في حيره من امري

[مشكلتي]

عندي صديقه عزيزه وغاليه عليه وعشره عمر لكن شوي يضايقني اسلوبها وطريقتها باعتبارها صديقتي تمزح معي تقول لي سلفيني مفلسه وحولي لي طيب انا ما اشتغل انتي تشتغلين عادي اعتبرها تمزح لكن شوي كلماتها تقول لي غبيه وهبله ذاك ليوم نزل قرار ومافهمت معناه قالت لي فلانه شو معناه هذا وشرحت لها حسب فهمي ردت علي انا فاهمه بس كنت بشوفك غبيه او هبله قلت لها مشكوره ردت العفو هنا حسيت هي جد مافاهمه بس ماتبي تبين ماتظن ان شوي بس تحسست عديتها لها المهم وكله لما تمزح معي تقول برميك بالجدر وكذا بس تمزح ادري انا اوفر ومكبرتها ولا تصير هالسوالف بين الصحبات وبعد تقولي اوص تشب من هالكلمات تقول خلاص تعودت عليك يعني اسلوبها شبابي وضحوك بس مرات تنرفز

[M.ahmad]

لا تدققي على مثل هذي الأمور حتى لا تعطي لشيطان مجالاً يحول بينك وبينها
بل أعتبريها سوالف عفويه من داعي المزاح بادليها فيها بنفس الاسلوب

واذا قالت لك سلفيني قولي لها ( من فين ياحسره الموظفين مافي أفقر منهم )
جد والله الموظفين مافي أفقر منهم حتى لو إمتلكو مايمتلكون

أذكر زمان عندما كنت عاطل كان يأتيني موظف متزوج يستلف مني شهرياً سعر الحليب والحفاظات لأطفاله
في أحد الأيام مسكته على جنب وقلت له :
أنت موظف جد وإلا عاطل ؟ لأن مو معقوله تستلف مني وأنت موظف
قال : أيوا والله انا موظف وراتبي 14 ألف ريال
قلت له : المفروض أنا اللي إستلف منك لأني عاطل مو أنت اللي تستلف مني

ولكن بعد أن توظفت إكتشفت بأن الموظفين بصفه عامه يعيشون تحت خط الفقر ، وياليتني ضليت عاطل أسلف الموظفين كان أفضل من أني أبحث الآن عن عاطل يسلفني .

لذلك إذا قال لك عاطل سلفني قولي له سلفني أنت لأن فلوس العاطل فيها بركه .

[العنقاء]

مساءك جميل ياحلوة :icon10:

ذكرتيني زماان لمن كنت ازعل من هالكلمات لاني ما تعودت اسمعها ولا تربينا عليها😂

بس هي عادي من باب الميانة تتكلم كذا:icon10:

عموما ياعيني العبي معها لعبة الصراحة

بيوم حلو جميل ولطيف قولي يلا نلعب لعبة الصراحة

تجيبي ورقين وقلمين تكتبي بالورق اسمك والورق الثاني اسمها تقسمي كل ورقة قسمين تكتبي بالقسم الأول ايجابيات والثانية السلبيات

ثم تعطيها الورقة الي باسمك وتاخذي الي باسمها

واكتبوا اول شي الإيجابيات ثم تتبادلوا الأوراق وتقرؤوا الإيجابيات كل وحدة تقرآ بصوت مسموع :icon10:

ثم تتبادلوا تاني تكتبوا السلبيات وكذا حتتفاجئي انه لك سلبيات كمان ونقاط ماتعجبها وساكنة وتعدي لك

وتتفاهموا على هداوة كل شي ينحل بالمصارحة والتفاهم ياعيني واعطيها بالاخير هدية لو بدك :icon10:


وبس :icon10: حافظي على صحبتك الي ترتاحي لها تهون عليك الأيام :نبض:

[سلطان الجبل]

في رأي كل انسان لازم يكون عنده حدود ما لازم يتعداها
اي شخص مهما يكون عزيزاً ..
قولي لها انا احبك واحترمك ولكن التزمي حدودك معي
وان تركت (بالناقص ) من هكذا صديق او صديقة ..
بعضهم يلجأ الى مثل هذه التصرفات لايجاد ثغرة ما
يستطيع من خلال ترك علاقاته معك .. فإذا كان صديقتك
من هذا النوع قولي لها لا تتعبي نفسك بهذه الشغلات اذا
كنت تشتهي لا تستحي قول من الاخر ..
اما مسألة ان اضايق صديقي بحجة المزح فاهذا انا لا اقبلها
من صديق ايما كان يكون .. الي بدوا يبقى معي يكون مثل
ما انا بدي ويكون مثل شخصيتي يعرف متى ازعل يتجنب
زعلي ويعرف متى افرح فيسعد لفرحي …


والسلام عليكم

[قنصل دبلوماسي]

صديقتك تربيتها عدائية
وسلوك تعويض لأستنقاص الغير

برأيي
حوليها لقائمة الشطب من حياتك

وانسحبي بدون تحميلها ذنب
تكوين شخصيتها

ولا تخافي ستجد بنات يناسبونها
في التعامل


المزح له حدود
هذي البنت إذا كملتي معها
راح تكون مشاكلكم أكبر
من الوقت الحالي

[رَوْحٌ]

بعض الناس يعبرون عن مشاعرهم بالعنف والسب
بس يكون من المحبة
مثل الأم لما تعامل عيالها بقسوة وتسبهم بس تكون تحبهم

وهي شكلها تسوي كذا من الميانة ولأن تعودت عليك
البعض يكون رسمي مع اللي مو متعود عليه
بس يمزح ويضحك مع اللي متعود عليه
ويمكن يكون مزحه قوي

وأنتِ شكلك تتحسسين بسرعة لأن الأسلوب مو نفس أسلوبك

لكن أنا أشوفها صادقة وواضحة
أحسن من أنها تقولك كلام حلوو وتبالغ بالمدح
وآخر شي تطلع حية ومن وراك تسبك

أنت الواضح أنك لطيفة وتجاملين
وهي صريحة يعني عكسك

أتوقع لو حد يغلط عليك وهي معاك راح تدافع عنك
وأنت راح تسكتين لو حد غلط لأنك لطيفة وما تواجهين اللي ضايقك
وممكن تبكين وتزعلين وما تبينين أنك تضايقتي
ما أعرف بس كذا حسيت من كلامك


حاولي تكونين صريحة شوي مثلها
وترا هي صديقتك
عادي لو قلتي لها شنو اللي يضايقك لا تكونين رسمية كثير
قوليها بمزح ونفس أسلوبها

و تقدرين تبينين بردة فعلك وتعابير وجهك أنه مو عاجبك الأسلوب

أو أنك تتقبلينها وما تاخذين كلامها بحساسية زايدة
لو غيرتي نظرتك لها وشفتي أن الناس يختلفون
راح تتقبلين أسلوبها


فكري أنها عفوية وصريحة ومندفعة
كوني أنتِ العاقلة والمتفهمة

غالباً الصداقات اللي يكون فيها اختلاف بالشخصيات تدوم أكثر
عكس اللي يكون فيها تشابه بالشخصيات أو يكون فيها مجاملات زايدة

وأنتِ بنفسك قلتي عشرة عمر
يعني طنشي لا تخربين علاقتك فيها

في ناس نقبلهم حتى لو عندهم عيوب بس لأننا نحبهم مو لأنهم كاملين

عشان كذا يقولون " عين الحب عن كل عيب كليلة "