سلام بالكمبود والمسك مخلوط = ماهو بمشبوك ٍ على سلك خلاط
أزكى من الريحان للقرم مسفوط = ومن التحايا فيه مليون قيراط
عذب الكلام اللي من الصدر ملقوط = نقيته من الصدر نقوه بملقاط
قصيدة ٍ كتبتها له على أوط = وطرزتها بأبيات وحروف ونقاط
وطبختها طبخه على قدر مضغوط = لين إستوت ما بين تمّوز وشباط
وعبرت فيها من ورا سبعة شطوط = نقوة حديث ولا بها غنج وهياط
من بحر إبن قضعان أخذت لي شوط = وأخذت لي شوطين من إبن شلحاط
أمدح بها شيخ ٍ من الناس مغبوط = ذكره ورد بالطيب في كل الأوساط
من كثر ما عزّه بلا قيد وشروط = كتبتها بيدي محبه ومسفاط
تركي وتحت إسمه دواوير وخطوط = إبن علي مبدا ومنهج ومقلاط
اللي على الطولات بالإسم محطوط = يرومها كنّه على طلعة الغاط
شيخ ٍ ليا جيته على طول مبسوط = ما عقّد حجاجه ولا عنده إحباط
من طيب راسه واصلن علمه أسيوط = كنّه يسابق هبّة الريح ببساط
من روس قوم ٍ علمها علم مضبوط = لا ثارت الهيّه قويين ونشاط
تاريخهم بالمجد والجود مربوط = مشهود له قبل حضارات الأنباط
كم راس شيخ ٍ راح بالسيف مليوط = سبيع منها الناس تخشى وتحتاط
وربعه شيوخ ٍ ماطت أرض الوغى موط = من طيبهم عدّوا على راس شمحاط
آل أبو ثنين ولا بها حرف مغلوط = تضرب على راس العدو ضرب مخباط
يحوطهم تاريخهم بالفخر حوط = صحايف ٍ بيضا أبد مابها أغلاط
يا تركي أبو ثنين يا راس عملوط = راس أبلج ً حر ٍ على الطيب يشتاط
ياشوق غرو ٍ نادر الوصف شمحوط = غزالة ٍ تقعد على فرش وسماط
اللي شعرها فوق الأمتان ممشوط = تلقط عناقيد السعاده تلقاط
أقولها والصوت عالي ومشحوط = المركز الأول لك بكل الأشواط
بالمرجله أخذت نوط ٍ ورا نوط = ومن الشهامه والسطر عشرة أنواط
أمرك ولو دونه مقصات وخيوط = نافذ ولا همّه مراكز وضباط
وإسمك على صفحات الأمجاد مخطوط = خطّه على صفحات الأمجاد خطاط
ما جيتك إلا ورحت راضي ومبسوط = لو كنت قبل أجيك مربوط برباط

صح لسانك يا برق الشمال

ماشاء الله تبارك الله
صح لسانك واعتلى شانك
قصيده جزله من جزل
امتعتنا ي برق