بداية الحياة الزوجيه

[مشكلتي]

السلام عليكم
ي جماعة الخير
انا متزوج عمري34 وزوجتي 26
لي 4 شهورمتزوج وأحب زوجتي وأعشقها واعشق التراب اللي تمشي عليه
أنا حبيتها قبل الزواج5 سنين والحمدلله توجت حبي لها بالحلال.
هي طيبه مررره وتحببني. ويشهد الله ماقصرت معها من يوم تعرفت عليها لين هاليوم والسبب اللي ماتزوجتها طوال ال5 سنين كنت أبني بيت وابي لها حياة كريمه كنت أشتغل ليل نهار. زوجتي عند أهلها كانت حياتهم اقل من المتوسط وانا الحمدلله وظيفتي زينه وراتبي زين يعني عوضتها بكل شي كانت محرومه منه ولا أمن عليها مشكلتي معها طلباتها كثرت ولاعاد يعجبها شي انا صح مااقولها لا بس والله زودتها شوي كل يوم طالعه لي جيب لي كذا وجيب لي كذا واذا ماجبت لها تقعد تبكي تقول انا بعدت عن اهلي وحبيتك وفضلتك ع كل الناس وسكنت بعيد عن أهلي عشانك لان اهلها بجده وانا بالرياض .وتقعد تونون وتبكي ومدري ايش
مره قالت أعزمني بمطعم والمطعم غالي أنا أعرفه وقلت لها طيب اخر الشهر وانا مو عشان الفلوس كنت مشغول واخوياي معهم طلعة للبر ماابي اكنسلها عشان مطعم لاحقين عليه واخويااي جايين من الشرقيه ماابي افوتها قامت زعلت وقفلت الباب وانت ماتحبني وانت وانت تفضل اصحابك علي وتفضل اهلك علي ،وجاء الراتب ووديتها ، ورضيت ومره أهلي كانوا يبون الجنوب. يغيرون جو قالت مر فيني لجده قريبه من أهلي وومافي وقت قلت بعدين نروح لجده وزعلت وطول الوقت مبرطمه بالتمشيه.وعديتها
ووقتها حتى حقي الشرعي مااعطتني اطلبها ي بنت الحلال تقول ماابغى زعلانه منك
قامت وقعدت زعلانه منك ي بنت الحلال .
وبس هذه هي انا والله مو بخيل ولاشخصيتي ضعيفه بس انا احبها أحن عليها وماقصرت معها يشهد الله اللبس تلبس ماركات والمكياح ماركات وجوالها اخر جوال والعفش اللي تبيه كله .. وماتحب تروح لجماعتي تقوول مايحبوني
وتحس نفسها غريبه بينهم واهلي تستحي منهم لين اليوم ابيها تروح لهم تطلع اي عذر ولاتروح
قهرت قلبي ،،،، وي ويلي ياويلي اذا ماجبت لها الشي اللي تبيه تبي طلعات ع كيفها وتبغاني معها24 ساعه اذا طلعت لاخوياي وتاخرت ليه تتاخر علي وراميني بالبيت لحالي واذا مثلا وعدتها بطلعه وتتكنسل تقعد تبكي وانت اصلن كل شي تقوله لي كذب وعودك ع الفاضي.
واذا رحت لاهلي وطولت تقول انا مخليني ليه ماتحس فيني اهلي بعيدين عني المفروض خلاص من دوامك لبيتك وبس
ي شيخه شايفتني حرمه انا ختقتني والله.
مو معقوله اللي يصيررررر والله.
سفرتها شهر عسل سويت لها احسن زواح عيشه كريمه لاخنتها ولالعبت من وراها صادق بحبي لها والله ماتلقى مثلي
حجتها أنا وحيده اهلي بعيدين المفروض معاي24 ساعه ...😂.
كيف أتعامل مع النوع هذا من الحريم.
هل هذا دلع او بدايةً الحياة الزوجيه.
انصحوني. ي اخواني..

[وطن قلبي]

هلا اخوي الحبيب اللي تورط هههههههههههه
والله شوف
الواضح ان زوجتك تغار مرررره وتبيك لحالها وتحس اي ظرف يبعدك عنها بانك ماتهتم لها وهذا شيء طبيعي بحكم علاقتكم قبل الزواج
تبي تعوض عن كل دقيقة كنت بعيد عنها .

