بنات حواء تحت المجهر

[عزف المشاعر]

اٍُلسّلاٍْمّےُعليكم ورّحٍمْـٍُہاللّـہوًبٍرّكًاٍتُـٍّه🌸
اسعد الله صباحكم / مساءكم
بالعمل الصالح
الحقيقه خطر في بالي هذا الموضوع
بعد سهرة البارحه حيث كنت في طلعه بريه
ودار بيني وبين رجل خمسيني نقاش
حول بنات حواء في منزلها
وساسرد لكم المحاوره
قال: بنات الحين مافيهم نشاط لشغل البيت
الشغالات خربتهم ماصاروا يحبون شغل البيت
لا الطبخ ولا التنظيف
بنات اول كان الشغل كله عليهم
قلت : كانوا الرجال ظالمين ولا امي تقول انها كانت
تطبخ وتغسل وتنظف الحوش وتهتم بالغنم والبقر
وتجيب العشب والحطب والماء للبيت وتربي العيال
والرجال ماكان عندهم شغل
يجي يحصل اكله جاهز لا وتلحقه بالفطور في المزرعه
هذا ماهو ظلم للمرأه وتحميلها فوق طاقتها
قال : هذا الشغل اللي يخلي النساء في نشاط
ولا انتوا يالاجيال الجديده تحبون تريحون حريمكم
علشان كذا زاد الكسل فيهن
قلت: نحن اقرب لسنه الرسول ﷺ منكم
قال : بناتي في الاجازات ما يصحون الا الظهر
واذا كلمنها بكلمه زعلت ورجعت غرفتها
رغم انا مانقول الا لمصلحتها ولا كلفناها بشغل فوق طاقتها
لو قلنا كنسي البيت فالمكنسه كهرباء ولو قلنا غسلي فالغساله اتوماتك
ولو قلنا نظفي الحوش فمكينه الهواء موجوده
ولا عندنا غنم ولا غيرها تقوم بها
قلت : انا عندي كل الاجهزه الكهربائيه اللي تريحهن
حتى غساله الصحون كهربائيه ولكن ليش جبتها
لاني احب ان زوجتي ماتنشغل بهذه الاشياء
على ماهو اهم بنظري وانا ارى ان المرأه في بيتها ملكه
والملكه ماتجي بالشغل بل بالاستمتاع بالمنزل
قال : خلاص مدام هذا رايك احتفظ به لنفسك
والله انتم اللي دلعتموهن وكسلتموهن

ابغى آراؤكم في هذا الموضوع
وماهي السلبيات والايجابيات في تطور الاجهزه المنزليه
وهل البنت تعودت فعلا على الكسل؟ ان كان فماهو السبب
وهل يجب على المرأه ان تكون خادمه للمنزل لكي تتنشط؟
وهل كان فعلا هناك ظلم قديم للمرأه وأُنصفت حالياً؟

ارجو ان يكون النقاش ودي بحت وبدون تجريح للكبنات حواء أو ابناء آدم
المجال لكن
والسلام عليكم ورحمة الله وبركاته

[السيده ملعقه]

انا من وجه نظري
ان الدلع الزايد الزايد مو حلو يعني مثلا تجيك وحده ماتلمس ولا شي ببيت اهلها
ويوم تتزوج حتى بيض ماتعرف تسويه تضطر انها تتعلم
والبنت لازم تتعلم من الصغر ع الاهتمام وتحمل لو شويه مسؤوليه ع قدها يعني
انا مو ضد الدلع بالعكس الحين مع الاجهزه الالكترونيه مافيه كرف مثل اول
يعني حدها مطبخ وكم غرفه بس

انا عن نفسي مستحيل اخلي امي تسوي شي اطبخ وانظف وكل شي
امي اعيشها ملكه :67:

[آلمتفائله]

زمان اول ماشاء الله حريمهم كان فيهم قوة وبنيتهم الجسديه غير

لان بيئتهم غنم وكرررف طول يومهم ولو لاحظت كان اكلهم كله تمر ولبن ولا قهوه

ويتعرضون للشمس كانت حياتهم غيررر الله خلق اجسامهم قويه عشان بيئتهم اصلا مختلفه كليا

