أريد سائقة ...

[مشكلتي]

السلام عليكم ورحمة الله وبركاته
أريد سائقة وبيتي صغير لكني أريدها تنظفه هل ممكن اذا أستقدمت سائقة تقبل ضروري لأن عمري ٤٥ وشلت الرحم ولدي الآم بالعظام وضغوط نفسية فأحتاجها توديني المستشفيات وتوصلني مشاوري

[M.ahmad]

أطلبي سائقه أندونوسيه بشرط تعمل معك خادمه ولكن الله يعينك زيديها في المرتب

[مسكك الغلا]

الآن لهن مهن يجن ع حسبها العاملة المنزليه غير عن الممرضة
وغير عن الطباخه وغير عن السواقه ..

تجي مهنتها محدده مسبقا ولو تم تشغيلها بغير مهنتها المتفق عليها يحق لها تعترض وترفع شكوى ..

قبل كانت العاملة المنزلية كل شي تسوية حتى الغنم تحلبها وتعلفها مع كفيلتها وعادي الآن حددو المهنه الي جايه عشانها

بامكانك عند التقديم تقولين لهم وش تبين عامله وسائقة بنفس الوقت ولا اعلم هل هناك دمج بالمهن او لا

[BlueCocktail]

هاتي من الجنسيات الاسيوية مسلمه وتصير لك مثل اختك اذا عاملتيها بالحسنى
الله يوفقك ويشافيك يارب

[نجمة]

توكلي وشوفي
بس اتفقي معها واعطيها راتبين لأنها تعمل معك بعقدين
انتبهي من الظلم والله ييسر لك الي فيها الخير يارب

[السهم الأخير]

الله يسلمك ويعافيكم من كل شر وأجر وعافية إن شاء الله .
من وجهة نظري حسب التجربة ماشاء الله نحن بيتنا معهد تدريب للمعاونة المنزلية (الشغالة أو الخدامه )
تفضلوا الإخوة والاخوات اللي سبقوني بالرد بمعلومات فعلا صحيحة وعن تجربة .

الاندونيسيه او حيدر أباد تفوز هههه ، اوغندا وزنجباريه او نيباليه لا تقربي واذا معد به حل نيباليه وتحملي افلامها الهنديه كل يوم .

الحمد لله وضعك كعائلة صغيره ممتاز ومقبول جدا وهذي نقطة مهمة جدا عندهم وعند المكاتب .
خلوني افصفض كل تجاربنا مع مكاتب العماله المنزليه . لعبتي كل ما بغوا يجيبوا عاملة منزل يخلوني سفير للمكتب هههه .أنا مقد شفت معاونة منزليه كانت بتخليني آكل اوراق الشجر من القهر غير وحده أوغنديه . أعوذ بالله كأنها جايه تطلع غضبها فينا وأحسن شي فيها الانجليزي أما عربي ما تدري وين الله حاطها مع أن المكتب قالوا لي إنها تتكلم عربي بلبل . شفنا البلبل أعوذ بالله . أمي الله يطول فعمرها معها غنم وذي الدبابه اول يومين سوت اضراب عن العمل وقالت بيتكم كبير قلنا نو بروبلم نزود الراتب . وافقت ولكن ثاني يوم قالت ضرسي عورني وخلعنا ضرس العقل . استراحة محارب يومين وبعد أيام لا هي عرفت تغسل صحن ولا نحن عرفنا نفهمها .
بعد اسبوع قالت أبغى تلفون وتلفزيون كبير هههه.
ياجماعه ظهر علم اوغندا في مخي وقلت : يا مطولك ياروح هذي جايه سياحه مهي خدمة معاونه منزليه.
بلغت المكتب قالوا حاضرين وبدلوا لي وحده من حيدر اباد .
طبعا بعد فرعون اكيد تشوف شارون شخص طيب . ذي الثانيه تتكلم عربي اخواتي المتزوجات بدن يعلمن الحرمه كيف تشتغل وكذا . قالت كلو معلوم . كفؤ بنت حيدر اباد .

اسبوع وقالت بغيت عند اختي اسلم عليها ومعد طلعت من عندها . يابنت ايش صار ؟ مافي شغل بيت مال انتا .

ليش ؟
قالت : اريد بيت واحد نفر . يعني مثل حالتك بالضبط يا وخيتي يصلح لك وحده من حيدر اباد او اندونيسيه ومع الايام راح تتفهمك ومع نصائحك لها راح تتولد عندها النظافة الشخصية لأعلى مستوى تحت اشرافك.

عيوب البنجالية : شوي التنظيف مش ولا بد .
عيوب الاندونيسيه: يبغالك تراقبيها اخلاقيا خاصة إذا كانت تتحرك بحرية في المنزل .
عيوب النيباليه : الموبايل ٢٤ ساعه وكل يوم تتحجج بظروفها ويعصبن بسرعه وبعد شوي يضحكن يعني مشي حالك وعطيها كلام ايجابي .

عيوب الاوغنديه : رباه الهمني الصبر بس . لا تطب بيتكم .

الكل في الطبخ مشي حالك يعني اذا معد به حد فالبيت يطبخ جهز نفسك للتحمل ومشي حالك اذا عجبك الاكل كل واذا ماعجبك علمهن الطبخ شهور لأن الاغلبيه باحثات عن مال محد خبير خدمة منزليه مجرد فقر خلاهم يمتهنوا هالمهن .

الله الله في حقهم ورواتبهم وعلاجهم الله الله
لهم عيوب كبر الأرض ولكن الله الله فيهم وفي حقوقهم ولو اضطررت للنوم كدر الخاطر مغموما و مظلوما أو مسروقا أفضل من أن تنام مرتاحا وظالما .

طولت عليكم اختي الكريمه ربي يرزقكم ما تقر به العين ويسهل الامور بقدرته .