((وين انت ياللي تشرح الحب بالقاف))

[القارظ العنزي]

وين انت ياللي تشرح الحب .... بالقاف
تعال واشرح لي عن حبك .... وشوقك
الياصار ما حبك جلب ظل .... والحاف
عز الله انك بت وتشكي ....... حروقك
ما ينفعك كثر السوالف ...... والالطاف
الياصار ما ينذاق منه ......... ويذوقك
وصار التحدي بينكم كنه ....... اسعاف
حتى ارتفع معيار ذوقه ........ وذوقك
هذا الصحيح وباقي الهرج .. صفصاف
تشكي الولع وتقول سهران ...... موقك
ما ينفعك لو تشتكي زين .... الاوصاف
ما دام ما حصلت منها .......... علوقك
خل الهوي يا ذيب للذيب ..... ما خاف
ذاك الجسور اللي بحبه ........ يشوقك
حاف الخطر والموت في حوفته حاف
واحيا عروقه وانت ماتت ......عروقك
عز الله ان السوق سوقه ..... الياطاف
سوقه نفق والا انت كاسد .... بسوقك
هذا هو الميلاف يا حي ........ ميلاف
هو طوق الزينات والموت ..... طوقك
يستاهل السهرات مع نابي ... الارداف
من ينعش الاشواق وانعش .. خفوقك

القارظ العنزي

[الغاوي]

صح لسانك

وعلا شانك


راعي القلب الاخضر
لا تلومونه

ابيات روعه سلمت

[نجم ضاوي]

الف وحاء .. ثم باء .. ويتبعه .. كاف
يا ذا الحبيب .. اللي . فاقت وصوفك

قلبي اللي .. من بعد . فرقكم عاف
زين البنات .. اللي حلاهم .. يطوفك

يا لعن ابو قلبك .. اللي علي ماراف
ويلعنك ياقلبي .. مو قادر .. يعوفك

يوم اثمر الليمون . حتى النخل صاف
عزيت علي .. يا باهي القد . شوفك

يومك صغير تقول اني للقلب ميلاف
واليوم محروم . . من لمسة كفوفك


صح لسانك يا القارظ على هذي الابيات الجزله ...
لله درك يا صبي عنيزه ...

[القارظ العنزي]

صح خفوفك المسا أسعدني مرورك لاهنت

[القارظ العنزي]

الجزالة في تواجدك في متصفحي ابو ضاوي لاهنت ، ولك في القلب محل ومكان يعظم يوما بعد يوم وانت الاستاذ والاخ الاكبر دوما وابدا .

[احلام عابره]

يقول الي لهواكم يوم .....ماعاف
وش حاجتي للعيون ..الماتشوفك

الف وحاء وبعدها........ باء وكاف
ماتوصف شعوري ياكامل وصوفك

الله عطاني قلب في حبكم ماخاف
تعال احضن اشواقي يزول..خوفك

ان كان عرفك بالهوى.. سيف وسياف
ضربة السيف اهون من طعنة حروفك

القارظ العنزي ابدعت
تقبل مروري

لك كل التقدير والاحترام
...

[القارظ العنزي]

آسف جدا جدا للاستاذ الكريم والعضو المميز الغاوي على الخطأ الغير مقصود بستبدال اسمه بأسم المسا لعدم التركيز فأقدم اعتذاري له مدد بلا عدد وأرجو منه قبول العذر ومغفرة التجاوز الغير مقصود . كذلك ارجوا من الاخوة المشرفين على القسم تعديل الخطأ مشكورين .

[القارظ العنزي]

عز الله ما عندك يالضاوي ....... انصاف
ظنيت انا المقصود بجملة ...... حروفك
تثرك تغزل في حلا زين ....... الاوصاف
وانا رفيقك اللي يفاخر ........... بنوفك
كنت احسب ان غلاي في خاطرك طاف
ومتمركي ما بين ذهنك ......... وجوفك

[القارظ العنزي]

عودة غلا يا مرحبا بكل .... مرياف
من ديرة العدوان لحدود ... جوفك
لك فقدة يالترف مع حرفك . وقاف
عسى السبب ما هو سبايب ظروفك
المسك ينشدني وضاوي والاطراف
وكل يقول احلام غابت . ووصوفك

[نجم ضاوي]

عز الله ما عندك يالضاوي ....... انصاف
ظنيت انا المقصود بجملة ...... حروفك
تثرك تغزل في حلا زين ....... الاوصاف
وانا رفيقك اللي يفاخر ........... بنوفك
كنت احسب ان غلاي في خاطرك طاف
ومتمركي ما بين ذهنك ......... وجوفك



أنا الكف وانت يا القارظ للكف اطراف
لو الكل عافك .. نجم ترى . ما يعوفك

كل طيب وخير .. منك نجم . قد شاف
تمنيت ذا اليوم .. قبل بكره .. اشوفك

العيون فراش .. وجفني .. لك . لحاف
تعال فيهن اسكن . في اقسى ظروفك

دامت نجم وياك .. يالقارظ . . لا تخاف
أنا السلاك بيدك .. ترى حزات . خوفك

[القارظ العنزي]

يا نجم ياللي للمناعير ..... مضياف
كم مرة للضيف تذبح ...... خروفك
دام انت بالدنيا اقدم ولا .... اخاف
ما دام سيفي بالخطر مع . سيوفك
يا ليت اشوفك لو مرة .. ومصياف
والا في يوم العيد ممكن . نشوفك
انت الصديق اللي له القلب ميلاف
عسى الولي بالخير دايم . يحوفك