شاب عندنا في الحي ملك جمال

[مشكلتي]

في شاب عندنا بالحي نسميه ملك جمال نتمنى نظره منه واكاونتاته بحثت عنها فحسابات محافظتنا وسويتله فولو وتحججت بمراسلته لكونه يوصل اغراض شفت طريثته بالمراسله كانه ماخذ وجه علي ويعرفني ومره بالمزح قال انتي هايشه ورديت بكلمه تعبر عن قهري من كلامه ومره سال عن طولي ووزني فقط للسوالف وانا مزحت قلت له انا من الجنسيه الفلانيه وقال حلو جسمهم متناسق هالجنسيه ومره كان يتكلم عن حينا ياويلي لو عرفني بروح فيها وخاصه يعرف اخوي من زمان ومره ببدايه المراسله قلي اذا مرتاحه بالتواصل واذا مب مرتاحه اخبره عشان يقطع الكلام انا طبعا حتى لو مامرتاحه ما ارفض ورديت له لا اذا مليت راح اعلمك والان كذه تواصله قليل صار بس صارلنه ٣ ايام من تراسلنا هو (كوميدي كثير كلامه مضحك وعلى نياته بشكل كبير) ومره سالني عن كلمه شوي مقززه ومعروفه لكن حلف مايعرف وش تعني الكلمه بعدها قال اسكتي مابي اعرف معناها اذا مقززه توني ماكل لكن العيب فيني اتحسس بالزايد كيف اعرف شخصيته اكثر؟ وكيف اخليه يحبني ويطلبني بالحلال؟ اريد اتقرب منه حتى المراسلات منه قلت شوي واستحي اسال عنه اقول له وينك حتى بالامس عاتبني لان ماسالت وقال عرفت اني مو مهم عندك لكن انا استحيت ابادر

[M.ahmad]

بحثتي عن حساباته حتى عثرتي عليها وقاعده الآن تتكلمين معه وهو قاعد يكلمك وباقي تقولين تبين تتعرفين عليه ..؟
خلاص معاد يبي لها تعارف أكثر من كذا إلا أنك تصارحيه بحبك له ورغبتك بمعاشرته

وتطمني إذا صارحتيه لن يتردد في مبادلتك نفس الشعور لأن رجال هذا الزمن إلا ماندر إذا أتتهم فرصه دسمه كهذه من فتاه غبيه مثلك لا يفوتوها ، بل سيكونون فحوله بمعنى الكلمه ولن يقصرون بواجبهم ولو بحكحكه من فوق الملابس

ولكن لا تحلمي يتزوجك لأن أولاد الناس لا يتزوجون بهذي الطريقه إلا في حالتين فقط وهي :
١- إذا كانو منبوذين داخل مجتمعهم بسبب أخلاقهم وسمعتهم السيئه
٢- إذا لم يجدون بنات لدى معارفهم وقرابتهم لزواج
وهناك حاله ثالثه ولكني سأستبعدها وهي : لنية المتعه المؤقته ثم الطلاق

لأنه في الغالب الرجل إذا بحث على تعارف لنية الزواج عبر الأنترنت أو من بعيد يريد إخفاء شيئاً عن حقيقته ، فما بالك إذا كانت البنت هي من بحثت عنه .

//
ملاحظه :
إذا كلامي زعلك تأكدي بأني تعمدت ذلك
وإذا لم يزعلك تأكدي بأنك أتصفتي بكل معاني الدلاخه .

[جــنـان]

كلام اللي قبلي لا غبار عليه ..
بس من كل عقلك تصدقي رجال انه ع نياته !!! ولا انقص من رجولة احد

انتي والله اللي ع نياتك وجماله ع قولك ساحرك هذا اذا كان فعلا جميل وحلو
و٣ ايام من تواصلك معاه صار يعاتب !!
كيف اقتنعتي !!
ما اقلل منك بس حاليا وبهذا الزمن حتى الزوج بزواج تقليدي ما منه امان
فكيف واحد تعرفيه معرفه سطحيه وتبيه يتقدم لك !!
فكري قبل ما تنجرفين وراه .. اقصد ابتعدي وبلكيه :)

[غَـزل ،]

بالامس عاتبني لان ماسالت وقال عرفت اني مو مهم عندك لكن انا استحيت ابادر

طيب ابي اخذك ع قد فهمك للحياة
في رجل جاد بعلاقته بعد 3 ايام بيقول انا مو مهم عندك؟
يعني امداكم تكونوا مهمين لبعض !!


