عروس وبااسكن مع أهل زوجي

[مشكلتي]

السلام عليكم ،، صباح الخير كيفكم
انا بقولكم ع مشكلتي وأبي رائيكم بالله .
انا ملكت ع شخص يحبني واحبوه من زمان
عمري 25 وزوجي 35والحمدلله ربي جمع بيننا ومره يحبني وسواا كل حاجه عشاني الله يخليه يارب هو انسان طيب بمعنى الكلمه واوفى بوعده معاي وخطبني عقد قرانه علي وزواجنا ان شاء الله 2017
هو الكبير والمسؤول عن أهله و اهله يحبونه مره خصوصا أبوه وكان مفهمني ذا الشي من زمان وانا مقدره وعارفه الوضع كله ابوه مايستغني عنه
مسؤول عن مرضه ومراجعاته وعلاجه وكل شي وذا الشي اللي خلآاني أحب زوجي . وزوجي انسان مرررره طيب ومسكين وع نياته ع قولتهم من أهل الله . فااهلي مررره حبوه واعجبو فيه .
زوجي هو يبني بيت من 4 سنين والبيت يكسر الظهر عمار وشغله وحوسه وفلوس وحتى انه ابوي قله ع مهلك لين تخلص بيتك من كثر ماابوي ماايبي يفرط فيه .. له أسبوع يلمح لي انه نسكن عند أهله بنفس البيت اذا تزوجنا لان يقولي البيت مابيخلص الا بعد سنتين وانا مافيني انتظر سنتين واخذك معي والله ان البيت سحب فلوسي سحب فقلت له استأجر قالي طيب الاجارات ع 25 30
والبناء ماتجي معه ماااينفععععع قال باتدين كذا ابني ولا استأجر . قال نتمم الزواج ونعيش عند أهلي لين يخلص بيتنااا اما اجار وبناء ماينفع صدقيني قلت وكيف نعيش عند أهلك قال بغرفته.
وفيها حمام الغرفه . بس كذا مابيكون لي مطبخ خاص فيني وخواته ماشاء الله 5 متزوجات كلهم يجون لاهله بالويكند مع عيالهم واكيد ازعاج وحوسه وزوجي دوامه ماينتهي الا 5 العصر.
فمااني عارفه هو قلي هالقرار وابوي قله لو تسكن بدون غرفه عادي مقدر وضعك ابوي احسه سلب حقوقي منه طيب حرااام على أبوي والله حراام
انا افكر اقول لزوجي اسكن عند اهلي وهو يجيني
كل مافضي ولا أجز ،،، صراحه مااقدر أعيش مع اهله ببيت واحد واهله كبار سن وانا انسانه مافيني للمسؤلية لان خواته متزوجات كلهم فببيصير في البيت انا وزوجي والشيبان وخوانه عزابيه بس بقسم الرجال ساكنين ديوانتيهم وغرفهم
مااني عارفه احس كنت فرحانه وفرحتي ذبلت
ودي اكون ببيتي بحريه البس لزوجي اي لبس
يجي من دوامه وأطبخ له الان احس لا , أكتئبت
وهو والله مايقصر معاي حتى لما شافني زعلت
قلي اخر شي خلاص خلااص مابيصير الا اللي خاطرك فيه بس لاتزعلين حزنت عليه
انا والله ابي اخذ راحتي معاااااه ماصدقت ربي يجمعنا الحمدلله بالحلال ابي اخذ حريتي
مو حلو اني اسكن عند اهله مااني متقبله هالفكررره أبد .واحس بنفس الوقت مايبي يبعد عن أهله يعشقهمم مرررره لدرجة يقولي انتي بكفه وهم بكفه ... بالذات أبوه لانه مريض الله يشفيه ويعافيه
لاتحسبون اني اكرههم او ماابي زوجي يبر فيهم
لا بس حطوا نفسكم مكاني شاب حبيتيه من سنين وعشتوا وحلمتو مع بعض بكل لحظه بالحياه
ماابي احد يشاركني فيه في بيتي ابي في البيت بس لي بلححالي . 😿
انا لو شقه فوق اهله راضيه
بس انه غرفه لي وحماام بس وحتى لو طلعنا وتمشيناااا اكيد بمراقبة اهله وأنا مااحب كذا
هل انا على خطاء أم صواب

[إحساس طفله]

حبيبتي دام انه جالس يبني . خلاص قدري ظروفه ..
ودام له غرفه وحمام وانتي بكرامه .. خلاص تحملي وربك السنين صارت تمشي بسرعهه ..!
وبعدين عنده ام و اب فكري فيهاا راح تاخذين اجر كبيييييييييييير كبييييييييير لو جلستي معاهم .. واهتميتي فيهمم
ممكن ربي ييسر اموركك ويفرحكك بعد
واهم شي خواته متزوجات ي قلبي احسن ولا انهم كلهم عزبات .. كان من حقكك ترفضين وتأجلين زواجك ..
ودامهم يجون بِ الويكند حـلو ولا انهم يغثون عليك يومياً فهمتيني .., ي قلبي


ربي يسعدكك و ييسر لك امـرك " اللهم امين :eh_s(8):

[مرجانة]

انا اشوف ان طالما هو شاد الهمة و قاعد يبني ، اصبري هالسنتين و ارضي بالسكن ببيت اهله
و لا تنجبون هالسنتين عيال عشان لا تتبهدلي ، حاولوا تأجلون موضوع الإنجاب إليما الله يفرجها و يجهز بيتكم على خير

الرجال الطيب يستحق التقدير و يستاهل الزوجة تتنازل في بعض الأمور عشانه
هو يبني البيت عشانك بالنهاية

و الله ييسر له و يخلص البيت قبل السنتين ان شاء الله
و يسعدكم و يهنيكم

و مبارك مقدماً حبيبتي

[مطر الفجر]

حطوا نفسكم مكاني شاب حبيتيه من سنين
وعشتوا وحلمتو مع بعض بكل لحظه بالحياه
ماابي احد يشاركني فيه في بيتي
ابي في البيت بس لي بلححالي . 😿

عليكم السلام ورحمة الله وبركاته
لو تحبينه بصدق سوف توافقين تعيشين معه
حتى ولو في غابة !
الحب تنازلات واخذ وعطاء
انتي قدري عطاءه لك وبناءه للبيت وفعل كل شيئ لاجلك
ووفى بوعده وخطبك وملكتو ويريد رضاك ولا يحب غضبك
انتي تقولين لاتريدين احد ان يشاركك فيه
اعلمي انه مستحيل يكون لك هذا الشيئ
عندك غرفتك لا احد يشاركك فيه !
اما البيت اسمحي لي اهله بحاجته وسوف يشاركونك
وهم لهم الاولوية
ابتعدي عن الانانية الغير محببة
وان كان لابد فهناك حل وخيار واحد فقط
وهو تاجيل الزواج حتى اكتمال المنزل
ولكن هذا ليس في صالحك ولا لصالحه
وافقي واسكني مع زوجك واهله بنفس المنزل
ولكن لكي لا تسلب حقوقك اكتبي شروط ومن ضمنها:
1 - ان اتوا اخواته المتزوجات انتي لستي مسؤوله
عن التقديم والشغل في المطبخ والتنظيف من بعدهم
2 - ان يحضروا خادمه لتجمعاتهم العائلية
3 - انتي لستي مسؤوله عن الطبخ لاخوانه العزابيه
وخدمتهم وتنظيف غرفهم وغسل ملابسهم
4 - ان اتى احد من ضيوفهم انتي لستي مجبرة على خدماتهم

بالتوفيق
تحيتي ....

[ظماي أنت]

من صبر لابد يحمد بالاخير

اصبري واحتسبي الاجر مساكين شيبانه
دامه يحبك وتحبينه ضحي بكل شي عشانه
صدقيني ربي بيهونها عليك اني بس فكري زين واقتنعي وبتسهل الامور كلها ان شاء الله

والسنتين طيااااره ترا

الله يوفقكم ويسهل امركم

:81:

[غالي]

من سبقني بالتعليق وفوا وكفوا ..... وما كنت سأقوله ذكروه ولا داعي للتكرار

لكن عندي ملحوظة صغيرة ....وهي أني لاحظت من ثنايا كتاباتك أنك تميلين للأنانية وحب تغليب المصلحة الشخصية على حساب المصلحة

العامة.... قدري الظروف والحمدلله الموضوع مؤقت وفيها فرصة لتتعرفي على أهله عن قرب

وفقك الله للخير

[الورد الاحمر]

دام هو مسؤل عن اهله

فيعتبر مثل ابوهم
فانا ارى انك ع خطأ مبين

اصبري وكم من وحده في نفس حالتك واخس

بس الكل يصبر وينتظر وقت الفرج :MonTaseR_51:

