مستراح وظل وارف ( ذكرى )

[جرح كبير]

اللهم صل وسلم على محمد

[جرح كبير]

هذا المكان للفضفضه بس لا أكثر ولا أقل ....
أتمنى اني لما افضفض ما اكتب كل شيء في خاطري ونتحكم في نفسي كويس لاني لو ماتحكمت في نفسي مشكله.....

احترم هذا المنتدى رغم اني ماحبيته لهذا اكتب فيه إلى الآن

المهم
يارب يكون فيه كل خير بيني وبين هذا المنتدى

[جرح كبير]

استاحشت حاجه واستاحشتها جدا جدا وهي معلومه عني في غرام .....كنت أحبها بشكل كل الظروف الي عشتها معاها في فترتي تلك صبيتها فيها .....

مشكلتي بأني لما ازعل أكره ويصير عندي حقد على الشخص الي زعلني أحس قلبي يصير اسود من ناحيته ......أستغفر الله

لكن فيه شيء مافهمته مع طبعي هذا فيه ناس ازعل منهم لكن في نفس الوقت ماكرهتهم ولا حقدت عليهم حتى لو أذوني أكثر من الناس إلي حقدت عليهم...هم بجد ما احقد عليهم لكن اتجنبهم وفوقها أكون لطيفه معاهم اذا تكلمت عليهم عند أحد وادافع عليهم في غيابهم وهم اصلا زعلوني وأذوني ......

هذا التناقض في طبعي انا نفسي مافهمته لاني اعرف نفسي لما أكره أكره بجد لكن في بعض الحالات يصير استثناء......ممكن لاني أعرفهم طيبين مع أنه صعب في هذا الوقت تعرف الطيب لأنها كلها صارت تتلبس الطيبه أو ممكن لاني اعرف ظروفهم الي عاشوها أو سمعت بها من أحد فيصير عندي عطف عليهم وحتى لو أذوني ما اكرهم.....طلعت بهذه النتيجه ومش عارفه اذا كانت صح أو لأ .....

[جرح كبير]

الزلازل الي صارت في تركيا وسوريا لما اتفرج على مقاطع فيديو وتجي أمامي اهرب منها ....لاني جربت تفرجت تقريبا على ثلاثه مقاطع دموعي من أول لقطه في الفيديو لين ينتهي وهي تصب لين اتعب ......لهذا صرت اتجنبهم ......الله يفرج عليهم
يقول العلماء عن حديث صاحب الهدم شهيد ....بأنه الي يطيح عليه بيته ويموت فهو شهيد بإذن الله حتى الي يموت بحادث سيارة انقلبت به أو صدماته يدخل في حديث صاحب الهدم وبإذن الله شهيد

الي ماتوا في الزلزال ومسلمين طاح عليهم بيوتهم شهداء بإذن الله

[جرح كبير]

مهما كانت الحياة معبية بكل الناس حولك انت وحيد مهما كانت الناس تحبك انت وحيد .....معك الله بس

[جرح كبير]

يجي يوم وتنتهي حياتك مافيه أحد قاعد فيها

[جرح كبير]

يمشي العمر وتستمر الحياة لكن الذكرى تقعد معك سواء أثرت عليك سلبا أو اجابا ....
قبل أيام سمعت قصة امرأة أثرت في نفسي إلى هذه اللحظه هي في بالي......الله يسعدها



لوكنتي في بالي ذكرى..
ما تخطر غير مره مره

هجرك يبقى هين أمره..
وكفاك انسيبك بالمره

لكن أنتِ حبك طاغي..
عدل في تركيب اصباغي..

عقلي كان الغيه لاغي..
لولا طفل افرح بملاغي..

حَطّك بين خلايا ادماغي..
حب الحاضر،
وذكرى الماضي،
وحلمي بكره.......لو كنتي في بالي ذكرى

وأنتِ أمعايا ملك إيديك..
ولمَّا انغيب أنفكر فيك

نايم صاحي نحلم بيك..
وبشواقه قلبي يناديك..

مابين اللحظه والذكرى..
أنتِ عندي أجمل فكره..

حب الحاضر،
وذكرى الماضي،
وحلمي بكره...

نحلم بيك بنيت آمال..
ليش أحلامي ماقدرتي

عودتيني بالوصال..
بعد وصالك ليش هجرتي

بدل ماتكوني راحة بال..
تبقي لي مشغال أخترتي..

غير أصحي لو هجرك طال..
وقدرتي ع الشوق صبرتي

يجلب هجرك تفكيري..
ونشاغل غيرك وتغيري

نكويك بناري وتحيري..
ونغازل في حُبّك لخره

لو كنتي في بالي ذكرى...
ماتخطر غير مره مره..

[جرح كبير]

أهم شيء في الحياة كلها انه يكون قلبك طاهر ونظيف ولما تعمل العمل يكون مخلص لله سبحانه....تقدر تمثل قدام الناس بأنك انسان كويس وتعمل في الخير لكن في داخلك يعلم ربي بك .....جهاد النفس متعب مهما كنت كويس يجيك الشيطان فجاة ويفسد عليك .....
اللهم طهر قلوبنا من كل شيء لا يرضيك عنا
.
.
.
.
.
.
.
.
.
.
.
.
.
ﺗﻼﻗﻴﺖ ﻧﺎ ﻭﻳﺎﻩ ...
ﻣﺎﺷﻲ ﻭﺟﻨﺒﻪ ﻣﺎﺷﻴﻴﻦ ﺿﻨﺎﻩ
ﺍﻟﻐﺎﻳـــﺐ ﺑﻌﺪ ﻣُﺪﻩ

ﺍﻣﻌﺎﻩ ﻋﻮﻳﻠﻪ ....
ﻗﺎﺑﻞ ﻭﻛﺎﻧﺖ ﻏﺎﻳﺘﻲ ﻧﻤﺸﻴﻠﻪ
ﺍﻧﺴﻠﻢ ﻋﻠﻴﻪ ﻭﻧﻌﺎﺗﺒﻪ ﻭﻧﺤﻜﻴﻠﻪ ....
ﻟﻴﺶ ﺍﻟﻐﻴﺎﺏ ﻭﻟﻴﺶ ﻃﺎﻝ ﺟﻔﺎﻩ

ﻭﺍﺫﻛﺮﺕ ﻛﻲ ﺭﻳﺘﻪ ﺍﺳﻨﻴﻦ ﺟﻤﻴﻠﻪ ...
ﺃﻳﺎﻣﺎً ﻭﻫﻮ ﻓﺎﺿﻲ ﻭﻧﺎ ﻣﺸﻜﺎﻩ

ﻛﻨﺎ ﺍﻧﺘﻼﻗﻮﺍ ﻛﻞ ﻳﻮﻡ ﻭﻟﻴﻠﻪ ....
ﻭﻣﺎﺿﻲ ﺗﻮﺍﺭﻯ ﻛﻨﺖ ﻓﻴﻪ ﺍﻣﻌﺎﻩ
ﻭﺍﻧﻘﻄﻌﻦ ﺃﺧﺒﺎﺭﻩ ﻭﻳﻦ ﺷﺎﻝ ﺭﺣﻴﻠﻪ .....
ﻋﻠﻴـّﺎ ﺗﺒﺎﻋﺪ ﻛﻨﺖ ﺟﺎﺭ ﺍﺣﺬﺍﻩ