ياحلوه واضح انك صغيره و مراهقة
و حتى لو انه مو حلو والبنات الي حولك رفعوا فيه بيحلو بعينك :)
واتضح لي من اهتمامات سواليفه شخص مو قليل شر
وزنك وجسم متناسق والخ .. هذى كلها تلميحات
بس مايقدر يجيك سيده لانه يعتبر حسابه الشخصي وسمعته تهمه قبل سمعتك :b090:
لذا انتبهي ثم انتبهي اغلب قصص القتل و السجن
تجي من ورا خوات يراسلوا اصدقاء اخوانهم وتنجرف البنت بدون وعي :)
يعني جميل تشوفين جماله شخص ممكن يستحق يكون اب لاطفالك :)


الرجل بشكل عام والاكثريه منهم
ماتشدهم الي ترسل وتفرض نفسها عليه
والشاهد بذلك قصه مشهوره تروي طريقة زواج والدتها
اول مرا تصادفوا بشارع اعجبها هي لكن ماطالعت فيه ابداً
خلاف البنات الي حولها كانوا يطالعوا فيه
لانه ع ايامهم كان الرجال برستيج ويشتغل بتجارة
يقول هنا انجذبت لها لانها ماطالعت فيني ابداً وغضت البصر
وثاني يوم تصادفوا ونفس الشي تعدت من جنبه ولا كانها تشوفه
طوالي قال هذى الي ابيها وارسل خواته يخطبونها


لذا اتركي هالطريق لوجه الله .. وربي بيعوضك اجمل من هالطريق
وجماله له هو ولو صار نصيب بيطفشك
بمغازله ونظرات البنات خوذي لك واحد انتِ اجمل منه :)
وانتبهي لنفسك لا تسمعين لمغريات افكارك.

[سلطان الجبل]

اولاً اتمنى لك زوجاً صالحاً ما دمت تريدين الزواج
وهذا شيء ايجابي ان تطلب البنت الزواج في وقت
صار الزواج هو اخر هم بعضهن وبعضهم وذلك لكثر
نشر مواضيع الانفصال وعدم التألف بين الازواج…

ثانياً هذا الذي تقولين عنه ملك جمال سوف يكون علة
عليك اذا تزوجتيه . لان العيون الزائغة سوف تلاحقه
هنا وهناك واحتمال كبير يكثر معجباته اكثر في اوساط
عائلتك من قريباتك تحديداً وهذا سوف يشعل بينك وبينهن
ازمات وقطيعة…
لا تفكري مثل ما يحدث في افلام بنت الحي تلاحق ابن الجيران.

ثالثاً .. اقول مادمتِ راغبة في الزواج دوري على شخص
صالح ذا خُلُق ودين،، ذا حياء.. هذا سوف يفيدك في دنياك
واخرتك !!!

[رَوْحٌ]

غالباً الطيور على أشكالها تقع

عادي ممكن يكون على نياته فعلاً وأنتِ على نياتك
ومثل ما أنت مهتمة بالجمال هو مثلك يهمه الجمال والمظهر

و دام أنه عاجبك ل هالدرجة و نيتك بالحلال

اتركي التواصل والمراسلات
ما يصير أنتِ تبادرين وتراسلين شخص غريب

بعدين ادعي أنه يكون نصيبك
وإذا هذا الشخص فيه خير لك
الله راح يجيبه لين بيتكم
ولا تفكرين أنه مستحيل عادي كل شي ممكن
الدعاء يجيب كل شي

وبكذا بتكونين خذتي اللي يعجبك
والله يهني سعيد بسعيدة

بس لا تنسين تعزمينا على العرس


وإذا ما صار نصيب خلاص يعني أنه ما يناسبك
وانتظري نصيبك وارضي فيه
يعني لا توقفين حياتك على هذا الشخص
لو جاء غيره استخيري وشوفي يمكن يكون أحسن من هذا

[الخواف]

المخدوع هو الشخص اللي راح تكوني من نصيبه ...لأنه ما يعرف ان ست الحسن والجمال اللي تزوجها كانت تكلم شاب بـ اسم الحب والنية الطيبة ...!!