[A S M A A]

بالله ابغا اسالك
العيشة مع بيت اهله حرام ؟ عيب ؟
لا بالمرة شي عاااااادي
ومو كل حياتك بس سنتين و ربي راح يفرجها
بالعكس عيشي حياتك مع اهله مادام غرفتك وحدها و بها حمام
عااادي اعتبري اهله اهلك
صراحة ما اشوف شي غريب
بالمغرب اي واحد يتزوج يسكن ببيت اهله ع الاقل 3 سنين اربع :MonTaseR_51:
صراحة اشوف شي عادي اذا كنتي تحبيه فعلا راح تصبري معاه سنتين و ما تظغطي عليه لكل واحد ضرووفه :رحيق:


ربي يوفق بينكم و يرزقكم الذرية الصالحة وتعيشوا حياة كلللها سعادة وفرح :رحيق: :نبض:

[اللورد يحيا]

شجعي زوجك ينهي بيته قبل موعد الزواج في عام 2017

حاولي تقللي طلباتك ويمسك فلوسه ليستفيد منها في إنهاء بناء المنزل في أسرع مده ممكنه

[غـيـر مـهـتـم]

لو انا منه طقلتك يجيب وحده غيرك ترضي تكون معه وين ما راح

تقولين مافيني تحمل مسوليه الزواج وش لعبه عندك هههه

[همسة الروح]

اللي مافيه خير لأهله مافيه خير لأحد !
خذيها قاعدة
دام زوجك له أسبابه الخاصه ومسؤل كمان عن اهله
هذا نعمة كبيره ولازم أنتي تعاونيه على هالشيء وتفرحين أن زوجك بار بوالديه
في وقت الابناء يتخلون عن تلك المسؤليه !!
ومع الوقت والصبر والدعاء راح يكون لكم بيت خاص ومستقل
بس لاتأخذك الانانية بأمتلاكه لوحدك
ولا تضغطين عليه وتحملينه فوق طاقته
والله يوفقكم ويسعدكم ...

[عابرون]

أحسك راح تخنقيه ع أخر عمره :فطسه:

كنت بقولك أنفري بجلدش وأسكني لوحدش معه

لكنك قلتي أهلك كبار سن حراام فيها أجر من الله كبير

والحمدلله خواته متزوجات ممكن نادرا مايتجمعون

تعذبلي من مداخيل الشيطان حب التملك مو جين يابنتي

هو ضحى وتدين عشان يرضيك

أوكي أهله لهم حق وأولى فيه منك ولو كان اللي بينكم حب
‏ لا تفكرين ببكره لا تدري لعل الله يحدث بعد ذلك أمرا

[الصولجان]

/

من حقك والي يعارضك شاب او بنت كذاب


كل البشر فيهم ذي الرغبه ..

الانفراد بشريك العمر وانصحك ما تروحي .. معاه بيت اهله


لكثره المشاكل اولا ثانيا عدام التفاهم فيما بعد

وممكن تجرحي كبار السن .. وغير كذا سلامات

اخوانه عزابيه صعبه جدا ..


لكن الحل اصبري سنتين .. لما يكمل بيته .. وبعدها

تزوجيه .. صح العمر يمشي


لكن التريع امر مرغوب .. ولا أعارضك

ذي رغبه كل انسانه تبي حلالها وباب

يتقفل عليهم .. مرح مشاكل خصام

ود سوالف .. في عشتي وحدي ماحد له دخل فيها



اتمنى من الله يكتب لك الحياه الكريمه ..

ويسعدك ويسعده .. وربي يفرج همك

[الصولجان]

لو انا منه طقلتك يجيب وحده غيرك ترضي تكون معه وين ما راح

تقولين مافيني تحمل مسوليه الزواج وش لعبه عندك هههه

لا جد انتي اوفر اوفر ..!

معليش حياتي خاصه .. ماني ملزومه

الا فيه ..!

لو اقوله اهلي معاي يسكنون بيرضى ..


عن الهياط وعن العقلانيه الكاذبه

بعض الردود .. غريبه مو بس ردك ..!


اش الي اطلق .. سلامات في العقد انت زوجي

مو اهلك وقبيلتك كلها ؟!




شوي تفكير .. الحياه مو خبط لزق

[الصولجان]

/


على الاقل يسكنها بشقه

جانب اهله او بنفس الحي


ليش بعضكم مسوي اوفر !!

