المساعد الشخصي الرقمي

مشاهدة النسخة كاملة : ((شبيه ابوي ومكسبه كل نوماس))


القارظ العنزي
07-20-17, 12:48 PM
يلومني بالطير من يجهل ........ الطير
ويلومني بالناس من يجهل ..... الناس
الطير حر ومن مواكر .......... صقاقير
طير ن وحش ما روضه كف ... حباس
وايضا البشر فيها معادن ....... مناعير
معدن ذهب ما خالطه زنك .. وانحاس
وانا من اللي هام للعز ........... ويطير
ما ردني فقري مع الناس ..... وافلاس
نزعت لربع ن ينطحون ....... الطوابير
كم فارس ن من فعلهم طاح . محتاس
وجبت الهنوف اللي على سنة .. الخير
دين العرب والمصطفى وستر والباس
ما نشدوني عن كثير ........... الدنانير
ولا قالت كم تملك من المال .. والماس
وجابت لي اللي همته همة ........ الزير
وارجي عسى يقضي على زوم جساس
وان زان ظني هو زبون ...... المقاصير
يشوقني بفعله ويرفع لي ........ الراس
سلمان شبره فاق كل .......... الشوابير
شبيه ابوي ومكسبه كل ........ نوماس
ابا انتظر طيري على جمة ......... البير
ولا بد ما ياتي على قب ....... الافراس
واشرب قراح الماء بورد ..... ومصادير
من عقب ايام ن عشتها سود .. يا ناس

القارظ العنزي

مسكك الغلا
07-20-17, 04:49 PM
صح لسانك واعتلا شانك
قصيدة جزله وربي يجمعك
بالشبل سلمان ووالدته
الله يلم الشمل ولا يفرق

نجم ضاوي
07-20-17, 05:17 PM
احسنت يا القارظ في نظم ن وتعبير
دقيت لحن القصيد على وتر حساس

توه بدري . على سلمان عاده صغير
فرخ طير ن .. ومن اصل . . قرناس

دام ابوه . . من الرجال . . المناعير
وجده .. من سلالة .. الزير وجساس

سلمان يجي يوم . يزف لك التباشير
شبل ن من أسد سلمان يرفع الراس


صح لسانك يا صبي عنيزه عز الله انك ابدعة واجزلت ..
والله والنعم في سلمان وابوه وجده ..
فالك وفال سلمان وجده البيرق ..

لا خلا ولا عدم ..

شيخه عربها
07-20-17, 05:27 PM
صح لسانك ياخوي

القارظ العنزي
07-20-17, 05:30 PM
هلا بأختي الغالية مسك الغلا ، آمين يا رب على صالح دعواتك للم الشمل ، ربي يحفظك ويحفظ لك من تحبين ولا يريك سوءا ولا مكروه وصحة ابدانك واعتلا شانك احترامي .

القارظ العنزي
07-20-17, 05:33 PM
هلا بك يا بو ضاوي ومعزتك .... غير
يطيب لي ناخذ معك والقاف مرواس
نجلي بها هم ن مثل زف .. المعاصير
ونكتب لنا قاف ن على لوح قرطاس
انت الصديق اللي يسوس .. المناعير
تفعل كما يفعل سالم ....... وجساس

القارظ العنزي
07-20-17, 05:37 PM
وش فيك يالشيخة حذفتي .... القصة
حكمتك حكمة وصارت للهم .... نباشة
حركت ي العبرة وصارت بالصدر غصة
ويا كثرهم اللي على الغيب .. طشاسة

صح خفوقك شيخة عربها ، أسعدني مرورك وتصيحتك مقبولة .

نجم ضاوي
07-21-17, 02:48 AM
اللي له الحكمه . . المعنى يخصه
الحكمه يا القارظ معانيها حساسه

كل حكمه يا العنزي . . ولها قصه
الخير والطيب . يا الغالي له ناسه

فيه ناس .. للقيل والقال . مختصه
نقل الهرج والكذب . يجري بأنفاسه

اخصرك من ناديه .. ولا تتبع حفصه
بعض العرب بقلوبها الحقد دساسه

وإنت قصتك . تصيب سامعها بغصه
انظر لحالك .. وافهم الوضع بقياسه

اجي يمك ودرسني من قصتك حصه
إنت من اللي . . ظلم الايام .. داسه

القارظ العنزي
07-21-17, 08:15 AM
يفداك عفون الناس والعرص والعرصة
اللي على ما قلت للشر ......... مكناسة
وافهمك انا وافهم مراميكم ..... ونصه
وترى القدح ينضح من ماعونه وساسه
وياكثرهم مروا وبصوا لنا ......... بصة
مروا باخوك ولا خذوا شعرة .... براسه
والحالة اللي اصبحت بالعرب ... قصة
يفرجها ربك يا سند ربعه ........ وناسه
زدنا من الحكمة وعطنا بها ....... حصة
واسجل الحكمة وقولك ......... بكراسة

ماضي الماضي
07-21-17, 07:52 PM
صح لسانك شاعرنا القارظ

صح لسانك شاعرنا نجم


وفيتو وكفيتو


تحياتي للجميع

القارظ العنزي
07-21-17, 07:57 PM
هلا بك ابو ماضي ، وصحة أبدانك لاهنت على المرور احترامي

نجم ضاوي
07-22-17, 04:35 AM
اللي انقرص يا القارظ من الثعبان قرصه
يخاف .. من الحبل .. لو مسك . بالباسه

يسلم .. بعض الناس .. من زود . حرصه
دامه تجرع . . من مر .. الزمن . . كاسه

وانت يا القارظ لابد ما تسنمح لك الفرصه
وتداوي جراح .. بداخل .. الروح .. لباسه

البشر . لو ما ياكل .. على الضرس قرصه
عز الله جاع .. والجوع بوسط الحشا جاسه

هذا كلامي .. وحطه .. في الاذن .. خرصه
قبل لا تندم وتصبح امورك يا خوك منحاسه

القارظ العنزي
07-22-17, 07:36 AM
نعم الخوي الصادق بودة ........ وحرصه
دايم شفيق وبالبلا حاضر ........... باسه
والخرصة للي حطت في اذنها الخرصة
الجادل اللي يزينها لبست ........ الماسة
وانا الياصارت عندنا بالبشر ...... خبصة
ناكل خبيص ونلبس لحروبهم .... طاسة
وحكمتك نفهمها ونفهم معك ....... نصه
ومثل ما قلت مسجل عندي ..... بكراسة


SEO by vBSEO 3.6.1