|
رجعنا ....وبنكمل : المهم بالنسبة لي من ناحية لعبتي للكورة : فـ أنا كنت مجنون كورة... يعني ادمان على لعب الكورة ....لدرجة ان مرة من المرات أقول بيني وبين نفسي : هل راح يجي يوم واترك الكورة .... لكن حصل هذا اليوم اللي تركت فيه الكورة .....والسبب ان ملعبنا جاه مشروع طريق كبير للسيارات .....وبعدها مالقينا ملعب قريب من بيوتنا .....وشيئًا فـ شيئًا لين تركنا لعب الكورة .... المهم كنت حرفيًّا لعب الكورة يمشي في دمي على قولتهم ...لكن ما أحب أتفرج على المباريات وأكرهها كره من القلب .....وخاصة اليوم اللي فيه مباراة في التلفزون لأنه ماراح أحد يلعب من الشباب في ذاك اليوم اللي يكون فيه مباراة ... مركزي في اللعب قلب دفاع أو وسط ....وإذا كانت عندنا مباراة أجلس دفاع طول الوقت ما أتقدم .... ومن الحوادث اللي حصلت لي في خلال مسيرتي الكروية على قولتهم ...هو ان مرة من المرات كانت الكورة فوف في الهوا أو السما ... المهم أنا جالس أطالع فيها عشان أضربها براسي ..لكن واحد من العيال من نفس فريقي ...جاي بكل سرعته من بعيد وعينه على الكورة مثل حالتي ....وطبعًا كلنا نطالع في الكورة في الهوا وماحنا شايفين بعضنا .....والنتيجة تصادمنا وجه لوجه ....اصطدام عنيف ... طبعًا رحت المستشفى وحطوا ثلاث غرز في الجفن ( بين الحاجب والرمش ) ..لأنه حصل قطع في جلد الجفن ...وصاحبنا الثاني الضربة جت على أنفه فى منطقة الوسط ..وهو أكبر مني تقريبًا بست أو خمس سنوات ... المهم من صفاتي الكروية الزينة والشينة ...هي : 1- التسديدات القوية بالقدم ..بغض النظر عن وصول الكرة إلى الهدف المحدد ... 2- لا أجيد المراوغة ...يعني مركز الهجوم ماينفع لي ... 3- اللاعب الطويل يبهذلني لأن الكرات العالية هي لعبته ...وأنا مش طويل ....يعني فقط أجلس اتفرج في الكورة إذا كانت عالية ... 4- أجيد اللعب مع كل الفئات العمرية وكل الأحجام ...لأن تقريبًا كل فترة لعبي كانت مع ناس أكبر مني في السن بفارق كبير .... 5- لا أجرؤ على التلاحم مع اللاعبين لأني خواف ....ماعندي شجاعة أشتبك مع أحد اشتباك قوي ... 6- المهارات الفردية صفر ... 7- علاقتي مع الناس في الملعب كويسة ...وكلامي معهم يكاد لايذكر ..فقط ألعب وامشي للبيت..لأن طبعي هادئ إذا كان المكان خليط مع ناس معرفتي فيهم هي معرفة لعب كورة فقط ... لأن ملعبنا كان يجمع شباب معرفتي فيهم فقط في الملعب ...... ................................. |
[QUOTE=الخواف;3283217][color="blue"] اقتباس:
كانت عشق وغرام بالنسبه لي اقتباس:
اقتباس:
اقتباس:
ذكريات حلوه حتي لو فيها غرز وتكسير روس هههه عموما العمر له دور والشباب والنشاط يفرق برضو لو انت الان تعرضت لنفس الاحتكاك فـ احتمالية فقدك للذاكره وارد وبشكل كبير هههه [QUOTE] المهم من صفاتي الكروية الزينة والشينة ...هي : اقتباس:
اقتباس:
تمام وبعد منت طويل لو كنت طويل بدون مهارة المراوغه ممكن تلعب راس حربه.. اقتباس:
اقتباس:
اقتباس:
سوالفك لاتمل يالخواف وتبقي ذكرياتك مع الكوره ذكريات من العمر.. |
