خيال ..
 

ليلة البارحة غصبٍ عليَّه سرحت
طرت مَعْ هاجسي جاوزت حد الخيال


يوم شفتك أمامي والله إني فرحت
وإن بغيتِ الحقيقة كِنْ جاني هبال


من غبائي بلحظة طيش يمك جمحت
قبل لا ينطق لسانك حبيبي تعال


جيت اسلم وقلتِ لي علامك طمحت
أرفق ارفق ترى خلك بعيد المنال


قلت غلطان انا و للسلم والله جنحت
بس مِن فرحتي أَحس فيني خبال


أنا مِن أجل عينك عن دياري نزحت
جيت لك ممتطي شوقي وعزم الرجال


ماني بقايل إني في الغرام انذبحت
عزتي شامخة يا بنت مثل الجبال


لكن الحق أنا في بحر حبك سبحت
طحت كلي كذا طيحة مَ فيها عَدَال


في البداية أنا للحب والله استرحت
كله أفراح واغاني وأحلى وصال


بس من بعدها مَ اظن إني ربحت
ما توقعت هجرك بعد ذاك الدلال


يوم رحتِ أنا (من قلب) مِنْك انجرحت
أصعب أيام عمري يوم شد الرحال


والحياة اعفستني طحت من فوق تحت
وطاحت احلام عمري وغترتي والعقال


لو تماديت في حزني ترى ما فلحت
قمت من طيحتي قومة كريم الخصال


وجيت لك في خيالي عن رحيلك سمحت
هاتِ اللي أبيه بدون أدنى جدال


وابتسمتِ وقلت لي خيال ؟! ولمحت
وجهك اللي أعرفه ساحرٍ بالجمال


والله أدري خيال ورغم هذاك رحت
أتأمل جمالٍ فاق حد الكمال


يا خَيالٍ جمعنا بالغلا ثم أشَحت
يا سقاك الكريم بوابلٍ من خِيَال



سُهيل

صح لسانك سهيل :رحيق: :32:

مبدعنا الأول والأخير سُهيل
أينما ولّيت حرفك فهو إبداع
في رحاب الخيال كنّا
ومن رحيق حرفك تذوقنا
فكان شهدا عسلي المذاق
ليس من السهل مداعبة الحرف بكل أناقة
وعصر معانيه بهذه السلاسة
مساحات حرفك أرض خصبة أنبتت دررا
انحناءة تقدير وختم وإعجاب وووو … :111:.

صح لسانك وسلم بنانك

كلمات رائعه

يعطيك العافيه

تقبل سلامي

'





من غبائي بلحظة طيش يمك جمحت
قبل لا ينطق لسانك حبيبي تعال


صح لسانه
قافية تنجسد ع هيئة موقف ينعش الذاكرة
دام حبركَ.