كل شيء بالتفاهم زين
من رايي
تجلس معها وتدلعها بالحكي
بعدين تقولها ابي افتح معك موضوع مضايقني شوي
وانتي حبيبتي اكيد مايرضيك اي شيء يضايقني
امسك يدها
وقول انا كلي لك حتى لو كنت بعيد عنك
انا احبك واحطك بعيوني لو تبين
بس لازم تحطين فبالك ان لي معارف واصدقاء لابد اعيش معهم
واذا تأخرت عليك حقك اني اتصل اتطمن عليك
واذا مادقيت هنا يحق لك تزعلين
وياروحي انا ابي ارتاح معك مابيك تصكين علي

والشيء الثاني
من ناحية المصروف
بصير اعطيك كل شهر او كل اسبوع مبلغ معين
وانتي سوي فيه اللي تبين
ولازم حبيبتي زوجتي تعيني على اني ما اسرف سواء لي والا لك

واذا انتم اول سنة زواج
يمكن يكون الشيء طفة
بس انت لازم تحط حدود عشان تعرف هي متى تزعل متى تطلب متى تغار والى اخره من الامور

وشكرا لطرحك
وربي يخليكم لبعض

[جديلة ورد]

اخوي اول شي مبروك الزواج وياحلوه اذا بني على الحب
صح زوجتك زودتها بطلباتها ممكن انها تبي تعوض اللي كانت فيه
وماتبي تحرم نفسها شي وممكن احد يحن عليها ويعطيها نصايح
تخبر الحريم اذا اجتمعن يحشن راسها افكار غريبه انتبهي يخونك
لايلتهي عنك وترى ماطلبتيه يتعود ومن هالكلام واضح زوجتك احد معبي راسها كلام واجد
لان مو معقوله كل هذا منها وانتم تحبون بعض من قبل ولاتقصر معها بشي ولاتحس
واذا على اهلك وقرايبك ممكن تحس انها غريبه لانها توها مستجده مالكم الا شهور متزوجين
اغصبها تتطلع قل عشاني وكذا بتجي مع الكلام الحلو ماعليك:icon20:
واذا طولت برا هنا ممكن تحس انك مطنشها ساحب عليها وكذا اذا بتطول اتصل عليها طمنها وتتطمن عليها
وفاتح زوجتك بالموضوع لاتخلي شي بخاطرك يمكن تراكمت عليك كذا لانك ماناقشتها ناقش جدي
بس لازم تكون لين معها م عصبي والله يااخوي ماتفيد العصبيه ابد بس تخرب بيوت

توكم بداية الحياه الزوجيه وتشتكي لازم تصبرون وتتفاهمون
العلاقه الزوجيه مبنيه على الصراحه والاهتمام
اذا انفقدوا مايعتبر زواج كلما كنت صريح كلما كان التفاهم سهل
هي بتفهمك على طول بس شكلك ماتناقشها ابدا او تفاتحها بموضوع معين
هذي مجرد نصيحه بسيطه عساها افيدك ياوخيي:MonTaseR_211:
وكثر الدعاء وقل اللهم سخرها لي وسخرني لها وان شاء الله ربي يستجيب

والله يوفقكم وبرزقكم الذريه الصالحه

[سحاابة عطر]

يسعد مساك اخوي
الله يوفقك اخوي ويهنيك ويسعدك
واضح انها تحبك وانت بعد تحبها ومو مقصر معها بشي اجلس تفاهموا مع بعض قول مثل ما انا البي طلباتك لبي طلباتي وقولها إذا تحبيني زوري اهلي علشاني جيبها بالكلام الزين وضح لها وصارحها انك متضايق من هالشيء بس باسلوب حلو وقت مناسب واصبر ترا مالكم الا اربع اشهر الله يسعدكم ويفقكم

[مرجانة]

باين انها تعشقك لدرجة التملك
تبغاك لها وبس

و الله شفت زوجة لأحد من قرايبي
زوجته من كثر ما تحبه تعصبه بتصرفاتها و دلالها

و المشكلة الزعل على اي شي يصير
يسوى او ما يسوى

و التبرير الوحيد .. احبك و انت ما تهتم فيني

فهمها ان تصرفاتها هذي اقرب لتصرفات الاطفال
و انك تنزعج منها ، لها حق لكن انت ايضاً لك حق تسافر مع اهلك و تزور اصحابك

