ابي صديقات مثل صديقات العمر

[منى الحربي]

ياحلوين انا الحمد لله بعد جهد جهيد التحقت بدوره ببمعهد وكل شي تمام وحبيته بس عندي حاجة وحده اني ماقدرت اختلط مع المجموعه اللي معي رغم ان وحده منهم كنت اعرفها بمعرفه صديقتي وسلمت عليها وعرفتها بنفسي ولقيت منها قبول وكانت دايم تناديني اجلس معهم وكنت اقبل بس ماعرف اسولف او ابداء بموضوع انا طبيعتي ما ابداء احتاج احد يفتح معي موضوع احيان احزن لما اشوف ال بنات منطلقات ويندمجون بسرعه مع بعض ويكونون صداقات بسرعه وانا ابي اغير هالشي حابه اني اكون علاقات وصداقات وكمان انا معي بنت عمي واجلس انا وهي مع بعض بس احس وضعنا مب عاجبني هي ماتقبلت المجموعه وهم احس مااقبلوها كثير يجوني ويسلمون علي وكذا وترفض تروح لهم وهم خلاص ماعاد نادونا عني تخيلوا بس انا وهي جالسات وهي ماسكه الجوال وبس لاتسولف ولاشي

قولولي كيف ادخل مع الناس واندمج ودي اصير منطلقه مليت من ذا الوضع وكمان عندي صديقات من الكليه بصراحه لحضتها ماكنت ناويه اصادق بس بغيتها علاقه كليه وبس بس مع الوقت لاحضت اني حبيتهم وكنت اخاف من ذى الشي لاني تعرضت لموقف صدمني من صديقتي اللي هي بنت عمي ذي وسكرت على قلبي وقلت خلاص مستحيل اثق في احد بعدها

والحين تخرجت وانا وصديقاتي لنا اكثر من سنتين متواصلين الحمد لله على قروب بس احيان احس ان فيه فرق بالمعاملة وكنت اقول شي طبيعي لاني انا اللي بعدت نفسي وبعد كانت الضروف تخليهم تقوى علاقتهم اكثر لاني انا مجتهدة بدراستي فدائما اجلس بصف الاول عشان اتابع الدرس و هم يجلسون جنب بعض فتعرفون مثل هالشي يقوي العلاقه وكمان انا اطلع بدري وقت الانصراف هم ربي يعينهم كانوا يتاخرون بسبب النقل فكنت احس اني بعيده حيل انا بصرراحه حبيتهم بكل مافيهم من حسنات واخطاء وهم يمكن يحبوني بس مب بنفس الطريقه اللي انا ابيها


انتو شفتوا صديقات العمر انا نفسي تصير علاقتي معهم كذا خاصه انهم طيبات وماعندي شك بهالشي بس انا ماعرفت ادخل في البدايه معهم فسبب لي احباط كبير لان اغلب اللي كانوا يجوني ع شان مصلحه في عز ماكنت انا معتبرتهم اقرب شي وصرت اخاف اني اصادق ناس ماتحبني الا عشان مصلحه بس الحين انا عندي شوي امل لان الكلية انتهت :icon3 3:ادري قرقت كثير بس من الحره اللي فيني

[تُعبّتُ ٱشّتُٱق]

سلمت أناملك الذهبيه على ماخطته لنا
أعذب التحيات لك
لكـ خالص إحترامى

[آتم بعيد .!]

مرحبا بك وحياك الله اختي
اولاً – صديقات العمر مسلسل وقصة خيالية ابصم لك ع العشرة الصداقة ماتستمر حتى لو طالت سنين .!
لابد من الفراق سواء لظروف الحياة من زوااج وتحمل المسؤوليات الانسان ينسى
و الحياة تشغل وتلهي وتنسينا انفسنا فما بالك بـ صديقات الدراسة .!
الانسان يتغيـر ومايبقى ع حال واحد وفيه صداقة لها تاريخ انتهاء مع انتهاء الدراسة!

ثانياً : والحين مع وجود الجوالات كل واحد مدنق ع جوالة ومايتكلم مع الي جنبه ألا قليل او كلمة ورد غطاها !
غالباً صرنا نكتب اكثر مما نتكلم ونقول .!

انتِ من النوع الخجول :
وإذ بتتغيري من حالك يبدا التغيير من الداخل خلي عندك ثقة بنفسك اجتمعي اختلطي بالناس شاركيهم الحديث اقري مقالات عن فن الحديث فن الحوار فن التعامل ...
ولاتحطين فـ بالك ان هـذا عيب فيك او مشكلة : بالعكس هـذا شيء عادي وخصوصآ إذ انتِ جلستي سنتين فالبيت وممكن قليل تجتمعي بالناس فـ امر طبيعي إلي انت فيه , ومسألة وقت وراح تتعوديين ع البنات وتصيروا صـديقات ..

