((احس انا والمسك ما من توافيق)) [الأرشيف] - منتديات مسك الغلا

القارظ العنزي

10-04-18, 11:54 AM

أحس انا والمسك ما من ....... توافيق
مدري هم الجمهور ........ ما يذكروني
احلام غابت عن كثير ....... الطواريق
والضاوي راح ولا يتذكر ........ فنوني
والله يا لولا ام السعد تجلي ... الضيق
حرمت انا اكتب بين كافي ..... ونوني
ومداوي اللي ينعش القاف ..... ويويق
ضاعت علومي يا عرب .... واعذروني
هذي رسالة قلتها ............... للتعاليق
عسى الغوالي بردهم ......... يطربوني
بعد الحبايب عذب القلب ....... ويعيق
ان غابوا متنا وان لفوا ...... ينعشوني
كني اشيل بكاهلي هضبة ....... طويق
والا الجبال الشاهقة في ........ متوني
والا سقطنا من الجبال ...... الشواهيق
اسرع من برق بالرعد ........ والمزوني
وتقطعت اوصالنا ............. والمعاليق
ومن تحتنا طير الوحش .... يحتروني

القارظ العنزي

ام أسعد

10-04-18, 01:44 PM

سلامة قلبك والله ماعاش اللي يزعلك عزيز وغالي

ياريتني اقدر اجاريك بالابيات نفسي ومنى عيني

لكن مني لك شكر وتقيم على ذكر اسمي بالقصيدة

يارب اكون فهمتها صح واكون عند حسن ظنكم فيني

القارظ العنزي

10-04-18, 02:29 PM

الله يسعد ايامك يام أسعد ، أكيد فهمتيها زين ، فأنا ظاهري المذهب لا باطنية ، أسعدني مرورك وتقييمك لا تهونين .

ام أسعد

10-04-18, 08:57 PM

الله يسعد ايامك يام أسعد ، أكيد فهمتيها زين ، فأنا ظاهري المذهب لا باطنية ، أسعدني مرورك وتقييمك لا تهونين .

الله يحفظك ويسعدك ويوفقك ويسدد خطاك

انت تستاهل الخير ودروبة ولا تهون يا اخوي

أنا فداهم

10-05-18, 12:37 AM

صح لسانك وهذي مجاراة بسيطة لأبياتك

،

بفتح أنا للمسك ملفات ..... تحقيق
ياللي من كاس العسل ..... تحرموني
عامين أكتب قصيدي .... والطواريق
هاليوم في سكة الناسين ... ترموني
عامين أوردكم وأنا يابس .... الريق
واليوم من حوض المنايا .... تسقوني
ياليتني من سكرة الوقت ... ما أفيق
دام أصدقايا بضيقتي ... ما يذكروني
وش لون أسليك يا خاطر ... والضيق
الضيق يملاني ويسكن .......عيوني
دزيت انا طرشي وعيني له.... تويق
على شظايا الشعر أعلن .... سكوني
حتى الفرزدق اللي له بشعره ..... بريق
لولا جرير ما عاش شعره .... الجنوني

،

أتمنى أكون وفقت بالمجاراة ...

لا خلا ولا عدم

مسكك الغلا

10-05-18, 12:57 AM

له له له من مزعل خالي أبو سلمان
....

السموحة منك ياخالي ماورثت الشعر والا تسان جاريتك
يعلم الله ماردني عن المشاركه في مسك والاطلاع والرد
الا الشديد القوي .... ربي يشفي الوالدة ان شاء الله لاني
منشغله معها .... والشعار هنا فيهم خير وبركه باذن الله
لا تحرم موقعنا من حرفك وبوحك ... يسعدك الرحمن ويجمع الشمل
عن قريب مع احبابك في ارض اباءك واجدادك باذن الكريم

نجم ضاوي

10-05-18, 04:17 AM

شيل بالقاف ...وسمعني الطواريق
ياعسى تفداك .. يالقارظ .. عيوني

يامن يزعليك .. عساه ...بالحواريق
تكفون يا بشر في غيابي اعذروني

قافك يا ابو سلمان سبب لي الضيق
لا انت ولا عذالي .. ودكم تعذروني

تدري إني . قاطع أنا نصف الطريق
صوب .. جازان .. ظروفي اجبروني

مثلكم .. في قلبي .. وعيني . يليق
تكفيني . . لو كل . . العالم جفوني

كل العالم فريق . وانت وحدك فريق
ما انساك . . لو كل الناس اعذلوني

أنا .. في همي .. وظروفي . غريق
والله ظروفي . يا بن عمي ازعجوني

يا أم سعد يا عذبة الاحساس والريق
اليوم .. اصحابي . . غدو .. ينكروني

يا أم سعد .. يا نور . في قمة طويق
يا اخيه .. هم ليه .. صارو يكرهوني

صح لسانك يا القارظ ...
كفيت ووفيت وفالك البيرق ...
لله درك وفالك البيرق ...

لا خلا ولا عدا

القارظ العنزي

10-05-18, 07:02 AM

آمين آمين يا ام أسعد ولك مثل ذلك .

