ابغا حل يا احلى اعضاء

[مشكلتي]

عمري ٣٦ عندي بنين ٨و٥ سنين ولد سنه ونص بنت ٨ شهور امي عمرها ٥٢ إذا جيتها زيارة احس شغل بيت يكثر لأن ماعندها في البيت الا اخواني صغار بنت ١٣ وولد عمره ٩ مايشتغلون واحس مع عيالي يصير مطبخ شغله كثير وبيت احيانا اتركه على امي لاني احسها أنشط مني صدق والله فهل هالشي غلط او عيب لاني قد سمعت نقد وش رايكم ابغا حل :MonTaseR_51:

[أمل.]

اربعة والمطبخ ينحاس
عمر عيالك طال عمرك
يعفس فندق موبيت
اغلب البنات
المتزوجات يعتقدن ان الذهاب لبيت اهلهن
إستراحة إذا تعبتي منهم نظمي النسل
من شأن يمديك تلحقي ع تربيتهم
وكان الله بعون امك

[M.ahmad]

مايصح التبطح في بيت أمك أنتي وأطفالك بدون فعل شيء
لابد تساعديها في شغل بيتها
حتى لا تكوني على لسان حالها (( ياحسافه تربيتي فيك ))

يكفي عند زيارتكم لها تطبخ أكلكم وتكنس بقاياكم وتغسل ملابسكم لوحدها وهذا بحد ذاته عقوق ، وليس عقوق فحسب بل قمه في الوقاحه تزوريها وتناظريها وهي تتعب لأجلكم بدون ماتساعديها

أسألي نفسك (( لو كنتي بدل أمك هل سيعجبك الوضع ؟ ))

لذلك نصيحتي سابقيها في شغل البيت ولو تحلفي عليها ماتشتغل وتشتغلي بدالها يكون أفضل ، هذي أمك لابد أن تكرميها قبل أن تكرمك .

[العنقاء]

اووهه والي يرحم أهلك

لا تتركي البيت من دون ما تنظفيه ولو كانت امك غزال :MonTaseR_203:

احسه من العقوق انك تتركي البيت معفوس وراك عشان امك تنظفه!!

حتى الطبخ اطبخيه ياعيني :icon10:

[وسن]

؛



انتي وطفل او طفلة عمرها ٨ سنوات
٨ سنوات يعني تفهم معناته ممكن تساعدك بامور الترتيب
مو احمال ثقيلة لا لكن ترتب غرفتها مع اختها الصغيرة والالعاب او المجلس او تجيب الغسيل وهكذا وممكن تجلس تساعدك بترتيبه
ربي بنتك إذا شربت أو اكلت تنظف بعدها
عشان تخففي الحمل على امك ع الاقل
اهمال هالجانب اشوفه في كثير عوائل
تصير بنتها بطولها ولا تعرف تطبخ بيضة وتتشرط على امها اش تبغى غدا وليش ماغسلت الثياب
اسسي اطفالك صح من البداية
لاتقولين هذا ولد او صغيرة
خمس سنوات مثل ما بهذلت الالعاب بعد ما تخلص لعب قوليلها تعالي نتساعد ونجمعهم
اهم شي التشجيع ماهو بالتعنيف
واذا ماسمعوك مرة مرتين لاتضغطين عليهم
إنما اشركيهم بشويش معك

موفقة ان شاء الله

والله الله بأمك وانا اختك

:81:

[الجده]

عقوق ياحبة عيني

متاكده انك دوووبيه من كمية الكسل

احسك المتزوجة اللي نشيطه لبعلها

وعند امها تمرض وماتعرف القبله


تاكدي بكره بزرانك يسقونك نفس الكاس


استعيني بالله وعدلي من نفسك

[الخواف]

الوحدة من المفروض عند زيارتها لأي شخص ( جارتها أو صديقتها أو أختها أو غيره ) لازم قبل ماتمشي من عندهم تنظف وترتب كل اللي خربوه عيالها ...فما بالك لو كانت رايحة عند أمها ...



ومعروف ان الناس يكرهوا زيارة الحرمة اللي عيالها كثيرين حركة ويعفسوا البيت فوق تحت ....وهذا شي طبيعي انهم يكرهوا زيارة الحرمة اللي هذا طبع عيالها ....وهي حضرتها ماتفكر تنظف الخراب اللي مسوينه عيالها .....

