الحب كله والمشاعر والإحساس
أهديتها لك ياحياتي هديه

ماعند من حبك جواهر والماس
ماغير قلبي شايله في يديه

لا جيت يمي تنقطع بيَّ الأنفاس
واحس ياعمري بيغمى عليه

من فرحتي يازين ماهو من الباس
طلتك ماهي عند خلك شويه

بعت العذارى كلهم يا اجمل الناس
وفي خافقي مافيه غيرك صبيه

أعطيتني قلبك عطوف(ن) وحساس
ياحظ قلبي يالغلا بالعطيه

أصبحت أفكر فيك مع كل نسناس
ونسيت اسمي المنكتب في الهويه

والله أنا من بعدك اليوم محتاس
أرجوك لا تغيبين يا الأجوديه

لك في خفوقي ياهوى البال مجلاس
مكانتك ما قاربوها البريه

محبتي لك مالها شرط وقياس
وببقى أحبك لين تاتي المنيه