روحي انا الغلطان فيك احسنت ظني
حسبت ارض الصبخ تنبت لـي زهور

الوم النفس كل الذنب مني
بغيتك في دجى الايام لي نور

،.

‏رافعاً نفسي عن أطراف الحديث الخالي
‏كيف أنزل مستواي و هامتي مرفوعه

‏والله إن طيبي ماهو بالمرتبط بـ أحوالي
‏و ضحكتي بوجيه ربعي ماهي بـ مصنوعه

‏نضحك أحجاج الرفيق و يستغيض التالي
‏ولا درينا عن هوى داره ولا موضوعه ..!

هاء

هذي بيوت اهل النفوس الكريمه
ما الـوم عيني يـوم تبكي عليـها!

بعض الامـاكن والبيـوت القديمه
اللي تهمّــه دمعتـه لا يجيــها !!

،.

‏أحيان تلقاني اصخف من دقاق الجريد
‏واحيان تلقاني اثقل من ثقال المزن
‏
‏وانا بشر من نسيج اعظام ماني حديد
‏وشلون مدري لكنّي باقيٍ متزن

‏بالله ياقوم ياللي تسرقون القصيد
‏ماتسرقون القصيد وتسرقون الحزن ..!

نصبر على ميل الزمن ،، و انعواجه
ونسعى لكسب الطيب في كل منهاج

" مرات نقضي للمطاليق حاجه "
" ومرات حنا للمطاليق نحتاج ".

،.

جعل العيون اللي لها اشتقت ثم حنيت
تبطي مَ شافت من الوقت حزن ونكايد ..!