الخواف

[الخواف]

قرندايزر .....مازلت زعلان على اليابانيين بسببه .....

ياعيال الذين ليش ماتسوون نسخة جديدة مطورة لقرندايزر ...

سويتوا نسخة لمعظم الكراتين المشهورة أيام زمان ..إلا قرندايزر حاطين نقركم من نقره ..!!...إيش اللي مزعلكم فيه ..!!..مدري ..!؟!


طيب حنا ما اختلفنا انكم زعلانيين بسبب ( كوجي ) سواق مازنجر ....اللي أصبح دوره مع قرندايزر مجرد معاون ومساعد له ....بـ طيارته الصفرا ...

وأنتم شايفينها إهانة ان سواق مازنجر يكون دوره أي كلام ...يعني دوره قرنبع .....


لكن هذي مشكلتكم مع المؤلف اللي جابه وحطه معاون فقط ...وسلمه طيارة صفرا كأنه جايبها من التشليح .....



وبيني وبينكم المؤلف ( جو ناغاي ) مدري كيف ذيك اللحظة ركب راسه وجاب ( كوجي سواق مازنجر ) واحشره مع قرندايزر ...!!......والنتيجة إلى يومنا هذا واليابانيين حالفين على الشركات انهم مايسوون نسخة جديدة لقرندايزر .....



.....................

[الخواف]

لعب الكورة من الأشياء اللي ماكنت أتوقع اني أتركها يوم من الأيام ...


لكن مع الأيام تركتها بلا رجعة ....... والسبب مشروع جاء على ملعبنا .... وهذا الكلام قبل سنوات ...


المهم ذيك الأيام جلسنا نبحث عن ملعب قريب من حارتنا ..... بس مالقينا ....فـ تركنا لعب الكورة ...



طبعًا أنا كنت مجنون في لعب الكورة ..بغض النظر عن لعبي هل هو زين ولا شين .....

المهم في نفس الوقت أكره شي عندي المباريات اللي تجي في التلفزووون ....ما أتابعها ولا أشجع أي فريق ..وإلى الآن ..ماتستهويني ....فقط إذا سمعت ان فيه مباراة أروح أسأل عن الناس في بيت مين راح يتفرجون على المباراة ...مش عشان أتابع المباراة ...بس عشان اللمة ودقة الحنك معهم شوية ....

طبعًا الآن حتى اللمات في المجالس على المباراة قليلة جدا ....وأنا ما أحب الجمعات في الكوفيهات والأماكن العامة ..... أحس اني مكتوم فيها .. وما أعرف آخذ راحتي فيها ...


المهم حاليًا ما أتابع اللي إلا كاس العالم فقط ...يعني بعد كل أربع سنوات ........

وغير كاس العالم ساحب عليه من يوم كنت ألعب في الشارع بدون سروال ...يعني من يوم كنت ورع صغير ...



........

[الخواف]

الفول يوم تاكله في نفس المحل ....له طعم ...

ويوم تاخذه معك للبيت أو أي مكان .....يكون مختلف طعمه بالمرة ....





والشي الثاني النواشف ( جبنة بيضاء وحلاوة طحنية وزيتون ..و..الخ ) في البيت الواحد ماله نفس فيها ......لكن يوم ياكلها عند الناس أو مع خوياه ...تكون نفسه منفتح لها ...




خلاصة كلامي :

الأكل عند الناس له طعم ......حتى لو كان خبز لوحده وجالس تغَمّسه في الشاهي ......مدري ليه ..


وعلى فكرة ....يا أخي العجايز ياعليهم طبخ للرز السادة اللي مامعه شي ......فـ تلقى العجوز يوم تسوي الرز ..تكون جالسة وحولها كم صرة وكم علبة صغيرة ...كلها بهارات وتوابعها ...كأنها جالسة تحضر مقادير قنبلة نووية ....

لكن بس الرز يطلع مزبووووووووووط ..... يوم تاكله تشوف باريس قدامك ...


.................



........

[الخواف]

حُب الحبيب ثلاث أشكال :

ببسي ...ومرندة .....وكاكاكولا ...


..........

[الخواف]

أناشيد قديمة ( منقولة ) :


هري هري
مثل النمر
يمشي حولي
حاني الظهر
فأداعبه فوق الحجر
وعلى كتفي وعلى ظهري
فإذا لاقى فأرا يجري
يعدو حالا خلف الفأر
وهنا يبدو طبع الهر


....................



صاح الديك فوق السور
كوكو كوكو بان النور
اصحوا اصحوا يا أطفال
جاء الصبح بالاقبال
كوكو بان النور
صاح الديك فوق السور
هيا جدوا بالأعمال
ليس المجد بالآمال
كوكو كوكو بان النور
صاح الديك فوق السور




...................................


أبي اشترى لي ساعة
مضبوطة بالثانية
ثبتها على يدي
لما رأى شهادتي
ودرجاتي العالية





.........

[الخواف]

أنا معدومة عندي سرعة البديهة والرد المناسب السريع ...وبرضه معدومة عندي هذي اللي يسمونها اللباقة في الكلام ...

أحس الأشياء هذي لها ناسها ......يعني أنا مش من أهلها وما أقدر أكتسبها .......


أحيانًا أشوف أشخاص أصغر مني بكثير ويتكلموا أحسن مني .....


ولكن لي كم سنة أحس اني متحسن في الكلام مع الناس .....والسبب المنتدى القديم ..كانوا الأعضاء يعطوني وجه أكثر من اللازم ...وهذا من طيبهم ....فـ كنت أدخل معهم كثير في حوار ونقاش من باب التسلية....فـ اكتسبت وتعلمت أشياء كثيرة من ناحية طريقة الحوار وغيره ....



طبعًا ممكن البعض يقول أنت تبالغ في كلامك ومسوي فيها زحمة ومحد حولك .....

وأنا أقولك : كلامك صحيح وما أنكره .....ولكن عاد جتني الفايدة بدون ما أقصدها ...يعني هي جت من نفسها .....




وعلى طاري الأعضاء .....ماشاء الله تبارك الله فيه أعضاء في هذا المنتدى يوم الواحد يشوف كتاباتهم يقول بينه وبين نفسه هذولي وش اللي جايبهم للمنتدى ودافنين نفسهم فيه..!!.....يا أخي تحسهم أصحاب فكر وعلم وثقافة عالية جدًا ...بغض النظر عن سلوكهم في حياتهم الحقيقية ...الله أعلم ..

المهم كتاباتهم مغرية مرتبة وحلوة رغم ان بعضها ما أفهمها ..لكن مانقدر نقول إلا هنيئًا لهم ..(( اصرفوا له مائة ألف قطعة ذهبية ...




.......

[الخواف]

كلامي اللي فوق ناقصه دمعتين .. ودش ماء يصب من فوق.. وطين.. ثم أجلس أتمردغ فيه وبكذا يقلب فيلم هندي ...



المهم أحيانًا أفكر اني أبيع ضميري بريالين..... ولايرد ولا يستبدل بعد البيع .... ياشيخ أبيعه لو بسندوتش مليس بالبيض والجبن..(( حط شطة رايح جاي ...

وبعد ما أبيعه أخربها مع القريب والبعيد ولايهمني شي ..






ملاحظة :

معنى ( شطة رايح جاي ) : هذي تقولها إذا طلبت من العامل أو أي واحد انه يكثر شطة ...يعني يحط شطة من أول السندوتش ثم يوم يصل لآخره يرجع مرة ثانية للنقطة الأولى اللي بدأ فيها صب الشطة ..بدون مايرفع قارورة الشطة ..بدون تقطيع ...

بمعنى آخر : بدل ماتقول كثر شطة ... قوله ( شطة رايح جاي ) ...




.........

[الخواف]

ودعنا الشباب ....بلا رجعة ....

فعلًا أنا ودعت مرحلة الشباب وما عاد لها رجعة ..(( وداعا ماركو ...


والشي اللي لاحظته الآن في كبر سني هو أني أصبحت أليف مثل البسة ...يعني الشباب يوم يشوفونك يبتسمون ويحترمونك بزيادة ...ياشيخ من زمان عن الإحترام اللي زي كذا ...

والبنات يمشون من جنبك ولا كأنك موجود على الأرض...ولايصفولك حساب ..



المهم وينك يادكتور ( رايق ) ..محتاجك الفترة هذي .. لا تقولي الدنيا مزحومة عندك ...



...............

[الخواف]

طبعًا الآن اللي مرغوب وسعره غالي في السيارات ...هو الديزل ...


لكن بعض الناس جالس يتكلم على سيارات الديزل ومشاكلها وعزمها الضعيف والدخان اللي يطلع منها وغلاء قطع غيارها ومدري ايش ...!!!


ناس يتكلموا وماجربوا ...... أو جربوا موديلات قبل ثلاثين سنة ...







أفضل سيارة لتعليم الحريم .....سيارة اسمها ( أفانزا ) .....شكلها مش حلو وغير مقبول للأغلبية الساحقة من البشر على الكرة الأرضية ....ومكينتها ضعيفة جدًا ....لكن للتعليم ممتازة لأن أبعادها الخارجية قريبة للشخص اللي جالس يسوقها.....يعني تقدر تتحكم بسواقتها بكل سهولة ....



تصرف بنزين رغم صغرها ....لأن المكينة غير مناسبة لحجمها ....طبعًا هي دفع خلفي ...يعني تتحمل المطبات والحفر ...

إذا شفتها أتذكر سيارة أم ( سانشيرو ) ....تشبهها .....تشيل فيها الحيوانات لأنها دكتورة بيطرية على ما اعتقد أو شغالة في محل أبقار ......ناسي بالزبط إيش ..



طبعًا سانشيرو من الكراتين المعروفة ....كلمات المقدمة :


سانشيرو بطلٌ مغوار.. سانشيرو

أحبوه صغاراً وكبار.. سانشيرو

أحب العلم فتعلم..واخترع دميته جومارو..

و صار يعمل ليل نهار..من أجل الخير..

ولفعل الخير.. يحارب الأشرار

هلا يا هلا بسانشيرو البطل المغوار

تعال تعالوا نشاهده هيا يا صغار

بطلٌ مغوار....أحببناه صغارا و كبار



......

[الخواف]

قبل قليل ظهرت لي أسماء الناس اللي في التقييم ..(( طيب وبعدين ..







المهم :

1- هل أنت مقتنع بوجود الضوء الأصفر بتاع إشارة المرور ....وخاصة انك عارف ان في كل الأحوال راح يتأخر ظهور الضوء الأخضر للطريق الثاني بعد ماتولع عندك حمرا ...؟


2- هل أنت مقهور من الناس اللي ترمي من السيارة مناديل ولا علب عصير ولا كاسة شاهي بلاستيك أو أي شي ثاني ..؟

3- هل أنت مقتنع بوضع الذبيحة ( مفطح ) في الصحن ..؟

4- هل تنام وارجولك على شكل أربعة بالإنقليزي ..؟

5- الصبح وأنت قدام المغسلة هل تنظر في وجهك شوية قبل ماتغسله بالماء ..؟

6- إذا كنتم ثلاثة أنفار ........هل تحرص انك تركب قدام ...جنب السواق ..؟

7- هل أنت من النوع اللي إذا تكلم مع أحد ...يجلس يحك بعض من أجزاء وجهه أو جسمه ..؟

8- أحيانًا نادرة وأنت ماشي في البيت لوحدك ومافيه أحد ... هل تجلس ترقص رقصة خفيفة وانت راح للمطبخ أو الصالة أو الغرفة أو أي مكان في البيت ..؟

9- هل الأرقام يوم تعدها.... هل تطلع قدامك في مخيلتك على شكل عامود متعرج طالع لأعلى ... أو تجي الأرقام قدامك على شكل عداد إلكتروني تطلع ورا بعض في مكان واحد ..؟

10- يوم تدخل صالة أو قاعة أفراح .... هل يصيبك شي من الحياء والتوتر وأنت ماشي وسط الناس عشان تجلس آخر الصالة عند شلتك ..؟



................

[الخواف]

من ضمن المقولات الجميلة :

( متصنع الأخلاق تفضحه الخصومة )

طيب ماعلينا من هذي المقولة .....فقط بس أعجبتني وجت على بالي يوم دخلت المدونة ...بغض النظر عن تطابقها على حالتي ...





المهم فيه بعض الأشياء أصبحت ما أقدر أستغني عنها ...وهي ( السبحة ) مدري بعضهم وش يسميها ...حنا نسميها سبحة ..


المهم السبحة ما أطلع من البيت سواءً لزيارة ولا مناسبة ولا رايح لأقاربي ولا خوياي ولا أي مكان ...لازم تكون معي ....

لدرجة ان مرة كنت راح لـ خوياي ( أصحابي ) .....المهم في الطريق اكتشفت اني ناسي السبحة ....وكأني ناسي سروالي ...

وعلى طول أقرب بقالة على طريقي... واشتري سبحة بـثلاث ريال أو أربعة ..طبعًا أنا أشتري من الرخيصة ..فأنا اللي معي الآن قيمتها بـ ( 3 ريال ) ثلاث ريال ...حباتها مش كبيرة ...وسادة ...وخفيفة .....وسهلة في اليد ...ماتضايق ....

يعني أحب تكون يدي متمكنة منها وتكون ناعمة ومش مزخرفة وماتكون حباتها عليها نقش ......وماتكون لها قذلة ...يعني الخيوط اللي في مقدمتها ماتكون مبثورة ومنفوشة...أحب الخيوط تكون على شكل قرنين أو ثلاثة ..يعني زي شعر بنات الابتدائي يوم يروحن للمدرسة شعرهم مسوياته قرنين ..



المهم ما أعرف أجلس ويدي فاضية بدون سبحة ...وإذا دخلت مجلس وأنا ناسيها ..تلقاني ألعب بالمفاتيح بـ يدي ... لأن خلاص السبحة ادمان عندي ...


أنا هالحين أكتب كلامي هذا وجنبي السبحة ....ويوم أقرأ مواضيعكم وردودكم ومدوناتكم وملفاتكم في المنتدى ..تكون السبحة في يدي أتسلى فيها وأنا أقرأ ...






خلاصة كلامي :

السبحة بالنسبة لي مثل الشنطة بالنسبة للحريم ...

فـ الحرمة تلقاها تشيل الشنطة معها كل ماطلعت من البيت ..حتى لو كانت الشنطة مافيها إلا منديل ... وخاتم داخل في زاوية الشنطة ما انتبهت له وماهي دارية عنه .... لأنه خاتم مضيعت من زمان وماتدري وين حاطته ..


وعلى فكرة داخل زوايا شناط الحريم ممكن تلقى في الزاوية حبة فصفص أو بقايا من الروج أو المكياج على شكل حبيبات صغيرة ..أو ممكن تلقى صامولة صغيرة حقت حلق الأذن طايحة وداخلة في زاوية الشنطة....أوطايح في الزاوية أظفر بلاستيك صناعي حق أصباعها الصغير وما انتبهت له ...أو ممكن تلقى بقايا مناديل على شكل قطع صغيرة جدًا ...أو ممكن إبرة ...الخ ..



.. ...



.......

[الخواف]

يوم كنت صغير وعمري في حدود 10 سنوات ..ما أذكر بالزبط كم ...


المهم كانت فيه بنت عمرها في مثل سني تقريبًا ...وشكلها عااااااادي جدًا ...يعني شكلها مش ملفت للنظر ...عادية ..

وكنت مرتاح لها ..يعني نقدر نقول أنها مودة من طرف واحد ......


المهم كنت إذا شفتها في الشارع .. أسترق النظر وأجلس أراقبها من بعيد لبعيد بنظري فقط ....لدرجة اني كل ماشفتها أطنش كل شي حوالي بدون ما أشعر ..ثم أجلس بس أنظر فيها فقط ...طبعًا ما أشوفها إلا في الشارع...

وطبعًا ولا مرة حصل بيينا كلام أو لعب بحكم أننا صغار ....وبرضه ماعمرها عطتني وجه...


على فكرة ماكان حب بالمفهوم اللي متعارف عليه .....هو فقط مودة وارتياح ...لأني صغير إيش عرفني بالحب ...


طبعًا كانت المودة من طرف واحد ......ومتأكد مليون في المية انها مادرت عني ولا حتى صفت لي حساب ولا 1% ....لأن أصلًا مقومات الإعجاب معدومة عندي ..فعلًا معدومة وهذا الكلام مش تواضع مني ...بل حقيقة ...


المهم كنت إذا انسدحت في الليل عشان أنام ..... لابد أدخل في أفكار وتخيلات ..مثلًا أتخيل اني أنقذها من وحوش أشكالها غريبة .. وبرضه أتخيل اني داخل في مضاربة مع عيال الحارة ..وهي شايفتنا ...وبدون شك أنا بطل المضاربة ....طبعًا هذا تفكيري وتخيلاتي لأني صغير ...يعني تفكيري على قدي ...





المهم مرة من المرات على ما أذكر كنت ألعب مع ورعان صغار مثلي ...في بيت وحدة من حريم الحارة ....أقصد في حَوْش بيتها ( الفناء )...

المهم فجأة الحرمة جالسة توزع أسماء بنات الحارة علينا حنا اللي جالسين نلعب في حوشها ..

يعني تقول فلان بنجوزه فلانة ..وفلان بنجوزه فلانة وهكذا ...طبعًا تمزح ...وحنا جالسين نلعب ..

وأنا أسمعها .....أما اللي معي من العيال مدري عنهم هل منتبهين لكلامها ولا لا ...


وعلى فكرة كان مفهوم الزواج عندي ان (حرمة ورجال) يعيشون مع بعض في بيت واحد فقط...وما أعرف الشغلات الثانية...بحكم اني صغير ..



طبعًا أنا مركز معها وانتظر دوري ....كأني أنتظر شهادتي هل أنا راسب ولا ناجح ....



المهم يوم قالت اسمي ...أحس اني انفصلت عن الناس اللي حوالي ...فـ أحس اني عايش في فراغ بدون مايكون حولي مجسمات ولا مناظر ولا أي شي .....فقط فراغ وأشوف هذي الحرمة قدامي وجالس انتظر تنطق اسم البنت اللي بتختارها لي ....


المهم الحرمة قالت فلان... تقصدني أنا ...بنزوجه فلانة...وطلعت هي البنت نفسها ...

يووووووووه ماتتخيلوا كيف طرت من الفرحة ....مهما وصفتها ...

بدون مبالغة في لحظة نطقها لاسم البنت ...فز قلبي ...وأحس انه بيطلع من مكانه ...يخفق بقوة ....يعني القلب يدق بسر بسرعة لدرجة اني أحسه يتحرك من مكانه يمين ويسار ......رغم اني عارف ان كل كلامها مزح في مزح ...

لكن طلعت ردة الفعل مني لا إرادي ...يعني وغصبٍ عني ....





نهاية الكلام :

من بعد ماكبرت البنت وبدأت تغطي وجهها وماتطلع من البيت ....أصبحت ما أعرفها ولا أعرف عنها شي .....فقط اللي أعرف انها تزوجت واحد من جماعتها ......وانتقلت من الحارة ...


وطبعًا أنا وأهلي انتقلنا من الحارة .....فـ كلامي هذا كله مجرد ذكريات أطفال لا تعبر عن صدق بقاء مودتي للشخص اللي جالس أتكلم عنه ....

فقط ذكرتها لأنها من ضمن ذكريات الطفولة لا أقل ولا أكثر ... فهي لا تعني لي أي شي ...مثلها مثل ذكرياتنا عن لعبنا في الشارع وذكرياتنا عن ملابسنا وذكرياتنا عن كل ماعشناه في أيام الطفولة ....






......................

[الخواف]

اقتباس من التقييم :
ياخي شكله حب .. نفس الشي حصل معي قبل ادخل المدرسه .. يعني وانا بعمر ٦ سنوات .. كان شعور جدا حلوا تجاهها .. اعتقد ان فيه شي اسمه حب طفوله والله اعلم


بيني وبينك تمر علينا أشياء وحنا صغار ومش عارف أفسرها بأي شي ...يعني مالقيت لها تفسير ..

لكن زي ماقلت أنت يابرنس هو كان شعور حلو ...لكن المشكلة انه من طرف واحد ههه ...


....

[الخواف]

الرسايل اللي تجيني في التقاييم ودي أنسخها هنا .....ولكن ممكن البعض مايحب أنسخها وأحطها هنا في المدونة ....طبعًا هذا الكلام اعتقاد مني فقط ...

بس مدري ...


.......................

[الخواف]

يُقال أن سبب تسمية الهايلوكس أقصد الهلكس والددسن ( وانيت ) أو ( ونيت ) هو :

ان أول شركة جت عندنا جابوا سيارات ( بيك أب ) اللي حنا نسميها غمارتين أو ددسن أو هلكس أو غرفتين وحَوْش ..وغيرها من الأسماء ...


لكن من ضمن أساميها المعروفةعندنا هو (وانيت أو ونيت ) ...وسبب التسمية ان الشركة اللي أول شي استوردتها عشان الشغل .. كتبت عليها رقم ( 81 ) واحد ثمانين ....

فكانوا الخواجات إذا طلبوا من السعوديين اللي شاغلين معهم انهم يجيبوا السيارة .. كانوا يقولوا لهم جيبوا السيارة ( ون إيت ) ...يعني السيارة اللي عليها رقم واحد وثمانية ....


ومن ذاك الوقت عرفوها السعوديين باسم ( ونيت او وانيت ) ...اجمعوا نطق الرقمين مع بعض ....فاصبحت الهلكس والددسن معروف باسم ( ونيت أو وانيت ) ..بدل اسم ( بيك أب ) ...


والله أعلم عن صحة هذا الكلام ...لكن يُقال عند البعض ان هذا سبب التسمية ....


..............

[الخواف]

أكره الجلوس في البر للتنزه .....لأن مفيش دورة مياه لما الواحد يحتاجها .....

وشغلة اني أروح ورا صخرة .. ولا وراء شجرة ... ولا ورا تلة رملية ومدري إيش...فهذا الشي مايمشي معي ...ما أحب الطريقة هذي ...قلق ...



لهذا السبب أصبحت أعتذر من أقاربي أو أصحابي إذا كانوا طالعين للبر ...للجلوس فيه ....


أما التنزه في البر بدون مانوقف ونجلس ...فهذا الأمر عادي عندي ....



وعلى فكرة أنا أعتبر التنزه في البر بالنسبة للحريم مش مناسب ... يا أخي إذا احتاجوا لدورة المياه هن مش زي الرجال يدبروا أنفسهم ....





.......

[الخواف]

في خلال حياتي ....جلسنا تقريبا 3 سنوات أو 4 بدون كهرباء ...

و 11 سنة تقريبا بدون مكيف ..... الحرارة تخليك تصحي من النوم ...الفنيلة مبللة من العرق ...رغم ان النوم برا ...



سبب هذي الحالة : احتفظ به لنفسي ...



....

[الخواف]

اقتباس : من التقييم
قليل الطلعات للبر .. اذا كشته ليوم واحد عادي لكن اذا مخيم فيه حمام متنقل ولك الكرامه عن ذكرة غرفة شينكو مركب فيها كل شي .. هذا اللي لاحظته من خلال ما اشوف مخيمات .. وع فكره تري هالشي من زمان اجدادنا كانو عايشين في خيام وحاجتهم يقضوها في البر بعيد



شي كويس ان المخيم مجهز بالمرافق اللي معه من حمام وغيره ...


وطبعًا أكيد الآباء والأجداد حياتهم في البر ماراح يكون عندهم حمامات ...وماشية أمورهم ....


أنا من الناس اللي أمي وأبوي... الله يرحمهم ...عاشوا في خيام بداية حياتهم ...



وبرضه أنا عشت في بيت مافيه حمام ...لأن بيتنا كان فقط غرفة واحدة صغيرة جدًا ...مبنية من الحجر والطين ...وحوش صغير جدًا مبني من الطين ...ممكن مساحته أربعة في أربعة ..تقل أو تزيد شوية ...




.....

[الخواف]

هذا الدباب ...طبعًا حنا نسمي الـ ( الدراجة النارية ) دباب ...

https://www.raed.net/img?id=99869 (https://www.raed.net/)


المهم مازلت أحب الدباب ...طبعًا أقصد الدباب العادي الرخيص اللي مش رياضي ولا فخم .....


المهم أحب ألفلف وأتمشى عليه هنا وهناك .. وأقضي عليه مشاويري اللي مش بعيدة ...يعني بالعربي الدباب العادي داخل مزاجي من زماااااااااان ...



لكن مستحيل أحقق رغبتي هذي....لأن الدباب عندنا مأخوذ عنه صورة انه للشباب الصايع ... طبعًا ما ألومهم لأن فترة من الفترات كان اللي يستخدمه الشباب الغير محترمين ....طبعًا هذي الصورة انتهت ..لكن خلاص محد متقبله ...



ممكن يجي واحد ويقول: مارس الشي اللي تحبه ....وماعليك من الناس طالما مافيه ضرر على الآخرين وغير مخالف للشرع ...


وأنا أقولك : كلامك صحيح ....لكن بعض الأمور الناس اللي حواليك مش متقبلينها نهائيا وماراح تتجرأ انك تسويها .....

مثلًا تخيل لو تشوف أبوك ولا جدك راكب دباب وراح يقضي عليه مشاوير .....هل راح تتقبل الشي هذا ...أعتقد لا ...

لكن لو راح على أرجوله أو أخذ تاكسي يوصله ...راح تشوف الأمر عادي ...رغم انه تعب ومشقه عليهم .وبرضه ضياع فلوس في المواصلات ....







المهم فيه أشياء الواحد يحب يسويها ...لكن يحكمه المجتمع اللي نشأ وتربى فيه ...

ومهما حاول يتجاهل مجتمعه ماراح يقدر ...إلا إذا كان في سن صعير من 11 - 18 سنة ...لكن بعد سن العشرين ماراح يقدر ...إلا إذا شاء الله ....


طبعًا هذا الكلام من وجهة نظري ..........






لحظة لحظة لحظة ....ممكن البعض عنده ميول إجرامية ...لكن مايقدر يمارس جريمته المفضلة ...

يعني أقصد بعض الناس تجده إنسان عادي وعايش مثله مثل غيره من الناس العاديين ....لكن :

لكن لو واحد سأله وقاله : لو سمح لك بارتكاب جريمة ....إيش هي الجريمة اللي تميل لها ..؟


راح تسمع منهم جرايم ماكنت تتوقع انهم يميلون لها ....لكن دينهم وأخلاقهم مانعينهم وضابطين سلوكهم ......


كما هو الحال في المجتمع العربي اللي ضابط سلوكهم من الناحية الإجتماعية هي العادات والعرُف ... طبعًا التعاليم الإسلامية أمر مفروغ منه ...



لكن مع حبي للعادات والأعراف العربية إلا أنهم مزعليني في شغلة الدباب .....

حرام عليكم حارميني من شي أحبه ....وأنا ماسويت لكم شي ...حالي حال نفسي ..

وإذا كان يزعجكم صوته ..راح أمشي على مهلي لين أطلع برا الحارة ....وبعد ما أوصل الخط السريع ....مالكم فتحت فم علي ...






.......

[الخواف]

يوم فتحت المنتدى ...لقيت قدامي دعاية عن نوعية معينة من الرز ....

المهم لما شفت هذي الدعاية تذكرت واحد من خوياي يمدح نوع من الرز ......وهو رز ( أبو علي ) ...يوم سمعت اسمه اعتقدته انه يمزح ...لأني أنا أول مرة أسمع فيه ...وإلى الآن ماشفته ....



وفجأة واحد دخل علي باسم نوع آخر من الرز ....ويقول تشم ريحته أول ماتدخل من البيت ...وقالي اسمه ( دلتا ) ..





خلاصة كلامي :

الحمدلله والشكر على نعمه الكثيرة التي لاتعد ولاتحصى...كانوا لايعرفون الرز ...والآن أنواع كثيرة ....

لكن الإسراف عامل عمايله ......خاصة الإسراف في الرز والخبز .....


......

[الخواف]

من ضمن النصايح والإرشادات والتوجيهات اللي مرت علي :

( بعد خروجك من البيت أنت أصبحت أبواب مفتوحة ....فـ حافظ على أذكارك )



....

[الخواف]

أحفادي وأولادي ماراح أخليهم يبوسوا راسي ويدي ...

لأن راسي ماراح يكون نظيف في كل وقت ....ويدي مدري هل راح تكون ريحتها طبيعية ولا لا ...



لهذا السبب راح أقولهم أنا راضي بالمصافحة فقط ...وراضي عنكم ......




طبعًا ممكن يجي واحد ويقول :

أنت بتصرفك هذا راح تقضي على مظهر من مظاهر احترام الأب ...وراح عيالك مع الأيام يستغربوا من الشخص اللي يبوس راس ويد أبوه ...




وأنا أقولك : كلامك صحيح ...ولكن هذي رغبتي...لأني أنا ما ألبس شماغ...وراسي معرض للغبار والحرارة وكل العوامل الخارجية ...وهذا ممكن ينتج عنه رائحة مش كويسة ....لهذا السبب ما أحب أحرجهم..وطبعًا أصرح لهم بالسبب..


وياما وياما قلت هذا الكلام قدام أقاربي ....فـ بعضهم ما وافقني على كلامي ..وبعضهم أخذوا الموضوع بجدية وإلتزموا الصمت مع إشارة بأن هذا الشي راجع لي ...ولي الحرية في اختياري هذا ... ..




على فكرة الشماغ ألبسه في الأماكن الرسمية .......أما زيارتي لأقاربي والأسواق والأماكن العامة ما ألبسه ...

وبرضه ما ألبس الشماغ لما أروح للمسجد إلا إذا كان لحاجة معينة .........



فأنا ما أحب ألبس الشماغ ...تعودت على الشي هذا ............


والله أعلم في سنواتي القادمة هل استمر على عدم لبسه ولا لا ...





.......

[الخواف]

العضوة ( إشراق ! ) ...أعتذر منك ...أعتذر ....أعتذر ...


ممكن يجي واحد ويقول :

إيش سبب الاعتذار ..!؟


وأنا أقولك السبب : اني أنا تكلمت في شخصها ..في بعض مواضيعها ....وحصل اللي حصل ..


طبعًا ماراح أدخل في التفاصيل ...فـ يكفي أني أنا اللي رميت نفسي عليها داخل مواضيعها وتكلمت في شخصها .....





وبرضه ممكن يجي واحد ويقول :

ليش ماتكتب اعتذار مستقل في أحد الأقسام عشان الكل يشوفه وبكذا هي ممكن تقبل اعتذارك ...بدل المدونة اللي أصلًا هي بنفسها ماراح تدري عن اعتذارك فيها ..؟



الجواب : شوف يابن الناس ...كلامك أو وجهة نظرك صحيحة .... لكن لا أخفيك سرًا أنا إذا نزلت موضوع اعتذار مستقل راح البعض يرد على الموضوع بكلام جميل... لكن أنا ما أقبل الشي هذا لما أعتذر من أحد ......

رغم ان ردهم كويس ومشجع ان الناس يعتذروا من بعض ...يعني نيتهم طيبة ..

لكن أنا أحب أعتذر بدون ما أسمع من أحد كلمة حلوة بمناسبة الاعتذار .....




المهم أنا هالحين راح أرسل لـ ( إشراق ! ) اني اعتذرت لها في المدونة ...


فإن قبلت الاعتذار فهذا شي كويس وطيب .....وإن رفضت فهذا حق من حقوقها وما ألومها ...




وبرضه ممكن يجي واحد ويقول :

ياعمي ليش تعتذر ..كله على بعضه كلام على الشاشة...هي ماتعرفك ولا أنت تعرفها..؟


وأنا أقولك : أنا مثلك دائمًا أقول ان الكلام على الشاشة مايضر أحد ......لكن أنا تكلمت في شخص معين وحددته باسمه .... وما استسغت تصرفي هذا وما ارتحت له ..بدليل ان كل ماشفت اسمها قدامي في المنتدى أحس بـ الندم على كلامي اللي قلته لها ...




وبرضه ممكن يجي واحد ويقول :

أنت مسوي فيها دراما ومسوي فيها حنون وطيب ومدري إيش ..ومكبر الموضوع على الفاضي ..!!؟



وأنا أقولك : هههه ...ما ألومك على كلامك هذا ...فعلًا ما ألومك ...لأن لو واحد غيري كاتب هذا الاعتذار راح أقول نفس كلامك ....

لكن ممممممممممممم بصراحة مدري وش أقولك ...




.................

[الخواف]

من الأشياء اللي مش متقبلها :

1- ان الرجل يمشي في بيته بـ ( شورت ) فقط ....!!...

مدري كيف يمشي وبطنه مكشوف وسره أو سرته مكشوفة ...


لا وبعد كمان بعضهم يجلس ويتفرج على التلفزوون ويسولف قدام عياله وزوجته وهو على هذي الحالة ...

أنا عن نفسي ما أتقبل الشي هذا من الرجل حتى لو كان عند زوجته فقط ...

أعتبره شي مقزز .......



طبعًا الناس يختلفوا عن بعض ..بعضهم يشوفون الشي هذا عادي وبعضهم لا ...وكل واحد وله وجهة نظر .....