بعطيك بعض من ذكريات الطفوله .. كوره وحب وحاجات ثانيه .. .... نبدأ بالكوره.. الوالد رحمة الله عليه كان شديد وصارم معنا .. وكان ابو الحاره كلها .. م اعتقد فيه احد من شلتي م انجلد من ابوي .. يعني اذا ماهفه بكف جلده بكلام اقسي من الكف.. وهالكلام يسري علي بقية الجيران .. كل اب لواحد من شلتي او الحاره كان بالنسبه لي اب واحتمالية تعرضي للنقد والجلد اكبر مقارنه بعدد الاباء واكيد راح اتعرض للجلد والتهزيء واكيد بـ صدر تخنقه العبره في كثير من الاحيان لأني لو برد عليهم بنجلد من ابوي ...شلون ترد علي واحد كبر ابوك الا "القم" وانت ساكت .. وكنت انا وشلتي وكل عيال الحاره "نلقم" كفوف وماتيسر من جلد بنفس ردة الفعل.. نسكت ونبلعها وشويات وننسي ونرجع نلعب ونضحك مع بعض..! مره "قفطني" انا وشلتي نلعب مباراه في حاره بعيده عن حارتنا .. يعني ممكن نوصلها كعابي لكن "بعيده" بحسب مقاييس ابوي رحمة الله عليه.. هو يعتبر الخروج من الحاره كِــ شق عصا الطاعه والخروج علي ولي الامر..!! المهم اخوي الصغير فيه "نذاله" نشأت بسبي دون قصد مني لكن بسبب اني ماحب اخذه معي يلعب لانه مايعرف يلعب وانا ابي ناس "تفت" كوره وابي افوز وكذا .. المهم مثل ماقلت لك كنا فالحاره البعيده وراح اخوي واسمه "بندر" غفر الله له بتبليغ ابوي بمكان تواجدي ..كان "جوجل ماب" لابوي قبل طلعت جوجل ... شفت جوجل ماب ..مكان ودبوس....هو الدبوس/المخبر هههه المهم مادريت الا ابو جاي بجمسه البهباني داخل الحاره ياولد حسيتني مروج مخدرات وطابين عليه المكافحه هههه المهم وقف في وسط الملعب قسم انا والفريق كامل من الحارس لرأس الحربه هجينا واطلقنا سيقانا وكراعينا لاقرب طريق يودينا لبعيد عنه وعن مطارده لايعلم الا الله متي تنتهي.. المهم مريت بسرعة الريح وكانت امي واقفه بيني وبين دخول البيت بتعليمات صارمه برضو من ابوي عشان انقفط وانجلد فغيرت مساري ودخلت في "زقاق" او "داعوس" او"ممر" واسمع صوت قواطي وعلب بيبسي وهي تبنط فالجدران من اثر "حوافر" الشله اللي معي نظفنا الطريق وحنا نركض من الرعب والخوف .. مالك بالطويله الوالد لياقته حلوه وسريع لكن عجز عن اصطيادي ودخلت بيت واحد من الشله وطمرت من سور بيتهم لبيتنا ودخلت غرفتي وانخشيت في دولاب الملابس كان بيني وبين الجلد مجموعه من السراويل المعلقه والثياب والمكان مظلم هذي اللحظات اللي م انتظر فيها نور هههههه النور رعب النور دولاب مفتوح وانفتح باب الدولاب وياليل م طولك انجلدت جلد "خضييير" بعقال عريض ولين كنت مره احسه بجنوبي ومره بخدودي ومره براسي كانت حركة العقال خفيفه وسريعه كخفة الاشياء وسرعتها في يد ساحر ههه وللحديث بقيه.. |
نتابع... المهم زي ماقلت لك كان ابوي رحمة الله عليه شديد والسالفه مو علي الكوره بس لا ..الا حتي علي الصلاه فالمسجد ..وكنت اصلي فالمسجد ومع الوقت تعودت وصرت اصلي حتي صلاة الفجر اصليها و اذا تأخرت يجيني ويقومني من عز نومي بصوت ابوي حنون مرهف الحس لين"العريكه" قم ياحمار و صل ياحمار اهم حاجه "صل" او "قم" متبوعه بـ اداه من ادوات االأشاره متبوعه ايضا بـ" حمار" يصبهم كجمله قاسيه في اذني لين اقوم ههههه وكنت اقوم وكنت اصلي مع قناعتي ان الحمار بطبيعته ماله فالصلاه وصوته نشاز وقبل كل شيء حيوان بس عاد خلص تعودت اصلا لو يقولي قم صل وينسي "ياحمار" ماقوم هههههههه الحياه صعبه بس كان حنون فعلا لكن كان بارز في اظهار قسوته اكثر من حنانه اللي ماخذ مساحه من صدره وفي دمه اكثر من القسوه لكن الظاهر انه كان يتبع سنن من قبله ابوه وجده وحاول يمارس نفس الدور معي الله يرحمة وبس.. مره صار لي حادث قوي في يوم عيد ..