ﻭﺩﻭﺭﺕ ﻭﺍﺟﺪ ﻣﺎ ﻟﻘﻴﺖ ﻭﺳﻴﻠﻪ ...
ﻭﻧﺤﺴﺎﺑﻪ ﺍﻟﻐﺎﻟﻲ ﻣﺎ ﻳﻄﻮﻝ ﺭﺟﺎﻩ

ﻭﺍﻟﻴﻮﻡ ﻗﺎﺑﻞ ﺑﻮﻋﻴﻮﻥ ﻛﺤﻴﻠﻪ .....
ﻭﻣﺎ ﺣﺲ ﻛﻲ ﻣﺎﺭﻳﺖ ﻣﻦ ﻳﺎﻻﻩ
ﺻﻔﻘﺖ ﺑﻴﺪﻳﺎ ﻭﻧﺎ ﻧﻮﻣﻴﻠﻪ .....
ﻭﺍﻧﻘﻮﻝ ﻓﻲ ﺳﺮﻱ ﺍﻟﻠﻪ ﺍﻟﻠﻪ

ﺍﻣﻌﺎﻩ ﺃﺻﻐﺎﺭﻩ .....
ﻏﺾ ﺍﻟﻨﻈﺮ ﻭﺍﻃﻰ ﻋﻠﻴﺎ ﺃﻧﻈﺎﺭﻩ
ﻋﺪﻳﺖ ﺷﻮﺭﻩ ﻭﺩﻣﻌﺘﻲ ﻣﻨﻬﺎﺭﻩ .....
ﻭﺗﻤﻴﺖ ﻧﻤﺸﻲ ﻓﺎﻟﻄﺮﻳﻖ ﻭﺭﺍﻩ
ﺗﻤﺘﻤﺖ ﻛﻠﻤﻪ ﻗﻠﺘﻠﻪ ﻋِﺒﺎﺭﻩ ......
ﻭﻋﺎﻭﺩﺕ ﺷَﺮﻳﻂ ﺍﻟﺰﻣﺎﻥ ﺍﻣﻌﺎﻩ

ﺣﺎﻭﻟﺖ ﻧﺤﻜﻴﻠﻪ ﺍﻧﺠﻴﺐ ﺇﺷﺎﺭﻩ ......
ﻭﺍﻧﺠﻴﺐ ﺫﻛﺮﻯ ﺍﺗﺬﻛﺮﻩ ﺑﻐﻼﻩ
ﻟﻜﻦ ﺗﺒﻴﻨﻠﻲ ﻣﻦ ﻋﻴﻮﻧﻪ ﺍﺧﺴﺎﺭﻩ ....
ﻧﺎﺳﻲ ﺍﻟﻤﺎﺿﻲ ﻭﻛﻞ ﻣﺎ ﻗﻠﻨﺎﻩ

ﻭﻻ ﺟﺎﺏ ﻣﻨﻲ ﺷﺊ ﻓﻲ ﺗﺬﻛﺎﺭﻩ ......
ﻭﺣﺘﻰ ﻛﻼﻣﻲ ﻣﺎ ﻓﻬﻢ ﻣﻌﻨﺎﻩ
ﺗﻼﻗﻴﺖ ﻧﺎ ﻭﻳﺎﻩ ...
ﻣﺎﺷﻲ ﻭﺟﻨﺒﻪ ﻣﺎﺷﻴﻴﻦ ﺿﻨﺎﻩ
ﺍﻟﻐﺎﻳـــﺐ ﺑﻌﺪ ﻣُﺪﻩ

[جرح كبير]

الي يكرهك لو تعمل له ما تعمل مايحبك
والي يحبك لو عيوب الدنيا كلها فيك ما يكرهك


سبحان الله

[جرح كبير]

اكتب كلام طويل عريض وبعدين امسحه......كويس صراحه اني أمسح لأنه مش معقوله كل شيء يكون عرض لناس .....إلا في بعض الاستثناءات


‏اصبر
شور شي عمرك ما حسبت ‎احسابه

مرات عز ‎الناس يرحل عنك
ومرات غاليك يطول ‎اغيابه

ومرات ‎تفقد من قريب منك
ومرات عمرك ما تعيش ‎عقابه

خليك صابر لو ‎مصايب جنك
مامـن اللى عافس عليه ‎عـذابه

و اذكر ‎الله انكان خابك ظنك
ما زي ‎ربى وين تقرا اكتابه

[جرح كبير]

استاحشت والدي الله يرحمه واستاحشت غرام لين خلاص....
الاثنين مافيه بينهم أي قاسم مشترك إلا حبي لهم
والدي هو روحي وغرام متنفسي
بسم الله عليا ماتحملت ذكرهم بدون حزن

[جرح كبير]

وحده كاتبه موضوع يخصها وتبي استشارة من البنات اغلب التعليقات قالوا لها هذا فيلم هذه قصه هذه روايه ماصدقوها.....
بصراحه اني لما قريت كلامها تعاطفت معاها لكن لما قريت التعليقات أقرأ وأضحك لأنه فعلا مرت عليا قصتها في روايات كثيرة ....كلامها كأنه روايه وقالوا لها نبوا الجزء الثاني .....
اما أنا مهبوله أو طيبه بزيادة حتى أصدق الناس ...
هو صحيح انا انسانه ذكيه ومايفوت عليا شيء لكن عاطفتي وقلبي الرهيف واقفين لي في الطريق.....ربي يستر

[جرح كبير]

سهل جدا انك تعرف الشخص شنو يقصد من كلامه معك أو من أسلوبه معك ......تقدر تطلع بنتيجة معه

[جرح كبير]

على قد ما تمر بظروف قاسية ومطبات فجأة ربي يشرح صدرك ويهدي سرك وتحس بالراحة مع ذكره سبحانه.......ومع كل هم وغم عشته تكفير ذنوب .....

(لَا يُكَلِّفُ اللَّهُ نَفْسًا إِلَّا وُسْعَهَا)

[جرح كبير]

السعادة والفرج في الطريق بس لو الإنسان يصبر

[جرح كبير]

وقت الفجر ولذة الفجر غير عن كل الأوقات. ...سبحان الله
يارب لك الحمد والشكر على هذه النعمه

[جرح كبير]

اللهم صل وسلم على محمد

[جرح كبير]

اللهم صل وسلم على محمد

[جرح كبير]

(خطرها علي زلزال )

قالوا هزه ......
ونا هزني غالي عزيز إنعزه .....
اليوم ما شعرت بشي قالوا هزه.....

ما انهز مكاني ...
ولا شي حسيته نقولوا جاني
لكن الهزة من خطأ حباني
زلزال خلى كبدتي تتجزأ
كسر رواشن خاطري وبيباني
وخلخل أركان القلب لين ترزا
وزعزع طريق الصوب في وجداني
وقطع أحبالي مالغلا و معزه
واليوم من مازال ما عزاني
إيجيني إصدار الحوش درت معزه

خبرها جاني.......
الهزة ونا اللي هزني بكاني
هزة قوية يوم ما جافاني
هدت ابراج الصوب قزا قزا
وطاحن مباني شوق في وجداني
وخلعت أبواب القلب رزا رزا
ومقياس رختر ما حسب خلاني
لين ف الجواجي امعاي صارت كزا
الحاصل انهارت قصتي ورزاني
كيف ما انهارت فلسطين وغزه

[جرح كبير]

القوة مايمدك بها أحد إلا الله والخير مايجيك إلا من الله سبحانه

[جرح كبير]

خطرت على بالي يرخص شنو صار فيها هل صارت مصممة ازياء زي ماهي تبي أو لأ هي اصلا قطعت عن غرام بسبب ظروفها لكن مرة مرة كان تزور فينا........
اااااه ياغرام استاحشتك موت مش سهل انساك لأنك كنت شريكي في وحدتي وعزلتي عن الناس إلى هذه اللحظه انا من هذا النوع وبالعكس زادت العزلة أكثر وأكثر لو تعرف كيف أفكر بس تقول لي يامهبوله جنيتي ....محتاجه اكتب وما ارتاح إلا عندك ياغرام لكنك خلاص مت وماتت الكتابه معك .....