2- والشي الثاني اللي مش متقبله نهائيًّا هو ان الرجل لما يخطب بنت... وترفضه.....تلقاه يبحث عن ناس يحاولوا يقنعوها انها توافق ... وأحيانًا هي واهلها رافضينه ..ومع هذا يحاول مرة ومرتين وثلاث عشان يوافقوا ...ويرسل ناس يتوسطوا له عشان يوافقوا .....


النوعية هذا من الرجال مدري كيف نفسيته متقبله انه يتزوج وحده رافضته .....!!..فعلًا شي غريب ...



يارجل الواحد منا يبطل من الزواج من البنت بمجرد علمه بأنها مترددة هل توافق ولا لا....فمابالك انها صرحت برفضها له...






.....

[الخواف]

من ضمن الكلام أو المقولات الموجهة للرجل :

عامل المرأة بطيبة وحُسن خُلق ولا تنتظر رضاها عنك أو حفظها لمعاملتك الطيبة لأن هذا ماراح يتحقق لك بصفة دائمة......فقط اطلب الأجر .....

[الخواف]

( الرجل في بيته يفكر في غرفة جلوسه هو وزوجته وأولاده .....والمرأة تفكر في الناس اللي برا البيت ...كيف تزبط غرفة جلوسهم عشان ترضيهم إذا زاروها ) ...وقس على ذلك بقية تصرفاتها ...


فرق كبير بين من يشغل تفكيره بأهل بيته وبين اللي شاغل تفكيره في الناس ..

[الخواف]

الرجل في وقتنا الحاضر ...اللي قضى على نفسيته وعلى سعادته هي كلمة ( أنت رجل ولازم تتحمل )

بمعنى آخر : هو في حياته الزوجية مجرد آلة بدون مشاعر بالنسبة للمرأة ....وفي المقابل تشوف نفسها هي الفكر والمشاعر والرقة والحنان والإنسانية ..

[الخواف]

الكرسي اللي مش هاضمه بالمرة ..هو الكرسي الطويل ....أقصد اللي قاعدته طويلة وفي الوسط حلقة على شكل دائرة يحطون عليها أرجولهم ...مثل اللي في بعض المقاهي الفاخرة على قولتهم أو أحيانًا تكون في البرامج الحوارية في التلفزيون ...


وعلى طاري الكراسي : إيش قصة الحريم اللي يجلسون على طرف الكرسي .. في البرامج واللقاءات التلفزيونية ....!!...ليش ماترجع ورا شوية او تسند ظهرها على الكرسي ..!؟

مايتعبون وهن جالسات على حافة الكرسي ..!!...

[الخواف]

قرندايزر راح يسوون له نسخة جديدة :MonTaseR_213::عبوث::MonTaseR_135::MonTaseR_6:


من ضمن الأخبار الزوينة بالنسبة لي ..هذا الخبر :







https://up6.cc/2022/09/166204148425241.jpg (https://up6.cc/)
(( وقال الدكتور عصام بخاري، الرئيس التنفيذي لشركة مانجا للإنتاج، إنه يسعدهم الإعلان عن هذه الشراكة غير المسبوقة مع اليابان حول الشخصية العريقة "جريندايزر"، والتي ألهمت الكثير من الأجيال على مدى أكثر من 40 سنة من الجمهور العربي والعالمي.

وأضاف ان شركة مانجا للإنتاج لها تجارب سابقة وناجحة في الإنتاج المشترك والتي تكللت بثقة الجهات الخارجية، وسجلت نجاحات متعددة ولقيت الترحيب من الجمهور العربي والعالمي.

وأوضح أن الشراكة في مشروع "جريندايزر "الجديد تعد نقلة نوعية في مجال الأعمال لشركة مانجا للإنتاج،))


(( فيما عبر جو ناغاي، مبتكر شخصية "جريندايزر، عن سعادته بإعادة مشروع جريندايزر الذي كان يتطلع إليه منذ وقت طويل، مؤكدًا أنه متشوق لإعلان هذه الشراكة التي ستجمع أفضل الخبراء اليابانيين ليصنعوا شيئاً رائعاً.

الجدير بالذكر أن سلسلة الخيال العلمي "جريندايزر" انطلقت منذ الخامس من أكتوبر عام 1975 واستمر لمدة 74 حلقة، حيث عرض المسلسل في بداية الثمانينات في المحطات التلفزيونية العربية ولاقى نجاحاً هائلاً في الوطن العربي من حيث المشاهدات.

وتعد الدبلجة من أحد أهم أسباب نجاح النسخة العربية، حيث قام الفنان القدير جهاد الأطرش بتأدية دور "دايسكي". توقفت جميع المشاريع الخاصة " جريندايزر " بعد عرضة في اليابان والعالم العربي. ))







كنت من زمااااااااااااااااااااااااااااااااااااااااان أتمنى يسوون له نسخة جديدة .....

بصراحة أنتظر ينتهون منه بأسرع وقت ....

بس ياليت مايغيرون الشخصيات ......إذا غيروا فيها شي ...راح يكون بايخ وماراح ينجح ...

والأهم من ذلك يكون جهاد الأطرش هو نفسه اللي يؤدي دور ( دايسكي ) دوق فليد ...هو مازال عايش ..يعطيه الصحة والعافية ...وصوته ماتغير ...

[الخواف]

على فكرة كنت أقلل من بعض اهتمامات الآخرين ....لأنها في نظري بايخة ومالها داعي ....لكن تغير الوضع عندي بعد اهتمامي بـ قرندايزر وبضرورة إعادته بنسخة مطورة .....

فقلت بيني وبين نفسي إذا كان قرندايزر من ضمن اهتماماتي وهو مجرد فلم كرتون أو كما يسمى عند البعض إنمي ...

فمن باب أولى احترام اهتمامات الآخرين وعدم السخرية منها ........مثلًا البعض يحط له بعارين ( إبل ) في البر ..ويصرف عليها مبالغ بدون أي فائدة تعود عليه ...لكن هو مبسوط ومرتاح نفسيًّا بوجودها في حياته ....وخاصة لما يجتمعوا عنده أصحابه بعد المغرب ويشربوا من حليبها ...وهو مستمتع بهذا الجو اللي هو عايش فيه مع أصحابه والبعارين من حواليه ...كأنه جالس مع أصحابه في مقهى وحواليهم مزهريات وشلالات اصطناعية مدري صناعية ...



ومن ذيك اللحظة وإلى هذا اليوم ماعمري انتقدت أحد على ميوله الخاص به أو رغبته....حتى لو شفته يمشي على إيديه بدل أرجوله ...طالما هو مبسوط وهذي رغبته راح أصفق له ......أهم شي نفسيته عشرة على عشرة ...


.......................................




المهم كنت جالس أقلب في مدونة رايق وإيزبيلا ومسكك الغلا ومدري مين ..نسيت أساميهم ..

بمعنى آخر : جالس أتسكع في مدوناتهم على قولتهم ...وعلى فكرة ما أعرف إيش معنى أتسكع ..؟..لكن ماعلينا ...


المهم ان مدونات كل الأعضاء بالنسبة لي زي المجلة ....يا أخي فيها كل شي ...



يتبع ...

[الخواف]

البارح مر علي مقطع لمسلسل أردني ......وتذكرت واحد من أقاربي رجل كبير ...كان يقول ان الممثلة الأردنية فلانة فيها شبه مني ...يعني بعض من أجزاء الوجه فقط ...ومش كله ......!!...طبعًا هذا الكلام كان قبل سنوات كثيرة ..!!

المهم لما تذكرت البارح كلامه ...حاولت أتذكر اسم الممثلة عشان أبحث عنها في اليوتيوب .....لكن ناسي اسمها ...ومافيه أمل أتذكره ....

وجلست أعصر مخي عشان أتذكر اسمها لكن ماقدرت ...............................



طبعًا هو شبهني فيها ...لأن مافيها جمال كشكل ........والشبه فقط في جزأين من الوجه ...




وقبل ( كورونا ) تفاجأت ان نفس الرجل يقولي ان حفيدته تشبهني ....!!...عمرها تقريبًا سنتين أو أقل بشوية ...مدري بالزبط كم ..


المهم هذا الرجل متفرغ لي على التشبيهات ههه...


طبعًا أنا أقابل كلامه بابتسامة فقط ...لأني مدري وش أقوله ..!!..هل أقوله لا ماتشبهني أو أقوله الشبه فقط في العين أو لأنف أو الفم فقط..أو ..الخ ..


وبصراحة أنا شايف ان مافيه شبه في الشكل بيني وبين كل اللي قال انهم يشبهوني ..!!






وعلى فكرة مرة من المرات كنت أتسوق في ( سوق الخضار ) وفجأة باكستاني وقفني وقالي أنت فلان ..!؟....

قلت له : لا .....ومفيش معرفة بيني وبينه ...


قال الباكستاني : أنت شبهه بالتمام ...طبعًا قالها بلجهته العامية المكسرة ..

وجلس يكلمني عن هذا الشخص اللي أنا أشبهه ..!! ..وقلت له : مالي معرفة فيه ...

طبعًا الباكستاني كان بشوش ومبتسم لما كان يكلمني ...






لا وبعد كمان ...مرة رحت لواحد من أقاربي ودقيت جرس بيته ....وفجأة انفتح الباب وأنا مش شايف أحد على الباب .....

لكن بسرعة تداركت الوضع وقلت : فلان موجود ....

لأني عرفت ان اللي فتحت الباب زوجته وهي خلف الباب ..طبعًا ماشفتها نهائيًّا ...


وسبب فتحها للباب لأنها نظرت من خلال ( العين السحرية على قولتهم ) حقت الباب ...وأعتقدت اني أنا زوجها ....بسبب أنها شايفه تشابه في الملامح والطول والجسم بيني وبين زوجها ...

وأنا أعتقدت ذلك لأن حتى الناس اللي أول مرة يشوفونا مع بعض ..يقولوا فيه شبه بينكم ...رغم ان مافيه شبه لا في العيون ولا في الأنف ....لكن كيف نشبه بعض ..!؟...مدري ...رغم ان اللي عايشين معنا في نفس الحارة مش شايفين شبه ملفت للنظر .....إلا الأشخاص اللي أول مرة يشوفونا يقولوا بينكم شبه كبير ...




المهم هي بعد ماسمعت صوتي ارتبكت وقفلت الباب على طول ..بعد ماحست أنها غلطانة ...






خلاصة كلامي :

شكل كثير من الناس بيني وبينهم تشابه ههه .......راح أنزل صورتي في المنتدى يمكن فيه أعضاء في المنتدى يشبهوني ههه...







......

[الخواف]

فيه لهجات تعجبني ..

اللهجة المصرية والسورية واللبنانية ...يا أخي لهجتهم خفيفة وتتقبلها الأُذن بدون تردد وبشكل سريع ...



بعكس اللهجة الخليجية ودول المغرب العربي ....كلهم لهجتهم ثقيلة ومنفرة ...



على طاري اللهجات : تذكرت واحد من معارفي ....ماشاء الله تبارك الله صوته ومخارج الحروف تطلع منه بشكل جميل لما يتكلم بالفصحى ..بدون ماتظهر اللكنة العامية في نطقه للحروف والكلمات ....

أحيانًا أتمنى يتكلم بالفصحى لفترة طويلة ....لأن كلامه مخلوط بالعامي والفصحى ....


......................







...

[الخواف]

فيه حاجة مش مقتنع فيها ودائمًا أسمعها ....وهي :

مقولة ( تكلم لأراك ) ....!!....هذي المقولة مش داخلة مزاجي....

اللي أؤمن فيه مقولة ( افعل لأراك ) ...


لأني أقابل كثير من الناس وكلامهم يخليني أقول ان هذولي أحسن ناس في العالم .....لكن لما تشوف تصرفات الواحد منهم أو تشوف تصرفاته لما تقع خصومة بينه وبين شخص آخر ..راح تشوف شخص آخر ....مش الشخص اللي كان متصدر المجالس بكلامه الحلو الرزين اللي كله ينقط عقل وحكمة ....

تلقاه مايعطي الحق لأصحابه لما يكون هو الخصم .....ومايعترف بخطأ أولاده أو أي واحد من جماعته ....بل تجد الشر في كلامه وتصرفاته ......

لهذا السبب مش مؤمن بمقولة ( تكلم لأراك ) ...........................


طبعًا ما أُنكر ان فيه ناس كلامهم على قد أفعالهم ....يعني يقولوا ويفعلوا ......بس قليل.....






على فكرة كانت فيه أمور معشعشة في راسي وما كنت أتوقع اني اتنازل عنها ... اللي أنتم تسمونها مبادئ وأفكار ومدري إيش ...طبعًا المصطلحات هذي ما أفهم فيها ...


المهم كثير من المبادئ والأفكار تنازلت عنها ....وغصبٍ عني تنازلت عنها .....بغض النظر هل كانت مبادئ وأفكار غلط ولا صح ....


طبعًا بعضها تنازلت عنها بسبب اني عرفت انها غلط ...وبعضها انجبرت على التنازل عنها بسبب طريقة الحياة اللي حنا عايشينها ....لأني لو ماتنازلت ما أقدر أعيش مع الناس ....



ممكن يجي واحد ويقول : لا تمشي وراهم زي قطيع الغنم ....لازم تكون لك شخصية مستقلة قوية..و.الخ ..


وأنا اقولك : يابن الناس حرام عليك لاتنفخ راسي بكلام أنا ما أقدر عليه .....لو مشيت على كلامك راح أعيش زي الكلب محد يعطيني وجه ..ولا راح أحد يتحمل يعيش معي ...


فلا تجي أنت ولا غيرك وتسوي فيها قدامي ان الواحد لازم يتمسك بمبادئه ومدري إيش ....

فـ أحس بطني تمغصني يوم أسمع حقين تطوير الذات وتعزيز الثقة بالنفس ..و..و.. الخ ..يوم يتكلموا عن هذي الأمور اللي أنت جالس تتكلم عنها ...ومش عايش الواقع ...




مانكب عفشي إلا المبادئ والثبات والثقة بالنفس ومدري إيش ......


أصلًا أنا غاسل يدي من هذولي حقين تطوير الذات واللي زيهم ... ومن يوم أشوف الواحد منهم مش لابس جاكيت وجالس يتحمطر على المنصة رايح جاي قدام الناس وهو لابس القميص الأبيض والكرفتة ..والجاكيت مدري وين راميه ...

مثل هذا ودك تسحبه بالكرفته المقلمة اللي لابسها وتخليه يعيش الواقع مع البشر عشان يعرف حنا كيف عايشين ومع مين عايشين .....بدل لفلفته على المنصة أو المسرح رايح جاي ...فقط كلام في كلام .....

لا وبعد كمان تشوف الناس اللي قدامه كل واحد منهم حاط القلم في فمه بين براطمه ومسوين فيها انهم مركزين معه ...!!



مانكب عفشنا إلا أبو كرفته بدون جاكيت .....والثاني اللي نكبنا هو اللي لابس شماغ وراش عليه نشا كوي علبة كاملة...وحاط يده على ركبته وماسك سبحة كبيرة طويلة كأنه جالس يسحب دلو من البير ...






خلاصة كلامي :

أنا قررت أبيع ضميري بريالين حتى لو بـ سندوتش مليس موافق ...ولايسترد ولا يستبدل بعد البيع ...




.....

[الخواف]

نفسي أجمع مجموعة كبيرة من الرجال ..وأسألهم سؤالين اثنين:


1- لو زوجتك شايفها قرفانة و متذمرة من شغل الطبخ والمطبخ ..

هل تتقبل نفسك الأكل اللي مقدمته لك وأنت عارف مليون في المية انها مسويته لك بدون نفس ...وطفشانة من الشي هذا ..؟





2- لو خطبت وحدة وما وافقت..يعني ارفضتك .....ثم بعد يومين غيرت رأيها وقبلت انها تتزوجك ..بدون محد يضغط عليها وباقتناع تام منها ..


هل راح تنبسط وتفرح ثم تكمل الخطوبة والزواج ..؟



( عزيزي العميل جاوب بينك وبين نفسك )


.....

[الخواف]

https://up6.cc/2022/09/166300934385431.jpg (https://up6.cc/)

[الخواف]

https://up6.cc/2022/09/16630228102871.jpg (https://up6.cc/)

[الخواف]

أحلى حاجة في قسم الحوار والنقاش انه مش ماشي على وتيرة وحدة .....

فـ لابد من الهوشات والمضاربات الكلامية ...لأنه يصبح ممل وكئيب لو كان كل واحد جالس يطبطب على الثاني .....فـ لازم من الأكشن على قولتهم ...



خلاصة كلامي :

قسم النقاش حلاوته بوجود الأعضاء المختلفين عن بعض في الطباع والفكر والأخلاق وكل شي .....و هذا الشي ممتاز ....