القارظ العنزي

10-05-18, 07:18 AM

يا مرحبا بك يا فداهم على . بريق
براد شاي مخدر من ........ عيوني
نشكي عليه همومنا ساعة الضيق
ونكتب عليه اشعارنا .... والفنوني
وناخذ لنا كاسة وكاسة .... تفاريق
حتى يتعدل مخنا ..... وتسبقوني
تسبق بقافك يا حسين الطواريق
ونعوض اللي فاتنا ..... وتطربوني
هذي هي الدنيا بها نوم ... ومفيق
وفيها رجال بالقصايد .... حدوني
اقفوا مع الجمهور بزود التصافيق
وكني انا وياك وسط .. السجوني

صح السانك يا فداهم وجمل الله حالك على المجاراة وكفو والله كفيت ووفيت لاهنت والهم واحد

القارظ العنزي

10-05-18, 07:32 AM

هلا بك بنت اختي وابن العم مسك الغلا وسلامة الوالدة من كل شر ، وقدامها العافية كلها باذن الله ومسموحة ومعذورة لا تهونين .

يا مسك ، يا مسك الغلا سيد البيض
لك وقفة معنا من العام .... يا مسك
وقفة شرف وعطورها مسك يفيض
اقولها وامدحك يالترف . ما ابخسك

ودي لك يا خالتي الغالية

مرجانة

10-05-18, 07:36 AM

يعطيك العافية و الجميع عالابيات الحلوة

اجمل مافي الشعر انه له يستنفر الكل
حبيت مشاركات من جاروك أيضاً يا القارظ
بارك الله فيك و في قصيدك الجميل

طبت

إرحليّ بسكـآـآت

10-05-18, 08:09 AM

يفز قلبي للوجيه المطاليق
فزت هل المقناص لا كلموني

للي على دروب المراجل مسابيق
ضنّي على مسك الغلا صادفوني

يا مرحبا تعداد ضو المشاريق
تشرق على كون المحبه وكوني

يالقارض ادري فيك ضمن المخاليق
اللي على كثر المشاره يموني

ان كان عندك حس مامن توافيق
فانا معك يا خوي ما وفّقوني

يا زيّن طعم الشاي لا جاك ببريق
وأهل الغلا في كاسهم شاركوني

نقّبل على الدّله بفك المغاليق
وترجم اللي في حكاوي شجوني

وانا بشر يا ناس ضمن المخاليق
إليا خطيت دروبنا عدّلوني

القارظ العنزي

10-05-18, 10:45 AM

يا ضو انا مفتون في . حلوة الريق
واحلا من طعم العسل .. والشبيبي
يا ضو لو شفت الجديلة .... تفاريق
تنسفها نسف الفرس ....... للسبيبي
يا ضو انا ضيعت كل ...... المعاليق
واظنها يا ضو راحت ........ حبيبي
بنت صغيرة بالديار ....... التشاريق
ابيض من البيضات ... والا الحليبي
ادعوا لنا يا ضو وقت ..... التوافيق
يالله عساها تنكتب من ..... نصيبي
يا ضو انا مجروح بي ضيقة وضيق
وزود على جروحي زاد .... النحيبي

القارظ العنزي

10-05-18, 10:51 AM

مرجانة الغالية أسعدني مرورك تعطيرك لمتصفحي المتواضع ، وتقييمك ذاك الوسام والذي مستقره صدري طبت ي وطاب مرورك .

القارظ العنزي

10-05-18, 11:05 AM

يا سكات يالنشمي حفيد المطاليق
شبل الرجال اللي تخوض المنوني
يا مرحبا بك عد وبل ..... التفافيق
واعداد وبل حدرته ........ المزوني
قافك تسيد الشعر ...... والطواريق
متميز قافك على كل .......... لوني
تراني وانتم بالهوى ... والعشاشيق
نشكي هيام من سواد ..... العيوني
يا ما ذبحونا فاتنات ....... الغرانيق
اشكي لك حالي يا فتى ... عذبوني
وش حيلتك يالقرم في حلوة الريق
اللي فتنتني ومنها زادت .. اجنوني

ابوالليل

10-05-18, 08:16 PM

في داخلي يالقارظ احساس بالضيق
ليه ماذكرت اسمي بذيك... اللحوني

نسيتني ......ولانويت .......التفاريق
ياحيرتي ياوحشتي......... ياجنوني

تتذكر الاحلام بنت .......الطواريق
والنجم راعي المجزلات.... الفنوني

يالله يامعبود جيب .........التوافيق
واحفظ عزيزن ماسأل ......ويشلوني

القارظ العنزي

10-05-18, 10:03 PM

انا ذكرت اللي وان تغيب .... يويق
ما هو من اللي هاجروا واهجروني
يمر عليه العيد ما له ...... تصاديق
ولا رسالة عيد فيها ...... اذكروني
واللي نساني لحظة الهم . والضيق
ما نذكره يا صاحبي ...... لا تهوني

طبت وطابت مجاراتك الجزلة لاهنت يا ابو الليل

ام سارونا

10-07-18, 06:47 AM

الا ولد العم ماارضى زعله
اعذرنا ي القارظ من القصور
مشكلتي ف الشعر اني مانيب من أهله
وإلا اعرف اكتب حتى شطر
صح لسانك
والله يكتب لك السعادة دووم

القارظ العنزي

10-07-18, 08:09 AM

عافاك الله يا ابنت العم ياسمينة لاهنتي على الطلة البهية وتعطير متصفحي المتواضع ، لاعدمناك هذا من لطفك احترامي

أورانوس

10-08-18, 07:38 AM

صح لسانك يالقارظ وإلا الزعل لا تطريه:ai:
الدنيا أشغلت الأخ عن أخوه ما بالك بالصديق ؟

ولمن جاراك ونثر بوحه هنا علا شانكم يارب
وهذا حال الدنيا ما تدوم لأحد:MonTaseR_221: