المساعد الشخصي الرقمي

مشاهدة النسخة كاملة : طفلي طلع لي الايرباق حق السيارة كيف اسوي ياشباب؟


مشكلتي
03-10-24, 02:10 AM
صباح الخير
طفلي صغير وتركته في السيارة ونزلت محل كبير ابي اغراض
ولدي حط السياره في الدي
وصدمت بسياج حديد امام محل كبير
هذي الاعمده القصيره اللي امام المحلات
ابي نصايح عن السيارة
مابي نصايح ليش تركتي طفلك بالسيارة
وتلموني اهم شي طفلي بخير الحمدلله
بس السيارة تعفطت الرفارف اللي قدام والصدام انعفط كمان
وطلع الايرباق كلو من السياره حق السواق
انا خوفت وماركبتها ناديت السطحه واخذوها الحوش
ماعرف شنو اسوي الان
هل ارسلها الوكالة ؟
عشان اصلحها هناك وهي مو موجوده وكالتها بمنطقتي
يعني لازم ارسلها
بس كذا بتتاخر وبتاخذ وقت
او اوديها ورشة بنفس منطقتي ؟
تخدشت مره من قدام وتعفست لازم رش لها
وماعرف هل الايرباق يتصلح واجيب جديد ولايركبون نفس الاول
محتاره شنو اسوي ماعندي فكره ولا عندي خلفيه عن الموضوع
ابداً ابداً
واخاف يغشوني العمال
وصار فتحه كبير فوق الدركسون ماعرف فهمتوني الان يعني انفصل ذا اللي فوق الدركسون
وضعي الان مع السيارة زي وضع الرجال لمن يسالوكم عن ادوات التجميل ."
وشاكره لكم مقدماً وانتظر رأيكم ياشباب
واللي بنت وعندها خلفية كمان تساعدني :eiwp:
الف شكر لكل من اقتص من وقته عشان يجاوبني .

M.ahmad
03-10-24, 06:35 AM
بما أني صاحب مركز صيانه سيارات وبما أنك لم تذكري نوع ومديل وتفاصيل كافيه عن الاضرار وهل لديك تأمين أم لا ، هناك عدة حلول للإيرباق الخاص بالسواق والراكب :

الحل الأول : شراء غطاء أيرباق لسواق وتلحيم أيرباق الراكب بالصمغ الخاص بالطبلون من محلات التنجيد ، ولكن بهذي الطريقه يعني السياره ستظل بدون إيرباقات .

الحل الثاني : شراء دركسون كامل بإيرباقه مع شراء جزئية الطبلون المتأثره من التشليح ، ولكن بهذي الطريقه سيكون أيرباق السواق موجود بينما الأيرباق الراكب غير موجود .

الحل الثالث : البحث عن سياره شبيهه لسيارتك في التشليح بشرط يكون الإيرباقات فيها سليمه وشراء منها الأيرباقات والأغطيه .

ولكن قبل كل شيء لابد أن يكون في بالك بأن سعر الأيرباقات من الوكاله يبدأ من 5 ألف ريال وطالع على حسب نوع وموديل السياره .

أما من ناحية تصليح ضرر الوجهيه من السياره
إذا تريدي نصيحتي لا تصلحيها في الوكاله حتى لو كانت الوكاله عند باب بيتك ( لأنهم حراميه ) ، وأنا عندما أقول بأنهم حراميه فأنا أعنيها حرفياً من خبره طويله في هذا المجال

ولكن إن رغبتي تصلحي سياراتك في الوكاله لابد عليك تحفظي رقم وزارة التجاره في جوالك لأني متأكد ستتعرضين لعملية نصب وإحتيال وستحتاجيه وخصوصاً إذا كانت وكالتك هونداي أو mg

لذلك الأفضل إسحبي سيارتك لأقرب مركز صيانه في الصناعيه ثم أشتري القطع التالفه بنفسك من محلات قطع الغيار أو من التشاليح ( على حسب دخلك المادي بين الأصلي وشبيه الأصلي والتايون والتجاري ) .

عموماً لو ذكرتي لي نوع وموديل السياره أو صورتي لي الجزئية التالفه لكنت قيمتها لك بنفسي بالسعر التقديري لتصليحها .

سلطان الجبل
03-10-24, 09:16 AM
بيعي السيارة كما هي واشتري واحدة اخرى
افضل من وجع راسك من تصليحات واخذ اوقات
طويلة عند المصلحين ..
الشيء الثاني لا تخلي سيارة شغالة وفيها اولاد
او فيها مفتاح.. هالمرة عدت على خير المرة الجاية
مين يعرف شنو يصير .. خلي هذا الموقف درس لك..
تخييلي سيارة دهست شخص بدل عمود الي قدام سيارتك
او دهس طفل مار من امام سيارتك !!

جلجامش
03-10-24, 10:14 AM
الحمدلله على السلامة اهم شي

بالحديد ولا بالعبيد
المفروض اول شي في تقرير نجم او المرور للحادث عشان ورقة اصلاح بعدها الخطوات اللي قال لك عنها المدير

ماذكرتي انها السيارة اقساط لانها اذا كانت اقساط هي السيارة تعتبر مولك لشركة التاجير وهم مأمنين عليها شامل


ونوع سيارتك بس ما تكون صيني لان الصيني قطعه غالية

احسبي التكلفة كويس .

العـ(احمد)ـالمي
03-11-24, 12:45 PM
ماحطيتي تفاصيل سيارتك
نوعها موديلها
اذا كان عليها تأمين
باسمك والا باسم شركة تأجير
المهم الحمدلله على سلامة الطفل
وماكل مرّه تسلم الجرّة

ربي يعوض عليك


SEO by vBSEO 3.6.1