يعني تخيل لو كان كل الأعضاء محترمين ....!!...طبعًا هذا راح يكون ممل في قسم الحوار والنقاش ...

ولكن ولكن ولكن ولكن اللي بياخذ الأمور بجدية وحساسية فـ الأفضل يتفرج بس مايشارك فيه بأي كلمة ....رغم اني أنا أحيانًا أتنرفز من بعض الردود ..ولكن نمشيها لأن هذا طبع قسم النقاش ..فـ شي طبيعي تجد كلام بخليك تشد شعرك ...




ممكن يجي واحد ويقول : طيب بعضهم يغلط علينا ويتكلم علينا بكلام مش حلو ..و..الخ ...


وأنا أقولك : هذي الأمور تمر على كثير من الأعضاء ...ولكن يغضون الطرف عنها ... لأنهم عارفين ان هذا الشي متوقع حدوثه .....ومش حابين يحرقوا أعصابهم بسبب كلام على الشاشة ......

فـ أنا بنفسي مرة غلطت على عضو في قسم النقاش ...طبعا العضو كبر راسه وطنشني ....لكن اعتذرت منه ....

بمعنى آخر : الكلام اللي على الشاشة ماراح يأثر على الطرف الآخر في حياته الحقيقية ...





ممكن يجي واحد ويقول : ماجبت شي جديد ..كلامك مستهلك ...

وأنا أقولك : كلامك صحيح مية في المية .....لكن يابن الناس هذي مدونتي وماعندي شي أكتبه فيها ....فـ وجدتها فرصة اني أكتب شي عن قسم النقاش ... لأن فيه موضوع حصل فيه هوشة ومضاربة ....

وطبعًا أنا من المرتزقة اللي مايهمني إلا نفسي ....فوجدت الحدث اللي حصل في قسم النقاش فرصة اني أكتب عنه أي شي حتى لو كان معروف ومستهلك وبايخ .....


المهم الموضوع وصاحب الموضوع والأعضاء اللي شاركوا في الموضوع ...كلهم
عشرة على عشرة بدون استثناء ...لأن القسم كان شبه ميت وهم أحيوه ....

......


.....

[الخواف]

مدري ليش بعض المحلات أسماء الأكل عندهم بالأنقليزي أو الأنجليزي ...


المشكلة تلقى اللي يشترون من المحل تقريبًا كلهم عرب ......!!......طيب ليش لازم أطلب بلغة مش لغتنا ...


أنا بعض أسماء الأكل بالأنقليزي ما أعرف أنطقها بشكل صحيح ........فـ أحط اصباعي على صورة الأكل اللي في القائمة اللي قدام المحاسب ...

مثلًا السندوتش له أسماء كثيرة ...اللي محشي مدري ايش اسمه كذا .....واللي محشي مدري ب ايش اسمه كذا ...وهكذا ....وكلها أسماء انقليزية ..

بعضها ما أعرف أنطقها نهائيًّا ...فـ أحط اصبعي على الصورة وأقوله عطني هذا ......!!


ياجماعة الخير أيعقل هذا .!؟ ..البائع والمشتري كلهم عرب ...وجالسين نطلب بلغة مالنا علاقة فيها .....وفي النهاية نضطر نشغل أصابيعنا بالإشارات عشان نشتري ..!!..


لكن هذا كله يهون مقارنة مع اللي يخلط كلامه بكلمات انقليزية....



.....



.....

[الخواف]

( التيس ) ......التيس معروف هو الذكر من الغنم ...حنا نسميه تيس ...




المهم يا أخي تحس التيس عايش حياته .....تلقى جدوله مليان مش فاضي ...كل بعد كم يوم تلقاه داخل زربة غنم جديدة ....


فـ تلقى التيس يلف الزّراب حقت الحارة كلها ....عشان يضرّب الغنم ......

لا وبعد كمان أحيانًا صاحب الغنم يحجز موعد عند صاحب التيس ....



تحس التيس يوم تشوفه في حوض الددسن انه مفتخر بنفسه... وهم متوجهين به إلى زربة الغنم ....



يجيك شعور الحسد والحقد الدفين على التيس لما تكون عزوبي وهو متعدي من جنبك في حوض الددسن متجه لـ غنم العم سالم ..





....

[الخواف]

أحياناً الواحد نفسه يطلع للبر بدون مايكون مخطط للشي هذا ...ثم يمشي فيه على أرجوله وهو يتكلم ويصارخ ويبكي بصوتٍ عالٍ ...

ثم بعدين يرجع للبيت ومعه خبز و زبادي ....ولا من شاف ولا من دري ...

[الخواف]

السكن بعيد عن الأهل والأقارب متعب ...

[الخواف]

ياجماعة الخير الفيل والأسد والزرافة ماعمري شفتهم على الطبيعة... لا في حديقة و لا غيرها ....

وكثير من الحيوانات نفس الشي ماشفتها .....(( طيب عاد وش انسويلك ...

[الخواف]

كنا في الابتدائي ..في المدرسة نشوف في كتاب العلوم صورة وجبة فطور مكونة من ( توست وجبنة وبيضة وكوب حليب ) ...


وكنا نعتبر هذي الوجبة للناس المتحضرة الغنية .....

وأصلًا كنا مانعرف حاجة اسمها توست ........




كتاب العلوم دمر نفسيتنا ههه...يحطون فيه وجبات وفاكهة وخضار مانعرفها ....!!....







وعلى طاري الأكل .....استغرب من نصايح بعض المختصين بالتغذية أو مدري وش تسمونهم ...

المهم هذولي المختصين يمنعونك من المأكولات اللي أغلب الناس عايشين عليها ..مثل الخبز والرز والفول ومشتقات الألبان ....ثم يطالبونك بأكل السمك وبعض الفاكهة والمأكولات الغالية اللي تحتاج ميزانية كبيرة ...ثم يقول هذا الأكل الصحي ..!!



يارجل إيش سمك وإيش اللي جالس تطلبه من الناس انهم ياكلونه بين الحين والآخر....!!...هم مش نايمين على بنك عشان تطلب منهم هذي المأكولات ...





استغرب من الإخصائي أو الدكتور اللي جالس في مواقع التواصل و يقول للناس لازم تأكلوا هذا وهذا وهذا .....ومتجاهل أسعار الأشياء اللي جالس ينصح الناس فيها ...




لو هذا الكلام موجه لواحد مريض فـ الأمر مقبول ...... ولكن يطلع في مواقع التواصل وجالس يطلب من الناس انهم يأكلوا ماكولات أسعارها غالية ..بحجة انها صحية ..فهذا الدكتور من الأفضل يحط ملاحظة على الشاشة ويقول ان كلامه موجه ( للأغنياء فقط ) ....



...

[الخواف]

طبعًا عارفين مسابقة أفضل مدونة ... اللي عن طريق التصويت ....اللي مسويها ( سُهيل ) ..




المهم أكيد أنا ما أقرأ كل مدونات الأعضاء ...لكن الواحد أحيانًا يقرأ مدونة واحدة أو ثنتين أو ثلاث أو ممكن اكثر ....وأحيانًا الواحد يدخل مدونته ويكتب فيها كلمتين ويخرج بدون مايقرأ أي مدونة لعضو آخر ......طبعًا أنا جالس أتكلم عن نفسي ...



لكن فيه مدونات بيئتها جاذبة بالنسبة لي ...ولا شعوريا أدخلها إذا شفت صاحبها كاتب تدوينة جديدة ....

مثل مدونة ( رايق ) .....بسيطة سهلة قوية متنوعة ....مافيها تعقيدات....حتى لما يتفلسف م تمل من فلسفته ولا تشعر بالضجر ..(( متعوب عليها بالضجر ...

لأنه يتفلسف بشكل مستقيم للنقطة اللي حاب يوصلها لك ....مش يتفلسف بشكل دائري ...يخليك تائهة مش عارف وين رايح ...وبكذا تدوخ وتمل وتطلع قبل مايكمل طرحه أو فكرته أو رأيه ......


المهم مدونة ( رايق ) أعتبرها زي المجلة المصورة الملونة....تتفرج على الأشياء فيها بنفسية مرتاحة .....بعكس المدونات اللي لماتشوفها تحس انك ماسك كتاب مجلد غلافه سميك ...وأروراقه الداخلية سوداء من الكتابة ....طبعًا عارف ان هذي المدونة مليان فوائد ولكن أنا ماتستهويني ....لأني مليت من الجدية في الكتابة ....طبعًا هذا بالنسبة لي ...





وعلى فكرة هناك مدونات نعجبني وأدخلها بين الحين والآخر....بعضها أذكر أسماء أصحابها وبعضهم ناسي أساميهم هالحين ...


وهناك أعضاء أدخل مدوناتهم بشكل مستمر إذا شفت لهم تدوينه جديدة رغم انهم من أصحاب المجلدات ...







خلاصة كلامي :

قسم المدونات ....أعتبره مكان أنفرد به مع العضو عشان يكلمني عن نفسه ....


بمعنى آخر : بعض الأعضاء آخذ عنه فكرة معينة لما أشوف ردوده على المواضيع المطروحة للنقاش... أو غيرها من المواضيع .....لكن لما أدخل مدونته ...أجد شخصًا آخر ....



..................

[الخواف]

أيعقل ياقوم ....ناس مثلكم لا تعي قرارتها الغير متوافقة مع وعيها وفهمها وإدراكها وعلمها وثقافتها...!!!


مش معقول بسبب تجاوزات على الشاشة أثناء الحوار والنقاش ..ينتج عنه ان كل واحد فيكم يركب راسه ويعتزل الأخذ والرد مع الأعضاء في أي موضوع يطرح للنقاش أو الحوار أو غيره...


كيف لو كنت أنت من ضمن أهل الحل والعقد وفض النزاعات والخلافات عند جماعتك ..!!.. هل راح تتحمل الهمز واللمز اللي راح تسمعه من جماعتك أثناء عقد الجلسة ... سواءً كانت جلسة صلح أو جلسة إحقاق حق لأصحابه أو غيره ..!؟


أو لما تكون مدير أو رئيس قسم أو غيره ...هل تقدر تتجاوز ماتسمعه من الموظفين في شخصك ..!!؟




وقس على هذا بقية أمور حياتك كرئيس أو مسؤول ... سواء كان ذلك الأمر
عند جماعتك أو قبيلتك أو في وظيفتك أو غيرها ...

فـ كيف راح يكون وضعك كمسوؤل وأنت تسمع كلام أشد من الكلام الموجه لك على الشاشة داخل المنتدى اللي أصلًا ماراح يقدم ويوخر في حياتك أي شي ..!؟...






طبعًا أنا لا أدعي المثالية وأقول أني ما أتأثر ومايهمني شي يكتب على الشاشة ومدري إيش .....


بالعكس كلنا لنا مشاعر مثلكم ....ونتأثر ونتضايق ونزعل من كل كلمة تُقال في شخصنا ......لكن الفرق أننا مانشيل عفشنا من أي مكان مُعد للحوار والنقاش بسبب كلام على الشاشة .....




المهم مازلنا نقول أننا لا ندعي المثالية .....ولكن فكر بواقعية و شغل المنطق...واحسبها براحتك..











...............

[الخواف]

اقتباس : من رسالة في التقييم ..

( هههه منهجنا كان بيراعي مشاعرنا .. بالنسبة لأطباء التغذية فهم عندهم حسبة أو معادلة معينة تبين احتياج الشخص من كارب وبروتين وغيره وعلى أساسه يحددوا كمياته بالأكل، والسمك قادرين نستبدله بالتونة .. نسبة البروتين فيها عالية نوعاً ما. )



ههه ....بس موضوع التغذية هو اللي مستحيل يزبط معانا ......

طيب سيبك من السمك والتونة .....وشوف موضوع الكبسة .. .....تخيل بينصحونا بـ ترك و طرد ( الكبسة ) ...!!.....فهل تعتقد ان فيه حد يسيب فرد من أفراد أسرته ويرميه برا ..!؟....طبعًا لا ...


فـ الكبسة من العيلة ....ومش ممكن إحنا السعوديين نضحي بـ أي فرد من أفراد الأسرة ...




المهم أحب أقول للـ ( كبسة ) :

متخفيش ياحبيبتي .. إتغطي كويس ونامي نوم العوافي ...ولو حد طلعك برا ...إحنا هنطلع معاكي وهنسيب البلد كوللللوه ...واشبعوا بيه ...




( يا بت يا لواحظ ..فين الكبسة ..ليَّا شهر وانا بندهلك ...جاتك نيلة منيلة في ستين داهية إنتي وبتوع التغذية )




.........

[الخواف]

بعض الناس يقترح حاجة فيها ضرر على الآخرين ...!!


مثلًا أحيانًا الشخص بين أصحابه أو بين أقاربه أو في مكان عمله أو غيره ......تجده فجأة يقترح انهم يجمعوا مبلغ معين عشان يسوون عشاء لفلان بمناسبة أنه كذا وكذا ..

أو يقترح انهم يسوون عشاء ( وليمة دسمة ) ) لأجل اللمة مع بعض ومدري إيش ...أو
غيره من الاقتراحات اللي فيها دفع فلوس ...

وقس على ذلك تصرفات الحريم مع بعضهن في مكان العمل ..تلقى وحدة ملقوفة تطلع باقتراح ..تقول بنشتري هدية ( بمبلغ خيالي) لزميلتهن فلانة بمناسبة كذا وكذا ....وممكن بمناسبة ولادتها ...



فـ من وجهة نظري أن الشخص لا يقترح أي موضوع يتعلق بـ الفلوس ...لأن الناس أنت ماتعرف ظروفهم كيف عايشين ... أو بمعنى أصح تجاهلت ظروفهم لأنك أنت تقدر تدفع ...ومسوي فيها كريم وراعي واجب ومدري إيش .. ..



ياحبيبي الأمور المالية لاتفتح فيها موضوع إلا داخل بيتك مع أهلك ....أما خارج البيت لاتقترح أي موضوع فيه دفع فلوس لأن ظروف الناس المادية مش زيك....





خلاصة كلامي :

من وجهة نظري : عند أصحابك .. أو زملاءك في العمل... أو أقاربك... أو أي ناس لك علاقه فيهم ....لاتقترح عليهم ولا تشاورهم في حاجة فيها دفع فلوس ...لأن مش كل الناس يقدروا يدفعوا زيك ....


ولو قبلوا فكرتك أو اقتراحك رغم ظروفهم المادية اللي أنت متجاهلها ....فـ اعلم انك إنسان عديم الإحساس ..أناني ....ساذج .....


بمعنى آخر : أنت أخذت موافقتهم تحت سيف الحياء ....على حاجة مش ضرورية ..



للاسف بعض (كبار العائلة ) يقترح على أفرادها انهم يدفعوا مبلغ معين لأجل كماليات لا علاقة لها بالضروريات .....يعني للبهرجة وحب المظاهر وغيره ...


وقس على ذلك الموظف مع زملاء العمل ...وبرضه الصاحب مع أصحابه ....والطالب مع زملائه في المدرسة ...وغيرهم ....

فـ إن أحببت ما اقترحته فـ ادفع أنت لوحدك وإلا فـ اصمت ....



( ارحموا الناس ولا تأخذوهم بـ سيف الحياء )









.........

[الخواف]

أصبح البعض ما يلوم الزوجة إذا لها علاقة مع رجل عن طريق التلفون أو الجوال .......بحجة ان زوجها لو فعل مثل فعلها ... راح نقولها اصبري وهذا أبو عيالك وراح يتعدل ..و...الخ ...


من وجهة نظري لا مقارنة بين الرجل والمرأة من ناحية فعل هذا السلوك .....




الزوجة تعتبر وعاء لحفظ الأنساب ...ومربية لبناتك ...وفي النهاية تقول عادي المرأة تسوي علاقة مع الرجل بالكلام في الجوال ولازم يصبر عليها الزوج ..بحجة أنها مثلها مثل الرجل لو فعل ذلك ...!!...

فـ ما أدري هل أنتم من جدكم تتكلمون ولا تمزحون ...!





وعلى فكرة هل تعتقدوا ان بناتها راح أحد يخطبهم لو عرفوا ان أمهم كانت تكلم رجال من ورا زوجها ..!؟..حتى لو تركت هذا الفعل .....يعني هل راح يثقوا بتربيتها لبناتها ....

أعتقد راح الناس يقولوا ان أمهم مربيتهن على التعامل بالمثل مع الزوج من ناحية السلوك البطال ....


بمعنى آخر : ممكن يقولوا ان أمهم راح تربيهن على الإنحراف متى ما وجد المبرر بالنسبة لها ...بعيدًا عن كونها إمرأة لها وضعها الحساس ....



