وشخصياتنا متقاربة نوعا ما مع بعض الاختلافات

عز علي فراقه،، لما كان على وشك السفر كان يقولي ودي أحطك في الشنطة وآخذك معاي ،، طيب مافي منك أحجام صغيرة على ميداليات��

كلمته اليوم يقول منتظر بفارغ الصبر الحش على الضيوف هههههههههه لو كان موجود كنا كل يوم نعقد أنا واياه حلقة حش عليهم ،، بس أبشركم سمعتهم يقولون ان يمكن يسافرون بكرة وأخيرا��

الله يجيب بكرة على خير ان شاء الله��

سحاب

05-08-22, 02:51 PM

تلك العلاقات التي تفتقر للمصداقية والأمان ك(الغرغرينا) ،، إن لم تقطعها فستُهلِكُ روحك ..

...
حقيقة،، دايمًا وأبدًا أهم صفة بالنسبة لي في أي إنسان أتعامل معاه الصدق والوضوح،، أكره الدوبلوماسية الي يقولون عليها،، أعتبرها من الأوبئة المتفشية في المجتمع في العصر الحديث ..

سحاب

05-11-22, 06:00 AM

أحسني اليوم عصفورة وأنا صاحية كذا بدري :icon10:
ايش عصفورة؟ إلا بومة مافي عصافير تصحى من الساعة ٢ الفجر!! :138:

ما نمت غير ساعتين بالضبط ولا أدري ايش الي مصحيني كذا ،، لا وبعد عيوني مفتحة بأقوى قوتها حتى مافي نعاس!! :69:

رحت بعد الفجر عند أمي يقال أدور حنان ويمكن أنام إذا تسدحت في حضنها،، طلعت بعد زيي طاير من عينها النوم ومعصبة ليش انها ما نامت وطردتني ههههههههههههههههه قالت انقلعي بس أنا ناقصتك!:xss:

أنا وأمي حساسين جددا ضد المسهرات ،، إذا شربنا بالليل شاي ،قهوة او اي شيء من هذا القبيل مستحيل ننام،، بس العجيب انه أمس ما شربنا شي من هذا!! قعدنا نتذكر ايش شربنا بالليل وطلع انه شربنا عصير جوافة،، بس هل معقول انه الجوافة تسهر؟! :MonTaseR_94:
الموضوع يبغى له بحث-_-

سحاب

05-16-22, 04:03 PM

خذني إلى مرافئ السكينة إن تهت في ظلمات البحر يا الله♥️✨

سحاب

05-17-22, 01:34 PM

أختي الصغيرة معتمدة المثل الي يقول"الزن ع الودان أمر من السحر" في حياتها ..

زنااانة بشكل مش طبيعي ،، وأنا أكثر شي ينرفزني في الحياة ان الواحد يزن على راسي،، أصبر على شقاوة الأطفال وعلى عنادهم وطولة اللسان وكل شي بس الزن لا لا لا ،،

والله اني بعض مرات أمسك نفسي غصب لا أضربها!! علمًا بأني ما أسخى والله أمد ايدي على طفل نهائيا ولا حتى تراودني الفكرة ولكن وبقدرة قادر أختي النتفة أبو سبع سنين خلتها تراودني -_-

مدري من وين جايبة هالصفة!! أذكر اني كنت شقية لما كنت صغيرة بس ما اذكر اني كنت زنانة :/ والله مصيبة لو كنت😂 لا بس ما أظن أمي تقول ما تعبتها مثل أختي ذي😌😁

بس ما أخفيكم سرًا إني اعتمدت طريقتها مع اخواني هههههههههه والله نفعت معاهم ،، أنشب للواحد واتلزق فيه لين أغثه وهو لما ينغث يجيب لي الي أبيه عشان يفتك مني هههههههههه،، الجانب المشرق من الموضوع😂✨

سحاب

05-19-22, 01:46 PM

https://youtu.be/e2T7fCTR8Ck

إدماني الجديد😍😍 عبد الله الجار الله يا ربي صوته فخم فخمممم:icon32:
أنا إذا أدمنت شي لازم أنقل العدوى للجميع وبدأت بأمي وفعلا حبته ،، مفروض يعطيني نسبة من عدد المشاهدات قاعدة أسوق له من قلببب😁،، ولكن الحق يقال خامة صوته تستاهل يعني فخامة الصوت مع فخامة الكلمات شيء إبداعي والله👌

سحاب

05-20-22, 10:15 PM

من وقت ما طلعنا من عند الكوافيرة لهالحين وانا مصدعة 💔

والسبب ان القصة الي هي حلم حياتي المستحيل طبعا لأن نبع الحنان رافضة تحت شعار(اذا تزوجتي قصيه) الكوافيرة قصت لأمي نفسها وطلعت تجنن😭😭💔

وأنا جاني صداع من القهر:crying: سويت كوب بُن أكبر من راسي على أمل ان هالصداع يفك عني بس مافي فايدة:69:

سحاب

05-21-22, 09:50 PM

ويبقى شوقي لك
غصة في حلق السعادة،، مرارة في عذب الأيام ...

سحاب

05-23-22, 06:54 PM

رن المنبه وخلصت الإجازة😭😭💔
هو يعني أنا ما نسيت ولا راح أنسى بس حطيت المنبه خوفًا من نفسي الأمارة بالسوء لا تزين لي الغياب في أول يوم،، وأنا البدايات عندي مهمة جدا

على طاري الدراسة في عندي مشكلة عويصة أفكر فيها من شهور ولا طلعت بحل،، باقولها لكم بعدين بعد انتهاء الدوام 🚶‍♀️💔

سحاب

05-25-22, 01:33 PM

وأخيرا لقيت وقت أتكلم عن مشكلتي العويصة

هي السالفة طويلة حبتين ولكن مختصرها اني درست سنة أولى في الجامعة أدب عربي وكان المفروض السنة الي طافت أكون سنة ثانية ولكن لظرف ما جمدت قيدي في الجامعة لمدة سنة ،،

وعشان أستغل هالسنة قررت آخذ دورات لغة أون لاين ،،

لهنا أوكيه؟
لا مش أوكيه أصلا من هنا تبدأ المشكلة

السنة قربت تنتهي وتبدأ اجراءات الاستئناف ،، وأنا بصراحة حبيت جو الانجلش والاون لاين،، حبيت الاحترام المتبادل وإنك تاخذ درجتك حسب مجهودك مش حسب نفسية الدكتور،، وان يكون لجهدك أثر ..

ونفسي الأمارة بالسوء تقولي خلاص يابنت كمليها اون لاين ودورات لغة وبتاع وشاي بنعناع ،، وبعد ممكن تاخذين لغة ثانية بعد ما تخلصي الانجلش،، تدرسي وتتسلي يعني كذا حاجة حلوة وخفيفة

ويرجع ضميري يقولي بلا غباء!! الدورات حلوة لزيادة مهاراتك بس من متى كانت تكفي عن شهادة البكالاريوس؟

وأمي تسألني ليه ما اسأل زميلاتي الي كانوا قبل عن المواد الي أخذوها واستعد للسنة الجديدة،، ما تدري عن الموال الي في راسي😁

لو تدري به بتفجر فيني،، فقررت اني أصرفها وما أقولها لين أقرر،، يعني الواحد اذا تفجر على الأقل يكون أخذ قراره بتأني وعن قناعة😂

مشكلتي مترددة جدا في القرارات المصيرية،، ما أحب ذا الصفة فيني تغث :(

سحاب

05-25-22, 09:33 PM

اسأل الله لك النجاح وان ييسر لك كل عسر اللهم بغلها مناها ...
آمين يا عيني آمين وإياك♥️ وين أروح من طيبة قلبك يا بنت:رجل خجول:

من واقع تجربه اي وضيفه بتقدمي عليها بعد التخرج راح يسألوك أول شي عن مستواك التعليمي .. والله لو عندك مآت الدورات .. المستوى التعليمي هو الأساس ارجوك لا تفرطي في البكالوريوس.. ربي يكتبلك الخير ويوفقك
حياك الله أخوي رايق ومساك بالخير،، مشكور والله ونصيحتك هي عين العقل،، والله ينصرني على نفسي الأمارة بالسوء وأسكتها :/

في في راسي هوشة كنت باكتبها بس احتراما للتقييمات الحلوة باكتبها في تدوينة ثانية😁

سحاب

05-25-22, 10:32 PM

ليه مافي كفوف الكترونية؟ يعني من جد الواحد مرات يحتاج انه يصفخ أحد كف محترم بس ما يقدر -_-

مثلا،، انا عندي واحدة في الكلاس وودي أكفخها ،، في الحقيقة هي أصلا لازم تتكفخ ..