وأصلًا من المفروض تنهى عيالها عن الأذية داخل بيوت الناس ...لكن هي ولا على بالها ...وصاحبة البيت ماسكة غضبها وجالسة تسب فيها وفي عيالها بينها وبين نفسها ..



بعض الحريم فيهن قلة ذوق وقلة أدب لدرجة ان الناس تقلب نفسيتهم زفت إذا عطتهم خبر انها بتزورهم ...






خلاصة كلامي :

من المفروض ان أمك ماتخليك تطلعين من باب البيت إلا وأنتي منظف ومسوية كل الخراب اللي مسوينه عيالك .....وتدفعين كل شي أتلفوه عيالك من تحف أو غيرها ... لكن الأم مايطاوعها قلبها انها تسوي الشي هذا في بنتها ...


لكن من وجهة نظري شايف ان الأب يقدر ينبه بنته بخصوص انها بهذلت أمها هي وعيالها ...طبعًا إذا كان مهتم ...

لكن مشكلة بعض الآباء ولا فكر ولا سأل عن الأشياء اللي تحصل في البيت من طرف بناته وعيالهن ...فقط ممكن إذا جا بـ ينام يهاوشهم لو أزعجوها .. وغير كذا كأن الأمر لا يعنيه ..




نسأل الله العافية ...

...

[حفيد الأكابر]

مساعدتكِ لوالدتك
من بديهيات الحياة
ومن أعظم ابواب البر
وأوجبه ..
أما كونكِ تتركين على
والدتكِ كل العبئ دونما
وازع منكِ أو ضمير يتحرك
فهذا ليس من المروءة في شيء
وليس من الفطرة السليمة ابدا
انهضي وانفضي غبار
التراخي والكسل
وارتدي ثوب الجد والعمل
فما أنتِ عليه الآن عقوق
انتبهي على نفسك جيدا
الآن أنتِ أم لأطفال صغار
وغدا سيكبرون وتتجرعين
من نفس الكأس

اتقي الله

[acroot]

الله يخليهم لكي بس أعتقد يوم أو يومين كافي عند والدتك ومولازم طبخ ما حبكت ، يعني شي بسيط من بره أو طبخه سهله تفي بالغرض وحتى الصحون والملاعق ورق وصلى الله وبارك

[صفصف]

انا شايفة
عادي
لفترة مؤقتة
بكون عندك شي شاغلك
في ذهنك
يعني بعد فترة
بتصور راح يرجع نشاطك
وراح ترجعي تقومي
بمهامك بس عادي
يعني فترة وبتمر
ما يكون لك فكر رايحي
اعصابك شوية
ولدرجة انك راح تشعري
انك راح ترتاحي اكثر
اذا ساعدتي الاهل

ودمت بخير من الرحمن

[السهم الأخير]

نحن عائلة كبيرة ولله الحمد اخواتي إذا جونا يسون مثل الدور كل وحده تتفنن تسوي غدا او عشاء وتساعد المعاونه المنزليه اللي عندنا وبعد الغدا والعشاء يجي المدح والتقييم اللي يرفع المعنويات للسماء . مافي حماس بدون تحفيز حتى الاخت اذا سوت شاي او الزوجه امدحها اول ما تصب الشاي . ياسلام هذا شاي مخدر بطريقة تخليك تبغى بس تشوف الكوب . يعجبهم المدح ويستاهلن المدح اما الرجال فيحبون الثناء . عشت بارك الله فيك . ذيب . الدنيا سلامات طالما عندك شغلتين . اما لسان يعزز بكلام طيب او جيب يعزز بريال حلال طيب والنتيجه معنويات وعطاء مستمر . جربوا اليوم وشوفوا النتيجه . الحمد لله على نعمة أن امي على قيد الحياه واخواتي قرة عين تبارك الله وبارك الله في نساء المسلمين . الحل عند الرجال في هذه المواضيع طالما هم اكثر المستفيدين من الطبخات والترتيبات . ضخ فلوسك وكلامك الطيب والدنيا سلامات .