المهم لا نتجاهل أن المرأة يصل ضررها لكامل الأسرة لوضعها الحساس من ناحية حفظ النسب ومن ناحية تربيتها لبناتها ...عكس الرجل تمامًا ..ضرره محصور على نفسه ..


طبعًا الذنب واحد .....ولكن كلامنا عن الجوانب الأخرى .......







وأعتقد مافيه أحد يرضى ويتقبل ان أخته تكلم رجال من ورا زوجها بحجة أن زوجها يكلم بنات ....


وبرضه مافيه إمرأة ترضى وتتقبل ان أختها تكلم رجال من ورا زوجها ....بحجة ان زوجها يكلم بنات ..


فلا تبرروا للمرأة أفعال أنتم متجاهلين عواقبها على الأسرة كاملة ....بحجج لا يقبلها العقل ولا المنطق ولا حتى الفطرة ...


فـ ياجماعة الخير الكلام سهل ...ولكن لما يحصل الشي هذا في واقعكم راح تتغير وجهة نظركم للأمور ..




خلاصة كلامي :

اللي يبرروا ويقارنوا فعل المرأة بالرجل .....لو زوجتك لها علاقة كلامية مع رجل آخر ..بحجة انك مقصر معها في أمر ما ...!!...فهل راح تتقبل الوضع وتصبر عليها..بحجة انها مثلها مثلك ولازم تصبر عليها ...!!؟


أعتقد حتى لو كنت صاحب محل ذعارة ماراح تتقبل فعلها هذا ولا راح تصبر عليها ......




المهم نسأل الله العافية والسلامة ...ويبعدنا ويبعد الجميع عن هذي البلاوي ....





................

[الخواف]

اليوم الصباح جتني رسالة واتس.....مفادها ان قرندايزر راح يسوون له نسخة جديدة ..

طبعًا هذا الخبر معروف ...ولكن اللي أشغلني مين هذا الشخص اللي أرسلي هذي الرسالة ..لأن اللي طالع عندي بس رقمه بدون اسم ...لأن الأسماء اللي مخزنها في الجوال طارت مابقي إلا الأرقام ....بسبب ما ..

المهم كتبت له ان ماعرفته لأن اسمه مش طالع عندي ...يعني عرفني بنفسك ...

وفجأة أرسلي صورته في الواتس ....


آآآآآه ثم آآآآآه ومية آآآآآه ...طلع واحد من معارفي له سنين ماشفته وما كان بيني وبينه أي تواصل ...

وحقيقة تفاجأت يوم شفت صورته ...ما جاء على بالي نهائيًّا ..



وبصراحة تحيرت مدري وش اكتب له ..... أحرجني ....لكن كتبت له كم كلمة .....طبعًا جلست أكتبها وأنا خجلان منه ...

المشكلة بعد ما أرسلت له ..رد على رسالتي ..وقالي ( والله مانسيتك ولكن مشاغل الدنيا )..


آآآه بعد كلامك هذا أحرجني زيادة وزيادة وزيادة .... من جد أحرجني ....لأني حتى أنا نفس الشي ما تواصلت معه ....



إيييييييييييييه بس مدري .......





.......

[الخواف]

أستغرب من الناس اللي يحطون كل شي على ظهر إدارة المنتدى ...!!!


يا أخي أنتم مش طلاب ابتدائي عشان يتابعونكم على الرايحة والجاية ........


إذا كان أنتم مش قادرين تنضبطون داخل المنتدى وأنتم كبار ومتعلمين ..فلا تتكلموا في المواضيع الإجتماعية اللي تطرح في المنتدى ....فاقد الشي لا يعطيه ... وأنا أولكم ..



.....

[الخواف]

بعضهم يقول أفلام كرتون للأطفال ..!!؟؟...

يا أخي حرام عليكم حنا نتفرج فيها ومش بس الأطفال ....

أحيانًا آخر الليل بعد ماتكون الدنيا هادية ومافيه أحد ..أفتح اليوتيوب وأجلس أتفرج على مقاطع للكراتين أو الأنمي على قولتكم ....رغم اني مش هاضمها كلمة أنمي ....كلمة أفلام كرتون أحسن .. ..



وعلى فكرة حتى ( السيريلاك ) فـ أنا عن نفسي أموت عليه ...


وبعضهم يقول السيريلاك للصغار ومش للكبار ومدري إيش ..!!


يا أخي حرام عليك أنا أحب السيريلاك حتى لو كان للحيوانات ...



.......

[الخواف]

اقتباس من : رسالة في خانة التقييم
ع كلامك ذا لازم نلغي القوانين والدستور وكمان كل المحاكم ما نحن كبار ولازم محد يراقبنا ؟ الناس بلا قوانين تعمهم الفوضى وتغلبهم السلطة واثبات النفس ولو ع حساب الآخرين



نعم كلامك صحيح .......

[الخواف]

هذا السطر نسخته ...لأنه طلعلي يوم جيت أبرسل في التقييم ل رايق :

( يجب أن تضع للبعض سمعات قبل إعطائها إلى رايــق مرة أخرى )


سمعات ..!!!!!!!!!!....

سمعات إيش ...


طبعًا قلت بيني وبين نفسي مممكن عشان أقيم واحد غيره ثم بعدين أقيمه .....

وفعلًا رحت لأحد الأعضاء وكتبت له في التقييم ....طبعًا رحت لـ عضو غايب عن المنتدى ..وكتبت له كلمتين في التقييم ....

ثم رجعت لـ رايق عشان أكتب له في التقييم ....لكن طلعلي هذا السطر اللي بالأحمر فوق .......ومكتوب فيه أني لازم أضع للبعض سمعات ...!!!؟




وعلى طاري التقييمات ..... فيه ناس أحيانًا أبكتب لهم في التقييم ...لكن أتردد لأني مدري وش طينة هذا الآدمي اللي راح أرسله ......خايف يكون من النوعيات اللي مايحب أحد يكتب له شي ...

وبرضه تخاف ان ماله كبد عليك ..يعني مايطيقك ...............


طبعًا هذي الأمور تجي في بالي لأني ممكن مش متعود أكتب لأحد لا في التقييم ولا في الرسايل الخاصة ....إلا احيانًا قليلة ..


وعلى فكرة مرة من المرات استلمت واحد بالرسايل ..وكل شوية مشغله بالرسايل ... بس شكله ندم انه عطاني وجه ههه ....لهذا السبب لحد يعطيني وجه ...من جد لحد يعطيني ولا ربع وجه ..




خلاصة كلامي :

كثير من الناس في حياتنا الواقعية مايدري الواحد كيف يتعامل معهم .....

بمعنى آخر : ماتدري هل هو أنت فيك شي غلط ولا الغلط فيهم ...!!؟!!


....

[الخواف]

ياجماعة الخير ماني قادر أفهم أمور اللغة العربية ( بلاغة ونقد وصرف وعَروض ..و..و.. ) وغيرها من الأمور اللي أنتم عارفين ...وبرضه الأمور الحسابية ...يعني شغلات الرياضيات ما أفقه فيها شي ....


في الدراسة أنجح بتقدير ( جيد ) ....إلا سنة وحدة نجحت بتقدير ( جيدجدًا ) ...


الدراسة بالنسبة لي معاناة بشكل رهيب .......تعبت فيها كثير .....

وطبعًا كلنا عارفين ان اللي ماهو ذكي يتعب كثير كثير كثير كثير ...وهذا الشي شايفه في نفسي ...




ممكن يجي واحد ويقول : الواحد لايقلل من نفسه ...لابد من الفروق الفردية في مستوى الذكاء وهذا شي طبيعي ...


وأنا أقولك : يابن الناس من زمان وأنا أقولك خلني أعبر نفسي ...يا أخي أنا حر حتى لو أجلس أسب نفسي ..مالك شغل ...



المهم ياجماعة حنا وين وصلنا في الكلام ...مممممممم إيه تذكرت ...طيب نكمل ..


ولا أقولكم خلاص ما راح أكمل ...لأن هذا الآدمي خرب مزاجي ....وأحسه من قوم تطوير الذات والثقة ومدري إيش ...!!

طيب يابن الناس أنا جالس أشرح مستواي في الدراسة ....وقلت أني أنجح بتقدير ( جيد ) ..فهل أنا ارتكبت جريمة في نظرك ..!!؟....طبعًا لا ...

طيب لا تجيني وتقولي لا تقلل من نفسك ومدري إيش ...وفي النهاية بـ تلبسني مية علة نفسية ...


يارجل خل الناس تعبر وتتكلم عن نفسها شوية ...


خلاص أنت قفلتها في وجهي وما عاد لي نفس أتكلم ...



.....

[الخواف]

داخل المنتديات شي طبيعي ان الشخص يكون صريح .....

مثلًا لما أكون أنا صريح في كلامي داخل المنتدى ..فهل هذا يعني اني شجاع وقوي وبطل ومدري إيش ..؟؟....طبعًا لا ..

لأني أنا مش خسران شي لما أكون صريح في المنتدى أو في أي موقع من مواقع التواصل ....


وطبعًا شي أكيد في حياتي الحقيقية خارج المنتدى راح أحاسب على كلامي مع الناس عشان لي مصالح معهم ...



خلاصة كلامي :

الصراحة داخل المنتدى مش شجاعة ولا قوة ....لأن مافيه حاجة راح نخسرها ....

...

[الخواف]

اقتباس : رسالة من التقييم ...
ياخي على طاري هـ الكلام .. بتكلم عن نفسي .. بالنسبه لي انا ترى الي اقوله هنا زي الي اقوله في الواقع والي استحي منه في الواقع استحي منه هنااحس صعب اكون جريء هنا وحيي برا فهمت علي ياعسل .. بالعكس انا استغرب من ابو شخصيتين في الواقع شكل وفي المنتدى شكل


طبعًا فيه أعضاء وضعهم هنا وبرا المنتدى نفس الشي...ولكن نجهلهم ... وأنت مايحتاج أتكلم عنك ...



المهم راح أتكلم عن نفسي بما أنك تكلمت عن نفسك :

بالنسبة لي لا أخفيك سرًا أنا بعض الكلام اللي أقوله هنا في المنتدى ما أقدر أقوله في حياتي الحقيقية ...


ممكن يجي واحد ويقولي : أنت متلون أنت أبو وجهين أنت غير موثوق فيك أنت مدري إيش ...


وأنا أقولك : يابن الحلال أنا ما ألومك على كلام هذا ...وما أقدر أقول انه مش صحيح....ولكن لاتلومني ...لأني أنا برا المنتدى لازم أحافظ على علاقاتي مع الناس بمختلف أنواعها ...وبرضه لازم أحافظ على سمعتي بحيث ما أقول كلام مايليق بـ شخصي ...وغيره من الأمور اللي مدري كيف أشرحها لك ...

أما داخل المنتدى مايفرق معي الوضع لأني مش خسران شي وماعندي أي شي أخاف عليه ..... طبعًا كلامي هذا لا يعني اني أخربها في المنتدى ..لا أبدًا ...


وعلى فكرة أعتقد بعض الأعضاء نفس حالتي ...طبعًا قلت أعتقد...حتى مايجي واحد ويقول لا تتكلم عن غيرك .....



......

[الخواف]

راح أسوي انتفاضة في ملفات الأعضاء ....يعني راح أشقر على ملفاتهم.....عشان أشوف رسايل الزوار في ملفاتهم ..ومع مين يتكلموا...وفـ إيش يتكلموا ....


يعني من باب التسلية .....وأنا من زمااااااااااااااااااااان مادخلت ملفاتهم ...لدرجة اني نسيت شي اسمه ملفات ..




على فكرة يا جماعة الخير حرام عليكم ليش ماتخلون الرسايل اللي في التقييمات مكشوفة لجميع الأعضاء ..مثلها مثل رسايل الزوار ..!؟...

لو الأمر بيدي أخلي كل مايكتب في المنتدى مكشوف قدام الجميع مثله مثل رسايل الزوار في الملفات ..ومثل المدونات ...يعني مايكون فيه خصوصية في المنتدى ...




شكلي أبسوي منتدى ....عشان أشوف كل حرف يكتب في المنتدى ..في الخاص والعام والملفات وفي الجن والعفاريت وفي كل شي ...




ممكن يجي واحد ويقول : هذا يدل على لقافتك وصغر عقليتك وضعف المروءة عندك ..و..و....


وانا أقولك : أنت كل كلمة أقولها لازم تطلع قدامي غصة في حلقي .....!!.....يا أخي محد أجبرهم انهم يكتبوا في المنتدى سواء في الخاص أو العام أو التقييمات أو في الملفات أو في أي مكان في المنتدى ...لأن اللي عنده شي خاص ماراح يكتبه في المنتدى أو في موقع من مواقع التواصل ...ولكن هو لما يكتب في المنتدى ماتفرق معه لو أحد استطاع رؤية الكلام الخاص اللي بينه وبين العضو الآخر .....





وممكن يجي واحد ويقول : مابقي إلا تقول ليش ماتحطوا صوركم في المنتدى ...!؟!!


وأنا أقولك : بكيفك ماعلي منك ....ولو أنت حطيتها فهذا اختيارك ومحد جبرك عليه ....وأنا عن نفسي لو كنت حلو كان حطيتها في الرمزية والتوقيع ....

طيب أنت اللي جالسلي على كبيرة وصغيرة .. أبسألك سؤال :

لو الأعضاء حاطين صورهم ....فـ هل تعتقد ان صورهم راح يكون لها تأثير على تعاملنا معاهم من ناحية الأسلوب في الكلام ....وبرضه هل راح يكون لها تأثير على تقبلنا لآرائهم أو أفكارهم في المواضيع المطروحة في المنتدى ولا لا ...؟...

[الخواف]

اقتباس : من خانة التنبيه ... اللي في أعلى صفحة المنتدى :

( أي إحتفال أو تهاني أو تباريك بالمولد النبوي داخل إطار المنتدى تعد مخالفه صريحه تستوجب الإيقاف المباشر )



أحسنت يامدير ..... وأحييك على هذا التنبيه ...



ممكن يجي واحد ويقول : أنت مسوي فيها انك فاهم الدين وان غيرك مش فاهم .و..و..الخ



وأنا اقولك : يابن الناس لا تحمل كلامي فوق طاقته ....فأنا مش مفتي ولا من طلبة العلم ولا أي شي ...

لكن أي فعل منتشر بين الناس وأصبح فعل يتكرر في يوم معين أو سنة معينة أو ساعة معينة ..و..و.الخ ....فأنا في هذي الحالة أبحث وأشوف هل كان الشي هذا يسوونه الصحابة أو السلف الصالح .....


وإذا ماشفت لا الصحابة ولا التابعين ولا تابعي التابعين من السلف الصالح ...ماسووا الشي هذا ...ماراح أسويه ولا راح أؤيد فعله ...وراح أمنع حدوثه في أي مكان لي سلطة فيه ..سواء كان المنتدى أو غيره ...






خلاصة كلامي :

أي فعل أصبح يكرر في وقت معلوم من السنة...وله علاقة بالرسول صلى الله عليه وسلم ...ولم يفعله الصحابة - رضي الله عنهم - اللي عاشوا بعد وفاته ...

فأنا ماراح أسويه ولا أؤيد فعله ... إلا إذا اتضح لي صحته من أهل العلم في مثل هذه الأمور ....






ممكن يجي واحد ويقولي : أنت مسوي فيها ملتزم وأنت جالس تسوي بلاوي زرقا في حياتك ..


وأنا أقولك : خذني بلطفك شوية يابن الناس .....أنا عارف أني فعلًا مش ملتزم ....ولكن ما أحب أخربها بأفعال لم يثبت فعلها في حياة الصحابة رضي الله عنهم ...أو أي أفعال أخرى لم يثبت فعلها في حياة الرسول صلى الله وعليه وسلم أو فعلها بعد وفاته في حياة الصحابة ....




بعض الأفعال الواحد يخاف مستقبلًا تتطور بشكل يمس العقيدة ( التوحيد ) ...فـ هنا الكارثة ...



( عدم توحيد الله ( الشرك )...والتعرض للعباد سواء كان ذلك بالكلام أو الفعل..أقصد ( حقوق العباد عليك ) ..فهذي اللي راح توديك في داهية ....





المهم :اللي سرق حلاوة ولا بسكوت كراميلا من بقالة العم سالم ...يروح يستسمح منه..ويدفع قيمتها ..


واللي سرقت بكلة شعر ولا شباصة ولا لبانة ( علك ) من فلانة وعلانة .. ..تروح تستسمح منها وتدفع فيمتها ....



( دنيا آخر زمن ...البنت اللي كانت تسرق شباصة وبكلة ...الآن تروح لـ مقهى فاخر وتطلب قهوة مدري وش اسمها ..!!....