واغمي علي نص اغماءه مدري وش اسميها بس حسيت بدوخه وعدم تركيز وماكان فيني شده اتكلم اغفي واصحي جاه خبر وجاني بعدها لقتيني متمدد في دوريه مو سيارة اسعاف وراسي علي فخوذه واحس كل جسمه ينتفض وفيه رعشه من الخوف علي الين وصلنا المستشفي وعلي طول دخلوني للطواريء وبدو يسوون انعاش وحطو كمام واكسجين وكنت اسمعه بصوت فيه حشرجه" لايموت" الين تحسنت حالتي وصار وضعي مستقر مرت سنين وسنين وبقت "لايموت" محفوره بذاكرتي يمكن لأنها في نظري وفي مقابل الكفوف والشوت والمطارادت سالفه الذكر كانت احن حاجه سمعتها بقلبي مو بـ اذني منه..!! يالله هذي الدنيا عاد تدري وانا بعد كل هالسنين لو كان في بيدي عندي استعداد اكل كفوف وضرب واذوق نفس احاسيس القسوه اللي مرت علي منه بس اشوفه مره ثانيه عشان اقوله والله اني اشتقت لك واشتقت لـ "صل ياحمار" وبقوله كل الكلام الحلو اللي في خاطري له ولاقلته له في حياته او ان الموت م امهلني ولاعطاني فرصه اقوله له وطبعا حاجات كان يتمناها مني في حياته وتحققت بعد وفاته بعلمه فيها عشان يفرح وينبسط ويعرف ان جلده وقسوته جابت نتيجه ههه وبس |
https://live.staticflickr.com/5562/1...4123bf9fde.jpg هذا طال عمركم تاخذ معك عزبتك/ خيمتك/ قدورك وعدت الطبخ وتسج في مناكبها وين ماوجهت في ذ الاجواء بينشرح صدرك .. ياحبذا لو كان معك ثلة من الحناجر الجميله كـ بشير حمد و ياليت سوق الذهب او مزعل فرحان في طير يللي كل ماتنوي الرحيل كما يفضل وجود الاسطوره عابد البلادي في رائعته نادولي المحبوب ملهوف الحشا ..نادوه ب اسمه وقولو يارشاا .. نعم نعم اجواء الشتاء تحرض علي الانطلاق رغم ان الغالبيه تنكمش في مثل الاجواء .. انا اتمدد كما تتمدد دولة الحب والاحساس مع كل شتاء.... وبس |
اقتباس:
كتابة و صوت .. ما عندي مشكلة مرئي .. ما أعتقد بالمناسبة .. لفت انتباهي عنوان الموضوع ! أهلا وسهلا بعودتك ي رومانس من الأقلام الجميلة والأسلوب اللذيذ والمضحك أحيانا :) اللي كنت أحب أقرأله ( أيام غرام) |
اقتباس:
ربنا يرحمه ويغفرله وجميع اموات المسلمين انا ع العكس .. كان الوالد متساهل معانا الصارمة والشديدة الوالدة .. :) ( ربنا يحفظهم :نبض: ) الأهل زمان .. كان عندهم صعوبة في اظهار المشاعر تجاه أبنائهم !! لكن .. صرامتهم وشدتهم نابعة من محبتهم ربنا يرحمو ويحفظلك من تبقى :27: |
اقتباس:
عندي ثقة بنفسسسي عمياء وتمشي مليون يالخواف راح ابقى اشاركم صوت وصورة من زود الثقه بس حطوني اغني لكم اغاني ابو نورة ماااره ماينفع اسولف لكم عشان بجيب العيد :icon10: بس هل بيحبوووني الاعضاء ولا بيسوون سكيييب :فطسه: هنا مربط الفرس :MonTaseR_203: |
صباح هادي ورايق يحملكم الى البهجة النقية يحقق أمنياتكم ويمسح على قلوبكم يداويها.. صباح ينتخب السعادات ويوزعها على العابرين ليصبح الكون ألطف وتصبح القلوب أرق ويصبح الناس أكرم وأوفى .. صباح يجلب الرضا وينثر عطر المحبة في العالمين صباحكم أحبتي اينما كنتم تحت كل "بطانيه" وفوق كل "سرير" تحت الدوش وفوق كل سجاده صباحكم انتم اينما كنتم فهو لكم.. و منوره اختنا ميريام .. وشكرا لكلماتك الجميله التي عادت بي الي ذكريات حتما لن تعود .. لم يعد غرام ملاذا جميلا كما كان بعيدا عن صخب الحياه وجنونها .. لم يعد ذلك المستراح والظلال الورافه وااه ياقلبي.. ثم ايضا اهلا بـ بنت ابها اوعبير او اي اسم تحبينه فالاسامي اسامي "شو خص الاسامي" او كما قالت سيدة الغناء فيروز .. وبس |