اعتقد الفراغ قاتلها .. شجعها تروح نادي او تدرس دورة حاسب
لغة او اي شي

او جيبوا طفل تنشغل فيه

الله يديم المحبة بينكم و يسعدكم و يخليكم لبعض طول العمر
تتهنون بحياتكم ان شاء الله

[أمير الأبجدية]

معظم النساء من هذا النوع

خلك حليم و صبور و زوجتك تحبك و تغار عليك

هذا شيء طبيعي جداً

[اللورد يحيا]

ماعليك منها خلها تبكي حتى تشبع بكى مصيرها تستسلم وتنقاد لطاعتك إن كنت صاحب شخصيه

فوالله وبالله وتالله لو تعطيها مجال عليك ستصبح هي الرجل وأنت الحرمه وستنقاد لها مذلول كالحمار يحمل أسفارا

حاول تعطيها بقدر ما تعطيك ، وإن جارت عليك إعتد على قول كلمة ( لا ) حتى لو إختلقت مشكله معك أو بكت بدل الدموع دم

قال الله تعالى في محكم كتابه ( الرجال قوامون على النساء بما فضل الله بعضهم على بعض وبما أنفقوا من أموالهم )، الرجال قوامون على النساء أي لهم السلطه والكلمة المسموعه على نسائهم ..

[انـــوااار]

مشالله النصايح اللي جاتك كثييره ماتوقع بقول شي اكثر من اللي قالوه


بس تحمل يعني مايصير تتشكى وانت مالك شهور من تزوجت اصبر كل شي مع الوقت يتعدل بنفسسسه

[غيرمهتم،،]

والله هي استغلتك عشان انك تحبها انت مثل الغبي اللي يقول طيب حاضر

معليش ترا زوجتك مره اوفر دلع ع فاضي تحسب بحركاتها كل شي يصير ي انك تصير مثل الرجال تفهمها صح ولا اسحب عليها

موكل من قالت تعال تجي مو كل قلت انا زعلانه تصدق تعرف تكربها ولا لا اكربها خلي كلمتك هي تصير

[السهم الأخير]

السلام عليكم ورحمة الله وبركاته

أخي الكريم أعتقد أن زوجتك تخاف من الفراق لأنها تعتقد أنها تركت جوار أهلها وانتقلت للعيش معك لذلك سيكون الطلاق لمثل هذه الزوجة قسوة كبيرة على قلبها . (مع أن هذا هو المعتاد وليس هنالك تضحية من جانبها )

أخي الكريم أولا أنا أحييكم أنت وزوجتك على الأسلوب المتبادل بينكم . لا يزال أحدكما يتنازل عن شيء للآخر وهذا شيء جميل.

إذا كانت تطبخ وتكد كثيرا في البيت وليس حولها جارة تزورها وتتسلى معها فهنا يجدر بنا نحن الرجال أن نتذكر أننا ونحن متجهون للعمل فهو بحد ذاته تغيير لأجواء البيت وكذلك المسجد والسهر مع الأصحاب .

كذلك روح الزوجة ترغب بالكثير والقليل .

أخي الكريم صحيح أن بعضهن فيهن من الطمع وخفة العقل الشيء الكثير ولكن الأغلبية يقبلن بالكلمة الطيبة والثناء الحسن والغزل و الكلام اللطيف لأنهن لا يملكن إلا ذلك اللسان ليعبرن عن مشاعرهن فإن ألجمناها ماتت بغيضها أو إنفجرت .

دع التعامل ساعة فساعة أحيانا هزل وأحيانا جد أحيانا مدح وأحيانا نصح وتوجيه .

أخي الكريم أحرجتني عبارة كان أهلها ذوي دخل أقل من المتوسط .

نعم ربما ولكن يحق لها أن تطلب كل ما تريد من زوجها وليس من أهلها وهذا ما فعلته الزوجة .
ويحق لك طبعا أن تقبل بما يناسب الأسرة وترفض ما هو فوق طاقتك .