خلاص فطمته
بعيد ع الغوالي خاطري رومته
اللي كان مشقيني خلاص فطمته

خلاص نهيته
سريب العشق من خاطري نحيته
بصوت عالي نقولها انا نسيته
والحب من جوفي اليوم عدمته

خلاص انسانى
وانسى ايام الشوق يا الاناني
راني رميته الحب من وجداني
الذنب ذنبك والقليب ارغمته

خلاص خلاص
فجوفي كوي تحلف تقول رصاص
عمرك ماعرفت الحب والاخلاص
ولا بعمرك عرفت الشوق لين وهمته

خلاص رميته
من جوف جوفي وخاطري مليته
ورد المحبه بالجفاء استسلمته

خلاص ومات
ماعاد يعنيني غلاك وفات
قصه من الماضي غرامك بات
ذكرى حكاية حب ما لايمته
خلاص فطمته

[جرح كبير]

الجرح من الاحباب واعر طبه
ولكن جروح الكارهين شفاه
والجرح من صاحب عزيز انحبه
يطول ماينفع معاه دواه

[جرح كبير]

سيور المجروحه تبرا
تاخذ من ماضيها عبرة

[جرح كبير]

لي غرام......

ذكرى قديمه وين هفت عني
خذتني معاها للزمان إنظني

[جرح كبير]

كيف ما نسا ..ننساه....
وندفن مع ذكرى سريب غلاه......جميع سرته

كيف ما نساني ننسا..
وكيف ماقسا نا زاد قادر نقسا..
اندور لقلبي الغير شطه مرسا..
انعده كما مركب الموج خذاه..
.....كيف ما نسا ننساه......

ننسا صوبه..
انحرم علي رجلي مسار ادروبه..
....كيف ما نسا ننساه......

ماغلاه انعبر..
ننساه كيف مادار الخطا واجبر..
واليوم عقلي بالحجايج دبر..
قطع سيرته بكل ودار عزاه..
.....كيف ما نسا ننساه.....
وندفن مع ذكرى سريب غلاه......جميع سرته

[جرح كبير]

قال الامام ابن القيم - رحمه الله :

" من تأمَّل أقدار الربِّ تعالى وجَرَيانها في الخَلْق :
عَلِمَ أنَّها واقعةٌ في ألْيَقِ الأوقات بها " .
.
.
.
.
.
.
الحمد لله على كل النعم وكل الأقدار الي كتبها ربي لنا
يارب أرضى عني أحبك

[جرح كبير]

مافيه حد ياخذ نصيب حد.....

المهم هذه لي غرام ....
.
.
.
يـــــــــــــــــادار زاعــــــل منــــك
عليـــك غبت مانشــــــدتي كنـك
كـــــــيف دوتــــك ؟؟

يــــــــــــــــادار زعـــلـــتـــيـــنــــي
رافع النظـر شـورك انقـول اتجينـي.
وكـي مـا بكيتـك طالـبـك تبكيـنـي
نـا ونسـك كـي رحلانهـم سابـنـك

اعطشتي ارويتك حاسبك تروينـي
كـي مـا انـظـاري بالـدمـوع ارونــك

عليك غبت لاهي في وداع قريني
وايش الظـروف اللـي علـي لهنـك

[جرح كبير]

مش معروف الجمعه عيد أو صيام
الشرق قالوا الجمعة عيد ..الغرب قالوا ماشفنا شيء بسبب الطقس المغيم والعيد السبت....
مساجد في الغرب تكبر ومساجد صلت التراويح......
حاليا قالوا المحكمه بتنزل بيان ومازال مافيه شيء .....والفجر يأذن الساعه 5 وتوا الساعه 3 ونصف...ومانوينا صيام أو عيد

الله يفرج

[جرح كبير]

كان شهر مريح لنفس الحمد لله....

لما تقعد تفكر بينك وبين نفسك تحس الدنيا تافه وماتستحق انك تصاحبها أو تتمسك بها ....
لما يجي الشيء الحلو فيها الحمد لله... واذا ماجاء الشيء الحلو الحمد لله لأنك في الحالتين رابح
الشيء الحلو فرحت بجيته والشيء الي مش حلو سواء كان حزن هم غم مصيبة أي شيء مع صبرك تؤجر عليه ويجزيك ربي خير

استاحشت معلومه عني كانت صديقتي في غرام...
لكنها راحت ومشت وقعد معي صاحبي المصحف
هذا دليل على أنه الدنيا زائلة ومهما اغرتنا بزخرفها علاقتك بربي هي الباقيه لين تنحط في قبرك .....

تعبت اليوم لكن صراحه انام بعد الفجر وأقوم بعد اذان الظهر .....كويس بأني انسانه مافي رقبتي أحد لاني بأنهار من التعب وانا متعودة على الدلع والنوم على راحتي ....

[جرح كبير]

اسمع في سيارة الجيران وأطفالهم نازلين منها أصواتهم وصلتني .... أذن الفجر .....أطفال مسهرينهم لهذا الوقت مشكله

[جرح كبير]

منشورات الناس ومشاكلهم تجيب الغم...وفيه ناس يكتبوا في أسئله واضحه ايجابتها لكن يسألوا...قصدي واضح كيف تتصرف ليش الاسئله .....
مملين بشكل وبايخين

[جرح كبير]

بأصلي الفجر وارقد بصراحه بحاول ارقد لأنه حتى يجي النوم يبي تقريبا ساعه أو أكثر

[جرح كبير]

اليوم في كل منطقه ناس عيدت وناس صايمه ... وحتى العائله نفسها في كل البلاد فيهم الصائم وفيهم اللي عيد وصلى صلاة العيد....

الله يتقبل من الجميع الي صام واللي أفطر وعيد ......

[جرح كبير]

على قد ثقتك بالله وحسن ظنك به تاخذ غايتك ويرضيك تمام الرضى...
سبحان الله الرضى الي يعطيه لك تكون مرتاح له جدا وهادىء
لأنه ربي يعلم بنيتك وقلبك يعطيك ..
ولأنك تقول يارب بكل إخلاص ويقين بالإجابة منه هو يسمعك يراك هو أقرب لك من حبل الوريد سبحانه...
ولأنك انسان تخافه وتخشاه في السر والعلن ييسر أمرك ويعطيك حتى يرضيك سبحانه

الانسان دائما يمر بمراحل بحياته مستحيل كل هذه المراحل تكون جميله و ورديه وهادئه هذه المراحل مرات فيها صعاب وتجارب ومرات اختبار للأنسان على مدى صبره على مدى خوفه من ربي على مدى رضائه بقضاء الله وقدره على مدى قربه من خالقه....كل مرحله تمر بنا هي حكمه لايعلمها إلا الله وحده

الحمد لله على كل حال
كل مرحله هي خير لنا مهما كانت بإذن الله
الحمد والشكر لله على كل شيء

[جرح كبير]

ما أحلاهم البنات ...البارحه بنت كاتبه يارب العيد السبت مازال ماكملت لبست العيد واشيائها الي معها......الناس حايرة صيام أو عيد وهي تفكيرها بعيد

قبل شوي بنات كل وحده حاطه لبستها وتقول اختاروا لي الألوان الي يطلعوا عليها من حقيبة وغيرها .....كل بنت وشنو طلبها والبنات جوهم حلو ويختاروا لهم ويباركولهم. ...جو
و وحده قالت يابنات شنو رأيكم في الالوان والتنسيق انحس في نفسي ندمت شريتها ...ضحكتني.......عايشين العيد بكل تفاصيله ما أحلاهم

من السنه الفرح بالعيد ولبس الجديد له أو أجمل الثياب الي عندك ....

