يا اصحابنا فالمنتدى لو تسمحون

[المزني]

السلام عليكم
مشاركه بسيطه وعابره

يا اصحابنا فالمنتدى لو تسمحون
السالفه ما هي نشيد ولا شعر

الشعر ديوان الادب وايضا شجون
ما هو سواليف على الخاطر تمر

والبارحه جريت لعيونه لحون
الجادل اللي ما يشابهها بشر

اذا حضرت ما غيرها سر العيون
مثل القمر اذا اكتمل نور القمر

قفت وانا عيني تراقبها بهون
والليل غطى نورها يوم انتثر

يا ليل ليتك غبت عما يسترون
شي ظهر والشي الاخر ما ظهر

ما ني مبينها اخاف تكثرون
الأسئله والخافي ادهى لي وأمر

وسلامتكم.

[نجم ضاوي]

الله الله عليك يا المزني ,,,
صح لسانك وسلم بنانك ,,,
قصيده عذبه من شاعر عذب ,,,
بيض الله وجهك وفالك البيرق ,,,

لا خلا ولا عدم ,,,

[القارظ العنزي]

صح السان أخي المزني على الابيات الشجيّة والمثيرة للجون ـ فاسمح لي بالمداخلة والمعاتبة بلوازم الحب ووصف المحب :

الخـاطرة هي الشعر وايضا الشجون
واساسها ســوالــــــــف هي الخطر
لولاها ما كـتـبـنــا بالـصـدر الـحـنـون
ولا وضــعــنــا في تـواصـيـفـه شـعـر
ليه الـتـنـاقـض يا فتى نــجـل العيون
وشلون الليل يغطي من ضوح القمر
ســـــواد الليل ما يطرده غير الفتون
الـلـي تـشّـع خـدودهـا نــــور جـهــر
ونسهر على نور الجبين اللي يمون
يمون بذبحي وايضا هو جـاب السهر
من شافها صــابــه بلا ومسّ وجنون
ما عــالـجــة دكــتــور شـافـه وانبهر
خطط القلب وحـــاول يفهم ما يكون
ولا لـقـى باشــاعــتــي أيّــة خــبــر
راحت علومه كــلــهــا قــهــر وغبون
ولا دري وش علتي بـيـن الــبــشــر
الحب سرّه مثل الروح ورب الــكــون
ما يــكــشــفــه الا خـبــيــر وله نظر
وشعر المزيني هدّني ثار الشجـون
وعزّاه لحالي قـافـكـم هـدّ الـظـهــر

القارظ العنزي

[آلنـور]

مشاءالله ،،
قصيده جزله
صح لسانك

[إمبراطورة البحر]

ما شاء الله
صح لسانك اخوي
قصيدة جزلة .. ابيات رائعة
راقت لي كثيرا ..
لا خلا ولا عدم .. بإنتظار الجديد وبشوق

دمت بود

:81:

...

[معزوفة مشاعر]

صح لسانكم والله ولا خلا ولا عدم ان شاء الله

[المزني]

أشكركم جميعا وشرفني مروركم وكلماتكم الجميله

[عتيم]

صــح والله لـسـانـك ...


ولـن اخـفـيـك الـقـول :: بــأن هـذه هـي الـمـره الأولـى الـلـتـي يـشـد فـيـهـا نـظـري شـاعـر مـن شـعـراء الـمـنـتـدى


شـاعـر مـتـمـكـن .. وزن وقـافـيـه وسـمـك ومـعـنـى

[المزني]

صــح والله لـسـانـك ...


ولـن اخـفـيـك الـقـول :: بــأن هـذه هـي الـمـره الأولـى الـلـتـي يـشـد فـيـهـا نـظـري شـاعـر مـن شـعـراء الـمـنـتـدى


شـاعـر مـتـمـكـن .. وزن وقـافـيـه وسـمـك ومـعـنـى





صح بدنك وشرفني مرورك وكلماتك والشعراء الموجودين فيهم الخير والبركه وانا أحاول وعسى الله يجملنا معكم

[ابوخالد..]

يا ليل ليتك غبت عما يسترون
شي ظهر والشي الاخر ما ظهر

ما ني مبينها اخاف تكثرون
الأسئله والخافي ادهى لي وأمر

جميله ،،
وصح لسانك يالشاعر
ولاهان قافك ولك التقدير..

[ابو الملكات]

كنت هنا مع جمال حرفك الانيق استمتع بما سطره يراعك الماسي
بشوق ولهفة مشتاق انتظر جديدك المتميز اكيد احلى
كل الود