العزله من الناس و المسرى تحت جنح الظلام
على دروبٍ تشتكي .. قلة وصال احبابها

يمرها مر الكرام اللي يعرف ان الكرام
لا مرت دروب الجفا ما هي تلد رقابها

لو حثته رجله على الممشى و هو ماله مرام
ما حثته نفسه على امورٍ تسكر بابها

و الذكريات اللي ما هي بـ تقال ما منها سلام
تاخذ من ضلوعه كثر ما مرته وأمسى بها

ليلة عتابٍ .. يستبيح عتابها قل المنام
اونست منها وجعةٍ ما كنت احسب حسابها

جمّعت فيها كلمتينٍ .. تختصر كل الكلام
و لا ذكرت من الحروف الا حروف عتابها

قصایدٍ کْتبتها و لا جبرت کسري حرام
اعدها ولّا احتفظ فيها ، و اشل کتابها

خليتها لـ المستصيب اللي معنّيه الهيام
يمكن تلامس خاطره و يزين له مضرابها

و الا الذي من وجعته ما هو على احسن مايرام
لو ان فيها ما يداوي علته؟ غنى بها

عليك يا اللي ما معي منّك سوى رد السلام
من خيبة الهقوه ، و عذر الراحله و اسبابها

یا اول شقى و اخر لقى و اكذب عذر و أصدق ملام
لا ترتضي لي حاجةٍ .. قلبك ماهو يرضى بها

من باب تقدير المحبه و الغلا و الاحترام
لا تكذب اعذارك و انا مقدر على كذّابها

الاوفيا لوّ جحدوا سولف بهم حتى الظلام
کنه عقب جور الحنين يبين اللي صابها

يستنزفون شعورهم .. على متاهات الغرام
لو ایّسوا و استعصت الحاجه على طلاّبها

ينزّهون شعورهم حتى بـ لحظة لأنهزام
الطيحه اللي من شعور الأوفياء ترقى بها

اقل ما هي تمتلك وصل، و محبه، و اهتمام
و اكثر ما هي بـ تخاف منّه في الحياه .. غيابها

مقام حبك ماله الا .. شرهةٍ قد المقام
ان عابها قل الوفا ، و لا الجفا ما عابها

لا تنزع الشرهه بـ واهي العذر و الا الابتسام
و لا تلبّسها الثياب اللي .. ما هي بـ ثيابها

نعم تبادلنا الجفا لكن؛ تهادينا السلام
في ليلةٍ لو اقدر أنساها .. نسيت عتابها
- حمدان المرّي