[جرح كبير]

جوني بنات الجيران الصغيرات ...ما احلاهم...معلمتهم في التحفيظ كنت...
طبعا جوني في الصباح لكن لاني راقدة رجعولي توا في العشيه
عيدت عليهم واخذت بخاطرهم ورجعت لمكاني يا إنه راسي مصدع ويبي النوم ......

[جرح كبير]

اتصلت بجدتي وعيدت عليها ....عمرها قريب بيوصل 100 أو وصل 100 مش عارفه.....أخذت بخاطرها
هي بس مازالت موجودة جدي واجداي ميتين...الله يرحمهم ويحفظها

[جرح كبير]

مر عليا موضوع اكثر من مرة خاصة اليوم وهو الكنه الي مانعينها أهل زوجها من دخول بيتهم سواء من أم الزوج نفسها أو أخوات الزوج...
وأغلبهم حزنهم علي خاطر أطفالهم يبوهم يعيدوا في بيت جدهم ويفرحوا مع الاطفال.......وأكثر من وحده تقول نبي أطفالي يفرحوا بالعيد ويلتموا عند بيت جدهم ...

الواحد الحق يكون عنده أكثر من تحليل حتى يحلل هذه المشكله...المفروض الكنه لما تطيح في أهل زوج زي اخواته وأمه يكونوا واعرات وصعبات تسكت وخلاص ولاتناقشهم في شيء وتعاملها معاهم يكون رسمي وبحدوده خاصة اذا كانت في بيت بعيد عليهم ومش معهم حتى مايكرهوها في عيشتها ويسببولها حاله نفسيه ...
لأنه بجد أكثر من مرة أقرأ لهولاء النساء أحسهم تعبانات نفسيا ومش عارفين كيف يتصرفوا ....
ومرات زوجة الابن بجد هي انسانه واعرة وسليطت لسان وفتانه وترفع وتجيب في الكلام فيكرهوها ويحاربوها ويعادوها وهي بهذا سببت العداوة حتى لبيتها واطفالها وحرمتهم وحرمت نفسها من اللمه والفرحه بأي مناسبه كانت ......

مش عارفه هم الرجال ماعاد يقدروا يتحكموا في النساء ويفرضوا عليهم قراراتهم والنساء صاروا ماسكين زمام الأمور ولا كيف ... او مطلعين مشاكل النساء من راسهم اصلا ....مش عارفه
التفريقه والتشتت مشكله

ربي يهدي

[جرح كبير]

شوفت فيديو بنت توزع في عيديه للاطفال في الأماكن العامه ومغلفتها بطريقه حلوة يهبل الفيديو ...قداش مانحب نهدي الهدايا للصغار اموت في حاجه اسمها هديه لطفل سعادتي أكثر من سعادته لما اهديها له....يهبلوا
الله يحفظهم لاهاليهم ويطلع جيل يخاف ربي ويخدم دينه

[جرح كبير]

مشكله مش نعسانه.....عليك حاله وخلاص

[جرح كبير]

النوم الملخبط مشكله

[جرح كبير]

كنت راقدة وقمت من إزعاج صوت المباراة وشكله مهرجان اهداف

[جرح كبير]

راسي ثقيل من النوم....مشكله

[جرح كبير]

كنت ادور في موضوع أعطي وردة لقيته مش موجود في القسم وطلع في قسم ثاني....عادي مش مشكله اهدي الورود حتى هنا....

زي كل مرة أتذكر عضو هذي المره...

بأهدي حديقه ورد كبيرة من كل الألوان لي أفسار بصراحه لطيفه جدا وكنت ناسيتها تماما تماما سبحان الله فجأة طلعت أمامي ...زي تذكري لغيرها من الأعضاء تذكرتها....

لطيفه جدا وبصراحه ناسيتها مش متذكرتها كويس لكن كلامها لطيف وغريب شوي زي مثلا تقول أحوبك أويلي احححا....
فراشة ألوان الجميله مش نمله.....

الله يسعدها ويسعد احبابها ويجمعهم دنيا وجنه

[جرح كبير]

كنت أفطر....روتين شهر رمضان مازال قاعد موجود معي...

لكن في شهر رمضان كنت اجتهد في قراءة المصحف خاصة في الليل من لما سمعت بأنه سيدنا جبريل عليه السلام يدارس القرآن لي الرسول عليه الصلاة والسلام في الليل في شهر رمضان بديت مهتمه أقرائه في الليل أكثر من بعد صلاة التراويح ...سبحان الله قرائته فيها راحه وجمال وهدوء وسكينة ....الله يتقبل منا

[جرح كبير]

لما يكون طريقك إلى الله تفتح لك كل الطرق بفضله لأنك أقبلت عليه....
أما لو كان طريقك لغير الله خبت وخسرت مهما تعمل انت خسران لأنه طريقك لغير الله

الحمد لله على نعمه وفضله ورحمته بنا
الحمد لله على كل الخير الي يجينا ب لا حول ولا قوة منا
الحمد لله في كل لحظه وكل ثانيه وكل نفس أتنفسه
بدون ربي انا خسرانه

يارب لك الحمد والشكر
يارب لك الحمد على كل شيء كل شيء كل شيء

[جرح كبير]

أحس بشعور حلو وفرح ومسرور بجد مش قادرة اوصف الشعور بالضبط لكنه شعور حلو جدا.....وهذا الشعور الي أحسه بفضل الله سبحانه وتعالى

الحمد لله والشكر

[جرح كبير]

تعرفت على زميلات في البداية أخذت انطباع جميل عليهم بأنهم طيبات ويتمنوا الخير لغيرهم اسلوبهم حلو كلامهم لطيف ....بجد أخذت انطباع حلو وجميل جدا
مع العشرة والوقت بان كل شيء وكل انطباع حلو توقعته... وبديت كل انطباع اشطب عليه واحط عكسه

لهذا ابتعد عن الناس وما أحب مخالطتهم ومصاحبتهم لأنهم اقنعه متعددة وكل قناع أشر من القناع الي قبله......إلا مارحم ربي


الإنسان يتوكل على ربي ويحصن نفسه بأذكاره ويدعي ربي يحفظه من شياطين الإنس والجن

[جرح كبير]

اشرب عصير واسمع في صوت الجيران يتناقشوا لكن على شنو مش عارفه المهم صوتهم واصلني وخلاص......


النقاش أحيانا مايجيب فايدة يصدع الرأس بس الأفضل الواحد يعمل الي في رأسه ويتوكل ...
كل واحد عقله في رأسه يعرف خلاصه

[جرح كبير]

بالصبر تفتح الأبواب ويجي الخير بفضل الله ويبان كل شيء مظلم وينور أمامك وتفتح عيونك علي كل شيء بفضل الله

يخليك ربي تمشي في طريق تقول انا كيف جت هنا ولما تستمر في المشي تتفاجأ بأشياء كانت مخبأه عنك وربي حط لك هذا الطريق حتى تشوفها وتتمعن فيها كويس وتقول الحمد لله الحمد لله الحمد لله......سبحان الله على عظمة الله وجبروته سبحان الله

مهما حمدت ربي وشكرته أحس ماشبعت حمده وشكره سبحانه لو اقدر كل نفس اتنفسه أحمده واشكره فيه سبحانه


الحمد لله والشكر

[جرح كبير]

يقولوا الطيور على أشكالها تقع.......فعلا

أمنيتي طيري يكون صقر ...صقر في كل شيء

[جرح كبير]