عالة كبدي يا ربي😭😭 ،، تجبر الواحد انه يحش عليها،، ما يدري الواحد يعلق على لبسها والا على الميكاب الي يحسسك انها طالعة سهرة والا الأضواء الي وراها والا دلعها البايخ الي ماله داعي والا ثقالة دمها😭😭😭

أنا استأذنت من الأستاذ أقفل الكاميرا عشان الانترنت ضعيف وبعد حر وأنا منقبة والأستاذ طيب ومتفهم ووافق،، تقوم تقول يا أستاذ ليش بعض الطلاب ما يفتحون الكاميرا😤

صديقتي المصرية وقتها ارسلت لي ع الواتس تقولي " هي البت دي فلحوسة كده ليه؟" قتلتني ضحك😂😂

الأستاذ حط عناوين كإقتراح للبرزنتيشن والي يبي ممكن يختار منهم،، تقوم تسأل ع الفاضي علما بأن العناوين واضحة أصلا،، وكان من ضمنها التحدث عن العلاج التقليدي والفرق بينه وبين العلاج الحديث
تقول يا أستاذ كيف يعني؟
قالها يعني طرق العلاج الشعبية مثل العلاج بالعسل أو الشاي الأخضر وهالأشياء
قالت وااو تيتشر عسل؟ تقصد اني عسل؟
يا ربي يا ثقالة الدددم😭😭 صديقتي قالت لو تدري النحلة الا تنتحر😂😂💔

سحاب

05-27-22, 05:40 PM

"Open minded" مصطلح جميل صح؟
بس المعنى مو جميل أبدًا
وش معنى انك تكون Open minded؟

يعني انك تشوف الشي الي مفروض ان فطرتك تنكره شي عادي وما تستغربه،، ويكون الموضوع عندك مجرد اختلاف وجهات النظر!!

يعني ان عيونك تشوف الوضع بشكل طبيعي ونفسك ما تعيفه!!

يعني يصير عندك تقبل للفكرة لدرجة انه ما عندك مانع اذا في يوم من الايام غيرت وجهة نظرك وتبنيتها او إذا أحد من أهلك سلك مسلكهم !!

كل إنسان مفروض يحترم،، الا المجاهيرين هم بنفسهم تنازلوا عن ذا الحق،، تدري ليه؟

لأن االه أنعم على الإنسان بنعمة لو تفكر فيها ماراح يتوقف لسانه عن الحمد عليها (الستر) نعمة أنعمها الله على الإنسان،،

كلنا لنا جانب مظلم،، وكلنا عندنا ذنوب وزلات،، لكن الله بنعمة الستر سترها ستر سيئ أفكارنا ووساوس أنفسنا وقبائح أعمالنا عشان يساعدنا نتقبل بعض ونتعايش،، بل وأكثر من كذا نحترم بعض ونحب بعض

ولكن الي رفس نعمة الستر برجلينه لا يستحق الاحترام ،، ما يستحق انك تدنس فطرتك وتتقبله..

(كل أمتي معافى إلا المجاهرين)
اللهم عافنا وأتم علينا سترك ..

سحاب

05-30-22, 12:06 AM

قسم بالله مالي شغل😭😭
ايش ذا اييييش ذا؟؟
كنت أكتب تقييم وكنت حريصة انه يوصل ولسة ما كتبت كلمتين على بعض طار بالغلط طبعا في ذا المنتدى طامة كبرى ان يطير التقييم منك لأن لازم تقيم الأمة الإسلامية كلها وما جاورها عشان ترجع تقيم نفس العضو😭😭😭

وبما اني انسانة مشهورة بالكسل باحط التقييم الي كنت باكتبه هنا ويارب همس تشوفه😢💔

المهم يا همس تدرين ليش ما سألتك اذا انتِ همس حقت غرام او لا؟ عشان صارلي موقف محرج مع عضوة شبهت على اسمها ،، وبدون كلام ولا سلام ولا سؤال رايحة استهبل على البنت واستخف دمي😂😭
وتطلع البنت ما تعرفني ولا هي ننفسها الي في غرام فحبيت اني احفظ ما تبقى من ماء وجهي🤣😂💔

سحاب

05-31-22, 11:41 PM

وكنتَ أدعوك يا الله في صغري
رزقًا من الأنس أو قطعًا من الحلوى

لما كَبرتُ عرفُ الرزق يا ربي
بأنه الأمن والإيمان والسلوى :31:

سحاب

06-04-22, 03:01 PM

مدري كيف عدت ليلة أمس،، ولكنها عدت على كل حال والحمد لله ..

كان عندي محاضرة وشوي أسمع صراخ وبكي وأمي جات تقول تعالي الحقي ولد أخوك مختنق ،، الولد شرق لأنه كان يبكي وأمه مصرة تعطيه العلاج

كنت باموت وانا أشوفه مو قادر يتنفس ولونه بدأ يتغير وأمي تبكي وزوجة أخوي بعد تصارخ،، كنت أحاول أسعفه باللي أعرفه ويدقون على أخوي ما يرد

وبعد ما أكلت فجيعة تكفيني لمية سنة قدام بكى الولد أخيرا وتنفس الحمد لله

طبعا أخوي تهزأ تهزيئة محترمة ليش ما يرد،، والصدق ان موقفه كان صعب،، قال وقتها كان عنده حالة إسعافية في الطوارئ مرة حامل في الشهر التاسع وللأسف توفت الله يرحمها لكن الطفلة عاشت،، قالت له مرته وولدك يموت عادي؟!
قال أنا أأدي الأمانة الي علي وربي بيحفظ عيالي إنشاء الله

لو جينا للمنطق كلام أخوي منطقي،، لكن الأم اذا تعلق الأمر بطفلها ما تعرف المنطق وما عندها مانع لو تفدى ولدها بالناس كلهم ..

سحاب

06-06-22, 01:31 PM

ضاقت فلما استحكمت حلقاتها
فرجت وكنت أظنها لا تفرج

بيت الشعر ذا ينطبق على مزاجياتي وبقوة

أقفل فجأة أحيانا بسبب وأحيانا بدون وأحيانا في سبب ولكن أحس انه ما يستاهل اني أقفل عشانه

والقفلة ذي له مراحل
الأولى أكون أحس بالقفلة بس أحاول أطنشها وأتجاهلها وأكمل يومي بشكل طبيعي

الثانية وتكون القفلة صار تأثيرها أقوى شوي وأكون واضح اني قاعدة أسلك وأمشي يومي هه بالغصب

الثالثة وأكون وصلت أعلى درجات القفلة وأتخذ وضعية لا أرى لا أسمع لا أتكلم، أتابع المشهد بعيوني بس وأجلس في مقاعد المتفرجين

ولكن بعد القفلة القوية ذي سبحان الله تفرج تماما وحتى اذا في موضوع كنت مو قادرة أفكر فيه تتهافت بعدها الأفكار وكلو يمشي تمام

أمس كانت الانفراجة من قفلتي الحمد لله،، ودخلت موضوع أريام الي شفته أول ما نزلته ولكن لأني كنت قافلة فما كان في شي أكتبه،، ويوم دخلت لقيت الكل مكفي وموفي وما بقى شي أقوله🥲💔

باعلق تعليق بسيط بس،،
والمرة الجاية ان شاء الله باحجز لي مكان في المقاعد الأولى قبل ما يخلصون علي الحكي🙂💔

سحاب

06-09-22, 10:29 PM

اكتشفت إن كل (أحمد) بكااش

أحمد ولد عمي عمره ٤ سنين،، أسأله مين تحب أكثر؟
يناظر بعويناته الحلوين وببراءة مدري هي حقيقية والا يصطنعها يقول ماما وبابا وانتِ:x124: ،، وأي أحد يسأله نفس السؤال يعطيه نفس الإجابة😅،، وعلى قولت الفنان مدري منهو "كذاب لكن حالي،، كذبه جديد مش بالي"🙂♥️

سحاب

06-10-22, 11:09 PM

احمد هذا دبلوماسي خطير جدا .. سيبهركم في المستقبل .. ربي يحفظه .. ويسعد صباحك

ايه معلووم ماهو عندنا نموذج سابق في العائلة،، عندي أخو اسمه أحمد بعد ،، ونفس النظام دبلوماسي مرة ما شاء الله وبكاش بعد ويخلي البحر حلاوة طحينية:MonTaseR_128:
عشان كذا قلت كل أحمد😂
آمين يارب،، ويسعد مساك أخوي:MonTaseR_11:

والله ما اذكر رديت عليك ولا لا ههههه .. يعتبر ابتزاز هذا ولا ايش

والله من حقك تنسين ههههههههههههه،، نظام التقييم هنا ينسي الواحد غصب🥲💔
هههههههههههههههه يعني ابتزاز على رشوة على طيبة قلب وكرم منك وحطيهم مع بعض في الخلاط 😁
وبعدين شفيك متكاسلة هي كلها ١٠ مشاركات صغنونة تسدحينها لأختك الضعيفة:eiwp:
الله يسعدها لقاليقو سدحت لي مشاركات مليااان والا كان الحين اشحد منكم يابو قلوب قاسية😿💔

سحاب

06-11-22, 06:09 PM

https://youtu.be/lZZP5NycmU4

من ذكريات فور شباب :نبض:

سحاب

06-11-22, 11:12 PM

استغفر الله ياربي الحر مش طبييعييي أنا قاعدة أتشوي يا جماعة😭😭
أتذكر انه احنا لسة في بداية يوليو وتخنقني البكية لسة مشوارنا مع الصيف طويييل😢💔
رحت لأخوي أقوله أخوي حبيبي قلبي انت ☺♥️
قال خير اللهم اجعله خييير🙂
قلت له ايث رأيك☺♥️
قال ايث رأيي في ايث؟🙂
قلت له تسوي لنا عصير أناناس بااااارد من يدينك الحلوين،، ويوم أحس البرودة نزلت على كبدي أقول يالله انك تسقي أخوي حبيبي من نهر الكوثر☺♥️<<< عاد العصير من يدين أخوي ذا ما ينتفووت من جد غيير😍👌
قال آمين بس معلش مافيني حيل🙂
أستسلم؟ لا طبعا ما انا خلاص صرت حافظة قانون الزن ع الودان😈
وزنييت لين وافق جعلني فداه😁♥️