لكن الحين غيررر البنت تغيرت البيئه الحين صارت الحياه مرفهه

واجسام البنات ماعادت زي اجيال القديمين الحين اقل شي يتعبون بسرعه

يعني اللي ابي اوصله انه اقل مرض خفيف يجينا مثل نقص فيتامينات الوالده كانت تقول
وش هذي الاشياء الغريبه والله حنا ماقد صار لانقص ولاشي ولاغيره

السبب بيئتهم غير الله خلقهم قويين وشديدين عشان يتكيفون مع العيش والحياه الصعبه

سبحان الله بنيتهم الجسديه تكون قويه

فـ\ مافي مجال للمقارنه بين بنات اول وبنات الحيين

لكن حتى بنات الحين فيه مسببات البعض مثل ماقالت السيده ملعقه

دلع زايد لدرجه الشغاله يخلونها بكل شي وهي ماتسوي ولاحاجه وهذا شي غلط

انه تخلي احد يدير بيتها بدالها

اما بالنسبه لأسئلتك ..

وماهي السلبيات والايجابيات في تطور الاجهزه المنزليه

انا ماشوف فيها سلبيات بالعكس حسيت انها سهلت اشياء كثير عن البنت
توفير للوقت لها بحيث تقدر تسوي كذا شغله والاجهزه الثانيه تشتغل

وهل البنت تعودت فعلا على الكسل؟ ان كان فماهو السبب

تعودت ع الكسل لان اهلها فتحو راسهاا بالدلع الزايد او ممكن ماعطوها مسئوليه من الصغر
لو حتى مسئوليه خفيفه مثل ترتب سريرها تنظف دولابها اشياء بسيطه تخص البنت نفسها
ومو كل بنت كسلانه لكن فعلا فيه بنات كساله

وهل يجب على المرأه ان تكون خادمه للمنزل لكي تتنشط؟

نعم لان كلن مسؤول عن رعيته والبنت مسؤوله اتجاه بيتها سواء رضت او مارضت
موتشتغل عشان تتنشط لا تشتغل لأن هذا واجبها اتجاه بيتها
الا لو كانت ببيت اهلها لازم تخدم بالبيت لمصلحتها حتى بعدين يسهل عليها الامور والمسئوليه


وهل كان فعلا هناك ظلم قديم للمرأه وأُنصفت حالياً؟

نوعا ما فيه ظلم من ناحيه التربيه والرجال مايسوي ولاشي يعني هي وين بتوصل مع الامور اللي تسويها ؟!
لان حسب معرفتي الزواج مشاركه مو كله ع الحرمه خصوصا التربيه استحاله تكون ع الحرمه فقط ..
اما شغل البيت عاد هذا مو ظلم لها لأنه مسؤوليتها اصلا


موضوع رائع شكرا لك ع الطرح وبارك الله فيك

استمتعت بالرد عليه وننتظر المزيد من روائعك

آلمتفائله ..

[جُلَّنار]

زمان مايروحوا الاغلبيه مدارس فمافي شي شاغلهم
واضافه الى ذلك ماعندهم شي لتسليه غير التنظيف
وغير عن كذا الوضع الان اتغير تماما البنت سارت تشتغل وتدرس ولها حق في كل شي
بس مو يعني انها ماتهتم لبيتها مهما تغير الزمن بيبقى الواجب واجب ومع تطور وسائل التنظيف ماياخذ منها شي في بعض البنات كل شي عالشغاله والغلط مو منها على اهلها...

والرجال ايام زمان ثقافتهم محدوده يحسبوا المراه انخلقت علشان تشتغل شغاله سوري بجد شي يقهر
بس الان الرجال فهم تماما انو احنا لنا حق في كل شي في الدنيا والي صراحه يبغ يتزوج علشان بس حرمهً تطبخ وتنظف قسم بالله اعتبره جهل منه

شكرا عزيزي عزف وكان حوارك راقي جدا

[آنثے م̝̚لآئـکﯾھَہّ]

الله ع النقاشات بالطلعات لها جوها الخاص ~

انا يمكن كلامي عكس ايات شوي ..