أحب القصص خاصة لما الشخص يحكي قصته أحس استفيد جدا بجد أحب اسمع فيه ناس تمل وماتحب تسمع أو توقف الشخص أثناء حديثه انا احب اسمع الشخص لما يتكلم حتى لو استمر لمدة طويله استمتع وانا اسمع في القصه وكل مايقول شيء في داخلي احلل الموقف الي يحكي فيه ....استمتع وفي نفس الوقت استفيد جدا ...لأنها ممكن تواجهني في حياتي أو تواجه أحد أعرفه وتكون قصته شبيهه منه فالحلول تكون جاهزة عندي واعرف أتصرف لانها مرت علي
أو مثلا أحد في مشكله تقوله احذر فيه شخص نفس قصتك وصار له كذا وكذا فممكن يصير لك زيه

لكن بصفه عامه استمتع بالقصص الواقعيه الي يحكوها أهلها نفسهم وعايشوها

[جرح كبير]

اسمعي ياجرح هذا مش غرام واخذه راحتك فيه وتكتبي بكل أريحية
هذا مكان غريب عليك وغرام يزعل منك لأنك بدلتيه بغيره
وشنو جرح هذا...ماعرفتك بيه

لو اكتب في مليون مكان غرام هو غرام... هو أول مكان في حياتي اكتب فيه واصادقه كان وفي معي لآخر لحظه كنت فيه ....
والوفي يقعد غالي ومكانه القلب حتى لو كان جماد زي غرام
كل شيء في الحياة يتساقط من القلب مع الوقت وينحط في مكانه الطبيعي بعيد عن القلب إلا غرام هو الحب الي ماتساقط. ..غالي علي

[جرح كبير]

أنتظر الفجر.... لازم أعدل نومي لكن في نفس الوقت النوم حلو وأحبه

[جرح كبير]

عليك كارثه قاعدة مارقدت والعصافير في الخارج أصواتهم واصلتني...مشكله

الإنسان من أول نقطه يتراجع ويقول ما اقدر بالعكس هذا دليل على شجاعته وصدقه وامانته. ..حتى العلماء لما تتقدم لهم مسأله عن فتوى او أي شيء وما يعرفوها يقولوا لا أعلم لا ادري....

أما انسان يقول أعلم وادري وأقدر وبعدين يوقف في نصف الطريق ...شيء مؤسف جدا


جمال الإنسان هو صدقه أمانته طيبته شجاعته اخلاصه وقبل كل هذا هو خوفه من ربي


خلاص بأقراء الأذكار وأحاول ارقد انا لو تكلمت شنو يسكتني تقولي معلمة انصح في الجيل الجديد وشوي واتقعد

[جرح كبير]

سبحانه علام الغيوب

أحيانا فيه قرارات نتخذوها ونعتقدوا بأنه تحديد المصير فيها موجع ومحزن لكن لازم تتخذ هذا القرار لأنه المعطيات الي عندك تقول بأنك بتمشي في نفق مظلم وبعد هذا النفق ماتعرف هل بتطلع منه بتشوف النور أو بتشوف عواصف وكوارث.....

لهذا انا في اتخاذ قراراتي أستعين بالله لاني ما أعلم الغيب هو سبحانه الي يعلمه وكاتبه ومقدره


مرة كان أمامي قرار مصيري وكانت أمامي المعطيات وكنت هذا القرار متمسكه به جدا جدا بكل جوارحي ونشوف فيه الصح
لكن المعطيات أمامي تخوف وعلى حسب تخميني اعطتني النتيجه بأني راسبه ميه في الميه لكن انا نبي هذا القرار فقعدت حايرة بين تحليلي وافكاري للمعطيات وبين استمر...

كنت تعبانه جدا زي لما أحد يحط لك اثنين من أبنائك ويقول لك أنقذ واحد منهم فقط .....كنت ادعي ما أتوقف عن الدعاء لاني ما اعرف اختار والاختيار الصح هو في علم الغيب عند علام الغيوب


وبعد كل المسافه الي قطعتها حتى استمر في القرار الي مشيت فيه من البدايه توقفت فجأة..
بجد توقفت قبل خط النهاية ممكن بدقيقة وبجد ما أبالغ لو قلت دقيقه
تراجعت وكلي الم وحسرة...
تراجعت وانا أبكي تراجعت وقعدت اشوف للمسافه الي قطعتها والمسافة الي بقيت وتراجعت ...

تخيل كل جهدك وحواسك تشتغل على عمل ما لأشهر وخلاص بتصل لنهاية وتتراجع

كيف تتراجع ؟ ليش شنو السبب
تخيل التراجع بسبب معطيات وتخمين بأنه هذا العمل فاشل
طيب تفكيرك كيف جزم بأنه فاشل بمجرد معطيات غير كامله ..

.تقول قدر الله وماشاء فعل
صحيح هذا القرار مفاجأ وغير متوقع مني لكن لعله خير بما إني تراجعت اكيد ربي يبي الخير لي


وتعيش في حزن وكآبه وضيق و وجع قلب بسبب اتخاذ لهذا القرار
وتحاول تطلع من الجو الي انت عايشه بأي طريقه وشوية شوي مع الصلاة والعبادة والدعاء والتقرب من ربي أكثر تحس براحة وهدوء نفسي
لكن في داخلك مازال فيه نقطه حزينه تقول لك ممكن اتخاذك لقرارك خطأ ..
وتستمر الحياة وتمضي الأيام والشهور وممكن السنه فجأة بدون أي مجهود منك وانت جالس تشوف معطيه من المعطيات الي كانت ناقصه حتى تتخذ القرار وانت مرتاح وبدون حزن منك

تشوف المعطي الي كانت مخفيه عليك حتى تخليك تتخذ القرار وانت سعيد بتخاذة وبدون أي حسرة أو حزن أو الم
بالعكس تتخذه وانت في قمة فرحك وسعادتك لأنك كنت بترفع نفسك للهاويه بترفع نفسك لشيء بيحطمك ويعفس عليك كنت بتنتحر وانت ما تعرف كنت ستمر وتدمر معك أحلام وطموحات وحياة جميلة كانت في انتظارك ولكن بسبب قرارك دمرت نفسك


لهذا بعد ماشوفت المعطى الأخير الي حصلت عليه بفضل الله فرحت بأنه ربي وجهني لاتخاذ القرار الصحيح ابعدني عن اتخاذ قرار كان حيقضي علي ويدمر حياتي كان حزني بيكون أضعاف مضعفه من الحزن الي عشته في إنهاء القرار ....

نجاحي في اتخاذ القرار هو بفضل ربي وحده

الحمد لله الحمد لله الحمد لله
على قد ما أحمد ربي واشكره مازال نبي نحمد ربي ونشكره أكثر....انقذني ب لاحول ولا قوة مني
الحمد لله والشكر
والله يعوضني خير في هذه المرحله الي عشتها
بجد كانت درس استفدت منه في كثير امور

وأول درس هو الاستعانة بالله في كل الأمور


الحمد لله والشكر

[جرح كبير]

الله يفرج على أهل السودان ويهدي النفوس بينهم

[جرح كبير]

أحس الناس أغلبها هبلت .....كل حياتهم صارت علي الشارع كل شيء ينقلوه لناس حتى أطفالهم وبرائتهم صارت على الشارع كل شيء يحطوه. ......مع اني اضحك على تصرفات أطفالهم وبرائتهم لكن بجد غلط

ربي يثبت علينا العقل والدين

[جرح كبير]

ما اعرف حاجه اسمها استسلام ولا أعرف شيء اسمه مستحيل الحمد لله ...أحارب واجاهد لأخر لحظه مهما صار وكان حتى أصل .....
لكن في كل خطوة أستعن بالله لاني لو اعتمدت على نفسي والله ما أصل لحاجه
كله بفضل الله
له الحمد والشكر

[جرح كبير]

كل شيء حلو في حياتك خبيه ودسه عن الناس .....خليه لنفسك بس اذا تخاف عليه منهم
لكن إذا بايعه انشره وخلي الناس تشاركك فيه وحتى إذا ضاع منك عادي لأنك اصلا بايعه من البداية ما يأثر فيك ضياعه

[جرح كبير]

وانتي بخير ...تقبل الله منا ومنك

[جرح كبير]

لما تلقى شيء يتعبك سكر عليه الباب حتى ترتاح....الكل يدور في راحته لهذا راحتك أولى

[جرح كبير]

انتظر الفجر .....

