اقرأ في التلجرام كالعادة احصد المفيد مما أقرأ وأطلع
قرأت هذه القصة بلهجة كاتبها .. اللهجة المصريه نسختها كما هي
العنوان .. سلس وجميل .. العبرة في النهاية .. فسبحان الله حيث انه يسوق الخير لطالبه على هيئة بشر ... .. ربي ما ابدعك

اترككم معها وكما اسلفت نسختها كما هي

......................

♡▪︎الحمد لله في زحام من النعم▪︎♡

بقالى ساعة بلف بالعربية عشان ألاقي ماكينة atm فاضية عشان أعرف أسحب فلوس ومش لاقي،،، يا إما عطلااانة يازحمة جداااا..

مشيت كتييير عشان ألاقي وآخر مازهقت لقيت واحدة خفيفة شوية

نزلت متأفف جدا إني هقف في الطابور ..المهم وقفت ...

لاحظت الراجل اللى قدامى حد في أوائل الخمسينات من عمره ومن الطبقة المطحونة...الراجل كان عرقان وجسمه بيتنفض مع إن الجو مش حر ولا حاجة بس ماركزتش اوى معاه ....

بعد شويه لقيته بيقولى " هستأذنك بس تحجزلى المكان عشان مش قادر أقف وخايف اقعد يروح عليا دورى"
فقلت له اتفضل ودورك محجوز....

الراجل قعد على الرصيف اللى جنبي وبدأ ينشف العرق اللى مغرقه ورافع إيديه للسما وبيقول "يارب أنا ماينفعش خالص أعيا،، النهار ده بالذات خد بإيدى بس لحد بكره يارب "

الراجل كان بيتوسل لربنا انه مايتعبش بطريقة لفتت انتباهى ...قربت منه وسألته "أنت كويس؟"

قالى كلمه هزتنى بجد "الحمد لله فى زحام من النعم "

بقوله واضح انك تعبان طيب ماتروح لأقرب دكتور ...

لقيت الراجل عينيه دمعت وهو بيقولى ماينفعش أتعب يا أستاذ دى رفاهيه انا مش أدها ...
أنا زوجتى متوفية من 8 سنين وعندى 4 ولاد كبيرهم فى الكلية ومحتاج مصاريف كليته النهارده ووعدته انى هقبض وأروحله الجامعة أديهم له ...التلاتة التانيين في ثانوى واعدادى وكتر خير والدتى كانت بتراعى ولادي بعد موت مراتي ...

لكن دلوقتي أمى كمان مريضة مرض موت وبراعيها هى وعيالى.

أنا موظف حكومة مرتبى 2700 جنية وبشتغل بعد الضهر عامل توصيل مطعم بألفين جنية وكل ده مش ملاحق على البيت والولاد والدروس ومصاريف علاج والدتي ....

صاحب البيت كاسر عليا إيجار متأخر وآخر معاد النهارده عشان ياخد نص فلوسه بعد محايلات منى ومن الجيران عشان ما يرميش عفشي وأمي المريضة وعيالي في الشارع

أنا وقفت قدام كلام الراجل مش عارف أقول إيه ....

الراجل عنده كل ده وبيقولى"الحمد لله فى زحام من النعم "

وأنا اللى ظروفي أحسن منه مليون مرة متضايق ومخنوق ...كأنه ادانى قلم على وشي وقالى انت جاحد بنعم ربنا ...

المهم بعد ما صرف الفلوس أخدته المستشفي بعد محايلات منى وأصريت أستناه وأوصله بيته بالعربية ...عشان اتفاجئ بمفاجأة أكبر ...

والدته ف التمانين من عمرها وكفيفة وراقدة على فراش الموت وكل كلامها الحمد لله على نعمه والشكر لله على واسع فضله ...

بصيت حواليا أشوف واسع فضل الله اللى بتشكره عليه لقيت بيت عبارة عن دور أرضي حيطانه أكل عليها الزمان وشرب وكله رطوبة

الفرش سريرين ودولاب وكنبتين بلدى وحصيرة ..

لسه ببص حواليا لقيت الباب بيخبط وطلع كلامه حقيقي كان صاحب البيت عاوز فلوسه وداخل يزعق ويتوعد ويهدد بطرده...

المهم بعد تدخل منى ورفض شديد من الراجل المحترم ده اللى علمنى درس عمرى
كان رافض تماما انى أدفع الفلوس بتاعت الإيجار
دفعت الفلوس لصاحب البيت ومعاهم إيجار سنة مقدم وأخدت منه إيصالات الإيجار واديتها له ...

الراجل فضل يعيط زى الأطفال ويقولى " انت طلعتلى منين ؟...أنا طول الليل ما نمتش وعمال أصلى وأدعى ربنا يسترنى وما اتفضحش قدام الجيران في الشارع"

قلتله ربنا عطل لك 4 ماكينات صرافة وزحم 6 ماكينات تانيين عشان يبعتنى ليك
وبعتك انت كمان ليا عشان تعلمنى أتأدب مع ربنا في إبتلائي. ..

الحمد لله في سائر الأحوال

ادعوا الله وأنتم موقنون بالإجابة