طيب أنتي يا برستيج ليش ماتسددين قيمة البكلة اللي كنتي تربطين فيها شعرك اللي هو كان عبارة عن قرنين وفرقة مع النص إلى قفا راسك ..وفستانك في العيد معروف انه من النوع هذاك المنفوش ....وإذا بتخربينها لبستي قفازات قماش مخرمة من نفس نوع قماش الفستان.. وآخر القفاز جهة الذراع مكرمش ...مسوية فيها ( سالي ) آخر حلقة يوم كانت لابسة فستان منفوش ونازلة مع الدرج )

[الخواف]

ممكن يجي واحد ويقولي : بما انك تكلمت عن ( المولد النبوي ) .. طيب إيش رأيك في الاحتفال بعيد ميلادنا والاحتفال بـالنجاح والاحتفال بـ ـ..و ..و ..الخ ..؟


وأنا أقولك : يابن الناس أنا تكلمت عن المولد لأنه متعلق بـ نبينا محمد صلى الله عليه وسلم ..فهو الذي بلغنا بكل شي عن أمور ديننا ..فلازم تستوعب العمل اللي تسويه لأجل أفضل الخلق...هل هو صح ولا مش صح . ..لهذا السبب قلت رأيي في قرار إدارة المنتدى ...

فـ أنت إذا بتحتفل بالمولد النبوي....فـ أنا فقط قلت الشي اللي أعرفه عن المولد ... وما فرضت عليك شي بالقوة والغلظة ....


والاحتفالات الثانية مالي دخل فيها ...سواء احتفلت أو ما احتفلت ...لأني أنا مش مخلفك وناسيك عشان أتابع وراك ....

وأنت مش صغير وجاهل عشان أقولك هذا حلال ولا هذا حرام ....وعلى رأي المثل ( اللي يسأل ميتهوش )..وأهل العلم موجودين في كل مكان ..





وعلى فكرة أنا راح أسوي حفلة بعد ماتنزل النسخة المطورة لـ قرندايزر ....


وعلى طاري قرندايزر ...يا أخي خايف يتفكرش مشروع النسخة الجديدة ...وبرضه ياليت مايتأخرون....وينتهون منه بسرعة...

ولا أخفيك سرًّا متحمس له كثير ......وياسلام لو يحطون موقع في النت خاص لمتابعة هذا العمل خطوة بخطوة ...


وتصدق لو كنت أنا المخرج للقطات الخاصة بـ ( دوق فليد ) ..راح أزبطه أحلى تزبيطه ....ومتأكد مليون في المية من الشي هذا ..


وممكن يجي واحد ويقولي : ياعمي أنت حدك مشرف على الإذاعة المدرسية للصف الثالث الابتدائي فصل ( ب ) ..الساعة سبعة ونص الصبح ...


وأنا أقولك : ياحبيبي اللي مايعرف الصقر يشويه .....

قال إيش قال مشرف على إذاعة سنة ثالثة ( ب )....!!





......

[الخواف]

( سالي ) عندها برووووووووود يوزع على العالم كله ......

يارجل تخيل ان ( آنسة منشن ) مبهذلتها ومذوقتها السبعة وذمتها .....ماسحة فيها البلاط ......وفي النهاية بعد ما استرجعت ورث أبوها ورجع لها المعهد اللي هي تدرس فيه لأنها هي اللي كانت تدعمه .....المهم قالت وبكل برود ان ( آنسة منشن ) تبقى مديرة ..!!!


يابنت الناس كيف تخلينها مديرة بعد اللي سوته فيك ....!!.... بس بصراحة تستاهلين كل اللي جاك منها وأكثر ..!!.....

مسوية فيها طيبة ومتسامحة ..!!..


لا وبعد كمان سامحت البنت ( لافينيا ) اللي كانت مشتغلتها إهانة وذل وتريقة وتطفيش .. وبكل بساطة خلتها تكمل معها في نفس المدرسة ....


وكله كوم وقصتها مع عروستها ( إميلي ) كوم ثاني ....!!!....



يارجل سيرتها تجيب الضغط ......فكونا منها وخلونا ساكتين أحسن ...






يوووه يوووووه يوووه تذكرت النحلة ( بشار ) اللي جالس إيدور أمه ...الكئيب النفسية ...وأشك انه هو مصدر النفسية ...


والمشكلة أثناء بحثه عن أمه ماترك الحشرات في حالها .....إذا شاف حشرة لازم يتدخل في حياتها ...مسوي فيها راعي فزعة وواجب ...وهو نكبة ...يارجل فيه نحلة ماتت بسببه ...




........

[الخواف]

أحس بألم قوي في داخل نفسي ..يصل إلى الرغبة في البكاء ......إذا شفت صور قديمة أنا عاصرتها ...وخاصة لما تكون الصور لي ولـ خوياي ( أصحابي ) ..اللي بعضهم مدري وين راح ... وكيف عايش ...


وبرضه حتى مقاطع الفيديو والصور القديمة المعروضة في النت ....نفس الحالة تمر علي ...


ماتصدق قد إيش أحس بضيقة صدر ووجع وألم يوم أشوفها ..لدرج اني خلاص راح أبكي ....لكن بسرعة أشيلها من قدامي ...

وطبعًا مش لأن الحياة كانت حلوة ...بدليل انهم لو قالولي ارجع لها ..ماراح أوافق ....ولكن ما أعرف سبب الحنين لها والشعور بالضيقة والرغبة في البكاء ....



قبل قليل فتحت الواتس ..وفيه واحد من خوياي في القروب مرسل صورة قديمة نوعا ما لبعض الزملاء اللي مدري وش وضعهم مع الدنيا .. .....بصراحة لما شفت الصورة يادوب ماسك الدمعة ..لكن شلت الصورة من قدامي ...ماقدرت أتحمل ..


المشكلة الحالة بدأت هذي تزيد معي ...فـ كل ماشفت شي قديم ....فجأة أحس بـ لخبطة في نفسي وخفقان وضيقة وحزن وهم ...ومايروح هذا العارض إلا بعد ما أشيل الصورة عن انظري ...

حتى أفلام كرتون اللي كنت أشوفها وأنا صغير ..إذا شفتها الآن يجيني نفس العارض اللي ذكرته قبل قليل ...راح أبكي لولا الحياء ...رغم أني لوحدي ومحد داري عني ..





ممكن يجي واح ويقولي : كلنا نفس حالتك ...ومكبر الموضوع على الفاضي ....

وأنا أقولك : طيب شكرًا ...




.....

[الخواف]

تذكرون يوم كتبت في المدونة... في الصفحات اللي راحت ..... ان فيه ناس أقابلهم ويقولو لي : أنت تشبه فلان ...والثاني يقولي انت تشبه فلان ..وغيرهم يقول أنت فلان الفلاني ويطلع فقط تشابه ..








وبرضه هذا اليوم بعد ما انتهينا من صلاة المغرب ...سلم علي واحد من المصلين... وما أعرفه ..

وقالي : تعرف فلان بن فلان الفلاني ...


قلت له : لا ما أعرفه ...ولا أعرف أحد بهذا الاسم ...

قالي : أنت تشبهه .......

وبرضه قالي كلام مش حافظ نص كلامه ....ولكن معنى كلامه انه توقع اني أخوه ...




لا وبعد كمان قبل كم شهر وفي نفس المسجد... فيه واحد من المصلين وأنا لسا ماطلعت مع باب المسجد ..جلس يناديني يافلان يافلان وهو مش اسمي ..وأنا مطنشه ...رغم اني عارف انه يقصدني .....وعارف انه غلطان ...


المهم وقفت...وقالي : كنت أعتقد انك فلان لأن بينكم شبه ....

طبعًا أنا ما أعرف الشخص اللي يتكلم عنه ....




ممممممممم بس مدري ....

......

[الخواف]

اقتباس : من رسالة جتني في التقييم ...
( ان الشخص يملك شخصيتين فهذا أحسه ضرب من المستحيل، وحتى ولو حاول يعيش بشخصية غير شخصيته فما بيطول فيها -أعتقد- ، لكن ممكن انه يتخفف من بعض القيود زي الرهاب، مثل أحيانًا تلاقي شخص تواصله بالنت أعلى من تواصله المباشر مع الناس، وهذا الصنف أنا منهم فعلاً. )




نعم كلامك صحيح .....وأتفق معك ...

وخاصة كلامك بخصوص ان بعض الناس تواصله في النت أعلى من تواصله المباشر مع الناس ....بسبب انه يتخفف من بعض القيود مثل الرهاب... زي ما قلت أنت ....




وعموماً أنا برا المنتدى في حياتي الحقيقية - زي ماقلت قبل كذا - ان اللي يقيدني هو مصالحي مع الناس بجميع أنواعها ..وبرضه اللي يقيدني المحافظة على سمعتي بحيث أحاول اني ما أقول شي مايليق بشخصي...

طبعًا كلامي لا يعني ان شخصيتي برا المنتدى مية في المية ومدري إيش ... بالعكس أحاول أزبطها قدام الناس بقدر الإمكان بالشي اللي يخدم مصالحي بجميع أنواعها ...دون إلحاق الضرر بهم أو بغيرهم ....



أما داخل المنتدى ما أهتم كثير بكلامي اللي أقوله ..لأن محد يعرفني ولا أعرف احد .. وبرضه لأن مالي مصالح مع الكتابات الموجودة قدامي على الشاشة ... وبرضه مش خسران شي وأصلًا ما عندي شي أخاف اني أخسره .... ولكن لا يعني ذلك اني أخربها في المنتدى ..لا أبدًا ...لأني مش لهالدرجة معدوم الأخلاق ...

وطبعًا كل هذا الكلام قلته قبل كذا ...



ممكن يجي واحد ويقولي : طيب ماله داعي تكرره مرة ثانية ......


وأنا أقولك : مشيها ولا إدقق ... لأن الشغلة هي تعبية كلام في المدونة لا أقل ولا أكثر ...



.......

[الخواف]

ياجماعة الخير أنا أحيانًا تجيني رسايل في التقييم .....لكن ما أعرف كيف أتعامل معها ...


وما أعرف هل أنتم الرسايل اللي تجيكم لازم تردون عليها من باب الذوق والاحترام والتقدير ... ولا كيف نظامكم ...


أنا بالنسبة لي أقرأها واتركها وما أرد على أصحابها... لأني بصراحة ما أدري وش أقولهم ...


طبعًا الرسالة اللي أعلق عليها ... هي اللي تجيني على شكل موضوع قابل للحوار ...مثل الرسالة اللي فوق اللي علقت عليها ...فـ أنا مثل هذي النوعية من الرسايل أستغلها كـموضوع أكتبه في المدونة ...





خلاصة كلامي :

رسايل التقييم نكبة ....لأني ما أدري عن صاحبها هل هو راح يزعل لو مارديت عليه من باب الذوق والتقدير ..ولا كيف ..!!

لأن فعلًا ممكن بعضهم يقول : هذا مطنشني..وماراح أرسله مرة ثانية .. ومدري إيش ..!!


ولكن عمومًا أجدها فرصة الآن اني أقول لكل الأعضاء اللي أرسلولي في التقييم من بداية دخولي المنتدى إلين هذي الساعة ..أقولهم مممممممممممممم مدري وش أقولكم ..




..........

[الخواف]

راح أفضفض شوية :

الاستيعاب عندي صفر ....وسرعة البديهة صفرين ...


أحيانًا يوم يقابلني واحد فجأة ويهجم علي بسؤال أو يدخلني في حوار أو نقاش في موضوع ما .....أجلس أخبص في الكلام يمين ويسار ....كلام مال أمه سنع ..

بمعنى آخر : فنون الأخذ والرد مع الآخرين ما أُتقن الحد الأدنى منها .....



أما الاستيعاب حكاية ثانية .....أحيانًا أكون مع مجموعة من الناس وإذا واحد قال قصة أو كلام ...أخليه يعيده مرة ثانية لأني مافهمت وش يقصد ...رغم ان اللي معي كلهم فاهمين كلامه ..


أو أحيانًا الواحد بيفهمني على حاجة معينة .....أقوله مافهمت ...وفي النهاية أقوله فهمت.. وأنا أصلًا مافهمت ....




حتى بعض المواضيع اللي في المنتدى ما أفهمها ..لكن أنتظر ردود الأعضاء على الموضوع..ثم من خلال ردود بعض الأعضاء أعرف وش المطلوب من الموضوع ...


وفيه بعض الأقسام ولا أفكر أعتب على بابها .... مثل الأقسام اللي خاصة بالخواطر والشعر والأشياء اللي فيها تكنولوجيا .. والعلمية وغيرها ...لأني ما أفهمها لو أجلس يومي كله ...وأحسها ثقيلة ...




بعضهم يقول ان كثرة القرآءة تنمي الفهم ..وبرضه تحسن أسلوب الشخص ...وبرضه يكتسب مصطلحات تساعده في الأخذ والرد مع الناس ...وغيره من القرآءة ..


لكن أنا القراءة أكرهها كره ما أقدر أوصفه .......مع العلم اني ما أقرأ كتب ولا عندي كتب أصلًا ...طبعًا عارف ان هذا الشي غلط في غلط ويدل عدم إدراك أهمية القراءة ..


ومن وجهة نظري : أعتقد أن القرآءة تنمي القدرات اللي يملكها الشخص ....ولكن ماتخليه يكتسب شي مش موجود فيه ... مثل الفهم والاستيعاب وسرعة البديهة ...







خلاصة كلامي :

لو سرعة البديهة والذكاء والفهم والاستيعاب ....تشترى ..راح أشتريها ....ومايعرف أهمية هذا الشي إلا اللي فاقده ...











.....

[الخواف]

اقتباس : من رسالة في التقييم ..
بلى القراءة توسع المدارك وبالتالي تزيد قدرة الشخص على التقاط المعلومة، يعني مثلاً إذا جيت أكلمك وبنص كلامي ذكرت مصطلح "النرجسية" وانت مالك علم فيها فطبيعي جدًا تجد صعوبة بفهمي، بالتالي فالقراءة تهيء عقلك لاستقبال أي معلومة جديدة بيُسر .. طابت أوقاتك.

نعم كلامك صحيح ...


وعلى طاري القراءة ...فترة من الفترات قررت أزبط نفسي بالقرآءة .....

المهم تسلفت كم كتاب من واحد من أقاربي أو من غيره ...ومش متأكد من مين أخذت الكتب...نسيت ...

المهم بقيت عندي الكتب وأنا ما قرأتها .....وفي النهاية رجعتها له ...






فـ العداوة اللي بيني وبين القراءة مش لاقي لها حل ...


يوم أمسك الكتاب أحس بثقل وملل ...بمعنى آخر : أحس أني مخنوق و نفسي بتطلع مني ...



..

[الخواف]

https://www.raed.net/img?id=129865 (https://www.raed.net/)https://www.raed.net/img?id=129867 (https://www.raed.net/)



نسمع من بعض الناس ان هذي سيارات الدبل الديزل تمشيك فوق 800 كيلو ( التاتكي الواحد ) ..

وبضهم قال فوق 900 كيلو ...

وبعضهم بالغ في الموضوع وقال تمشي 1000 كيلو ....!!!



والحقيقة انها تمشيك من 600 إلى 650 ...وممكن تزيد شوية حسب دعستك ...



واحد أعرفه معه جيب ايسوزو دبل ديزل ...يقول يمشيني التانكي 600 وأقل ...





خلاصة كلامي :

السيارات اللي ماتصرف ديزل هي الغمارتين اللي بدون دبل وقير عادي ....يمشيك التانكي في حدود 800 كيلو تقريباً ..وممكن أقل ..وممكن أكثر ...حسب دعستك ....



ولكن في كل الأحوال الديزل يمشيك أكثر من البنزين ....بغض النظر عن سعر التعبئة ...

......

[الخواف]

أحيانًا أشوف على جانب الطريق وحدة حاطة طاولة وعليها شاهي أو مشروبات حارة ....مدري بالتحديد إيش ...( المهم جالسة تبيع )........


وأقول بيني وبين نفسي الله أعلم إيش هي الظروف اللي خلتها تقف في مثل هذا المكان ..وفي هذا الجو الحار ...


الواحد يوم يشوفها بهذا الشكل يعاف الدنيا ...



والمشكلة بعض البنات تستحدث الهم والحزن وهي عايشة مع أهلها بخير ونعمة وما اضطرت تخرج وتجلس في الشارع ( في العراء ) عشان ظروفها ....





ممكن يجي واحد ويقولي : طيب أنت إيش اللي قدمت لها يوم تشوفها جالسة في الشارع تبيع شاهي وفي الحرارة ..ولا جاي مسوي فيها حنون وطيب ومدري إيش ..!!


وأنا أقولك : بصراحة ماقدمت شي ولا سويت شي ...فقط تعاطفت معها وقت رؤيتي لها بهذا الوضع ...يعني بعد ما اختفت عن نظري نسيتها...وكأني ماشفتها ...يعني تعاطف مؤقت وانتهى ....





وممكن يجي واحد ويقول : هن قوية شخصية وواجهت ظروفها بكل قوة وبدون ضعف وذل ..


وانا أقولك : مين قالك تشعر بالقوة والفخر بسبب انها تحدت ظروفها واعتمدت على نفسها ومدري إيش..!!...فهذا الكلام مال أمه داعي ...

بالعكس ...أعتقد ان فيها من الهم والغم والضعف ماتعرفه لا أنت ولا أنا ...تلقاها تبكي الدم بسبب الظروف اللي جاببتها لهذا المكان وبهذا الوضع ..






خلاصة كلامي :


شكر النعم معدووووم عند بعض الناس ....وتصرفاتهم تترجم هذا الشي ...



..........

[الخواف]

أصعب شي في الحياة قلة الفلوس ...يعني أصعب شي في الحياة لما يكون ماعندك فلوس إلا الشي الذي لا يذكر ...ومن باب أولى الفقر ...


أما موت الأحبة وغيره كله يهون .....مقابل المعاناة اللي راح تعانيها بسبب ان ماعندك فلوس .....ناس تبهذلت واتركوا أوطانهم وعيالهم بسببها ....


أما لو مات من تحب مثل أمك أو أبوك .. راح يذهب حزنك بعد كم يوم من موتهم ... وبعدها تعيش حياتك بشكل طبيعي ...وحتى لو تذكرتهم مستقبلًا ماراح تحزن بالشكل اللي يخليك مهموم ومغموم ....فقط راح تدعيلهم وتتصدق عنهم ...وهذا هو اللي طالبينه منك ( أمك وأبوك ) بعد موتهم ...وبكذا هم مستفيدين بالشي اللي تقدمه لهم بعد موتهم وأنت في المقابل بداخلك راضٍ عن نفسك ..


بعكس الفلوس طالما مش موجودة بين يديك راح تكون هموم الدنيا فوق راسك ...يعني حياتك توقفت ....فما بالك بالشخص المتزوج وعنده عيال ...



ممكن يجي واحد ويقولي : أنت شخص مادي وماعندك عواطف ولا رحمة ولا إنسانية ..و..الخ ..

وأنا أقولك : مقدر كلامك هذا وما ألومك لأنك ماعشت عيشة الناس اللي ماتملك إلا الشي اللي يخليهم يتنفسوا ويمشوا على أرجولهم ...


وماجربت عيشة البنت اللي جالسة في الشارع وقدامها طاولة تبيع شاهي ....ومانعرف هل تتعرض لمضايقات أخلاقية ولا لا ....

ولو كنت أنت مكانها ماراح تنزل دمعة من عينك على موت كل الناس اللي تصلك بهم قرابة.. وحتى لو تموت كل قبيلتك ماراح تهتم لهم ..


الفلوس هي أهلك وقبيلتك وعزوتك وسندك وظهرك .....



ياشيخ بس خلنا ساكتين ....





.........

[الخواف]

ياسلام على المطر الهتان في البر ...

وياهلا وسهلا فيك يا ( الشتاء ) ..تعال أحضنك مشتاااااااق لك بقوة ...

[الخواف]

يقولون : واحد سأل بعض الناس ...وقالهم :

وش رايكم .. أدخل الطب ولا أدخل مجال ثاني يخرجني مدرس ..؟

قالوله : الدكتور يتعامل مع الجسد.....وزي ماتجي تجي .. أوقات عمله ملخبطة مش ملك وقته...
ومايتعرض لـ ضغوط نفسية حادة بسبب مرضاه ..وله احترامه ..


وقالوله : المدرس يتعامل مع الجسد والعقل والسلوك والنفسية وبـ جميع أنواعها وفي وقت واحد ....ويتعرض لضغوط نفسية حادة ...ومعرض للإهانة والسخرية من طلابه .....يعيش في قلق وتوتر حاد مستمر ...



فـ اختار اللي يناسبك ...

....

[الخواف]

كوكب فليد
https://c.top4top.io/p_2475ulhh32.jpg (https://top4top.io/)

https://g.top4top.io/p_2475wl4ai5.jpg (https://top4top.io/)


وهذا النهر في كوكب فليد ..دايسكي وروبينا كانوا يتقابلون فيه ....
https://e.top4top.io/p_2475su8ik4.jpg (https://top4top.io/)



......

[الخواف]

https://j.top4top.io/p_2483h6xdk1.jpg (https://top4top.io/)

هذا بيت جارنا أيام الطفولة على قولتهم ..

وبيتنا تم هدمه ..لسببٍ معين...

طبعًا بيتنا نفس هذا البيت ...غرفة واحدة من حجر ..وحوش ( فناء ) من الطين ...ارتفاع الجدار أقل من مترين ...يعني ممكن متر وثمانين 1.80...


الموقع : خارج البلد ..يعني خارج النطاق العمراني ..

وحنا وجيراننا في حدود 12 بيت فقط ...بحكم بعدنا عن العمران ...




طبعًا لا أشتاق ولا أحن لتلك الأيام ....ولا أتمنى رجوعها نهائيًّا ...

لا كهرباء ولا تمديدات مياه ولا غاز ....الطبخ على الحطب...




ممكن يجي واحد ويقولي : وش مناسبة كلامك هذا ...ماله داعي ..!

وأنا أقولك : يابن الحلال أنا قلت هذا الكلام عشان تتعاطف معي وتحول في حسابي مبلغ وقدره تفضلًا وكرمًا منك ..!!!!...هاه اقتنعت ولا لا ..

طيب شوف يابن الناس : أنا ماعندي شي أكتبه في المدونة ...وجاء على بالي اللي أنت شايفه قدامك في الصفحة ...يعني أنا مثلي مثلك ....فـ أنت تكتب في مدونتك أشياء ماتعنينا ولا تخصنا ... فقط نقرأ كلامك ونمشي ....وأنا الآن مثلك أكتب أشياء ماتعنيلك أي شي ...

فـ لا ادقق على غيرك وتنسى نفسك ...



وعلى فكرة عطني خبر إذا كان عندك علم عن موعد اصدار النسخة الجديدة لـ قرندايزر .....


.....

[الخواف]

لقيتها ليتني ما كنت ألقاها .....تمشي وقد أثقل الاملاق ممشاها

أثوابها رَثَّةٌ والرجل حافية ................ والدمع تذرفه في الخدّ عيناها

بكت من الفقر فاحمرّت مدامعها ..... واصفرّ كالورس من جوع محيّاها

مات الذي كان يحميها ويسعدها..... فالدهر من بعده بالفقر أشقاها

الموت أفجعها والفقر أوجعها................ والهمّ أنحلها والغمّ أضناها

فمنظر الحزن مشهود بمنظرها............. والبؤس مرآة مقرون بمرآها

..الخ .....الخ ..........................................الخ ..........الخ ........


كان المدرس في المتوسطة على ما أعتقد انه يقول من ضمن الاحتمالات ان الشاعر كان يتكلم عن حال اللغة العربية الفصحى ..وممكن يتهيألي انه قال هذا الكلام وهو ماقاله ....


بس مدري ....

[الخواف]

:icon10::icon10::icon10::icon10:

[الخواف]

الدنيا تقلبنا يمين ويسار....

كان الواحد يتفرج على أفلام كرتون وجنبه فلان وفلان وفلان ...الخ ..

والآن تتفرج على نفس الكرتون لكن لوحدك ...واللي كانوا يتفرجوا معك بعضهم مشغول في حياته الخاصة .....وبعضهم مات ...


....

[الخواف]

من الأشياء اللي مش قادر أستوعبها .....هي تصرفات بعض كبار السن ....يتحدث عن أيام الجوع الشديد الي عاشوه ...

لكن ياويلك وسواد ليلك لو يزورك واحد منهم وماتذبح له ذبيحة .....!!!!...حتى لو كان عندك لحم في الثلاجة وطبخته له ..راح يشوفها نقص في حقه ...لازم يشوف الذبيحة طازة ومسدوحة قدامه في الصحن ..!!!..حتى لو تتسلف قيمتها من فلان وعلان ....

ومدري هل هو نسي أيام الجوع اللي عاشوه ولا لا ...!!!



المهم هذا اللي مش قادر أفهمه من تصرفاتهم ...



......

[الخواف]

بعض الناس يجلس في المجالس ثم يقول ياليت مافيه جوالات ولا انترنت ...بحجة انها أشغلت الناس عن بعضها ومدري إيش ..


مثل هذا تتمنى تاخذ منه الجوال وتفصل عنه النت .......عشان نشوف كيف تمشي أموره من دونها....

بعض الناس مش مقدر النعمة اللي فيها .....


لكن هذا يهون مع الآدمي اللي يسب في المكيفات ...يقول مضرة ..!!!.

يابن الناس المضرة الحرارة اللي تخلي دماغك يطبخ بداخل جمجمتك ....



.....

[الخواف]

مفيش حاجة اسمها ( جيل الطيبين ) .....كل مافي الأمر انهم كانوا ناس قليلين ...والجرايم على قدهم ...


وحاليًا كثافة سكانية رهيبة وبكذا تكثر الجرايم بجميع أنواعها....


يعني الشغلة كلها نسبة وتناسب على حسب الكثافة السكانية ...وعلى حسب توفر الوسائل المساعدة على ذلك ...



....

[الخواف]

بعض الأعضاء يذكروني بشخصيات ( كرتونية ) ..طبعًا في مدوناتهم ...مثلًا :



نجمة = فلونة

أحمد22 = االدكتور آمون للي في مسلسل قرندايزر ..

أريام = هنتارو

رومااانس = سلفر

صعفق = قراي اللي في جزيرة الكنز

إشراق! = آنسة منشن

بدر = بيتر

شطرنج = علَّام اللي مسلسل عدنان ولينا

أمل = سنفور مفكر اللي في مسلسل السنافر

رايق = روبنسون

سحايب شمالية = ماريا

سهيل = باقيرا

مسكك الغلا = ( آنا )

المدير : سموليت

مولانا : كوجي

همس : سنان

eve = كلير


......

....

[الخواف]

بعض الناس يتكلم في المجالس أو مع أصحابه عن أيامه أيام زمان ... بداية من يوم كان عمره سبع سنوات إلى سبعطعشر سنة ...

فـ تلقاه يتكلم عن تلك المرحلة من عمره عن مشاكله مع الجيران ومع فلان وعلان وبرضه يتكلم عن البلاوي اللي كان يسويها وكلها أذى في أذى ...وكأنه يتكلم عن بطولاته ..!!..لا وبعد كمان يسولف بها وهو يضحك ....!!

طيب كيف تضحك وتتجاهل الخساير والأضرار المادية والجسدية اللي سويتها في الناس ....

وبرضه مافكرت في دعوات الناس اللي آذيتهم وبهذلتهم بـ صياعتك وخستك وقلة أدبك ....

يا أخي من المفروض الأضرار المادية اللي سويتها لازم تعوض أصحابها ...يعني مثلًا إذا كسرت قزار سيارة جيرانكم أيام صياعتك ...من المفروض تروح لصاحب السيارة في وقتك الحاضر وتدفع له قيمة القزاز ...بدل ماتجلس تسوي فيها سلطان مجلس بذكر بلاويك اللي كنت تسويها ...



أنا عن نفسي أستحقر الرجل يوم يتكلم في المجالس عن الأضرار اللي كان يسويها في بداية شبابه ...ومايدري كم من الدعوات اللي جت على راسه ..!!


وممكن النكبات اللي جاته مستقبلًا في حياته أو عدم توفيقه في بعض الأمور هو بسبب دعواتهم عليه ..




.........

[الخواف]

أحس اني تحمست في الخطبة اللي فوق .... بس أحسن عشان يسددون العم ( صالح ) راعي البقالة ..اللي كانوا يشترون منه بـ ريال ويسرقون بقيمة ريالين ..

[الخواف]

من وجهة نظري شايف ان الضيافة أصبحت عند الناس هم وغم وكآبة وقرف وتعب وكل شي ....

لأنه مش معقول حالة الاستنفار اللي تحصل في البيوت يوم يجيهم خبر ان فيه ناس راح يزورونهم ..!!


فعلًا شي مقرف ولا يطاق الشي اللي حنا شايفينه عند كثير من الناس ..!!..

فـ تجد الرجل رايح جاي يجيب أغراض ...والحرمة وبناتها كأنهم جنود في الجبهة ....

وتلقى الحرمة...الروب اللي لابسته قالبته منشفة بدون ماتحس بنفسها.. لأنها طول وقتها تمسح الماء اللي في يدها أو غيره في الروب.....من شدة التوتر والقلق اللي عايشته ... وبناتها في البيت زي صوص الدجاج المنفلت في الشارع ..

يعني كل البيت رايح ربكة ولخبطة وشيل وحط .....







أنا عن نفسي في وقتنا الحاضر أكره اني أزور أحد .....لأن لسان حال تصرفاتهم يقول انهم يكرهوا زيارتك .....








لا واللي يقهرك بعض الحريم تقول يازين البساطة أيام زمان ..!!!..... لا ياشيخة ..

طيب محد ضربك على يدك وقالك ماتكوني بسيطة في بيتك مع ضيوفك ...





وعلى طاري البساطة تذكرت فلم كرتون ( بسيط ) ...اللي معه صديقته السلحفاة اللي اسمها ( سريعة ) ..


طبعًا ( بسيط ) قلبه طيب و ابن حلال ..ويحب يساعد أي واحد يقابله أو يتعرف عليه ...لكنه نكبة زي نكبة البرامكة ..وتتمنى انه مايساعدك ....والمشكلة مايترك احد في حاله لأنه حاط نفسه فاهم في كل شي ..لكن بحس نية ...ومش خبث منه ...


..............

[الخواف]

https://mrkzgulfup.com/uploads/166678052791963.jpg (https://mrkzgulfup.com/)



وزير العلوم ( زوريل ) أحسن وأفضل شخصية شريرة ...بالنسبة لي ...

ماعنده خسة ودناءة ومن هذا القبيل ...... بالعكس هو رجل شر محترم وقوي ...الشر يمشي في دمه بكل رجولة ..



وبالرغم من كل صفات الشر المحترمة الموجودة فيه ..إلا أنه في النهاية مات بسبب وحدة كان يحب يتزوجها وهي مطنشته ولا حتى معطيته وجه ...وهي بنت ( فيقا الكبير ) قائد قوات نجم فيقا المتحالفة ...يعني بنت المدير حق زوريل ......


واللي قهره بزيادة هو صاحبه القائد ( قندال ) لأنه أحيانًا يرمي عليه كلمتين كلها سخرية واستهزاء فيه من باب المزح بسبب ان بنت ( فيقا الكبير ) مش معطيته وجه ..

لأن ( قندال ) عارف ان زوريل متأثر بقوة برفضها له ...لأنه ماتوقع ان أحد يرفض له طلب وخاصة انه له هيبته وقوته العقلية وشخصيته ومكانته القوية بين الكواكب المتحالفة اللي هو قائدها بأمر من فيقا الكبير ...


.....

[الخواف]

ذكريات الماضي ..ماني قادر أشيلها من تفكيري ....إلعبت في نفسيتي لعب ...


كانت الجلسة في البرد بعد المغرب في غرفة صغيرة بسيطة...والفرش أوصال مشكلة ولونها أحمر على أخضر على مدري إيش ..مافيها تناسق ...والمتكى أو التكاية تلقى لاصقة فيها تمرة يابسة لها أكثر من سنة ....ولا شعوريًّا تلقى الشخص اللي متكي عليها يحكها بـ اظفره عشان يطلعها ....يعني يتسلى فيها وهو يسولف مع الناس اللي جالسين معه ...


ويوم المطر ...يسيل ماء المطر على جدار الغرفة من الداخل ..مخلوط مع الطين أثناء سيلانه على الجدار ...وتصبح الغرفة لها رائحة مميزة ....


مع العلم أنني لا أتمنى رجوع تلك الأيام ....ولكن أتمنى عودة البساطة اللي كانوا الناس عايشينها ...





المهم خلونا ساكتين ...ترى يا دوب ماسكة الدمعة .......




.........

[الخواف]

https://d.top4top.io/p_2498krlfx1.jpg (https://top4top.io/)

هذا الآدمي هو اللي ابتكر شخصية قرندايزر ودوق فليد اللي هو ( دايسكي ) وغيره مثل زوريل و وبلاكي وقورو وكوجي وهيكارو وماريا ودامبي ومدري مين ......



طبعًا اسمه ( جو ناغاي ) ...وهو معروف ....