[جرح كبير]

الناس العاديه الي مايعنوا لي شيء اذا زعلوني وانا ماعملت لهم شيء انتقم منهم وارد الصاع صاعين. ...الحق ما اعرف اسكت لازم أخذ حقي وبصراحة اصير شريره أحس الشر تلبسني لاني ماعملت شيء ليش تقترب مني أبرد خاطري وبعدين خلاص ولا كأني أعرفهم نهائي...


لكن الناس إلي صارت لهم مكانه عندي وحبيتهم بصدق وخذلوني ازعل منهم وما اعاتبهم ....
لأنهم مش مجبورين يحبوني أو مايزعلوني يكفي اني عرفت مكانتي الحقيقيه عندهم و وضحت لي زي وضوح الشمس......وكل لحظه وكل كلمه معهم احترمها وما اضرها اسكت بس... واصلا احتراما لصدقي قبل كل شيء ما اعاتبهم..


أمس وانا بأنام فجأة تذكرت بأني أعطيت بعثرة وردة هنا و وديتها بها....وأنا اصلا متعاركه معها وزعلانه منها وخذلتني لكن ماتذكرت نهائي هذا الشيء وتذكرت اني كنت أحبها .......
سبحان الله عقلي تذكر حبي لها وماتذكر عركتي معها ....مع اني كل الي تعاركت معهم اتذكرهم وأتذكر حتى بعض الجمل الي قالوها في حقي وخاصة إذا جاء الاسم أمامي لكن هي ما تذكرت ....سبحان الله


اليوم قريت وحده كاتبه بأنها وفيه واخلصت في تعاملها مع إحداهن لسنوات عديدة وكانت تعطي أكثر من أنها تأخذ سنوات طويله جدا في الأخير طعنتها وخلتها تفقد الثقه .....طبعا هي قالت بعض التفاصيل لكن انا اختصرتها ماعندي نية اكتب أكثر......الله يعوضها خير



استاحشت غرام موت .....لما اقرأ مناشير كثيرة أمل كلها نكد وهم وغم معظمها لو مش كلها..... مشاكل الناس كثيرة صراحه ويقولوا في أشياء تخليك تغم أكثر
ولما افتح اتفرج على مقاطع انسجم مع مقاطع العلماء لكن لما اتفرج على مقاطع لناس عاديه اتفرج شوي وافوتهم تافهين صراحه يدرهوا الكبد .....مش عارفه على شنو مشهورين كلها تفاهه في تفاهه

[جرح كبير]

مرة قريت قصه بجد قصه قريتها صدفة ابحث عن شيء في القوقل طلعت لي هذه القصه....وقعدت محفورة في ذاكرتي من كثر ماهي جميلة واثرت فيا ....

هذا واحد يحب وحده اعتقد من سنوات يعشقها اذا أصح التعبير فسألاته امرأه عابرة شافتهم بالصدفه مع بعض قالت له هذا مقلب قال لها لا هذا مش مقلب هذه حبيبتي ....انا قيس.....
بصراحه يعجبني الرجل الي يعبر عن حبه لحبيبته أمام الناس ويقولها بالفم المليان حبيبتي وهي في عيوني وماتطلع مكان إلا رجلي على رجلها .......الله يسعدهم ويوفقهم في حياتهم ويجمعهم دنيا وجنه


انا رومنسيه بزيادة واحب النهايات السعيدة الي زي هذه النهايه ما احلاهم عصافير الحب زي مايقولوا.....


المهم خليني من الناس توا انفكر كيف بنوض الساعه 8 صباحا.....يارب أعطني طاقه حتى أكون مصحصه كويس

[جرح كبير]

اعرف شرع الله بس حتى لو كل العالم يشوفني خطأ مايهمني أهم شيء عندي اني امشي بشرع الله


بأصلي قيامي وأحاول انام ....مع أنه أحس صعب

[جرح كبير]

مارقدت عارفه نفسي صعب ارقد.....ممكن بعد الفجر احصل ساعه أو ساعتين نوم هذا إذا قدرت أقوم مع اني أشك ....

قرأت شيء لشخص مبدع في التعبير يكلم في حبيبته قال لها ليتك معي ..قيس .....زعلت عليه حسيت يعبر بكل جواره واحاسيسه الفياضه ما أحب الفراق أحب النهايات السعيدة

اليوم ما أفطرت كويس وبصراحة ماعندي نيه في شيء شوي وبيأذن بأخذ جغمة ماء وخلاص وبأحتسب فيه الأجر لأنه وصى الرسول عليه الصلاة والسلام على السحور

[جرح كبير]

تعرف متى تفتح الطريق أمامك لما تكون مخلص مع الله...يبارك لك في حياتك في صحتك في زوجك أو زوجتك في ذريتك في مالك في رزقك

[جرح كبير]

مش عارفه اواصل أو ارقد ....بعد الصلاة اقرر

[جرح كبير]

استاحشت غرام ....مستحيل أنساه الا اذا ذاكرتي ضاعت مني

[جرح كبير]

مهما صار معك تفتح وتفرج في يوم من الايام....بإذنه سبحانه

كانت عندي ظروف كثيرة في حياتي وكنت جدا مرهقه منها.. فتحها ربي وفرجها سبحانه ...الحمد لله
كنت واثقه ومؤمنه بأنها ستفرج بإذنه سبحانه
كنت ابكي وازعل بدون إرادة مني وينكسر خاطري جدا وما أتكلم ابكي وادعي بس .....كلها انحلت وفرجت بإذنه سبحانه .....لأنه ربي قال لنا بعد العسر يسر وبأنه مع الصابرين وبأنه اذا دعيناه استجاب لنا وبأنه اذا اتقيناه يجعل لنا مخرجا


الحياة مش ورديه الحياة فيها منغصات وصعوبات وبلاء وهموم ومشاكل وضيق ...مش سهل دخول الجنه ....لو كانت حياتنا ورديه وما فيها اختبارات كيف بندخلوا الجنه كيف بنوصلوا لنعيم الدائم في الجنه


الحمد لله على كل حال

[جرح كبير]

الناس تقدم لها تحبك تعطيها تحبك
لكن لما تطيح ولا كأنهم يعرفوك

أثرت فيا إحداهن قالت زوجي معيشني أميرة ومش مقصر لا معي ولا مع أطفاله وحتى أهلي وأهله يكرم فيهم في كل شيء ومش مقصر معهم ابدا...

زوجي خسر في شغله وصارت ظروفنا قاسية من فوق صرنا تحت كل الناس إلي كنا مش مقصرين معهم ولا واحد فيهم وقف معنا حتى أهلي وأهله ولا أحد فيهم ساعدنا رغم أنهم يعرفوا ظروفنا القاسيه.....تقول قلبي واجعني من الناس الظروف عادي بإذن الله تتصلح لكن واجعني الي كنت افرح بيهم واعطي وأقدم لهم حاليا عايشين ولا كأنهم يعرفونا ولا أحد جبر بخاطري وقال بالك محتاجه شيء أو تبي شيء .....حتى لما اجلس وأقول لهم على ظروفنا يسمعوا بس ولا يجبروا بخاطري حتى أقرب الناس مني ......