أرى أن تخصص لها مبلغ شهري لإحتياجاتها وعندما يأتِ وقت السوق والتسوق والترفيه أفضل أن يكون بعد عصر الجمعة أو السبت وإن كان يوما في الشهر .

اضف إلى ذلك أقل الحقوق أسبوع عند أهلها كل ستة أشهر أو تقسم الأيام على الشهور.

أخي الكريم لين الرجل لا يأتِ إلا بخير فاختر يوما تجالس فيه زوجتك وتكسب الأجر بذكر محاسن هذه الزوجة التي ترى فيك فرحتها ودمعتها.

صدقني يا أخي هذه الزوجة يحز في نفسها كثيرا أنها لا تملك المال لشراء هدية لك لذلك تجدها تتحسس كثيرا من المواضيع المادية .

أنت رجل كريم وصبور ولا أرى لك إلا احتواء هذه الزوجة التي لا تملك إلا مشاعرها لتعبر عن رغباتها .

اجعلها تشغل وقتها بشيء مهم كالقراءة والمهارات المنزلية وحبذا لو رفعت من مكانتها بأن تجعلها ترى الحنان في أمك لتحل البركة عليكما معا .

أخي الكريم إن لها في أعماق قلبك منزلة يغذيها الود والتفاهم وإن الرجل ليكسب مكانة جميلة عندما يتودد لزوجته ويرعاها ويذكرها بمحاسن أهلها .

لا تلم زوجة لم تكن تجد المال يوما فصارت تعرف طريق الحصول عليه بدموعها وهو حقها إن كان في استطاعتك.

و مع ذلك كله أنا معك في كثير مما قلت ولكني أطمع بصبرك فاعتبرني والدها أو أخاها أجد فيك مثالا للزوج الصابر والعادل والحليم .

أنت مصدر فخر لأهل زوجتك . هذه أضمنها لك .

وأعترف بأنك أرق وأحلم زوج قرأت مشكلته إلى الآن.

كن جميلا كما أنت

الله يحفظك لأهلك وزوجتك

[مطر الفجر]

عليكم السلام ورحمة الله وبركاته
باختصار و على مسؤوليتي
لابد ان ترى الجانب الاخر من الوجه الاخر لك
كن هادئا وقاسيا باردا لا تعيرها اهتمام حتى ان بكت وزعلت
اقسى عليها لمصلحتها لعل وعسى ترجع الى رشدها
هي تاكدت منك انك تحبها وظنت انك لن تستغنى عنها
ولن تبتعد ولن ترفض لها طلهاةوانت بذلك اثبتت لها هذا الشي باظهار محبتك كاملة
وليس من اللائق ان تمنعك حقك الشرعي وعاملها بالمثل اهجرها في المضجع حتى تعرف احترامك
صدقني هذا من النوع الذي تقسى عليه ويتعدل وقد تقول لك ارجعني الى اهلي قل لها حسنا لك ذلك
ارجعها عند اهلها اجعلها تعيش في بكاء و اسى وقسوة وقهر حتى تعرف قيمة النعمة اللتي لديها
انت رجل بمعنى الكلمه احببتها 5 سنوات ووفيت بعهدك لها و تم الزواج بها
ان تعدلت ورجعت لك بشكل جيد فهذه بدايه جيده للتغيير وستعرف حدودها
وان لم ترجع لك فهذه خيرة من الله وسيبدلك الله خيرا منها
اسال الله لك التوفيق تحيتي

[عاشق الحرية]

يعني عوضتها بكل شي كانت محرومه منه


أنت الآن تجني ثمار هذه القاعدة الغريبة الدارجة على لسان الكثير من الشباب ...

وكأن البنات كن في جحيم مُستعر عند أهلهن ...!!

ولكن الأهل يُحبون الوسطية ويعلمون شخصيات أبنائهم وبناتهم ويعلمون كيف يُمكن ترويض جماح طلباتهم اللتي لا تتوقف ...

عزيزي ... عليكـ بالوسطية ولو بالتدرج اليسير حتى تصل إليها ... لا إقتار عليها ولا تبذير لهآ ...

والزوجة تلقائيا ستتأقلم مع ظروف زوجهآ .. فقط أمسكـ العصا من المنتصف وقم بموازنة الأمور


تحية طيبة

عاشق الحرية