سحاب

06-12-22, 10:33 PM

ليس شرطاً أن يكون الرزق مالاً،،
قد يكون الرزق خلقاً أو جمالاً..!!
قد يكون الرزق عقلاً راجحاً،،
زاده الحلم جمالاً وكمالاً..!!
قد يكون الرزق علماً نافعاً،،
قد يكون الرزق أعمارا طوالاً..!!
ليس شرطاً أن يكونَ الرزقُ مالا،،
قد يكونُ الرزقُ قلباً صافياً
يمنح الناس وداداً ونوالا..!!
قد يكونُ الرزقُ بالاً هادئا،،
إنما المرزوق من يهدأ بالا..!!
قد يكونُ الرزقُ طبعاً خيّراً،،
يبذل الخير يميناً وشمالا..!!
ليس شرطاً أن يكونَ الرزقُ مالا،،
كن قنوعاً واحمد الله تعالى...♥️
كلمات أ.د.محمد بن أحمد الدوغان

https://www.instagram.com/reel/CetwxHkIGGV/?igshid=MDJmNzVkMjY=

الإلقاء بالصوت الفخم:سكر:

سحاب

06-14-22, 03:37 PM

توأمنا فخمين يا جماعة فخمين مرة:Chulo:

كل الأطفال ياخذونهم يتلقحون،، إلا عيال أخوي اللقاح يجي لعندهم في البيت:MonTaseR_218:

هذي من فوائد ان أبوك يكون دكتور:icon10:

يا عيني هم الحين أكيد يعورهم:eiwp:💔

سحاب

06-15-22, 06:21 PM

وماذا عن أُختِكِ الكُبرى؟

إذا تبسَّمتْ،
غنَّت أزهارُ المدينة كما إذا حلَّ الربيع،،
وأما عذوبة صوتِها،
فإرهاصات الفتحِ إذا ما اشتد حِصارُ الحُزن على أسوارِ قلبي،،
وأما عن قلبِها،
فما أشبهه بقلب أمي..♥️

زمااان عن الكتابة
آخر شي كتبته ما أذكر متى بس من شهوور ،، حتى هواياتي تخضع لقوانين المزاج🙂💔،، واليوم رجعت هفتني نفسي وكانت الكلمات من نصيب أختي♥️

سحاب

06-17-22, 10:42 PM

هلاا ... ههههههههه لا عادي عيني .. ههههه اي العوامل المشتركه هههه .. انتي بجامعه اللغه ******* صح .. المهم كيفك يا بنت بلادي منوره مسك

باسم الله!! من وين عرفتي اني ادرس لغة عربية؟:MonTaseR_94:

خلينا نكمل هنا بلاش تقاييم لأني دخت والله في المرة الي فاتت وانا أقيم الخلق🙂💔🚶‍♀️

سحاب

06-17-22, 10:55 PM

مصادري الخاصه هههههههههه ... وافضيحاااته بالعلن هههههه

لا لا تراني باموت اذا ما قلتي لي،، اروح أموت؟؟ عادي أموت؟؟ ترضين أموت؟؟؟🚶‍♀️😭💔

عادي ياشيخة سماحات 😁
أسهل وأريح بصراحة أنا كسولة🙂،، وزيد لو نهدر بلهجتنا ومحد يفهم😂😂
وبعدين سؤاال؟ كيف كذا بسرعة رجعتي تقيميني؟؟ أنا أجلس أسبوع أدور زباين أقيمهم🤣🤣

سحاب

06-18-22, 04:35 PM

استأذنت من الجميلة أريام إنه أقتبس من مدونتها هالمشاركة وقالت ما عندها إشكالية،، شكرا أريام🌸

كلام طالع من قلبي من غير ترتيب

في سنه من السنوات حصل موقف وتغير تفكيري من بعده جذريا

انتشر مقطع لشاب مراهق او مما يطلق عليه بلهجتنا (( داشر ))

كان هذا الشاب مفحط عربجي شعره منكوش لاسفل اكتافه ومستهتر

ايوه نعم كما خطر ببالكم الان ونفس تفكيري سابقا انو قليل ادب وغير جدير بالاحترام

وصحبته سيئه وسمعته …. الخ الخ الخ

بعد فتره قام بتصويره شخص ما وهو يقود والدته المسنه الى مدرستها محو الاميه

وكان مبسوط بنجاحها ويصفق ويصفر تشجيعا لها

وفجأه مات هذا الشاب الصالح كما وصفته والدته

او كما قالت من ابر اولادي بي وكان مقيم الصلاه وعلى خلق رفيع

لوهله توقف بي الزمن وتفكرت : (( انا ليش ظننته سيئ ..؟))

من زرع هذي الفكره بعقلي وانا حتى لا اعرفه

من حدد لنا صفات معينه اذا تواجدت بالشاب فهو عاصي ومذنب

وللاسف استنتجت من بعض محاضرات رجال الدين قولبوا الناس بقوالب وحددوا هذا صالح وهذا طالح

لا اخفيكم اني ندمت اشد الندم على حكمي عليه رحمه الله رحمه واسعه

بعد هذي القصتين الحقيقيتين تفكرت بقول الرسول عليه الصلاة والسلام فيما معناه

ان امرأه بغي (( في نظرنا زانيه منبوذه )) دخلت الجنه لسقاية كلب

تأملت عميقا هذا الحديث وايقنت انو نحن ظالمين بأحكامنا ولايعلم بواطن الناس الا الله سبحانه

بينما امرأه ساجده وقائمه تؤذي جيرانها بالكلام فقط (( والكلام من وجهة نظرنا فعل بسيط ))

دخلت واستحقت دخول النار ..

•••

دائما هناك وجه اخر للحقيقه

هناك سبب للفعل

هناك عذر للمخطئ

هناك ندم للعاصي

نحن لانعلم وتسببنا بأذى للناس

ورمينا تهم عظيمه في احكامنا على الناس

اسأل الله ان يعفو عن احكامنا اللتي اطلقناها في حق كل شخص لانعلم مابينه وبين الله سبحانه

معلش أريام قصيت وحطيت في الرد عشان أنا الي يهمني منه الجزء الأول والأخير ..

وهو تقريبا نفس الموضوع الي طرحه أخونا أحمد في النقاش وما سمحت الفرصة لأن الموضوع تقفل،،

بالنسبة للشاب رحمة الله عليه في من أمثاله كثير..
في الشارع وفي المول وفي الملاهي وأحيانا زملاء في الدراسة

طيب،، أنا لما أشوف شاب>> بشكل عام يعني ما أتكلم عن الشاب الي تكلمت عنه أريام الله يرحمه
ناكش لي شعره ولابس أساور وسلاسل وحاطط تاتو أتوجس منه،، ليش؟

هل لأن مثل ما قلتي هذي هي الصورة النمطية الي رسمها رجال الدين؟
لا أنا هنا أختلف معاك،، أنا أتوجس منه لأن أغلب الي أشوفهم على شاكلته فعلا (صيع)،، وحقين مغازل وترقيم وقلة حيا،، فهو لبس لبس قوم وانحسب عليهم!!

على سبيل المثال شفت مجموعة وكلهم كانوا لابسين أثواب وشماغات وبشتات أول ما يتبادر الى ذهن الواحد انهم خليجيين،، مع ان ممكن يكون فيهم واحد مش خليجي ولكن لأنه لابس زيهم ما قدرنا نميزه ،، وعلى ذلك قيسي

طيب أنا لما أتوجس منه،، هل أنا بكذا حكمت عليه انه سيء؟ هل إذا طلع عكس تصوري أكون مذنبة في حقه؟

لا،، أنا ما حكمت عليه،، أنا فقط أخذت تصور مبدأي عنه،، ممكن هالتصور يكون صحيح وممكن خاطئ
متى طيب أكون ظلمته فعلا؟
نعطي مثال،، مثلا زميل في العمل وكان بهذا المنظر ،، واضطريتي تتعاملي معه،، ومن خلال تعاملك تبين لك إنه على خلق حسن بعكس ما يوحي مظهره،، وبقيتي مصرة على تصورك عنه وقلتي أكيد يسوي كذا مجرد تمثيل

هذا هنا ظلم وسوء ظن،، لأن مالك حق تدخلي في نواياه بأنه هل الي يسويه فعلا طاعة لله او مجرد نفاق وتمثيل

طيب التصور الأولي مين يتحمله؟ هو طبعا ،، أنا بشر وما أعرف دواخلك ولا نواياك،، فليش تعطيني عنك نظرة سيئة؟! ليش مثل ما تحسن داخلك تحسن خارجك أيضا،، علما بإن تحسين الخارج أسهل بكثير

ممكن تقولي طيب فيه ناس مربية اللحية وماسكة المسبحة وحتى ممكن حفاظ قرآن ،، وتعاملهم وأخلاقهم مااش
طيب هل انت لازم تكون يا هذا يا ذاك؟؟ انت كمسلم أحق بأن تحوز الثنتين جمال الداخل والخارج

أنا معاك،، في أحكام مو من حقنا نصدرها،، ما أقدر أقول ذا في الجنة ولا أقدر أقول ذا في النار،، مو بس لمجرد ظني انه عاصي بل حتى ولو شفته بعيني طايح في المعصية ما يحق لي احكم عليه

انا ما ادري كيف تكون خاتمته لعله يتوب قبل موته ولو بساعات ،، لعل يكون له عمل صالح بالسر ويشفع له ،، فمالي حق اني أحدد مصيره

طيب هل نحن ملائكة ؟؟ هل نحن معصومون؟ هل ما عندنا اخطاء ونظيفين من اولنا لآخرنا؟ لا طبعا،، ولكن كوني غير معصومة وكون عندي معاصي وأخطاء سترت برحمة الله وستره ما يبرر لي أرمي عبايتي وحجابي على سبيل المثال واقول ما انا يمكن أحسن من الي متغطية!

