فضفضة فقط

[حلم ادراية]

السلام عليكم
انا سجلت بالمنتدى فقط للفضفضة
:blushing:
انا عندي هم بنظر غيري حيل تافهه انا ادرس وبنفس الوقت اهتم ب ابن اختي من كان عمره سنتين والحين عمره اربع سنوات
طبعا خواتي كلهم متزوجات وعندهم اطفال همي انه كل زيارة لخواتي احس انه الشيب يطلع من راسي ....ابن اختي مع كل زيارة لخواتي يتأثر انه كل طفل مع امه طبعا امه تدرس بمنطقه ثانيه وابوه يعمل بمنطقه ثانيه والمنطقه جدابعيده يعني مايشوفه ابد الا بالاجازه الدراسيه يروحون له
وخواتي ماهم بالحيل على ابن اختي يعني مايحبونه بس يجاملون جنب امه .. وطبعا انا اذا جاو عيالهم كلهم علي وابن اختي يغار ويصير هواش ونذاله وطبعا عيالهم كله طلبات مايوقفون يرجون الراس بطلباتهم واذا ماتنفذ لهم صياح وخواتي ولا وحده تقوم لعيالها يعني مثل ماتسوين لهذا سوي لعيالنا وانا تعبت خلاص مو قادرة اتحمل وتقريبا يجون من الظهر وبعض الاحيان من الصبح الى الليل
:MonTaseR_74:
طبعا كل يوم اجلس افكر يمكن وحده من خواتي يمكن تجي ماارتاح الا لما تصير الساعه 7 المغرب:ai:
اضمن انهم ماراح يجوون وكل يوم على هالحاله
وانا اخاف من خواتي مستحيل اقول لهم قوموا لعيالكم لان ماهم متفاهمين ويفسرون على كيفهم والكلمه من وراها تصير مشاكل :wallbash: وبعد اذا جاو ولا لعبت مع عيالهم يقولون لي انتي هونتي ماتلعبين معاهم ونظرات عتب ولوم وانا اذا هونت لاني عندي ثقب بالقلب ويجيني الم قوي مع الاجهاد صحيح المشكله تافهه بس انا توصل معاي اني ابكي ههههه
واكثر من مرة اذا كنت بعيده عن ابن اختي اسمعهم يتنرفزون عليه وجنب امي يتمسخرون عليه يعني مثلا غبي هذا بس من وراي
بس امي الحمدلله مو متاثره منهم لانه تشوفه من غير وجودهم هادئ وذكائه خارقه اذكى من اطفالهم كل شي يعرفه من كان عمره سنه وكل شي يفهمه
وبس :blushing:

[رويدا محمد]

وعليكم السلام ورحمه الله وبركاته
الله يعينك أختي ..!
ان شاء الله يفيدك الأعضاءء ..

[آلمتفائله]

سؤال بس !


خواتك ليه تزوجو اصلا اذا بيرمون عيالهم ومافيه مسؤوليه ؟؟؟؟


شوفي ابقولك شغله يا اختي

صحتك اهم من كل شي لو خسرتيها محد بيفيدك لاخواتك ولاعيال خواتك
وعادي قولي لخواتك كل وحده تمسك ولدها عطيهم على راسهم وحتى لو صار مشاكل فانتي مو مسؤوله عن تربيتهم

هذا بنظري امر مو تافه صراحه لان فيه اهمال واستهتار وعدم مسؤوليه
انتبهي لصحتك وزبدي لهم واللي تبي تعاتب تعاتب لين بكره دام وصلت لدرجه مايهتمون فيك ولافي صحتك ووصل لعتاب

عطيهم بالوجه وقولي ترا ماني مسؤوله عن عيالكم مو انا اللي خلفتهم ونسيتهم

قلبك وصحتك اهم من كل شي تراكضين ورا مين ولاتخلين مين !