المهم هذا الشايب لو عندنا راح أخليه في صدر المجلس ....عشان أخليه يعطينا اعلوم قرندايزر ... يعني أسأله كيف ومتى سويته ...وش اللي خلاه يطري على بالك ..وغيره من الأسئلة ....و..و..الخ ...


و أحس ان يوم واحد مايكفيني اني آخذ اعلومه من طقطق إلى سلام عليكم ...لأن الشغلة ماهي بس كيف حالك وش لونك وش أخبارك وكيف الجماعة ومدري ايش ..!!...على بالكم جالس أسأل واحد من شيبان الحارة ..!!.... لا ياحبيبي هذا شايب ياباني بـ نجلده بالأسئلة لأنه من زمان مش راضي يسوي نسخة جديدة لقرندايزر ...






المهم .......نفسي أروح لليابان عشان أدخل العمارة الكبيرة الطويلة اللي مدري كم دَور ....وكل الأدوار مخصصة لأفلام كرتون ....قرندايزر وغيره ....

ودي أدخل وأتفرج على مهلي ....لين يطيح اللي في راسي ....ثم على المطار سيدا
راجع لبيتنا ....ثم أجلس شهر في الحارة متصدر المجالس عشان أعطيهم العلومة الغانمة من اللي شفته في العمارة حقت أفلام كرتون ...




ملاحظة :

لحد يقولي اسمه أنمي ومدري ايش ....لأن كل الرسوم اسميها فلم كرتون ....وكلمة أنمي ما هضمتها ...مرررررررة ماهضمتها ...







....

[الخواف]

اقتباس : من مدونة رايق ...

( هل تعلمون ؟

أنا أحبكم كثيراً .. كل شخص منكم له مكانة بقلبي

اتعامل معكم بكل مشاعري .. ولا أعتبركم مجرد معرفات ورمزيات

بل أنتم بمكانة الأخوه والأصدقاء والزملاء عندي بالواقع )





المهم يارايق اعتبر نفسك ضيف في برنامج تلفزيوني وأنا المذيع ...وراح أطرح عليك هذا السؤال ..هاه خلاص اتفقنا ..؟...اتفقنا ...


طيب .....زي منت عارف ان أغلبية الناس مايصدقون مشاعر الشخص تجاههم داخل مواقع النت مثل المنتديات وغيرها ....بمعنى آخر يعتبرون حديثه عن مشاعره مجرد كلام في كلام ...

لأن زي منت عارف الناس مايصدقون أحد داخل النت ...وطبعًا هذا شي طبيعي وهو الأصل ...


فـ أنت يا حبيبنا رايق - ماشاء الله تبارك الله - طيب وراقٍ في تعاملك بشكل ملفت للنظر ...تساعد.. وتواسي.. وتسأل ..وتجبر الخاطر .... وغيره من الصفات الحلوة اللي فيك داخل المنتدى ...وهذا كل الأعضاء شايفينه فيك ..


لكن السؤال اللي أعتقد يدور في ذهن بعض الأعضاء ...وهو سؤال متعارف عليه ومش جديد ....المهم السؤال هو :


هل وضعك داخل المنتدى يختلف عن وضعك في حياتك الحقيقية ..؟.. ولا فيه اختلاف بحكم الاحتكاك بالصوت والصورة مع الآخرين في حياتك برا المنتدى ....؟



المهم هذا السؤال ياما وياما طُرح على الأعضاء في بعض المواضيع ....وطبعًا تكلموا عن وضعهم داخل المنتدى وعن وضعهم برا المنتدى ...وأعتقد أنه لم تكن هناك نظرة جادة لإجابة الأعضاء من قِبل البقية ....


لكن أنت يارايق داخل المنتدى أصبحت شخصية مشهورة ومعروفة ومحد يجهلك...يعني أصبحت قضية رأي عام ... وخاصة انك أنت كثير الاحتكاك بالأعضاء سواء داخل الأقسام أو عن طريق الرسايل بمختلف أنواعها ..

وكل هذي الصفات والتصرفات اللي تسويها مع الأعضاء أجبرتنا على أن ننفرد بك لنسألك هذا السؤال ....عشان تكلمنا عن نفسك بزيادة من خلال إجابتك..



( وطبعًا الإجابة خليها في مدونتك ...وعلى فكرة لك حرية الاختيار..)









ملاحظة :

المرة الجاية راح يكون الدور على عضوة ... وراح نسألها عن سبب خلافها الحاد مع وحدة من العضوات ...








ممكن يجي واحد ويقولي : يا أخي مالك ومال الناس ...جالس تسألهم أسأله مال أمها داعي ..؟


وأنا أقولك : يابن الناس أنا من زمان أقولك هذي مدونتي وأنا حر فيها حتى لو أحط فيها عنز ميتة .......كيفي ..كيفي ..كيفي..(( بصوت أحلام ...




.......

[الخواف]

https://h.top4top.io/p_2500jw20g2.jpg (https://top4top.io/)


وقت غروب الشمس أحس بـ ضيقة وكآبة إذا كنت في البر أو منطقة مفتوحة لأن غروبها بجميع تفاصيله يكون مكشوف قدامي ... أما داخل المدن ما أشعر فيه .....

[الخواف]

..............وكل هذي الصفات والتصرفات اللي تسويها مع الأعضاء أجبرتنا على أن ننفرد بك لنسألك هذا السؤال ....عشان تكلمنا عن نفسك بزيادة من خلال إجابتك..



( وطبعًا الإجابة خليها في مدونتك ...وعلى فكرة لك حرية الاختيار..)

[/color][/color]


رايق عطاني خبر ...ومحتوى كلامه انه راح يرمي كل اللي عنده في مدونته ...

المهم يا رايق خذ راحتك وعلى أقل من مهلك ......الليلة ولا بكرة ولا بعده ..ما حنا مستعجلين ...



لأن أهم شي عندنا راحة العميل ...
https://e.top4top.io/p_2500i90g41.jpg (https://top4top.io/)

[الخواف]

طلع رايق منتهي من الإجابة ...

الآن موجودة في مدونته ...أنا عن نفسي مابعد قرات شي ....أبروح أشوف وش كتب

[الخواف]

أبدعت يا ( رايق ) في تعليقك على كل كلمة قلتها لك ...


كنت راح أقتبس كل كلامك وأحطه هنا ...لكن ماراح يطلع بنفس الترتيب والتنسيق اللي في مدونتك ..


ومممممممممممممممممممممممممممم خلاص ماتركت لنا شي نقوله ....



...

[الخواف]

اقتباس : من مدونة رايق ...
إذا تبغى نصيحتي بلاش من ذي الفكره
يعني تجيب عضوتين بينهم خلاف
وتطلب من وحده فيهم تتحدث عن الأخرى
هنا … أخاف أن يحصل تصعيد غير محمود
وحتما سوف تفقد السيطره على الموضوع





لا أخفيك سرًا أنا حطيت السؤال عشان أشوف ردة فعلك هل تخليه يمر مرور الكرام ولا تعلق عليه ....


وبيني وبينك مافيه ولا عضوة جاية على بالي يوم حطيت السؤال ...


لأنه مش معقول أجي لوحده وأقولها ليش تكرهين فلانة..!!!....حتى لو كنت شايل عقلي في يدي ماراح أسال هذا السؤال في المدونة .....



طبعًا ممكن أقولها ليش تكرهين العضوة فلانة إذا كان حاصل بينهم حوار ونقاش في أحد المواضيع المطروحة داخل الأقسام وجالسين يسبوا ويقطعوا في بعضهن ...فـ ما أضمن نفسي في تلك اللحظة أني أقول لوحده منهن ليش تكرهينها ...طبعًا أوجه السؤال للشخص اللي من خلال وجهة نظري انه هو العلطان ...طبعًا ممكن يكون مش غلطان ....



بمعنى آخر : ما أقول لأي عضو ليش تكره العضو فلان وقدام الأعضاء سواءً في المدونة أو غيرها.....إلا في وقت ومكان المعركة والمضاربة اللي حاصله بينهم ...أما خارج الوقت والمكان ما أسأل السؤال هذا ...





أما خارج المنتدى لو أشوف ناس يتكلموا على بعضهم سب وتقطيع وغيره ...فـ أعدي من جنبهم وكأني ماشفت شي ...حتى لو جالسين يكسروا في رووس بعضهم ...


أما في المنتدى : لما أدخل بينهم وأصدر أحكام على أن هذا غلطان وهذا مش غلطان ومدري إيش ..فهذا من باب التسلية لنفسي لا أقل ولا أكثر ...


.....

[الخواف]

اقتباس من : رايق ..
لماذا أخترتني أنا بالذات لهذا اللقاء والحوار ؟

مافيه سبب معين ولا تخطيط للشيء هذا ..... فقط دخلت مدونتك وشايف قدامي انك جالس تتكلم عن مشاعرك تجاه الأعضاء ....فـ قلت بيني وبين نفسي أبكتب كم كلمة لـ ( رايق ) بخصوص كلامه عن المشاعر داخل المنتدى..وابسأله سؤال ..وابشوف وش يقول ...


بس هذا كل مافي في الأمر ...


....

[الخواف]

( سوار العسل )

كنت مدري هل هي ولد ولا بنت ...لكن دخلت ملفها عشان أشوف وضعها ...



المهم على طاري ذكر اسم ( سوار العسل ).....

سوار العسل هو نفس المسلسل الكرتوني بشار ....


بشار دبلجة كويتية مع أصوات من باقي الدول العربية ...زي منتم عارفين ....واللي قامت بدور ( بشار ) وحدة مصرية ..ناسي اسمها ...

أما ( سوار العسل ) دبلجة أردنية زي منت عارفين ....وماشفت ولا حلقة منه ...فقط لقطات بسيطة في اليوتيوب ... لأني تعودت على النسخة الأولى اللي كان اسمه فيها بشار ..






المهم يا ( سوار العسل )... عندي لك سؤال :

طبعًا أنتي شكلك كريمة في اعطاء كلمة ( اعجاب يعني لايك ) على مشاركات الأعضاء ....

وأعتقد ماينافسك على الشي هذا إلا ( رايق ) ............


وأنا ماعرفت بوجودك في المنتدى إلا عن طريق رؤية اسمك أسفل مشاركات الأعضاء بجانب كلمة ( like ) .................



المهم السؤال هو :

سبب كثرة الضغط على كلمة اعجاب على مشاركات الأعضاء ....هل فعلك هذا من باب الدعم والتشجيع .. أو لأن طبعك اجتماعية وطيبة وتحبين نشر الود والحاجات الحلوة للأعضاء ومنها الضغط على كلمة لايك على مشاركاتهم ...ولا إيش ...؟

طبعًا كلامي مش انتقاد ..ولكن حابين انك تتكلمي عن نفسك في النقطة اللي أنتي متميزة فيها ... اللي أنا ذكرتها .....


لأن كل عضو وله علامة فارقة متميز فيها داخل المنتدى ...مثلًا ( روماانس ) متميز في مدونته انه يتكلم عن نفسه فقط ..ومايجيب سيرة عن المشاكل الاجتماعية اللي عايشين فيها الناس ثم يسوي فيها فاهم ولا يجيب سيرة عن الدنيا كلها ..فقط يتكلم عن نفسه وعن يومياته ..طبعًا هذي رؤيتنا لمدونته بشكل عام ...


أما أنتي يا سوار العسل العلامة الفارقة اللي فيك واللي متميزة فيها هي كرمك بالضغط على كلمة ( like ) ...لـ مشاركة الأعضاء ....

فـ كلمينا عن هذا الشي اللي حنا شايفينه فيك ...لأنه فعلًا شي ملفت للنظر ..

فهل هو بسبب طيبتك أو هو دعم للأعضاء .. أو هو بسبب ان طبعك اجتماعية وطيبة داخل المنتدى أو إيش ..؟؟




المهم اعتبري نفسك في سنة رابعة ابتدائي فصل ( ب ) وعندك حصة تعبير عن هذا الموضوع ...

وخذي وقتك ..لاتستعجلين ...متى ماراقت معك الغزالة اسرحي وامرحي براحتك ...




...

[الخواف]

اقتباس من : سوار العسل ..
((باختصار الايك عندي هو احترامي لصاحب المدونة عيب تدخل بيته وما تترك أثر

ما بدها لا موضوع ولا فلسفة

الي مضايق من وجود سوار العسل بمدونته يخبرني

وشكرا ))


ياهلا سهلا سوار العسل ...

طبعًا هذا تعليق ( سوار العسل ) على الكلام أو السؤال اللي طُرح عليها ....

وتشكر على ردها ....





لكن طلعتي عصبية هههه وماعندك ثلث الثلاثة كم ههه...



المهم ياسوار العسل يتشرف الأعضاء بوجودك في مدوناتهم ....ويعتبر شخص غير طبيعي اللي مايحب أحد يترك أثر طيب في مدونته ...

وأنتي من الأعضاء المعروفين اللي يحبوا انهم يتركوا أثر طيب في المدونات وغيرها .....ولهذا السبب سألناك عن سبب تميزك بوضع الأثر الطيب في مدونات الأعضاء وغيرها ....


بمعنى آخر : بسبب هذا الأثر الطيب حبينا نتعرف عليك أكثر وأكثر من خلال إجابتك ومن خلال تعليقك على كل ماطُرح عليكِ ......



المهم شكرًا يا سوار العسل وماقصرتي ..عطيتنا الزبدة من الآخر ....

.....

[الخواف]

عندما يصبح القمر في بيتك...طف اللمبات ...

وعندما يخرج شغل اللمبات وعش حياتك بكل أنواعها وألوانها وأشكالها ....ولاتنسى تزبط السيريلاك ..روعة ..

[الخواف]

https://g.top4top.io/p_2502xwdkr1.jpg (https://top4top.io/)

( صورة منقولة من قوقل )

[الخواف]

بعض الناس عصبي ويزعل بسرعة ويتكلم على الناس إذا اخطأوا عليه بدون قصد .....ثم بقولون هذا طبعه لكن قلبه أبيض ..وطيب ....!!


فعلًا بعضهم مبهذل الناس ..ثم في النهاية يقولوا عنه ان هذا طبعه لكن قلبه نظيف ومايشيل في قلبه على أحد ....!!!




أنا مش مقتنع بكلامهم هذا ...لأن ياحبيبي مايهمني نظافة قلبه ولا وساخته ..أهم شي عندي تصرفاته قدامي ...


لأن ماعندي استعداد أساير عصبيته وزعله بحجة ان قلبه طيب ومايشيل على أحد .. ...



...

[الخواف]

لما تتبهذل في حياتك من أول ماطلعت على الدنيا ... راح يقولوا عنك رجل شديد وقوي ومدري إيش ...

واللي طلع على الدنيا عايش حياة دلع وغنج ونعومة .....يقولوا هذا ماراح يتحمل الدنيا وهذا مش خشن زي الرجال وهذا ما راح يعيش لو الدنيا تختلف عليه ..!!




خلاصة كلامي :

اللي حالته صعبة في الدنيا لو تمدح رجولته ليل ونهار ماراح يحس بكلامك فيك .....بالعكس لسان حاله يقول خليني أعيش حياة حلوة وراضي انك تقول عني دلوعة وناعم وراضي تقول اني ما أقدر أتحمل الحياة بدون ماما وبابا على قولتهم ..و..الخ....



الكثير من الناس يعتقد ان اللي عايش حياة رفاهية على قولتهم انه راح يطلع ضعيف ماعنده صبر وتحمل وقوة ..و..الخ....

فما أدري ليش يربطون الشدة والرجولة بحياة النكد والبهذلة ....؟


بمعنى آخر : البعض آخذ فكرة ان الرجل اللي يكرف في الدنيا هو أرجل من الشخص اللي عايش في عز وبذخ واللي الذي منو ...!!



زي البنت لما تكون ظروفها المعيشية صعبة وجالسة تقاوم الحياة مع أهلها ..... يقولوا هذي بنت عن ألف راجل ...

واللي مدلعة في بيت أهلها ومنغنغة وعايشة حياة حلوة ... يجلسوا يتكلموا فيها بكلام فيه تقليل من إمكانياتها لتحمل بيت وعيال ومسؤولية زوج ..و..الخ ...!!





....... أنا من ضمن الناس اللي مش مقتنع بهذي المفاهيم ..........

[الخواف]

اقتباس : من رسالة في التقييم ...

( شيء بديهي الفكرة مش غني وفقير ..الفكرة انه شخص تعلم يشيل مسؤوليته ومسؤولية غيره منذ الصغر وشخص الدادة والعاملة شايلين مسؤوليته ..في بيئة العمل مثل بيئة قسم الطوارئ ولا التدريس لو حطيت بنتين وحدة غنية مدللة والثانية فقيرة شايلة مسؤولية مين الي تتحمل )


فعلًا كلامك صحيح ....

اتضح لي الوضع .....