سحاب

06-19-22, 09:45 AM

خلصنا المستوى بدرجة حلوة وعندنا إجازة أسبوع🥳

الأستاذ كانت روحه جميلة وتم إدراجه في قائمة أفضل مدرسين مروا علي

حسه بالمسؤولية عالي،، مستحيل يتركك الا وانت فاهم ولو اضطر انه يبقى معاك بعد انتهاء وقت الدرس ويقضي معك وقت إضافي المهم انك ما تطلع من عنده الا وهو متأكد انه المعلومة خشت راسك

وحتى بعد انتهاء المستوى أرسل لنا كتاب المستوى الجاي وروابط تفيدنا وقالنا موجود في أي وقت اذا احتجتوا مساعدة

ودي أطبع منه نسخ وأوزعها على العالم🙂،، محتاجين الناس الي نفسه يتكاثرون في المجتمع عشان نحس ان الحياة حلوة😁♥️

سحاب

06-20-22, 12:33 PM

هلا بموزعه التقاييم هههههههههههه يا شيخه احييك عالفضاوه الي معك يا شيخه قيمي اي اتنين على المدونات مش شرط معروفين فيبك طافه ههههه
احسه مش لايق عليك الحياء وربي هههههههه

طيب ليش ما تشاركي في الاقسام الثانيه معك حق الاعضاء التهاني والمناسبات وو كثيير

وصح صباحك فلل
اتكاسلت اسوي تقيمم هههههههه

نذالة ما بعدها نذالة،، يا جساة قلبك يالجاسية:(

الآن مرسلة رسالة خاصة علشان تذكريني اني ما أقدرش أرسل رسايل؟😭
هي الناس قلوبها ماتت ليه؟؟😭😭💔

الا أبو نواس يقرب حاجة؟ الإجرام ذا مش غريب علي،، اذا الأطفال باتحرقيهم انا بتسوي فيبي🙂💔

هههههههههههه اتشقدفي بس والله إني حياوية وأجنن😝😝

أقيمهم ايش أقول؟مبروك؟ وانا ما أعرفهاش والا ما اعرفوش؟ اتخيلي بس!احرااج🙂💔

مساء الورد،، وانا ما أقدرش أرسل لا تقوليش ليش رديتي في المدونة:iqf03163:

سحاب

06-20-22, 11:12 PM

"أنا عاتبٌ لتعتبك،،
عاجبٌ لتعجبك،،

إذ كُنتُ حين لقيتني
متوجعًا لتغيبك ..

فشُغلتُ عن رد السلام
وكان انشغالي عنك..بك!!"

سحاب

06-21-22, 01:56 PM

يتبادر في ذهني سؤال
ليش انتشرت في هذا العصر الأنانية؟
الي يقهر أكثر لما تكون هالأنانية من الناس الي مفروض إنهم أحن وأحرص الناس عليك!

موضوع سفر الأم والأب ورمي العيال ،، مدري ايش أقول يعني

بالنسبة لي تربيت في وسط والدين أفنوا أعمارهم في العطاء،، عصرت ذاكرتي ولقيت انه فعلا ما أتذكر ولا أي موقف أمي وأبوي بدوا أنفسهم علينا!

أبوي أحرم نفسه من الطلعات مع الأصحاب وكان يطلعنا كل خميس وجمعة رغم انشغاله وكان وقتها يحضر الماجستير ومن بعدها الدكتوراة، ومع ذلك ما قال انا مشغول ومضغوط بالدراسة والشغل ومو فاضي لكم!

أشوف الحين الأم تنام وتخلي الطفل يتجهز بروحه للمدرسة ويطلع ما أفطر ولا شي،، ويشتري وجبته من المدرسة
وأمي لين واحنا بالثانوية كانت ما تخلينا نعتب الباب قبل لا نفطر في البيت وبعد تسوي لنا سندوتشات بنفسها عشان وقت الاستراحة ما تقول اشتري من مقصف المدرسة

على قولت الأوليين يا شين من يبغى يعيش زمانه وزمان غيره!! استانست بحياتك كثير والحين صار وقت العطاء والبذل، ليش تتهرب؟

الناس صارت تشوف انه لاوم تعيش حياتك بالطول والعرض وتستانس لآخر دقيقة ،، ونست انه ما العيش الا عيش الآخرة

ما يمنع انك تونس نفسك طبعا بس مو على حساب مسؤولياتك..

الحمد لله على نعمة أمي وأبوي الي نادر نشوف مثلهم الحين:67:

سحاب

06-22-22, 12:45 PM

دخلت وفي بالي أكتب شي،، ونسيت ايش هو:dunno:

إلا على طاري النسيان،، عارفين ايش أسوأ نصيحة ممكن
تتلقاها إذا شكيت من شي صار في الماضي ومضايقك؟؟
أيوة بالضبط هي نفسها أكثر النصائح انتشارًا وأسهلها على اللسان (انسى)

طيب عارفين ايش لازم نسوي مع الي يقولك انسى؟
لا مش عارفين،، اجلسوا أنا بعلمكم:MonTaseR_59:

الي يقولك انسى اذبحه ثم قطعه وبعدها افرمه وحطه في كيس أسود وارميه لقطاوة الحارة منها تكسب فيهم أجر ومنها تخفف على الكوكب الكثافة السكانية:MonTaseR_194:

لهالدرجة هالنصيحة مؤذية؟ اي نعم لهالدرجة ..

بالنسبة لي أحسها حتى غير منطقية،، كيف الواحد يقدر ينسى حدث خذا من عمره يمكن أيام وشهور أو حتى سنين!! كيف ينسى شي عاشه بوجدانه ومشاعره ولا تدري عن الندوب الي خلفها في روحه؟؟

والأهم الأهم الأهم ،، إن هالحدث غير فيه كثير،، علمه درس،، وأغلا الدروس أثمان هي دروس الحياة

ويجي يقولك انسى؟ لا مصيبة لو أنسى ويضيع مع النسيان حتى الدرس الي تعلمته

طيب وش أسوي؟أجلس أسير هالحدث وأجلس طول عمري أبكي وأولول؟

لا طبعا،، في مصطلح جميل أنا أحبه جدا وأحترمه جدا وأعتبره منطقي ومو مثل النسيان ألا وهو (التجاوز)

تذكر الحدث بتفاصيله بالعبرة الي أخذتها منه،، ولكن في نفس الوقت تتجاوز المشاعر السلبية،، يعني يبقى في ذاكرتك كقصة قرأتها لتستفيد منه وتاخذ منها عبرة

سحاب

06-22-22, 01:24 PM

اتق الله سمعة القطاوي في انحدار اجل تعطيهم لحمنا ها 😂😂 اي عادي تنسي لو تجاهلتي الامر لأزمان واستبدلت مصائب الأمس بمصائب اليوم 😭

أفاا ليش انحدار! لهالدرجة لحمنا ماسخ؟ هههههههههههههه

وهذي بعد تبي تستبدل مصيبة بمصيبة😭😂

الا ما تلاحظين ان وجهي خير عليك؟🙂
يوم كلمتك رجع حسابك😁✌
يا ألف أهلا وسهلا وعسانا ما نفقد حسك:icon32:

سحاب

06-27-22, 09:33 AM

دورت على موضوع الحلطمة عشان اتحلطم من صباح ربي خير وما لقسته في الصفحة الأولى وما يحتاج أقولكم ايش السبب الي ما خلاني أدور لأنكم صرتوا عارفين اني كسولة:MonTaseR_4:

بصراحة اليومين ذي المفروض لا عتب علي ولا ملامة في الكسل،، لأني وبلا فخر تعديت مرحلة كرف الحمير لما فوقها،، مفروض الحين يخترعون شي اسمه كرف شموخ كدلالة على شدة الكرف:MonTaseR_187:

سحاب

06-29-22, 02:55 PM

فيني بكية :eiwp:

ليه ما تفتحون هنا مساحة للندبة،، عشان الي يبغى يبكي :(

كان عندي صندوق جميييل مصنوع بسعف النخيل،، يعني كذا شي تراثي،، اشترته لي أختي وأنا صغيرة وصار له معاي ١١ سنة تقريبا