كلامها أثر فيا جدا ويخليك تطلع بنتيجة بأنه دس قرشك الأبيض ليومك الأسود
وأيضا لاترفع سقف توقعاتك عالي في حب الناس لك حتى لو ضحكوا في وجهك واستقبلوك بالاحضان لأنه ممكن يحبوا الشيء الي عندك من مكانه أو منصب أو غيره .. تحب الناس عاملهم بحدود مهما كان حبك لهم لأنك ماتعرف قلوبهم شنو تحمل لك ...

وأيضا علم اطفالك مرة مرة بالقليل لأنه ممكن يجي يوم ومايلقوا الكثير الي تعودوا عليه ويتأثروا نفسيا لهذا كن جاهز ....

بجد فيه قصص يحكوا فيها الناس تأثر فيك نفسيا وحده قالت والدي كان كريم مع الناس وبيته دائما مفتوح لضيوف والناس بعد موت والدي ولا أحد سأل علينا أو طق بابنا أو قال كيف حالكم ......

الله يفرج على الناس....صحيح القصص تأثر فيا جدا لكن مع هذا أقرأ فيهم إلا القصص المملة زي الي في ليه هذوم مليت منهم رسمي وكرهتهم من كثرتهم تقولي بنات الشعب كلهم نفس القصه عليك حاله

[جرح كبير]

الشخص الي مايحزن معك وقت حزنك ومايفرح وقت فرحك ومايساندك وقت شدتك بلاش منه.....بالعكس فيه ناس وقت الشدة تزيد ألمك أكثر وتستغل جرحك وتعفس عليه أكثر

وفي كل مرحلة من هذه المراحل تظهر الناس على حقيقتها وتتساقط الاقنعه خاصة وقت الشدة والحزن هنا تبان الحقيقه




الحمد لله بأنه ربي معنا

[جرح كبير]

حايرة في الناس إلي تتبع في أخبار الناس
حتى تعيش مرتاح خليك في نفسك بس وخفف من ذنوبك شوي....
الي سعيد ماتقدر تمسك عليه سعادته هذا قسمه ونصيبه من ربي
والي حزين وفي كرب هذا قسمه ونصيبه من ربي
ربي يفرج عليه ويلطف بحاله

الأقسام من ربي وكل إنسان وقسمه لهذا خليك في حالك

[جرح كبير]

لاتزعل اذا كانت صلتك بالناس مش حلوة حتى لو فعلت فيهم الخير ولقيت مايثمر فيهم وبالعكس أذاهم زايد عادي لاتزعل دايما الخير الي بتديره أقصد بيه وجه الله بس ....الأهم صلتك بالله لانها هي الي تخليك في خير وراحه...
سبحان الله حتى لو عملت خير بسيط يرجعه لك ربي بأضعاف مضعفه

الناس تتغير اليوم يحبوك غدا يكرهوك اليوم يضحكوا في وجهك غدا يعبسوا في وجهك اليوم يكرهوك غدا يحبوك وهكذا....


إلا علاقتك بالله كل ماسعيت أنها تكون أحسن كل ماشوفت الخير يجيك والراحة تسكنك




الحمد لله

[جرح كبير]

فيه شيء غريب وحايرة فيه هو البذخ في الضيافة...إسراف غير عادي
وحسيته صاير زي التحدي من الي ضيافته احسن وأرقى واجمل....

ناس غبيه.... واذا كانت ضيافتي احسن والناس تكلمت عليها شنو استفدت اصلا


صحيح الضيافة فيها أجر واكرام لضيف ومن تعاليم ديننا لكن لما تكون نيته نفاق وحتى الناس تتكلم عليه وعلى كرمه أو على جمال ضيافته يمشي يراجع نفسه صراحه

[جرح كبير]

انا مشكلتي اذا فكرت في شيء أو حطيت شيء في رأسي اتعب وأحس راسي بيتفجر وما انام واتضايق جدا وفي نفس الوقت ما أحب أحد يتدخل في تفكيري لاني أثق في نفسي بس لأنه كل شيء بيرجع علي انا مابيرجع لأحد انا الي بأعيش اللحظه.. بعدين الي أعطاك الفكرة يهرب ويقول لك انا اقترحت عليك كان ممكن لاتاخذ رأيي .....هذا حال معظم الناس

الحمد لله صاير دماغي هاديء لاني تقريبا كل المشاكل في حياتي حليتها بفضل الله سبحانه وتعالى وتيسرت الأمور ومابعد الضيق إلا الفرج .......الانسان يصبر بس

[جرح كبير]

أحب العيون الي لونهم أزرق أو أخضر ....ماشاء الله

إبداع الخالق سبحانه

[جرح كبير]

أحس راسي بينفجر من الصداع مارقدت إلا ساعتين بس تقريبا..وبعدها اختي قومي قومي اقعدي مع فلانه قعدت مع ضيفه قريبه ثقيلة على القلب لكن سايرتها إلى أقصى حد لين روحت.....
أحس تعبانه بشكل وغدا لازم أقوم من الصباح الباكر منهكه بكل ما للكلمة من معنى لكن فوق هذا كله مش قادرة أرقد ممكن من كثرة التعب لكن المفروض بسبب التعب ارقد

[جرح كبير]

مش مهم أرضي الناس في هذه الدنيا أو اكسب ود أحد نهائي مايهموني .....دائما أمامي هدف واحد اشوف له من بعيد وأحاول قدر الإمكان أصل له وانا سليمه من كل شيء

على قد ماتحاول توضح رأيك و اسلوبك في الحياة حتى تقدر تتعايش معك الناس وتفهك لا فائدة .....مايفهمك احد ولا يتحملك أحد

حتى لو انت الصح يطلعوك انت الغلطان وانت المذنب......الحمد لله بأنه ربي هو الواحد الأحد لاشريك له سبحانه الي يحكم بيننا بالعدل ويعطي كل ذي حق حقه

[جرح كبير]

الصبر طيب

[جرح كبير]

اعمل الخير يجيك الخير وانت جالس لكن تعمل الشر وتبي الخير يجيك عاد هذا مش كلام

[جرح كبير]

أحس بأغير المدونه إلى اسم جديد زي اكسترا لطف مثلا لكن أحس نفسي خوانه اذا بعت مستراح وظل وارف حتى لو مايعني لي شيء الاسم حاليا لكن في يوم من الأيام كان يعني لي على الأقل احترم المكانه الي كانت له في يوم من الأيام و صدقي معه وأبين له بأني ما ابيع أصلي الوفي بأسم رخيص......مع أنه اسم



المهم .....جاي على بالي زردة في مكان جبلي جميل بصراحه سهفوني الناس إلي يمشوا للجبال

[جرح كبير]

بالصبر يجي الفرج

[جرح كبير]

الحمد لله والشكر

[جرح كبير]

رغم عندي جوال ثاني إلا أني هذا مش قادرة استغنى عنه هو مازال كويس ماشاء الله...محافظة عليه ..لكن مشكلته في الشحن متعبني ومع هذا على قلبي زي العسل بجد....اتنرفز لما يفصل واصير انتظر حتى يرجع كويس والجوال الثاني بجانبي وفايتاته مع أنه أفضل منه في كل شيء لكن هذا مش قادرة استخدم غيره ولا استغنى عنه.....طبعي مشكله

[جرح كبير]

كويس بأنه جوالي هذا جماد لأنه لو كان مش جماد وأذاني مع السلامه بكل سهوله

[جرح كبير]

على قد ما أحب النوم إلا أني ما أحب الصداع بعد النوم أحس راسي ثقيل ويبي وقت حتى يصير كويس

[جرح كبير]

‏لو يَعلَمُ المرءُ ما يُخفي الزَّمانُ لَهُ
لَرُبَّما فَرَّ مِمَّا قد تَمَنَّاهُ!
كم يَعشَقُ القلبُ ما فيه الهلاكُ لَهُ
والخَيرُ -يا قلبُ- ما يَختارُهُ اللهُ.