أعتقد لو يعرف زوجك المستقبلي عن علاقتك مع الشخص اللي تتكلمي عنه راح يشك فيك.... .... واحتمال يصل فيه الأمر انه يشك في عياله اللي من صلبه ...





خلاصة كلامي :

اقطعي علاقتك معه .....واستري نفسك قبل محد يكشفك ..


الشخص اللي جالسة تكلمينه ما راح يخليك أم لعياله .....راح يتزوج وحدة صاينة نفسها من جميع النواحي ...


وعلى فكرة حتى اللي يقرأ كلامك الآن راح ينظر لك نظرة استحقار ...يعني شايفك مش محافظة على نفسك ...


بدليل ان ولا واحد من الشباب اللي في المنتدى راح يتزوجك حتى لو كنتي ملكة جمال الكون ...طالما عرف قصتك ..


وهذا يدل انك ماشية غلط وبقوة ....





نسأل الله العافية .........

[رَوْحٌ]

الرجل بشكل عام والاكثريه منهم
ماتشدهم الي ترسل وتفرض نفسها عليه
والشاهد بذلك قصه مشهوره تروي طريقة زواج والدتها
اول مرا تصادفوا بشارع اعجبها هي لكن ماطالعت فيه ابداً
خلاف البنات الي حولها كانوا يطالعوا فيه
لانه ع ايامهم كان الرجال برستيج ويشتغل بتجارة
يقول هنا انجذبت لها لانها ماطالعت فيني ابداً وغضت البصر
وثاني يوم تصادفوا ونفس الشي تعدت من جنبه ولا كانها تشوفه
طوالي قال هذى الي ابيها وارسل خواته يخطبونها

صح كلامك
بس في حالات تكون غير

أنا أذكر مرة قرأت قصة لوحدة
كانت تحكي كيف عرفت زوجها

هي عايشة برا بدولة أجنبية
وكانت لما تطلع مكان تشوف زوجها بالصدفة
من قبل ما تعرف أنه بيكون زوجها
كل مرة يظهر لها بالصدفة وتحس كأنه في رابط بينهم

تقول ل درجة بالصدفة كانوا بنفس اليوم
يلبسون نفس لون اللبس
وفي النهاية صار هذا زوجها

سبحان الله هذا كان نصيبها

[العنقاء]

معليش ياختي

وين البراءة. في واحد. يسالك من اول يوم عن طولك ووزنك؟!! :فطسه:

ويتكلم عن( الجسم المتناسق) !!!!

مفروغة من اول ويش غايته ونظرته فيك :فطسه:

تخيلي لو اعطيتيه عنوانك ويعرف اخوك هو ويش يصير فيك؟!


فوقي فوقي ماتقدري تلعبي على راسه عشان يتزوجك

قد انه من يوم ما كلمتيه بدء يلعب عليك :MonTaseR_215:

[رَوْحٌ]

بصراحة أنا أشوفه ممكن يكون على نياته وغبي بعد
لأن ما فكر أن البنت يمكن تكون أذكى منه
ويمكن تخدعه وعلى طول رضى يكلمها

وترا الخبيث ما يجي يقول كل شي بصراحة ووضوح
لازم يلف ويدور ويخبي نواياه ويبين العكس

نفس النوع اللي يقول خلينا أخوان ولا صداقة بريئة
أو يقول ما يهمني الجمال وأهم شي الأخلاق
وهو كذاب متقطع ع الجمال
وما يقول كذا إلا لوحدة شايفها جميلة أصلاً
بس ما يبيها تفكر أنه تافه وسطحي وأكبر همه الجمال
يعني مخداع ومتلاعب

يكون يشبه الذئب اللي في قصة ليلى والذئب
وإذا كانت البنت مثل ليلى راح تنخدع فيه ويفترسها

لأن شخصية ليلى بريئة وتحسن الظن
وما تتوقع الشر