فانت ي عسـل :
حاولي تاخذي صاحبتك وتروحن تجلسن معاهن لاتقولي صعبة !
قولي لها خلينا ننضم لهم ونتسلئ ونسولف مثل ماخذتيها المرة الاولى لهن تقدرين مره ثانية وثالثه ..

حاولي وخليك مرحه فرفوشة عيشي ببساطه ونصيحة إذ عندك اطفال صغار فالبيت تقربـي منهم أكثر العبي معاهم > وبكذا راح يصير تفاعل وحماس وتاخذين من رجتهم وتصيرين جرئية ومرجوجه شوي >:icon10:
خليك ايجابية فمواضيعك الي تتطرقين لها تكلمي بصوت هادي نبرة صوتك تكون واضحه
اهتمي بـ مظهرك الخارجـي له دور بعد الثقة بالنفس وكمان حالتك النفسية ريلاكس هددي هن بنات مثلك .. ومع الوقت راح تصيرون " صديقات واخوات "

وانصحك بكتاب
" إن كنت خجولاً عالج نفسك بنفسك"

الله يرزقك بالصحبة الصالحه الي تفيدك وتعينك فـ الخير قبل الشر :رحيق:

يُنقل لقسم الأنسب له

[شخبار قلبك]

اهلين حبيبتي ..
بالعكس من قالكم الصداقة تنتهي لو طالت السنين ؟؟؟
بالعكس اللي حريص انه مايخسر هالصداقه ماراح يخسرها الا بالضرف القوي وهو ( الموت ) بعد عمر طويل للجميع ..
انا عندي وحده تعرفت عليها بأولى ابتدائي .. واستمرينا للمتوسط والثانوي وهي كملت كليه وتزوجت وتزوجت انا بعدها
ولازلنا مستمرين مع بعض الى الان .. وباذن الله مافيه أي شي صحيح ننشغل أحيان عن بعض بس هذا مايعني اننا نترك بعض ..!
انا معاكم بالثقه انها ماتنعطى أي احد
انتي حاولي تجلسين معاهم كثير حتى لو ماسولفتي معاهم اول مره وثاني مره وثالث مره وصدقيني راح تندمجين معاهم على طول ...
انا اول كنت مثلك مااحب أتكلم مع اللي حولي كثير ومو بسرعه اندمج معاهم بس مع الوقت ومع جلساتي اللي كثرتها معاهم الحمد لله ..
صرت مجرد مااقابل احد اسولف معاه وعااادي كاني اعرفه من مان ..

وانا من هنا أقول لك مستعده أكون معاك اخت وصديقه باذن الله :733449542:

[جُلَّنار]

وانا كمانا صحبتك واختك

ياربي يسعدك حبيبي ويحبب الكل فيك..

[المنفلوطي]

قد اختلف مع ما جاء من تعقيبات أن الصداقة لاتدوم وهذا غير

صحيح شخصيا معي اصدقاء منذ الطفولة واصدقاء اخرين لهم قرابة عشر سنوات

صحيح أن النفوس في هذا الزمن تغيرت كثير

ولكن عندما الصديق يأخذ سبعين عذر لصديقه الصداقة راح تطول

للاسف الكثير لديهم اصدقاء وهولاء الاصدقاء لهم افضال كبيرة وكثيرة على بعض

ولمجرد خطأ بسيط لايذكر قد تنهدم هذه العلاقة التي بنيت منذ سنوات

وهذا والله من ظلم الانسان لنفسه ولعدم عدله

صديقات العمر سمعت به ولم اشاهده

ولكن يبدوا المشكلة اختي منى منك انتي شخصيا

انتي ليست اجتماعية

وكي تملكين اصدقاء لابد أن تكوني اجتماعية بشكل كبير

وشكرا

[اللورد يحيا]

يا أختي الشغله بسيطه ولا تحتاج لأي عناء وهي :

حاولي تدربين شخصيتك بينك وبين نفسك وانتي في بيتك على المواجهه وتقبل الردود والآراء والقناعات

والتدريب يكون عن طريق التخيل

مثلاً : وأنتي في غرفتك لوحدك تخيلتي إنك قابلتي صديقه قديمه لك ، كيف تبدأين بالكلام معها ؟

1- لابد تناظرين في عيونها وقت الكلام ..

2 - بادليها بنفس الإسلوب في السوالف ، مثلاً قالت قصه قولي كذالك قصه قالت نكته قولي كذالك نكته وهكذا ..

