منتديات مسك الغلا | al2la.com - لثام الصمت ... حصرية

لثـام الصمـت ... حصـريـة

رفع صوت الوجع عني لثام الصمت لين أبكاه
تفتّق من جدار الحزن لين أغرق مدى عيني

بكيت وليت مثلي لا بكى يبكي على ليلاه
يا صورة من وجع ليلى قبلها الريح ترميني

ترى ما جيت أبحرث هالثرى وأمشي إلين أقصاه
هنا جيت أنفض غبار الغياب و امسح إيديني

أبكتب للشقا ، للملح ، للأحزان معنى الآآه
أبكتب شي يعنيني إذا بي روح تعنيني

ينادي بعضي لبعضي وتصرخ ونتي قل هاه
و هاه حكاية لناظر غريبٍ شلّ تكويني

أنا منفى لوطن ذل الرحيل لسلهمات خطاه
أنا أكثر من أحاسيس الدموع اللي تبكيني

تكثّف كلمة بفمي وتغرق بالكلام أفواه
زفرت آخر وجت جرحٍ صدى صوته يعريني

تجاعيد الوجع هدلى إذا برد الوجيه أغواه
كذب ذاك الذرى لحظة توقعته يذريني

أبدفن من تحت سطر السنين اليعربي وأنساه
أبرقا للثرى ممكن أشاهد من بقى فيني

أحب ! وليت من حب الدروب وداعبه مضماه
سأل بإيد الحنايا وين انا من قبلي وويني؟

خطأ يا رحلة أنفاس الليالي هالمدى أخشاه
عرفت آخر تفاصيل الطريق اللي يوديني

إذا كان الفخر فوق الأعالي جيت أبي أرقاه
وإذا الخطوة تبي راسي كفنها تحت رجليني

أتوه بكل من حولي وأغني للفضا عزاه
عزيز وذب من آخر مشاويره دواويني

ظلامٍ طوّق رقبة السحاب وحدّ من ممشاه
نسانيس الجحود أضحت على البسمة تواسيني

دموع جار والغربة مدينة والشوارع جاه
أشيل بهالضلوع العوج حلمٍ ملّ يبنيني

تعبت أجامل الهم الطويل المعتلي وألقاه
وطن ذبلت تعابيره على دفتر تلاويني

أقدم له تحت ظل الهجوس المعتمة مركاه
يقدم لي مسا دربٍ تعب حزنه يسريني

أشوف الحرف بين السطور الممحلة وأقراه
أسلي خاطري لو كان مافيني يكفيني

وحضرت أسوق لدروب المعاني شاعرٍ حياه
منابر من فخر ضخّت حياها في شراييني