زمان ماكانو كل الامهات عاطلات ماعندهم شئ غير البيت بالعكس كانو يدرسون وكمان متوظفين ..

مثلا زي الاستاذات الي اعمارهم اكبر من امي كمان ..

لكن هم اتربو ع انه الانثى السنعه تقوم ببيتها وماتقصر بشئ لا من ناحية بيت ولا زوج ولا اولاد ..

مشكلة بعض بنات ذحين يتعذرون كثير ( انا ادرس ) ( انا تعبانه عندي وظيفه ) وووو الاعذار ماتخلص ..

وفي بنات مدلعات بزياده اتذكر ايام المدرسه وحده ماتعرف تسوي شاهي فما ببالك بالاشياء الثانيه ..

او تجيك بنت مكروفه ببيت اهلها واذا اتزوجت اشتغلت الارانب وقالت مستحيل اشتغل ببيتي ابغى شغاله ..

" وفعلا وحده حكمت زوجها يجيب الشغاله بيوم زواجهم "

يعني كلها تجي ع التربيه الام المفروض تربي بنتها ع هذي الاشياء ..

وتزرع بتفكيرها انه هذي مملكتك لا تخلي يد غريبه تشاركك فيها ( او عدو بالاصح )

واخيرا الله يعين الاطفال الي امهم تحتاج مين ينظف وراها لا بيتربو زي الاوادم ولا شئ بيكونو تربية شغالات ..

واخيرا الرجال الي تفكيره ان زوجته شغاله ولازم تكرف صبح وليل بعتبره عديم احساس ولئيم ..

صح مملكتها وتكون ست بيت لكن لا تحملها فوق طاقتها وتقوم باشياء مفروض الرجال يسونها ..

وبس ..

عزف يسعدك ربي ع الموضوع الحلو ..

[egy qween]

أنا
عن
نفسي
ما
احب
الدلع
الزايد
لا
بنات
واكيد
لا
اولاد
بس
المراة
لازم
تهتم
بنفسها
وشؤون
بيتها
بشكل
متعادل
:x90:

[يتيم الفرحه]

أصابع اليد ماهي سوا
صحيح في فرق واضح وملموس بزمان أول والأن
لكن البنت اللي توازن بين امورها الشخصيه
وبين أمور البيت من اشغال وطبخ ..الخ
بيكون وجهة هدفها صحيحه وناجحه بكل المقاييس
لكن البنت اللي تكون متربيه على الدلع والأتكاليه
بالأشغال عمرها ماراح تتقدم ولاخطوه ..!
بالرغم في وقتنا الحالي أشوف ان كل شي مهيئ
وجاهز ومافيه مشقة تعب ولا اجهاد عكس زمان
/
وجهة نظري

[مسكك الغلا]

هو ع حسب البيئة والبيت والحموله

زمان اول جميل الذهن صافي والجسم سليم

البنات زمان اول يبدن بالسرحه ع 6 سنوات مع البهم

والعيال مع النوق مافي كلمة انه مايسوون شي

زمان اول تعب ع الرجال في كسب الرزق حيث مافي

وظايف واللي نقول قرم يروح يسرح بحقه

يعتمدون ع الصيد بالنسبه للحم يتغذون

ع الارانب والغزلان من جهدهم وتعبهم > الحين الفلوس بالمخباه والعثيم موجود

الشغله زمان تعب في تعب

نجي للبنات اول يتعبن ع الحلب والحطب والري

الا القهوة ع الرجال

شوف ي طويل العمر

اول زي ماقالو لنا الاجداد الاكل

جمريه وخبز صاج ع سمينه بريه

قلييييييل الرز واللحم في حال جا ظيف ذبيحة

لان مافي ثلاجات عشان كذا اكلهم صحي تماما

خالي من الدهون والمواد الحافظه عشان كذا اجسامهم سليمه

تقول جدتي الله يرحمها كنا مانعرف الغدا اللي تعرفون

نسرح مع البهيم ولمنا اضحينا شبينا نارنا وعجنا وخبزنا جمريتنا

ومعنا صميل به حليبه والحمدلله وعليه لليل

نجي لجيلنا الحاظر

كل شي متوفر ماحد يتعب حتى الرجال اسمحو لي الحين مريحين مو زي قبل


البنت لمنها ربت في بيت حموله وتربت ع يد ام سنعه سنعتها

التكنلوجيا خدمتنا بشكل ملحوظ القهوة والهيل تنطحن بطاحونه بدل النجر والمهباش

وغيره وغيره

الزبده في الموضوع


الدعوا تعتمد ع الام في تربيتها اولا وع البنت كمان لازم يكون عندها تفكير ايجابي

بكره بيكون لي بيت وعائله بكون مستقله عن امي يعني مو معقول اتزوج واقعد اتعلم

ومو كل رجال مقتدر يجيب شغاله


اطلت وحست الموضوع :x59:

تقبلو مروري

[mohamed laid]

السلام عليكم و رحمة الله موضوع جاد و يستحق النقاش المتبادل ربما نخطئ في حق الأخرين. نحنمع التطور النافع و مادام الاجهزة نافعة ليش نتعب الشخص لكن الاعتماد الكلى أكيد يقلق المرأة قبل الرجل أما عن عمل المرأة زمان بأنها أعمال شاقة و متعبة و الرجل لا يشقى فهذا غير حقيقي و الدليل أن الطلاق الأن أكثر لأن المرأة تعمل خارج و داخل البيت و الرجل نائم زمان يستحيل ينام الرجل و المرأة تعمل نهاية الموضوع المرأة تخلت عن عمل المنزل و الرجل تخلى عن مسؤولية البيت فلم يعد هناك مسؤول ولا بيت

[سكوت]

موضوع يستحق النقاش.. تشكر على هذا الطرح أخي العزيز
......
زماان كان فيه قسهو على النساء أنا مارح أتكلم بصفه عامه لكن الأغلب بالزمان الي قديم
تكون النساء تتحمل مسؤليه أكبر من طاقته.. وممكن تنحرم من حقوقها.. ومنها العلم
أنا راح أقول تجربة أقرب الناس لي.. أمي.. الله يحفظها كنت أسمعه منها دايم تقول ليت أبوي خلنا ندرس ونتعلم وصارت تهتم على أنا نكون مجتهدين بدرستنا والحين أمي كملت درستها وبشركم خلصت الابتدائي >>هههههههه
فأنا أحس زمان كان فيه قسوه على الحريم بشكل كبير أو بنسبه كبيره
لكن الزمان هذا أصبح فيه لين معهن بشكل غير مرغوب فيه
وصار فيه تهاون شديد وتدليع لهن والحرمه (ماتنعطى وجهه) بجد فالقسوه معه بحدود والين معه بحدود
والزمان هذا توفرت الشغالات والاجهزه وصار فيهن كسل وعدم أهتمام بالبيت والأطفال والتربيه إلي هي من أهم وجبتها بل صار فيهن عدم مسؤليه ونتشر الطلاق بنسبه كبيره
بل حتى أصبحت الفتياة لا يتمتعن بالصحه تلقى العظام عند بنت عمرها 16سنه زي عجوز عمرها 100سنه ونقص فتمينات وبالاخص فتمين (د) وزاد الوزن لأنهن أربع وعشرين ساعة على الجوال أو نايمه لا يتعرضن للشمس ولا رياضه ولا شغل ولا حركه وبعد بالزمان هذا زادت طلبتهن وصرفهن من ملابس وأغراض حتى المهر زاد
وهي ماتعرف تسوي بيض
إلا من رحم ربي وأنا ماتكلم عن الكل فيه بنات بهذا الزمان فيهن الخير والبركه وبنات رجال
وبس هذا الي عندي عن هالموضوع وشكرا لك
ولروحگ.. :رحيق:

[مطر الفجر]

ماهي السلبيات والايجابيات في تطور الاجهزه المنزليه
الايجابيات انها اختصرت الكثير من الوقت
وانقذت الكثير من جمال الجسد واليدين
برايي لا يوجد سلبيات من تواجد الاجهزة الحديثه
في تنظيف البيت

وهل البنت تعودت فعلا على الكسل؟
بالطبع لا لانه يعتمد على البنت نفسها
وطبيعة شغلها وتنظيم وقتها
ان كان فماهو السبب
وهل يجب على المرأه ان تكون خادمه للمنزل لكي تتنشط؟
ليس على المراه ان تكون خادمة لكي تنشط
بل عليها ان تقوم بواجباتها كامراه وتنظيف مايخلفه من حولها
النشاط ليس مقتصر او محصور على تنظيف المنزل
لان لو اضطر الامر للتنظيف سوف تنظفه رغم عنها
حتى وان لم تكن نشيطه !
وهل كان فعلا هناك ظلم قديم للمرأه وأُنصفت حالياً؟
من رايي نعم كان هناك ظلم شديد جدا واضطهاد
حتى انهم لم يدعونهن يكملن دراستهم
او اغلبهم عاشوا اميات لا يقران ولا يكتبن
والان نستطيع ان نقول ان المراة انصفت نفسها بنفسها
وكان للتكنولوجيا دور بارز في تسهيل امور كثيره
ولكن هذا لا يعني تخلي المراه عن اداء هذه المسؤليات
ولابد لها ان تتعلم فعل كل شيئ بنفسها
حتى لا تضطر لمساعدات خارجيه من احد
او ربما تسوء حالتها وتضطر هي بنفسها للقيام به
ان التعلم لها يفيدها مستقبلا
و لا مانع من تدليل نفسها مرتين او ثلاث بالشهر
واحضار خادمة مؤقته تقوم بالاعمال الثقيله
من غسل عميق للستائر وسطح المنزل
وازالة الغبار والاتربه العالقه بالاماكن الصعبه
ولكن ليس بشكل دائم مع اني ارفض وجود الخادمات بالمنزل
الا للضرورة القصوى

تحيتي لك اخي الكريم

[عزف المشاعر]

اشكر تفاعلكم مع الموضوع ورقي حواركم

[القلب المجروح]

هلا
عزف
ويسلموو ع الموضوع القيم ..
واعتقد ان ايقاع العصر السريع قلب الموازين
وكذلك الاجهزة قدمت خدمات جليلة
للنساء في هذا الوقت ..
ورغم كل هذا لابد ان تكون الفتاة ع قدر
المسؤليه وخاصة بسن الزواج
حتى لا تكون هناك مشكلات بين الطرفين
من ناحية تجهز الاكل واللبس للزوج
كم حاله طلاق تمت لهذة الاسباب
وعلى الفتيات اخذ العبره من تلك القصص ..
والعذر ع الايجاز

[آجاذبك الهوى]

متابع .. لجمال الطرح والرأي .
واتمنى الاستمرار في طرح وجهات النظر لكلا الطرفين من بقية الاعضاء .. لي عودة

[D̳̿A̳̿N̳̿ ̿I̳E̳L̳̿]

اخي الكريم ,, قمة الخطا المقارنه لكل زمن ظروفه واسلوبه ,,
لكن زبدة الحكي والخلاصه التامه ,, ان لكل من الجنسين حقوق وعليهم واجبات ,,
بالماضي كانت هناك البساطه وعدم التكلف ,, لكن وقتنا الحاظر اختلف كل شيء ,,
وهو المشاركه فيما بين الجنسين في الحقوق والواجبات ,, بس يكون بحدود المعقول ,,

لكن ارجع واقول انا اؤيد فكرة الرجل الخمسيني الزمن تغير لكن لا نقارن اي نعم هنااك فرق ,,

واختم كلامي بان البيت والرجل والاولاد من اساسيات المراه وواجباتها والرجل له حق المشاركه فقط لاغير ,,

اتمنى مطولت بالحكي , ,
دمتم بود ..