واذا كبار في السن ..! لهم الاحترام والتقدير ..

على عيني وراسي ازورهم


لكن لا والف ما اسكن مع اهله لو يطق

[آسيرة حرف]

عزيزتي مشكلتي

بعيداً عن الردود ولكل عضو نظره خاصه

انا حابه اقولك اذا وافقتي تسكني بيت اهله في غرفه بحمام فانتي مع احترامي مجنونه
يعني تستبدلين راحتك ببيت اهلك وانتي تسرحي فيه من مجلس لصاله لمقلط لحوش
نهاية عمرك بحمام وغرفه
ابسطها اذا جعتي لزوم تدقي ع عمتك وتسوي لك درب في غياب زوجك
الله حتى اكلي فيه اذن

واذا وافقتي راح يجيك السكر لان اغلب وقته برا البيت وانتي مالك حل الا التوكس
والنوتيلا اللي تملكيهم بغرفتك

بعدين وش يعني اهله بكفه وانتي بكفه
حتى انتي اهلك غالين عليك ومستحيل تبدليهم باحد في الارض
يعني المفروض رديتي عليه وانا اهلي بكفه وانت بكفه حطها ببالك

وبعدين في بيت اهله فرضاً وافقتي
لو خشيتي المطبخ بتطبخي لنفسك صراحه اشوفها عيب في حقك ماتحسبي حسابهم
مع انك موب مكلفه بهم بس والله عيب
واذا لقيتي المطبخ معفوس هل يعقل بتمرين عليه تلقين تحيه اكيد بتنظفيه
واذا تجمعو في الويكند اهله كلهم
بالعقل بتخلي امه تلم الكركبه هذيك كلها
واذا صارت وخشيتي غرفتك وقلتي وش عليه
بتقول ابااااو البنت عايبه شافتني مارحمتني في بدايتها بيكون حياء وفي نهايته الف ابتلاء

وزوجك بما انه قال اهلي بكفه بيجي ينقدك امي ترتب لوحدها امي هذه جنتي لو جنتك جيب لها شغاله

يحب اهله حلو الله يخليهم له يارب يبقون اهله بس انتي مالك ذنب في حب اهله
يفصل مابين اهله وبينك وكل واحد منكم يقوم بواجبه انتي زوجته ولك حق وهم اهله ولهم فيه حق
يزورهم ويقوم بواجباتهم واكيد انتي ماتعارضي ع هالشيء ولا وحده راح تعارض اصلاً
لكن يقارنك بهم لا

قوليله انتظرك ماورايه شيء مرتاحه ببيت اهلي خلص البنايه وحياك الله
غير كذا مقبل بغرفه وحمام في بيت مشترك لو تبلط السماء
ماحد يبدل الجنه بجهنم

اما ابوك لزوم تفهميه انك مستحيل ترضين بغرفه وحمام لجل يتفاهم معه بطريقه سليمه
من حقك تشرطين السكن
ومو من حقه يكظم هذا الحق ويقوله شيلها حتى لو بدون غرفه يعني فراشي الارض وسقفي السماء

واذا وافقتي صدقيني
1- بيتكاسل عن تكميل بيته السبب بيقول المصاريف زادت اهلي واللحين انتي
2- بتجيبي عيالي وتسكنو كلكم بهذه الغرفه
ع صجتكم وحوستكم هذه الغرفه مقبرتكم بما ان البيت فيه عزاب وكبار سن
بيكون ازعاج عيالك اول داء لهم ولك بما انك في غرفه اما هو وقت ماتصدع صفق الباب وطلع لاهله
وانتي تحملي قرارك

الحب مو تضحيه ابداً

الفكره بحد ذاتها سلبيه الف مره ولها الف مشكله ايضاً قد لاتكون ظاهره لك الان
لو انو العكس وهو بيسكن في بيتكم اكيد بيعارض لانه السبب مابياخذ راحته
فكيف يقتل راحتك بقراره ذا

ممكن تقولي له لاتكمل العماره كلها شطب لي غرفتين ومطبخ وصاله وحمام
وكمل البقيه كل شهر حبه حبه لين تنهيها
كثير عملو هذه الحركه وكملو ثلاثه ادوار موب دور واحد
ارحم مليون مره من انك تسكني مع اهله بغرفه وحمام :x12x:

الله يعينك يارب

تقبلي ردي وعبق وردي مع خالص احترامي لسموك
آسيرة حرف