عند شبّاكك .. حصريه

[أنا فداهم]

*

*

صباح الخير ..



الصبح والله يا زينه مانه بـ شوفك
لا فتَّحت عيني من النوم بـ وصوفك

يفرق كثير إن صحيت لحالي أتململ
عن يومٍ أصحى على همستك و كفوفك

ياحيّ والله "صباح الخير" من فمك
يا قربها من حياك البارح .. وخوفك

أهمس ولهتي علي؟ من قبل لا أفتّح..
ويرد عنّك خجلك .. وهزة كتوفك !

لبيه ياغايتي .. ياراحتي .. يا انتي
لبيه صبح الورود اللي بنفنوفك

لبيه يا وقفتك جنبي عشان أصحى
ماودي أصحى عشان يطوّل وقوفك !

وإذا تعبتي .. تعالي واجلسي جنبي
وأنا بوقّف عشان أحميك .. وأحوفك

أحميك من كل شيٍ حولك بـ يشرق
ودّه يلحّق على صبحك .. ومعروفك

الشمس ما تشرق إلا عند شبّاكك
لأنها يوم تشرق جت تبي تشوفك !

والطير غرّد غزل .. وده يقلّدني !
لاقمت أصبّح على الطير اللي بجوفك

حتى الرسايل عشان تصبّح بكفّك
ترمي عمرها رمي من عالي رفوفك

خلّيهم وقربي يمي , وأبشرح لك
وشلون جمرك يبرّد كبد ملهوفك !

وشلون أقرّب إلين أصير ما أشوفك
عشان أشوفك .. مثل ماودّي أشوفك!

وأقول ياربي إحفظني لها دايم
وإنتي الحيا يمنعك من رفعة كفوفك !

*

*

[أعد النجوم]

صح لساااانك شاعرنا انا فداهم

أبيات قمه في الروعه

بوركت

يختم ل3 ايام مع التقييم

[غَـزل ،]

'




ياحيّ والله "صباح الخير" من فمك
يا قربها من حياك البارح .. وخوفك


صح لسانك
ابيات تلبست بِ فتنة الصَباح
لا هنت.

[خياآل]

ياحلو والله صباح الخير من فمك :32:

شطر يختصر كل السواليف
صح لسانك
والقصيدة فيها ملامح من قصائد خالد المريخي
مبدع فداهم

[وارف]

نص مليئ بالمشاعر الدافئة
التي فاضت من وجدانك لترسم ملامح وروعة قيفانك
صح لسانك وفكرك شاعرنا العذب انا فداهم
على هذه الابيات الجميلة
وعلى هذا الاحساس العاااطر


لروحك قوافل من المسك

[الْياسَمِينْ]

رقيقة وجذابة تأسر النفوس المتعبة والجريحة
لتدغدغها وتبعد عنها الملل في هذا الصباح..
أيها الشادي فوق أغصان الذوق
شكراً لكلّ حرف خطته أناملك بهذا الرقي:ورده: