اختي تظربني

[مشكلتي]

بنات مشكلتي انا الكبيره وعمري 24 سنه بختصار كل شي على راسي من مسؤليات ولا احد في البيت يساعدني خواتي مايسون شي بس على لابتوباتهم وجوالاتهم
وماقدر اخلي شغل البيت والطبخ عشان ابوي تعبان وعنده السكر ويرجع من الدوام ولازم يلاقي البيت نضيف واكله جاهز بس على حساب راحتي وليتهم يقدرون الي اسويه امي ماتدري عن ابوي ولاتقوم بواجباتها المهم مشكلتي ياناس
اختي بثالث ثنوي ماتحترمني ابدا وتمد يدها علي تخيلو اخوي الصغير اليوم كب العصير وهاوشته جت تظربني وتقول ليه تظربينه بكل وقاحه كأني مو اكبر منها وتقوله اذا ظربتك تعال عندي قولي عشان اظربها !!
تخيلووو صرت ولاشي حتى قدام اخواني الصغار
بنات وش اسوي معاها تقهرني وتجرحني وستتفزني ودايم تسب خطيبي عند اقاربنا وتتكلم فيني وتسرق مني فلوس ولما تصير هواش عشان اقولها تصلي ولاتذاكر ولا سوي شغلك تسوي سالفه وتقوم تكسر اغراضي انا وقتها وربي زي الاطفال ابكي من القهر ماقدر امسك دمعتي وهذي مشكلتي !!
ماحد يوقفها عند حدها ولاتخاف من احد بنات لاتقولين ليه ساكته لها وربي جيتها بالطيب مافاد جيتها بهواش وظرب مافاد ابوي يرجع يمرض ويتعب لما نتهاوش والجيران يسمعون
وهذا الي يخليني اتحاشاها بس هالشي خلاها تتمادى بقله ادبها ورفع صوتها وعنادها الله لايوفقها قهرتني ولا ادري وس اسوي خلاص تعبت نفسيتي منها وش الحل بنات تعبت وربي ابيها تحترمني وتخاف مني ليه كل البنات خواتهم يحسبون لهم الف حساب ويحترمونهم مع اني مأذيهم ويشهد ربي علي قلبي طيب مررره وش الحل ؟؟

[ألانـــَْيــُٰقے ‏،]

الله المستعان
والله يعينك على اللي انتي فيه
وهيبتك انتي من يصنعها بنفسك
بضعفك هذا والله لو تجلسين عمرك كله . ما راح يحترمونك ولا يفكرون فيك حتى
المشكله انك اكبر اخوانك وهذا تعاملهم معاك
واللي مايجي بالطيب يجي بالقوه . خصوص انهم اخونك
لو حد غريب كان قلنا طز فيهم احترمك او لا . مافي ذيك الاهميه
بس اخوانك الصغار ومالك احترام وهيبه قدامهم مصيبه
وشغل البيت اتركيه لا تسوين اي شي نهائيا
دام امك تاركه البيت كله على راسك انتي
على الاقل امك تخلي حد من اخوتك يساعدونك . وش الام هذي
بس اذا مره مره اهتمي ب ابوك فقط
بس واضح انك اخذتي شخصيه ابوك
لان الظاهر ابوك ماله هيبه هو بعد قدام امك والبيت
ولا ما كان هذا وضعكم
والله يعين

[آلمتفائله]

شخصيتك جدا راائعه لانك صبوره وهاديه وطيبه وهذي الصفه ليست موجوده بكل الاشخاص

ولكن نمي شخصيتك للافضل ولاتسكتين عن حقك ولو مافيه احد احترمك قولي لامك وابوك ونبهيهم
انه اذا ماحترموك اخوانك رح تضطرين تلجأين للضرب ويتحملون النتايج
مو اذا اشتكو يغلطونك اهلك عطيهم كلامهم من الحين

صح تصير مشاكل بين الخوات وياكثرها ولكن ماتوصل للضرب
واول شي الكبير له مكانه غير بالبيت لازم اخوانك يفهمون هالشي

واذا مانفع معهم الكلام اضربيهم ضرب قوي عشان يتأدبون

حتى لو بالنعال الله يكرمك المهم يتكفخون قولي اهلي ماضربوني عشان تجون يالبزارين تضربوني
دافعي عن نفسك
والا الحق محد يسكت عنه وهذا من ابسط حقوقك انو الاحترام واجب
سواء كبير او صغير او وسط وغصب عليهم يحترمونك

ولاتشتغلين بالبيت اتركييه يا اما يتوزع الشغل ع الكل ولا ماتشتغلين
اما بالنسبه انها تتكلم عن خطيبك هذا عيب كبير ومافيه احترام
وقولي لابوك بهالسالفه عشان يربيها زين او انتي دافعي عنه قدام قريباتك

اولا : لانه عيب تتكلم على الرجال وهي ماتعرفه ولاتعرف شي عنه والاهم من هذا كله ماتحترمه

وبعدين تستهبل اختك بتصرفها هذا تسيء لشخصيتها وسمعتكم وش بيقولون عليكم الحريم الكبار
لو شافو هالشي رح يتوقف نصيبهم لاقدر الله بيقولون ذولا بنات مو كويسات ولسانهم طويل مانبيهم لعيالنا
وبيقولون والله فلان ( اللي هو ابوك ) ماربى بناته .. وهذا مافيه بنت ترضى احد يتكلم على ابوها

وقولي لابوك هالكلام حتى يكون عندك دليل قوي قوليله تكلمت على خطيبي قدام الناس
ومن غبائهم رح يوقفون نصيبهم والناس بتتكلم عليكم ويقولون اهلهم ماربوهم وانا مارضاها لكم ..
ولازم يحترمون انفسهم ويضبطون اعصابهم قدام الله وخلقه ..


واذا انك تقوليلها قومي صلي او انتبهي لدروسك لاتتدخلين فيها
اتركيها كلن عقله براسه يعرف خلاصه وهذي عقلها للأسف غبي تحسب نصيحتك تدخل في شئونها الخاصه

وبعدين امك وين عنكم يعني معقوله تشوف هالظلم اللي يصير وتسكت ؟؟ وابوك وينه كمان عن تصرف اولاده

اتوقع انه كلهم راع وكلن مسؤول عن رعيته اتمنى يفهمون الاهل هالكلام ..

[اللورد يحيا]

يا آنسه من الواضح بأن أختك فتاه كسوله في إدارة الأعمال داخل المنزل وغير مباليه بما يدور من حوليها .

وإقدامها على الإعتداء عليك بالضرب أو الكلام الجارح هذا يعني بأنها تغار منك لأنها تعلم جيداً بأن الفتاه العمليه مثلك هي الفتاه المحبوبه لدى الجميع .

فمن المفترض تؤمنين بأنك الأفضل والأرقى منها بكثير ، لأنها تبقى في مقام المكروهين إذا إستمرت في أفعالها وتصرفاتها ..

فعليك يا أختي أن تحافضين على أخوتك بها لأنها تبقى أختك أولاً وأخيراً خوفاً من الله ولكن كوني حذره من أفعالها حتى لا تحدث هناك تجاوزات ..

أتمنى لك التوفيق

[المنفلوطي]

لاتحملين نفسك فوق طاقتك

هناك أب وهناك أم احملهم المسئولية على مايحدث لكي

لابد من الوالد او الوالدة أن يقفون وقفة حازمة

فحاولي أن تتكلمي مع والدك كي يضع لهذا الامر حد

وكان الله بعونك