وكنت أحط فيه ذكرياتي الي أحبها سواء من أختي أو من صديقاتي
غفلت عن هالصندوق هاليومين،، وانصدمت أمس إن أمي الله يهديها ويسامحها رمته بالي فيه😭😭💔

ومن أمس متكدرة وخانقتني البكية من جد،، أنا أحب أحتفظ بأشيائي القديمة ما أحب أرميها،، أحب أطالعها بين فترة وفترة وتعني لي كثيييير

الشي الي بقى من الصندوق ورقة صغيرونة،، كانت رسالة من صديقتي المقربة قبل أربع سنين،، وقتها أرسلت لي كم كتاب هدية وحطت فيهم هالورقة

https://e.top4top.io/p_2371m23qg0.jpg (https://top4top.io/)

حتى هي وشحتني والله على قولتها:دموع الورد:
تخيلوا آخر مرة شفتها من خمس سنين:30:

سحاب

06-30-22, 12:46 PM

https://youtu.be/DOSEwnQ9ejY

حبيت ذا الفيديو،، بشكل عام أحب فيديوهات قناة طحالب
أحسها تناقش قضاية هامة بطريقة حلوة وكوميدية

سحاب

06-30-22, 08:03 PM

خذيت لي لفة في المدونات
ويا سلااام ع الأجواء الروحانية:دموع الورد:

جميل لما تلاقي الكل يحتفي بهالمواسم ،، استغرب من الناس الي تحسه شي بداهي ومش لازم نتكلم ،، صح الكل عارف بس في الناسي ويمكن لاشاف كلامك يتذكر
والمتذكر يأنس وتعلا همته

الله يوفقنا وإياكم لكل خير وطاعة في هذي الأيم المباركة ويبلغنا يوم عرفة ويجعلنا فيه من مستجابي الدعاء والعتقاء من النار♥️

سحاب

07-05-22, 07:28 PM

يا مساء الفؤح والعافية

تدرون اني اشتقت لكم والا ما تدرون؟؟
عندي ذا اليومين تدوينات كثيرة ودي أكتبها بس الوقت ما يسمح

ببدأ من قبل يومين ،، وصل ياعيني أخوي بعد ٦ أيام سفر،، على قد ما كنا فرحان بجيته ومشتاقين له على قد ما كنا شفقانين عليه من تعب السفر ..

وبما إنه منبهنا وملزم علينا من قبل لا يسافر انه طول فترة إقامته عندنا ما يبي يشوف خلقة الباذنجان لأن طباخ السكن الجامعي كل يوم يأكلهم باذنجان لين طلع من أذانيهم ،،

كان لزاما علي إني أسوي عكس كلامه وأستقبله بالباذنجان:y2o01875: >> هرمون النذالة يرتفع عندي بقوة مع الناس الي أحبهم وأحب أسوي عكس الي يقولونه:icon10:

وقطعت باذنجان ورتبته في صحن وحطيت بعد في الوسط شمعة وكتبت له على ورقة أدري إني وحشتك:MonTaseR_211:

كنت أفكر إني أغطيه بكريمه وأسويه على هيئة جاتو وما يكتشف إنه باذنجان إلا بعد ما يقطعه بس فكرت إنه حرام بعدين ينرمي مع الكريمة ،، لو هو لوحده عادي أسوي فيه مسقعة ثاني يوم

المهم يوم دخل وبعد السلام والأحضان غطيت عيونه واقوله في مفاجأة وطبعا الأطفال الأشرار معاي وأول ما فتح عيونه يناقزون ويقولون له عيد باذنجان سعيييييد ههههههههههههههههههههههههههههههه

سحاب

07-09-22, 08:21 PM

مساكم عود وبخور:27:

عايدنا الأهل وجينا نعايدكم،، كل عام والجميع بخير،، ينعاد علينا وعليكم واحنا في أحسن حال:ورده:

سحاب

07-13-22, 11:34 PM

التجهيزات لعرس إخواني قائمة على قدم وساق >> مدري ليه أحس انه التجهيزات ذي استعارت قدمي وسيقاني لأن هاليومين ما أحس فيهم من شدة الكرف 🙂

وأهم شي وصل فستاني الي خليت أمة لا إله إلا الله كلها تختاره معي حتى أخوي الي مشغول بامتحاناته ما أعفيته ،،طبعا أنا أهم شي في العرس :y2o01875:

على طاري الفساتين ،، كنت قاعدة أرتب كبتي وطاحت عيني على فستان وذا الفستان كل ما أشوفه أضحك لأن لي معه سالفة هههههههههههه

مرة كنا طالعين أنا وأختي الكبيرة لزفاف صديقتها،، كشخنا وخلصنا ورحنا لأبوي نوريه كشختنا وأبوي يعزز لنا لأنه مغسلين يدنا من نبع الحنان الي ما تحب تعزز أبد💔🙂

وبعد ما أخذنا كفايتنا من الدعم المعنوي من الغالي حفظه الله علق بملاحظة على فستاني يقول ما كأنه قصير!
لا يبه لا قصير ولا شي شوفه لتحت الركبة
هز راسه وهو ماهو بالع الموضوع كثير فانحشت بسرعة قبل ما يغير رأيه ويقول غيريه

خذيت عباتي في ايدي ويادب أحط رجلي عل أول درجة الا أحس أحط يسحبني مع فستاني ،، ألتفت وراي ألاقي أخوي ماسك في إيده سروال سنة ويقول وهو ماسك ضحكته خذي البسيه واستري سيقانك بلا قلة حيا ههههههههههههههههههههههههههههههههههههههههههههه

أنا تلقائيا اتخيلت شكلي وانا لابسته تحت الفستان وتسدحت على الدرج من الضحك:MonTaseR_26::MonTaseR_26:

سحاب

07-14-22, 11:34 PM

من فترة ليست بالبعيدة اقتنعت بتغيير معرفي ،، ولكن ولأني أحب أشيائي القديمة ووفية لها جدا أخرت الموضوع لين أكون فاضية وأقيم لأسدي الجميل هنا حفلة وداعية ونصب تذكارية:73344:

سحاب

07-16-22, 01:27 PM

إلا بسألكم ،، هو العالم باقي فيه سُكر والا توأمنا خلصوه عليكم؟:دموع الورد:

المهم إذا خلص عليكم السكر فعندنا كمية من احتياطي السُكر في هالحدود الحلوة

https://a.top4top.io/p_2388ze5w90.jpg (https://top4top.io/)

يا لببببى بث:دموع الورد:
الحلوين صاروا يناغون وأنا منهارة عليهم ياختااااااااي :MonTaseR_110:
ايه وأبشركم اكتشفت مين الي يزرع بعقول الأولاد انه ألف بنت تتمناه طلعت الجدة مش الأم:MonTaseR_128:

سمعت أمي وهي قاعدة تناغي ولد أخوي وتهدهد له بأغنية شعبية ومن ضمنها في ما معناه تكبر ويصير كل البنات يبونك هههههههههههههههه الله يهديك يا الغالية الولد توه ما يعرف أمه من أبوه وانتِ مستعجلة على البنات الي بيراكضون وراه خخخخ

سحاب

07-17-22, 12:18 PM

صح انا هي^^غبت سنتين ونص عن غرام ورجعت لقيته مغلق، اضايقت..شواخبار الشجية/الهمام/هيبةحضور/شمس الاصيل/سراب..وغيرهم..بتواجدو هنا!؟

يا ألف هلا ومرحب مريوم أنورتي وأسفرتي وآخر الغيبات🥰♥️

اوووه فاتك كثير بهالسنتين ونص:icon10:

لا تصدقي ترى ما فاتك شي نفس وضع زمان ،، ندخل الألعاب نتتاقر وبعدها نروح قسم النقاش نبدأ كويسين وبعدين نتضارب ويتقفل الموضوع ونرجع نتفاتن ونروح نشتكي للمدير ويطنش ونرجع نكمل هوشة في المدونات وهكذا:Kq600697:

وللأسف كل الأسماء الي ذكرتيها غير متواجدة هنا :ah11:
ولكن بقولك عن آخر عهدي بهم

شجونة اتخرجت وصارت دكتورة ومكروفة في المستشفى الله يعينها،، نتواصل بعض أحيان خارج المنتدى

الهمام .. عياله مطلعين عيونه>> يستاهل😂 ،، وانقطعت أخباره حتى قبل ما يتقفل المنتدى،، ولكن ان شاء الله إنه بخير

هيبة حضور برضو اتخرج وصار مهندس
شموسة جابت بنوتة كيوتة وصارت أم يا حلوها😍♥️
سراب .. ما كان لي تواصل معها فما أدري والله

^
^
نشرت غسيل الجماعة😂😂
معلش معلش اصلا الكلام طويل وانا للحين غير مسموح لي بإرسال الرسائل💔🙂

سحاب

07-17-22, 02:01 PM

ههههههههههههههههه انا فاطسة ضحك على مسقعة نجمة ههههههههههههههههههههههههههه

ولا يهمك يا عيني أهم شي سلامة الأرواح هههههههههههههههههههههههه

عشان ما يطلع الباذنجان مر بعد ما تقطعيه انقعيه في شوي مويا وملح وبعدين لما تطلعيه نشفيه من المويا كويس قبل ما تحطيه في الزيت عشان ما يحصل انفجار ثاني ههههههههههههههههه وبس تراها بسيطة😁😂

سحاب

07-19-22, 11:53 PM

خلصنا اليوم أول مراسيم العرس،، وكان جنان ووناسة 😍
عاد الأعراس عندنا وش طوولهااا يطفش الواحد وهو عريس والا عروسة 🙂
والا بالله في عرس في الحياة يستمر لعشرة أيام؟ -_-

طبعا الضحية نحنا الي ننكرف لدرجة ضلوعنا تتداخل في بعض وتضيع أماكنها🚶‍♀️💔

يالله أهم شي اني أخت العرسان:MonTaseR_21:
راح شبابي وانا اخت العريس وبنت عم العروسة وبنت خالة أم العروسة :MonTaseR_203:

أنا ودي أعرس على النوم وأمسك لحافي وأنزف معاه وأم العريس هي وسادتي العزيزة وعش الزوجية سريري الجميل ونعيش في سبات ونبات ونخلف أحلام بس ما نبغى كوابيس:icon10:

سحاب

07-20-22, 12:38 AM

أعيش صدمة حياتي بعد ما قريت موضوع في قسم مشكلتي !!!