مبسم "هيا" .. له بالظلام اشتعالا بين البروق .. وبين مبسم هيا فرق له ريق .. احلى من حليب الجزالا واحلى من السكر .. الى جاء من الشرق قالوا تتوب من الهوى .. قلت لا لا الا ان تتوب الشمس .. عن مطلع الشرق الاسطوره محسن الهزاني يتغزل بالسنيوريتا "هيا" .. |
الخواف .. صباحك حب وحياه سعيده... في موضوع الحب .. ليه الاعضاء طبو فيك والبعض شخصنها معاك..؟! اعتبرني فاتح لك "نافذه" هنا عشان تعطينا موقفك من هؤلاء العصبه هههه المايك/الكيبورد معاك... |
هههههه المهم ياروماانس راح ندخل مع هذي النافذة ونكب العفش كله ...مابعنا بالكوم إلا اليوم ... المهم ييني وبينك مستغرب ايش العيب والجريمة يوم الواحد يقول انه متجوز عشان الجنس ...!!؟!! الكثير من الناس يعتقد ان الرجل إذا كان هدفه من الزواج هو الجنس أو اشباع الرغبة الجنسية أو حسب مايسمونه ... المهم الناس يعتقدون انه راح يعاملها معاملة زي الزفت وراح يهينها وراح يقولها كل يوم انه تزوجها عشان الجنس ومدري إيش ...!!....يعني على بالهم انه راح يخليها تعيش حياة مختلفة عن بقية الحريم .....!! وهو بالعكس راح يخليها تعيش مثلها مثل عامة الحريم لا هي زايدة عنهم ولا هي ناقصة ... لو فيه واحد سأل جاره حمدان ولا جاره معيض ولا جاره صالح أو سأل كل معدد ...أنت ليش تزوجت ثلاث أو ليش تزوجت أربع ...؟! هل نتوقع انه راح يقول عشان أكون أسرة وأعيش في كنفها بالحب والوئام ..!؟! معلش بمناسبة كلمة ( الوئام ) ....تذكرت ( وئام الصعيدي ) ..لبناني ...وهو المشرف على دبلجة أفلام كرتون مثل زينة ونحول وجزيرة الكنز وريمي وغيرها .... المهم نرجع لـ هرجتنا عن الهدف الأساسي من الزواج في وقتنا الحاضر .... طبعًا ما يخفى على أحد عِظم متطلبات الحياة الزوجية في وقتنا الحاضر .... ومايقدر أحد يدخل نفسه في ديون وقروض ومسؤوليات ينتج عنها استهلاك مادي كبير مايقدر عليه ... إلا بسب قوي يخليه يقع في كل هذي الأمور ... ومن ضمن الأسباب القوية اللي تخليه يتحمل كل هذي الأمور هو محبته في اشباع رغبته الجنسية ...عن طريق الزواج .....ولو كان ماعنده رغبة جنسية كان مافكر يتزوج في وقتنا الحاضر ... وعلى فكرة طريقة حياتنا هي اللي صعبت شغلة الزواج ....ومش الحياة الزوجية بذاتها هي الصعبة .... بمعنى آخر : طريقة معيشتنا هي اللي قضت على الراحة والسكينة بين الزوج والزوجة ...ومش الزواج بحد ذاته .. فـ لو كانت طريقة حياتنا ماشية صح ..كان راح تكون الحياة الزوجية كلها سكينة وطمأنينة وراحة بال ...لكن مع متطلبات طريقة حياتنا الزوجية اليوم انتفت راحة البال ..يعني طارت أهداف الزواج ولم يبقى إلا هدف واحد هو اللي مازال يجبرنا على الزواج وهو الجنس ..... واللي يقول الزواج راحة بال هو الشخص اللي عاش مع عائلة حالتهم المادية طيبة ..ومتوظف براتب كويس ....وتزوج بمساعدة أهله أبوه أو اخوانه أو تزوج لأنه مكتفي ماديًّا ..وساكن في عمارة أبوه ...مش مستأجر ....وما عليه قروض ومسلتزمات مادية لأي جهة أخرى .. وأرجع مرة ثانية وأقول : حنا بتصرفاتنا وطريقة معيشتنا ألغينا مقاصد وأهداف الزواج ..... وعلى سبيل المثال : الواحد مايقدر يروح لمناسبة زواج ومن هذا القبيل إلا ولازم يدفع مبلغ وقدره ...!!....