3 - حاولي تعودين نفسك على كلام يكون دائماً في بالك مسبقاً لمثل هذي المواقف ، مثل سؤال أو إستفسار أو حتى رأي ..

4 - إصنعي لنفسك جرأه بحدود انوثتك ..

5 - ناظري في المرآه وتكلمي لحالك ودققي في ملامح وتفاصيل وجهك كأن هناك شخص ما بخاطبك ..

وحاولي تكوني مطلعه على كل مايدور داخل مجتمعك من مشاكل وقصص وذكريات وكذالك إلعبي دور الجاهل الذي دائماً يستفسر ويسأل

وتأكدي مع الإستمرار راح تتغير شخصيتك ألا إرادياً للأفضل بفضل تدريبك الدائم لنفسك

لأن من الواضح عزيزتي بأنك تعيشين في منزل ووسط أسره لم تعتد على الإجتماعيه بما فيه الكفايه

وأخيراً : الصداقه لا تدوم إلا بالإسلوب والمعامله الجيده ..

أتمنى إني أفدتك ولو بجزء بسيط

[إسْتِثنَائِيَه .!]

وعليكم السلام ورحمة الله وبركاته .
شدّني الموضوع .
وحبيت اضيف " مستحيل شخص ما يتغير عليك, سواء صديق, قريب ...الخ !
كل شخص وله ظروفه ! اذا انت في البيت لما مزاجك يتعكر تقلب على اهلك فَـ كيف اذ كانوا من خارج هالحدود !
واكبر دليل قلتيها "صديقتك وبنت عمك تغيرت"
ترا الانسان في بعض الأحيان ما يتحمل حتى نفسه .! ويبعد عن كل شيء !
وجدياً اذا انتِ نفسك ما تغيرتِ تجاه صديقاتكِ !!! فـ الأكيد هُنّ بِـ يتغيرن !
الثانوية انتهت ! نادراً ما تجتمعون ! ما دخلتوا نفس الجامعة ! الأغلبية تزوجت !
كل هالاشياء تخل الشخص ينشغل بـ حياته الجديده !! ولا اقولك ما راح يتذكر الماضي ويحن له !
لكن مب كل مرا !
اما عن تكوينك لـ صداقات كثيره فـ هذه جدا بسيطة !
بما انك خجولة اكسري خجلكِ ب التدريج يعني تعرفي على وحده وحده انسجمي معاها تكلمي في أمور الحياة
مثلاً اخبار اليوم, احداث التويتر, برامج اليوتيوب, وغيرها ..! وبكذا بعدها تنطلقين معها في كل شيء .
وصديقة وصديقة بـ يتحولن لـ قروب .
لكن ابداً لا تصدقي ما يُعرض على التلفاز "صديقات العمر" في النهاية هذا تمثيل ..
وراح يبقى تمثيل ."
بس حبيت اقولكِ " ترا ما تدرين يمكن خيره لكِ بما انك ماعندك صديقات كُثر , في بعض الأحيان يكن شراً لا خيراً لكِ" - والله يرزقك الصُحبة الصالحة اللي تعينك على طاعة الله ورضاه.

[تُعبّتُ ٱشّتُٱق]

^





في اصدقاء يبقو معاك للاخر وفي من بيتغير عليك اصابعك مو نفس بعض

[(قيثار الحب)]

منى الحــربي

الاخت لاتفكري افكار ببالك انك ماتقدري تجلسي وتخجلي من نفسك ودايم وحدة ولاتناظري لحولك انهم مجتمعين ونتي بصمت لوحدك

تقدري تكوني صديقات واكثر من كذا

خليك تعاملك مع اي احد ببتسامه وسولفي اتركي لشخص اللي امامك ينبسط من حديثك

واكسري الاحباط اللي في قلبك ولاتخافي واجلسي مع المجموعه وسولفي ولا تنفعلي من اي شي مهما كان والصداقه موجوده في كل مكان

واعتبري نفسك انتي القلم واللي امامك دفترك سولفي احكي بادلي بالكلام ولا تخجلي ولا تفكري ان احد مايبيك

والله يسعدك دنيا واخره :وه:

[مطر الفجر]

والله يا اختي تبين نصيحتي ؟؟؟
خلي علاقاتك رسميه
وانسي شي اسمه صديقات العمر
لان صداقات هالوقت قائمة على المصلحه فقط الا من رحم ربي
وصداقات العمر اللي تشوفينها موجوده هذه من الصغر تاسست واكتملت واستمرت
اما الحين على الكبر تبين صداقات العمر ما اظن رح تسوينها
انا اتكلم من واقع افضل مما انك تنصدمين بعدين
مشي حياتك وامورك ولا تتعلقين في احد
اتمنى لك التوفيق والنجاح في حياتك
تحيتي للجميع