مو قادرة أستوعب ،، خذيت نفسي بسرعة وطلعت لأني لو كتبت باغلط عليها

يا جماعة الي باقي ما شبع بهللة وحياة وباقي بيعيش حياته وماله حيل يشيل مسؤولية لا يتزوج لا يتزوج لا يتزوج خلاص فكونا

من أكبر آفات العصر قلة المسؤولية

لا إله إلا الله ،، الله لا يقسي قلوبنا
اخنقتني البكية وانا مالي دخل

سحاب

07-20-22, 11:55 PM

قرأت هوشة حزب الشاي والقهوة في مدونة النايفة وجات على بالي نجمة وعشارها
https://b.top4top.io/p_23923cfku0.jpg (https://top4top.io/)
ربي رزقني على قد كسلي وجاتلي علبة عشار هدية:الجوهره:

الصورة ماش صح؟ ما عندي اتكيت تصوير أبدا أنا ،، بخاطري أتعلم:(

سحاب

08-10-22, 03:19 PM

مدونتي الحبيبة عنها زمااان ،،
جيت انظفها وانفض الغبار ،، الي عنده حساسية او ربو او من هذا القبيل لا يدخل لين اخلص معلش :1:

على طاري التنظيف ،، أنا من عادتي دايما اذا خلصت أنظف البيت لازم أبخره ،، أعشق البخور وريحته
تقريبا كل شي في حياتي مبخر
أخلص أكوي ملابس ابوي أعلقها وأبخرها
أبخر كبت أمي وكبتي ،، وحتى جلالات الصلاة والسجادات أبخرها ،، أحس بالراحة النفسية اذا بخرت البيت قبل ما أنام يا سلاااام عاد هذي تكون أطلق نومة في حياتي :دموع الورد:

مفروض يسجلني بانافع كأوفى زبونة والأكثر استهلاكا لمنتجاته:icon10:

طيب قد سمعتوا بالماء المبخر؟ هذي أظن ما يعرفها غيرنا :SnipeR95:

سحاب

09-02-22, 09:24 PM

دخلت المنتدى أخيرا :bye1:

طبعا جيت على المدونات على طول
والي ترقى والي تغير لونه وانا رجعت حتى الرسايل ما حنوا علي وفتحوها :298:

فقررت قرار خطير جدا

الا وهو اني بكتب كل جملة في مشاركة مستقلة لعل وعسى أحقق الرقم المطلوب للمشاركات :smoke1:

سحاب

09-02-22, 10:24 PM

عندي إجازة عشرة أيام من فرحتي قاعدة أحتفل:y2o01875:

الله يرحم يوم كنت أشوف الثلاثة شهور حقت الإجازة الصيفية قليلة :crying:

كان أمس آخر اختبار ،، ولأني كنت باقي ما ختمت المنهج شربت لي كوب بُن يصحصحني ورحت أتكي في المخزن وأذاكر >>>> انصدمتوا لي في المخزن صح؟ عادي حتى أبوي انصدم :icon10:

من عادة أبوي كل ليلة قبل لا ينام يتفقد البيت اذا في كبس مفتوح لمبة شغالة الأبواب وكذا ،، واستغرب ان لمبة المخزن شغالة

جا ولقاني تاكية !! وش تسوين!!O_O

أذاكر 😁

في المخزن!!O_O

ايه عشان ما أنام😁

ناظرني وراح،، طبعا نظراته كانت تقول "الله يزكي عقلك يابنتي"🤣🤣

حالة المذاكرة في أماكن غريبة لا تخطر على البال عندي من أيام الثانوية ،، الحمد لله ما خليت بقعة من بقاع البيت الا وذاكرت فيها >>> بتشهد معاي يوم القيامة ضد الوزارة الظالمة :eiwp:

كنت أذاكر في المطبخ وعلى الدرج وفي غرفة أمي وغرفة اخواني وفي الاستقبال وفي الحوش ،، وليتني جبت الدرجة الي تمنيتها😑

سحاب

09-06-22, 09:59 PM

والله يا نجمتي مابي أصير مغرورة وأمدح بنت الصحن الي أسويها

ولكن على ما يقولون الأهل انها من ايدي غيير:85:

بس بصراحة انا يوم أسوي بنت الصحن ما أرضى أحط ايدي في شي غيرها يعني انا يومها غير مسؤولة لا عن كبسة ولا مندي ولا سلطة ولا مواعين ولا شي :الجوهره:

سحاب

09-06-22, 10:11 PM

احم يعني على كثر إنشغالاتي وزحمة حياتي ولكن ولأنك صديقة عزيزة على قلبي ولا يسخى خاطري أردك فما عندي مانع في حال إذا وفرتي لي طيران على حسابك يجيبني لعندك وأسوي لك أحلا بنت صحن في الحياة :556751:

لا لا مش نفسها ،، حتى الطعم غير

بنت الصحن فيها بيض وخميرة وعجينتها دقيق أبيض بس

السبايا مافيها لا بيض ولا خميرة وعجينتها خليط أبيض وأسمر+ السبايا ما نحطها في داخل الصحن ،، لما تلوحيها تحطي أطرافها برى الصحن كأنك قاعدة تغطيه

مدري واضح الشرح والا لا😂

سحاب

09-13-22, 09:55 PM

جاري البحث عن موضوع الحلطمة نااااو ناااو

ايش حصل ؟؟ هل هناك هوشة؟ وبدون حضوري؟؟؟

أنا كنت زمان أشهر من نار على علم في الهوشات وأول من يجيب فشاره ويجلس يتفرج>>>> منقهرة من قلب

لا جد جد،، ايش صار؟؟ ايش حصل؟؟

سحاب

09-16-22, 11:20 PM

عندي تكليف كاتم على أنفاسي 🤢
آخر موعد للتسليم بكرة ،، وقاعدة أسويه حرفيا من ورا خشمي ومالي أي نفس أسويه :c:

عليه درجتين بس،، نفسي الأمارة بالسوء تقولي راحتك النفسية أهم ولازم تحافظي على روقانك وهي كلها درجتين بس مو لازم تصيري دافورة على طول الفشل أحيانا مفيد

وضميري الدراسي يقول درجتييين يالظالمة درجتييين كيف تخليهم؟! بتموتي يعني اذا سويتي التكليف؟؟ اضغطي على نفسك كم ساعة وارسليه واخلصي منه أحسن ما تقعدي ندمامة انك ما سويتيه ولما تطلع الدرجات تقولي اووه لو سويت التكليف كان زادت نسبتي درجتين :3:

هو في الحقيقة أنا بسويه بسويه ما يسخى قلبي أطنشه بدون ظرف طارئ بس جيت أتحلطم عشان أخفف الطاقة السلبية وأرجع له:crying:

سحاب

09-21-22, 02:20 PM

كتاكيتنا صار عندهم أربع شهور تقريبًا،، وتوقعت انهم صاروا يفهمون في المشاعر ويتفاعلون مع الي حولهم

فقررت إني أختبر مدى تأثرهم بمشاعر المقابل ،، فمسكت واحد ومثلت اني أبكي ،، ياعيني تأثر من قلببببه وبكى معاي هههههههههههه طبعا أمه سوت لي حفلة وانتِ بكيتيه انتِ سكتيه بس طنشتها ورميته عليها واخذت الثاني عشان نسوي له نفس الاختبار 😁

الصدمة كانت ان الثاني ما تأثر أبد!! لا والي جلطني انه يضحك!! وقررت اني أسحب عليه عديم المشاعر وأحب أخوه بس:MonTaseR_70:

فأخذت حبيبي الحساس معاي للغرفة وخليته يذاكر معاي بعد
https://j.top4top.io/p_2455zrx7a0.jpg (https://top4top.io/)

ووووه أروح فدوة بث♥️

سحاب

09-24-22, 10:11 PM

فيه حاجتين تقريبًا كل الأمهات يسوونها ،، ويمكن حتى أنا اذا صرت أم أسويها😁

الأولى: جيب لي (الهذا)..
(الهذا) نكرة غير معرفة عند الجميع الا عند الغالية معرفة وانت بعد لازم تعرف وش هي

قد يكون (الهذا) سبحتها او مصحفها أو جوالها الي في الكنب الي قدامها أصلا او مناديل او حتى شبشبها الي تبي تكفخك فيه لأنك غبي وخذالك كم دقيقة تفكر عشان تكتشف وشو (الهذا)!!