ومحد يعذره ... يارجل مرة من المرات سمعت واحد قدامي يقول انه لن يروح لزواج فلان ....ويقول مستحي أروح للزواج بدون ما أدفع شي ..لأن حالته المادية ماتساعده ...وطبعًا أنا ما ألومه وأوافقه على كلامه ...لأن ماراح أحد يعذره ..... اللي أحواله المادية تعبانة مايقدر يواصل الناس في مناسباتهم ومايقدر يزورهم حتى في بيوتهم ....لأنه مايقدر يروح ويده فاضية ..لازم يجيب معه شي عليه القيمة ..!!.....واسألوا الحريم عن المبالغ اللي يدفعونها في الهدية عشان تزور فلانة النفاس ولا عشان فلانة المخطوبة ولا فلانة اللي بـ دق حنك عندها بعد المغرب ولا فلانة مدري وش قلعتها ... وبرضه مثلًا الكرم.. أصبح الشخص يجد حرج يوم يجيه ضيف في بيته ......والسبب انه لو طبخ لهم لحم من ثلاجته راح يكون موضع مسبة من ضيوفه .....لأن حضرتهم مايعترفون بالكرم إلا إذا كانت الذبيحة طازة قدامهم ومش مقطعة تقطيع ثلاجة ....!!!.. يعني بالعربي لسان حالهم يقول : روح تسلف من فلان وعلان قيمة الذبيحة واشتر ذبيحة جديدة بكرتونها ..ومش تطبخ لنا من ذبيحتك اللي مقطعها في الثلاجة مدري الفريزر ..!!...(( فريزر على وزن قرندايزر .. وقس على ذلك بقية أمور حياتنا الغير عقلانية اللي بسببها انتفت واختفت كثير من الفوائد والمقاصد الطيبة اللي تكلم عنها ديننا الإسلامي .....وأولها الزواج ... خلاصة كلامي : طريقة عيشتنا في حياتنا الزوجية هي اللي جعلت فوائده معدومة ...لا راحة بال ولا غيرها ....فقط اللي باقي الجنس .... وأعيد وأكرر للمرة المليون : الزواج في ديننا الإسلامي هو راحة بال وسعادة وسكينة ... لكن حنا بسبب طريقة حياتنا الجديدة في وقتنا الحاضر جعلنا الزواج مش راحة بال ....فقط الشي الباقي اللي يشجع عليه هو الجنس ... |
ياروماانس جا على بالي هالحين اني أنسخ كلامي اللي فوق وأحطه في موضوع الحب ..تعبت في الكتابة وما أبي تعبي يروح بلاش ههه ..زي شركات السيارات يحط مكينة وحدة في أكثر من فئة ..شغلة اقتصاد وقلة جهد ...وهم ماهم أحسن منا ..... ....... |
خلاص نسخته وحطيته في الموضوع هذاك ......عملية توزيع ....واااااااازززززززززززع على قولة معلق الكورة اللي مدري وشسمه ... |
ههه بعد مانسخته من هنا .. حطيته في واحد من مواضيع شطرنج بالغلط ....وحذفته ..ثم برحت وحطيته في موضوع الحب ... لكن المشكلة وش اللي يفكني من شطرنج لو قرا اللي حطيته في موضوعه قبل ما أحذفه ... مشكلتي عناوين المواضيع ألخبط بينهم ...أنساها ...مثلًا موضوع الحب كنت أعتقد انه لـ شطرنج ....وطلع لـ أحمد22.... |
اقتباس:
استقرار لما تكون مقتدر ماليا جدا وجدا جدا .. الزوج اللي مو قادر يصرف علي بيته وزوجته واولاده واولاد الناس من جماعته في عرس والا عزيمه لظروفه الماليه راح تضطر زوجته مع الوقت علي العمل لمساعدة زوجها وبالتالي فراغ اسري وانهيار كل ابو استقرار بينهم فلايتبقي الا الجنس كما تفضل معاليك.. وبس |
صوتي لأ ومرئي كمان لأ هيك افضل واحسن |
| الساعة الآن 04:42 AM. |
Powered by vBulletin® Copyright ©2000 - 2024, Jelsoft Enterprises Ltd.
SEO by vBSEO 3.6.1 al2la.com
HêĽм √ 3.1 BY: ! ωαнαм ! © 2010
new notificatio by 9adq_ala7sas
جميع الحقوق محفوظه لـ منتديات مسك الغلا