هذا افضل حل كل وحده تمسك عيالها وبس انتي مو مسؤوله عنهم

[آسيرة حرف]

وعليكم السلام ورحمة الله وبركاته

هاتي خواتك لي :MonTaseR_56: من جدهم ذولا
تدرين انك تذكرين بصاحبتي واخواتها الانانيين مع احترامي لهم

خيرا ان شاء الله اذا هما عارفيين ان مستقبلهم اهم من ولدهم لا يجيبو عيال ولا عادي
يخلفو وانتي تتمي تربي لهم الحاضنه
عيال اختي ع عيني وراسي هذه ساعه ساعتين ثلاث يالله امشيها يوم
يومياً امعصي
قروشة العيال ماحد يبيها اذا ابوهم وامهم ماتحملوهم
حتا لو اني خالتهم مابتحملهم

خلاص اختك اللي تدرس بعيد تاخذ ولدها معها حرام يخسر حنان امه منشان وظيفتها
اي عقل ذا يحكمها كذا في حضانه تابعه للمدارس وروضات اذا سن روضه
ومدارس اذا صار يدرس

بعدين انتي لو تتغاضي بتشيلي وتخسري حياتك ودراستك
خواتك موب نافعينك
اجتهدي بدراستك وايش عليك منهم ومن عيالهم
عادي يتجمعون ويكند اسولف معهم ساعتين والعب شوي مع عيالهم اذا راغبه اذا عندي اختبار سلام ع الطاير
غير كذا صل الله وسلم
اسحب نفسي لغرفتي واجلس بها مقفله بابها وهم بكيفهم جعلهم يباتو ماعليه
مستقبلي صحتي اهم من علاقتي معهم
واذا زعلو من الحقيقه بكيفهم بيرضو من حالهم

يعني انتي تتنازلي وتراعي مشاعرهم وهم لا قل هو الله احد
اتخذي موقف حازم اتجاههم لو عندك تغاضي وتنازل خليه في الاجازه ايام الدراسه
شدي حيلك وطنشي كل ابوهم
نصيحه مني لو جا معدلك هابط بسببهم مابترفعينه وقتها
مستقبلك اهم من مستقبل عيالهم الصغار
عيالهم مسؤوليتهم هم مو مسؤوليتك
ماخذين المثل هذا خلفنا ونسينا يعني معليش لاتزعلي

لازم تفهميهم انك مو مسؤوليتك هذه انتي عندك شيء اهم يخصك حياتك صحتك دراستك لو هما مكانك كان صارت احداث ثانيه
اذا تعبت واحده فيهم وعندها ظروف خاصه ايه ماعليه اوقفي مع اختك بس هاكا
ع طول الحال بصحتهم وتعبهم لا

والقرار بنهايه لك اكيد والله يعينك ع ما انتي فيه ..

تقبلي ردي وعبق وردي مع خالص احترامي لسموك
آسيرة حرف

[الدانة]

وعليكم السلام ورحمة الله وبركاته



مااعرف شنو الظروف اللي حدت اختك انها تخلي ولدها وتروح .....!!؟

بس الله يعينك بس شوفي ياروحي حاولي اذا جاو خواتك عندكم

اشغلي ولد اختك باي شيء بعيد عنهم

اما انك تطلعين انتي وياه وتتمشين ..او تعطينه البلاي ستيشن يشغل وقته فيه

اللين مايروحون خواتك


بس سؤال حبيبتي ..غريبه هم خالاته مثلك ...وشلون مايحبوونه ؟؟؟

وياليت تصارحين اختك اللي تاركه ولدها .. قولي لها ان ولدك مرره محتاجلك

ودايم يسال عنك ..لازم تاخذه معها ...وقولي لها استثماركم وتضحيتكم لعيالكم


الله يهديها ..ويهدي الخالات


ويسخرلك يارب ويسهلك امرك ..مثل ماتضحين لهم :81:

[مرجانة]

خواتك مستغلينك بصراحة
و برأيي إذا ما تقدري تواجهينهم و تقولين لهم بنفسك عن تعبك
قولي للوالدة تحكي معهم من باب خوفها عليك

يعني تقول لهم انا اشوف بنتي في اليوم اللي تجون و تتركون عيالكم عليها تتعب بزود و هي الاجهاد يضرها
كل وحدة تشوف ولدها و كفوا شر عيالكم عن اختكم

أنا أم و أعرف أذى لعيال
يا الله اتحملهم فكيف غيري يتحملهم؟!