الثانية: وهذي ما يعرفها الا البنات
_ يمة كم ملعقة ملح أحط؟؟
_قيسي بالنظر ..

عاد انتِ تبي تركبين ميزان ملح في ايدك والا في عينك والا تبي تستفتين قلبك ،، كيفك المهم تتصرفي وتطلع كمية الملح مضبوطة 🫂

سحاب

10-07-22, 06:38 PM

أختي الصغيرة من زمان ودها في حفلة ،، وبما إنه ما نعترف بتاتا بأعياد الميلاد في بيتنا وعدتها إني أسوي لها حفلة لا خلصت تحفظ جزء(عمَّ)

وبما إنها قربت تخلصه فبدأت أشتغل على التجهيزات ،، وأمس نرفزتني وغثتني وطلعت نفوخي على قولت اخوانا المصريين وزعلت منها وقلت لها لا تكلمني

تستسلم؟ أكيد لا ..
تقعد على راسي وتزن وتشغل حياتي ،، ولكني انتصرت عليها وقويت قلبي:b090:

وبالأخير لما جت تنام قالت لي ببراءة كسرت قلبي وقسمته إلى نصفين:30: :
-أدري للحين زعلانة مني وما تكلميني

ولسة يا دوب بأتكلم وأرد عليها بتعاطف،، إلا وأكملت بنبرة معاكسة وخالية من البراءة والمشاعر:
-أصلا طُز كلميني والا ما تكلميني مو مهم انتهى الأمر

!!!!!!!!
علامات تعجب ضخمة جدا طلعت فوق راسي ،، عاد من الصدمة نمت فورا😂😂

ولما صحيت الصباح لقيت حاجة لطيفة جدا
https://c.top4top.io/p_24713nfeq0.jpg (https://top4top.io/)

:نبض: :نبض:

سحاب

10-09-22, 05:04 PM

الأجواء ذا اليومين ما تدري كيف تتعامل معها

تحسسك انك واقف قدام أبوك وقاعد يهاوشك وإذا رديت وحاولت تبرر موقفك أو تدافع عن نفسك زعل ليه ترد عليه وإذا سكت بعد زعل ليه تسكت وتطنشه

الشتاء تحسه كذا متردد أدخل ما أدخل؟
تلبس دافي تحتر ،، تلبس صيفي تبرد ،، وش نسوي طيب؟؟-_-

سحاب

10-09-22, 05:29 PM

أنا مين؟؟

أنا الي أكبر وما أدري لين أحد يذكرني:MonTaseR_148:

https://k.top4top.io/p_2473fbkvw0.jpg (https://top4top.io/)
:فطسه:

سحاب

10-11-22, 04:44 PM

الي نقص معدود،، والي باقي ما ينعد

الحمد لله دائمًا وأبدًا :نبض:

سحاب

10-12-22, 09:55 AM

أحب فقرة الطواف على المدونات جدًا ،،
مدونة تلاقي فيها هدوء وثانية فيها حيوية وأخرى فيها روقان وشاعرية ،، جنون ،،فصلات ،، فوائد

تغير مودك من غير ما تتعب نفسياتك ولا تتنرفز:MonTaseR_135: ،، القسم ذا أجمل قسم دائما وأبدا😁♥️

سحاب

10-12-22, 09:02 PM

وغيرنا المعرف أهووووه :MonTaseR_6:

كيف المعرف الجديد؟ ترى اختياره تم وفق استراتيجيات معينة مش معرف والسلام :Chulo:

صح قلنا راح نسوي حفلة وداعية للمعرف القديم؟ ايوة ما نسيت

ويبشر أسدنا بوداعية يسمع بها القاصي والداني ،، ولكن الصبر طيب :عبوث:

سحاب

10-13-22, 05:50 PM

الي يحب كيكة السويس رول يرفع ايده ،، سننطلق الآن إلى المطبخ:وحده مون:

سحاب

10-13-22, 07:24 PM

https://e.top4top.io/p_2477627u70.jpg (https://top4top.io/)

وصارت كيكتي جاهزة🤤
أنا غير مسؤولة عن أي أحد بيتأخر الكمية محدودة✋>> أنفع في الإعلانات؟😂

سحاب

10-16-22, 09:55 PM

كتعبير مني عن شكري وامتناني للمعرف الذي دام معاي لسنوات عديدة وأبدا ما كنت أفكر أغيره أو أبدله،، وانطلاقًا من بدأ الوفاء لأشيائي القديمة نكتب هذه التدوينة ويا ريت لو كان في خاصية التثبيت لتدوينة معينة في المدونة كنت عملت تثبيت لهالتدوينة ..

نبدأ بلوحات كتبت بخط أخوي الهمام الله يسلم يمينه
https://f.top4top.io/p_2480mzqre0.jpg (https://top4top.io/)

https://g.top4top.io/p_24802kega1.jpg (https://top4top.io/)

https://h.top4top.io/p_2480keygf2.jpg (https://top4top.io/)

https://i.top4top.io/p_24805xf1j3.jpg (https://top4top.io/)

بما إنه جبنا سيرة الهمام خليني أحكي لهم عنه،، وعن هاللوحات
كان عضو في المنتدى القديم ،، صادق ووفي جدا،، كان يعجبني إنه صريح ولا يجامل وبكل صراحة حيقول في وجهك انك غلطانة ومن باب الأخوة بعد ممكن يرفقها بتهزيئة وموعظة لا تنسى:icon10:
كنت أحترمه جدا من جهة نظرا لسنه ومن جهة لعلمه وأخلاقه واحترامه،، كنت أناديه (جدو) لأنه فعلا يذكرني بناس زمان الطيبين الي على سجيتهم ولا عندهم لف ولا دوران

اللوحات أعلاه كانت عبارة عن مكافآت هههههههههه أبلشه يعطيني على قد عقلي:icon10:
بالرغم من انقطاع أخباره الا اني دايما أتمنى له السعادة والخير ..

وهنا اقتباسات من موضوع في المنتدى القديم ،، كان عبارة عن ابداء شخص لرأيه عن عضو
https://k.top4top.io/p_2480url4v0.jpg (https://top4top.io/)
هذي شجونة ههههههههههههه رئيسة العصابة سابقًا المكروفة في شغلها حاليًا ههههههههههه،، شجونة كانت كمان من الناس الواعية والواضحة جدا لخا مكانة في قلبي وأتمنى لها التوفيق دايمًا وأبدًا:نبض:
https://l.top4top.io/p_2480uqwty1.png (https://top4top.io/)

https://a.top4top.io/p_2480ltxz42.png (https://top4top.io/)
وهذي فايزووه،، محترمة وخلوقة وطيبة جدا جدا ،، وكاتبة من الطراز الرفيع،، أحب كتاباتها ولمسات التفاؤل الي فيها،، يسعدها ربي:نبض:

وفي أثناء البحث عن ذكريات لأسدي الجميل تذكرت إني فزت في مسابقة تلخيص الكتب وكنت المركز الثاني ويا ليتني لم أفز ههههههههههههههه،، كانت المرة الأولى والأخيرة الي أشارك وأفوز ببساطة لأن الجائزة كانت عقوبة أكثر من انها جائزة 😭😂

الجائزة كانت العضوية المميزة وكانت باللون الوردي ،،اااخ وهاتك يا طقطقة أسدي انمسح فيه بلاط الأرض ودخل في حلبة التنمر ولا طلع منها :(
https://b.top4top.io/p_2480peu8k0.jpg (https://top4top.io/)

https://f.top4top.io/p_24809ksjh4.jpg (https://top4top.io/)

وعاد أنا يوم طفشت قررت إني أتعايش مع التنمر هذا وحولت كل أبو الدنيا وردي :MonTaseR_197:

الرمزية والخط والتنسيق،، كان المنظر يفقع العين حرفيا ههههههههههههههههههههههه
https://c.top4top.io/p_2480vpkva1.jpg (https://top4top.io/)

https://d.top4top.io/p_2480tlvr72.jpg (https://top4top.io/)

https://e.top4top.io/p_2480lqh8p3.jpg (https://top4top.io/)

وبس،، نودع هنا شموخ أسد وتبقى ذكرياته الجميلة :نبض:

سحاب

10-16-22, 10:44 PM

ياخي والله لو تتشقلبي ..مابيليق لك الا شموخ الاسد ياحزني 😭😭. احس سحاب ماتقرب لنا هههههه

اخر شي توقعته بيوم من الايام انك تغيرين النك

أهون طيب؟؟😭😭😭💔
ترى من جد أحس اني بفارق شخص عزيز مو مجرد معرف ،، لا تزيدون الوجع ترى عادي اروح وارجعه الحين:MonTaseR_70:

سحاب

10-18-22, 12:04 PM

جميلة بكل حالتك سحاب من الغيم والنقاء / وشموخ اسد من العزة والرفعة .. وفي النهاية نفس البنت العسولة (:
الحين أنا أستحي والا أستحي؟:x124:
فدو للذوق والله:سكر:

سحاب

10-18-22, 06:55 PM

والله سحاب حلو والله // اعدنا موضوعك مع المراقبه للنقاش واقترحنا لك حل جميل ليبرد كبدك هههههه
خلاص نعتمد رأي الأغلبية ونقول مبروك لسحاب:0005:
مااش الحل ما أرضاني :/>>> قلبها أسود😂

يختي تجنني بأي اسم / ع فكرة الصور حركت مشاعري رغم اني لا اعرفهم ولا بس المشاعر الجميلة بينكم وصلتني / ربي يديم لك احبابك يارب
كبرر راسي وانتفخت الحين وش يرجعني لحجمي الطبيعي؟:110:
حقيقي المشاعر الصادقة تصل وإن كانت من خلف الشاشات،، الصدق يزين كل شي في الحياة ولو ألقي على أرض فلاة لأزهرت :67:
آمين ياارب،، عاد انتِ ضمن قائمة الأحباب ووجودك سعادة والله:67:

بعد جرعات السعادة نروح للنكد شوي نذاكر وأرجع لكم إذا اكتئبت من الكتب هههههههههه

سحاب

10-19-22, 08:09 AM

صباح جديد

أبحث فيه عني ،،
أقلبني كصفحات كتاب عتيق علاه غبار السنين ..