[جرح كبير]

أحلى شيء لما تكون في سلام مع نفسك...تحس كل شيء تشوف فيه جميل وحلو مهما كان...
لما توصل مع نفسك لقناعه ورضى تام تحس بالهدوء والسكينة.....الحمد لله ..كل شيء بفضل الله سبحانه وتعالى

وأنا اكتب في هذه الكلمات جت على بالي الجادل مع اني كنت ناسيتها نهائي حاليا بس جت في البال......الله يسعدها وين ماكانت

[جرح كبير]

الصيف بيدخل علينا وربي يستر من النو ...

قبل فترة شوفت مقطع الشيخ عبد الرزاق البدر اتصل بالشيخ الفوزان فلما اتصل اول مرة في حياتي اسمع الشيخ الفوزان بهذا الصوت لما قال لشيخ عبد الرزاق كيف حال الوالد قالها بطريقة محب لشخص اللي يسأل عليه بجد اول مرة في حياتي اسمع هذه النبرة من الشيخ الفوزان دائما جاد في نبرة صوته لكن هذه النبرة مميزة واول مرة اسمعها منه فقلت اكيد صاحبه ....
خلاص سمعت المقطع لكن دائما هذي اللهفه في السؤال عن والد الشيخ قعدت في بالي وانا من طبعي ما افوت شيء لفتني...
يعني دايما اصير أفكر في الحلقه المفقودة لين تكتمل الصورة عندي حتى ارتاح من التفكير ...
مع اني ما ابحث صراحة عن الحلقه المفقودة لاني أمل وما أحب ابحث وادور واشوف لكن سبحان الله تجي الحاجه لعندي ولو بعد فترة طويله...

المهم اسمع في مقاطع واشوف مكتوب في المقطع عبد الرزاق عبد المحسن العباد بديت أتأمل في الاسم وأقول الشيخ عبد المحسن ولده الشيخ عبد الرزاق فقلت آه لهذا الشيخ الفوزان سأل عنه لأنه صاحبه أبوه الشيخ عبد المحسن العباد

سبحان الله.....



حتى في حياتي العاديه لما نبي نعرف شيء عن شيء ما ....افكر فيه لكن ما أبحث أو أسأل عنه ومع الوقت اعرف كل شيء بدون مجهود مني....سبحان الله


الله يرحم علماء المسلمين ويحفظ من مازال حيا منهم وينفع بهم المسلمين

[جرح كبير]

غرام غرام وينك ياغرام .....غرام بيتي
هنا أحس نفسي ضيفه

[جرح كبير]

كله من الثلاثي الي تعاركوا وجابوني هنا ....انا ليش اتفرج على عركتهم حتى لو كانوا أمامي المفروض غمضة عيوني ....لكن قدر الله وماشاء فعل...كل شيء يصير لحكمه

[جرح كبير]

ب أصلي وانتظر الفجر.....اصلا هذا الوقت أجمل وقت عندي
أجمل شيء في الحياة هو خلوتك مع الله وخاصة في هذه الساعه

كل الي عندك قوله له وهو يعطيك ويريح بالك وينور طريقك ويغفر لك

الله يثبتنا ويهدينا ويتقبل منا

[جرح كبير]

اليوم كثرة نوم جدا وراسي صار ثقيل بشكل.....ما أتحمل التعب واذا تعبت اصير انتظر متى انام بس

[جرح كبير]

كل موقف وكل قصه تصير معانا في حياتنا تحتاج ردة فعل مختلفه عن اللي قبلها مش كل ردود الفعل تكون نفس الشيء ولا كل الناس تكون معاهم بنفس التصرف ونفس الرد......

مكانة الشخص عندك الي كانت في يوم من الأيام هي الي تحدد ردود فعلك وتحكمك فيها وانا عن نفسي أركز جدا عن هذا الشيء حتى لو الشخص كسر بخاطري أو اذاني أو اتعبني نفسيا اشوف لهذي المواضع ..
بجد أركز جدا واختار التصرف المناسب للعشرة والاحترام الي كان في يوم من الأيام وفي نفس الوقت اختار التصرف الي يناسب مشكلته معي.....

ناس ما عندي معها أي اختلاط أو عشرة أو ذكريات وهم الغلطانيين في حقي تصرفي معهم بيكون عبارة عن مشكلة ولسان طويل والي بيصير يصير لأنه مالهم مكانه في نفسي ولا في يوم من الأيام شوفت مكانتي عندهم لهذا عادي أتصرف زي مايعجبني ....


لكن ناس عندي معهم عشرة واختلاط وذكريات وهم الغلطانيين في حقي هنا أقف... بجد أقف وأفكر واتحكم في تصرفاتي ومشاعري الشريرة لاني شريرة اذا غضبت ....
أضع حد معهم وامشي ولاعاد التفت لهم و ماعاد اشوفهم كل حياتي .....


بطبعي احترم كل شيء كان في يوم من الايام جميل وكويس في حياتي واحترامي هذا لنفسي ومشاعري قبل مايكون احترام لشخص نفسه.....

المواجهه والتحدي والنقاش في شيء فات وصار هو خسارة لك وتعب لصحتك وعقلك وحياتك....لهذا اشتري راحتك والي صار صار وقفل الموضوع وفي كل الحالات امشي وفوت وخلي كل شيء وراك وتستمر الحياة

[جرح كبير]

كان يوم جميل وهادىء بالنسبه لي فرحت بيه وهذه الفرحه بفضل الله سبحانه وتعالى ....له الحمد والشكر

[جرح كبير]

مرات تصادفك أشياء ماتعجبك ولا تتحملها اصلا لكن التغاضي مطلوب حتى تقدر تريح نفسك وبالك وتحط رأسك على المخدة وانت مرتاح ومطلع كل شيء من رأسك

[جرح كبير]

شوفت طبخه على النت عجبتني وخاطري اجربها أخذت الطريقه بالضبط لكن المشكله كسلانه جدا اعملها كل يوم اقول اليوم ومايصير.....

[جرح كبير]

سبحان الله من قال بأنه تفكيري وخاطري قبل سنه يختلف كليا عن هذه السنه بالذات ....
سبحان الله سبحان الله لو أحد قال لي بيجي وقت بتغيري رأيك اقول مستحيل مافيه شيء يغير رأيي واتحداك...

لكن سبحان الله ربي خلاني اصعد درجه درجه وشوي شوي واكتشف نهاية السلم شنو فيه.....
كنت واثقه من نفسي زيادة عن اللزوم ممكن لكن كنت في نفس الوقت أستعن بالله لأنه علم الغيب مايعلم به أحد إلا الله..

انقذني ربي من شيء كنت اشوفه حياتي لكن هذا الشيء هو العكس تماما ....

لعله بعمل خير انا عملته ونسيته ربي كافأني بيه وانقذني...
لعله تعليمي للبنات أو لعله دعائي أو نصحي للخير أو صيامي أو صلاتي أو مساعدتي أحد أو دعوة خير من أحد ما أعرفه
لعله عمل صالح عملته ونسيته وربي انقذني به

القرب من ربي هو الي يصلح لنا حياتنا


الحمد لله والشكر