خواتك متكلات عليك و لانك ساكته و عودتيهم استغلوا هذا الشي

ممكن انتي طيبة و ما تحبين تتجادلين معهم
بس لا تحملين طاقتك فوق حدها

و لازم تتخذين موقف يا قلبي >> عورني حالك و الله

ربي يرضى عليك و يحنن قلب خواتك عليك

[إحساس طفله]

..
الله يكون بعونكك
بصراحه بعض الاخوات هم عَ القلب قسم يتزجون و الوحده تحمل وتولد
وتفلت يعني " تترك " طفلها يعذب العالم ..
مافي احساس مافي كرامه يختي امسكي ولدكك بلا تفاهه حقتك
انا اعرف وحده كانت كذا من قريباتي يا اني دجيتها دج يعني " ضربتها ضرب " :MonTaseR_4:
خليتها ماعاد تخرج عيالها قهرتني قسمم ..
وانتي لا تخافي انتي تعبانه ربي يشفيك يارب .. حاولي تكلميهم ..
فديتك

[مطر الفجر]

وعليكم السلام
خذي ابن اختك وابقي في غرفة لوحدكم انتي واياه
والعبي معه وطنشي الباقيين ^_^
اريحي نفسك وراسك
واتركي خواتك واولادهن يتشاجرون مع بعضهم
هن اولى بالاهتمام باولادهم
تحيتي

[السهم الأخير]

السلام عليكم

الحل إنك تتزوجي وتهتمي بعيالك وتربيهم أحسن تربية وتظلي بارة بأمك وطيبة مع الكل .

أختي تذكري شيء

طالما الزعل والهم ما راح يفيدوا في شيء فلا تزعلي ولا تشيلي هم .

فرفرة عيال الأخوات معروفه فكل بيت ونحن عندنا نظام في بيتنا .

اللي بغى يجينا ياحياه الله ولكن لا يوجد ضمانات في البيت

اطفال تطاقوا تضاربوا فلان عض فلان هذا انكسر ضرسه او يده حد طاح من الدرج هذا سكر على اصابعه

ماشي ضمانات اللي حس بالوجع يبكي ويناجي أمه والبيت زلزال وحد ياكل أزرار الريموت وحد ياكل غطاء السماعات وحد ياكل صابون وادوات الميكاب وحد يدخل حمام ويسكر على نفسه الباب .

حالة تسيب غير عادية وأنا شخصيا إذا جيت أتضارب مع الاطفال ويعضوني وأجلدهم جلد بالمخده لين يناموا من التعب أو تجي أمهم وتقول هلكت الاطفال .

أهم شي عندي الطفل يأكل ويكون في البيت وما قد شفت في الدنيا كارثة إلا لمن تجمع 3 بنات مع بعض ياخي فيكن سم ماله حل من صغركن . هواش وبكا وحسد وعناد يازين الأولاد ياخي كل شيء فيهم حلو .

ومع ذلك صدقيني بيوت كثيرة تتمنى تسمع صراخ طفل يكسر كل أكواب المطبخ

طولي بالك الصغار يكبرون وما يظل إلا جميلك وحسن طبعك .

انتي بنت راقية ومليون واحد يتشرف تكوني شريكة عمره والله يرزقك

[قيس]

انتي ترجمه حرفيّه لكلمة (انسان) بكل ماتعنيه الطيبه والرحمه

لذلك اصبري وان شاء الله ربي بيعلي شانك ويعوضك خير على كل هذا التعب بس كمان انتبهي لصحتك مو زين الاجهاد للي معاهم مشاكل فالقلب وانتي ادرى بهذا الكلام