فأمسحه برفق كلما علا وتجدد ،،
لأجدني بذات الوفاء،، وذات الميول

أجدني كما تركتني ،، لأعود إليّ كلما أضاعتني انشغالات الحياة ..

صباح الخير♥️

سحاب

10-26-22, 09:24 AM

صغيرتنا الشقية مريضة من أسبوع:30:
دعواتكم لها بالشفاء:دموع الورد:

سحاب

10-28-22, 07:20 AM

صباح تحفكم فيه السكينة والصلاة على النبي الكريم :نبض:

هل تخيلت في يوم من الأيام أن يكون عندك امتحان في يوم الجمعة؟
لازم تتخيل،، لأن حتى أنا ما تخيلت وصار:وحده مون:

سحاب

10-29-22, 08:48 AM

https://c.top4top.io/p_2493ygkky0.jpg (https://top4top.io/)

:MonTaseR_26:

أعرف ناس تؤمن جدا بالأبراج،، ومصدقين انه شخصيتهم كذا لأن برجهم كذا وكذا!!

أنا واثنين من اخواني مولودين في نفس الشهر وفي أيام متقاربة جدا،، ولو بحثنا في علم الأبراج المفترض يكون لنا نفس البرج،، يعني مفروض تكون شخصياتنا متطابقة

لكن أبدا مو متطابقة كل واحد يختلف عن الثاني!
عاد الي يعتمد في تحليل شخصيته على تاريخ ميلاده أهون بكثير من الي يصدق ان مستقبله بعد يتعلق بتاريخ ميلاده:wallbash:

اتخيل لو ان ألف بس في العالم مطابق تاريخ ميلادهم تماما لتاريخ ميلادك،، وانت اتخرجت مثلا في هالسنة من الجامعة او تزوجت او جاك مولود،، الحين الألف ذولا كلهم بيصير لهم نفسك؟؟ كذا الحياة راح تكون مجرد تكرار لنسخ فقط

من جد غباء :/

سحاب

10-29-22, 09:41 PM

كنت قبل شوي بس في موضوع مشكلتي الأخير،، وكنت مستغربة من بعد الردود الي فيها نوع من التنمر والاستصغار!

الموضوع فيه عقبات ومعقد،، لكن ما يعني إن الإنسان فاضي أو ما عنده شغلة،، الواقعية والشاعرية تختلف نسبتها من شخص لشخص،، ومرات الشخص تاخذه مشاعره لبعيد شوي،، ويكفي إنك تنصحه وتوجهه

المهم شوي صادفتني هالصورة
https://i.top4top.io/p_2493mr4nf0.jpg (https://top4top.io/)

فعلا ليه الإنسان يقلل من مشاعر الآخرين وآلامهم؟
دائمًا في طريقة أحسن لإيصال النصيحة،، خصوصًا لما يكون الشخص ما غلط على أحد

سحاب

10-31-22, 07:05 PM

صغيرتنا تحسنت صحتها الحمد لله
واكتشفنا انه طالع لها سن تحت السن اللبنية!
فأخذناها للدكتورة تخلعه لها قبل يكبر السن ويصير خلعه أصعب ..

فقلت للدكتورة وأنا أغايض أختي : اخلعي لها أسنانها اللبنية كلها مرة واحدة ،، يعني مو كل سن راح نخسر له مشوار مخصوص -_-

الصغيرة قلبت عيونها وطنشتني!!!!
يا شين الأطفال إذا كبروا،، ما يعرف الواحد يتسلى عليهم :/

قبل لما كان عمرها أربع سنوات،، كنت إذا غثتني أقول لها ترى أرجعك في بطن الماما👿
تبكي وتقول لاا مابي أرجع:فطسه:

بصراحة مدري وش كانت تبكي عليه؟ أنا لو ينفع أرجع لبطن الماما كان رجعت :MonTaseR_185:

سحاب

11-06-22, 11:08 AM

أستاذنا مدري شرير مدري هو رايق كذا على طول ما شاء الله؟!!!

الاختبار الي فات كان صعب جدا،، طبعا الأستاذ ماله ذنب فيه لأنه معد من الأكاديمية،، ولكن بعد الاختبار نقوله خبصنا يا أستاذ ونتحلطم وهو يضحك يقول أفا لييش بس!!!

والحين يقولنا بابتسامة عريضة تكاد تشق وجهه انه ورانا اختبار بعد ساعة ،، الله يسعدك يا شيخ مرة أسعدتني:MonTaseR_171:

ادعوا لي ببعض روقانه:x117:

سحاب

11-06-22, 07:47 PM

https://j.top4top.io/p_25014xthq0.jpg (https://top4top.io/)

يوم القيامة ينزع كل ستر،، مو بس ستر البدن
بل حتى ما كنت تخفي من الذنوب،، ما كنت تخفي من السوء وتبدي خلافه،، إلا من رحم ربي وأتم عليه ستره

لأي درجة راح تكون الأمور مكشوفة؟؟ لدرجة إنه ماراح يحتاج أحد يقرب منك ويتعرف عليك أو حتى يسألك،، يتضح من هيأتك فقط إذا كنت صالح أو لا ..

آية تدعو إلى التفكر والخشية،، نتاجها صلاح الداخل والإخلاص..

الله يرزقنا وإياكم الإخلاص ويتم علينا ستره فوق الأرض وتحت الأرض ويوم العرض عليه :نبض:

سحاب

11-08-22, 12:09 AM

آخر سولافة وبعدها باروح أنام إن شاء الله:MonTaseR_14:

أختي الصغيرة دوختني رايحة جاية مو راضية تنام ووراها مدرسة

انتِ ليه ما تنامين؟
قالت مستنيتك !!
وليه مستنيتني؟؟
قالت أخاف أنام لوحدي

أنا توقعت تخاف من الجن وذا السوالف،، لأني كنت كذا وأنا صغيرة،، وبصراحة ولأني حابة أهرب من جو الكتب شوي فتحت معاها حوار ليه تخاف مع اني كنت متوقعة اني اعرف الاجابة مسبقًا

لكن الي صار ان توقعي غلط!!

قالت انها تخاف لأنه لما تكون لحالها يوسوس لها الشيطان!!

استغربت فعلا وذي المرة الفضول كان صدقي مش لمجرد الهروب من الكتب ..

قلت لها ايش يقولك طيب يوم يوسوس لك؟
قالت لي عادي أقولك؟؟
قلت لها طبعا عادي
قالت يقولي يعني انتِ ليه تصلين،، انتِ صغيرة مو لازم تصلين عادي العبي ولما تكبري صلي

قلت لها وانتِ وش تسوي لما يوسوس لك؟
قالت اتعوذ من الشيطان واغمض بقوة عشان أنام بسرعة وأنسى ..

قلت لها عارفة ليه دايمًا يوسوس لك؟ لأنك ما رديتي عليه،، لو كنتي رديتي عليه كان ماراح يوسوس لك مرة ثانية
مفروض تقولي له انك تصلي عشان انتِ تحبي الله وتحبي انه يكون راضي عنك،، عشان احنا عادي نتعب شوي في الدنيا بس بعدها نرتاح في الجنة ،، وطااال الشرح وسؤال يجر سؤال وإجابة تجر إجابة

بصراحة حبيت موقفها وانها كلمتني،، لأني تذكرت انه كان عندي أسئلة شبيهة لما كنت صغيرة بس ما كنت أسألها كنت أخاف،، أحس إني بمجرد السؤال باروح للنار على طول هههههه

لما كبرت وصار عندي جوال وعرفت عن الدكتور ذاكر نايك ومناظرته أدمنتها حرفيًا ،، شيئ مذهل ما شاء الله سبحان من أعطاه هبة إقناع الناس وسرعة البديهة

بعدها صرت ما أخاف أسأل،، لأن إبراهيم عليه السلام سأل،، وعزير سأل ولكن سؤال الميقن بأن هناك إجابة،، إجابة انت تجهلها ولكنها موجودة ومعرفتها راح تزيدك يقين ورسوخ

سؤال اليقين يزيدك نور ،، عكس سؤال التشكيك الي يتبعه حاليا الملحدين

وتصبحون على كل خير:m42: