والله يا ماهر اكيد انت وصلت
للصيغة اللي انت حابب انها تكون اجابة لسؤالك
من خلال التعليقات...
وفي الاخر هو استطلاع اراء

واللي نيتجته باختصار هيكون ان كل واحدة هتعمل باصلها ..

خليني اكلمك من منظور تاني
اللي هو ازاي قرار الانثي محسوم بناء علي اصلها ..

اكيد عارف جوزيه مورينيو

في وقت لما كان مدرب لمانشستر يونايتد
كان ليه مؤتمر صحفي شهير بيتكلم فيه عن الارث الكروي
عشان كان فيه هجوم عنيف من الاعلام والجماهير عليه
بسبب سوء النتائج ..

كان بيوضح ليه حصوله علي المركز التاني مع مانشستر
يعتبر افضل انجاز في تاريخه
بناء علي الارث اللي استلمه
مع ان مانشستر هو كبير انجلترا ..
مؤتمر كان شيق ..بس بيوضح عامة
ازاي ان معطيات الماضي
هي ببساطة بتحدد شكل المستقبل ..

وبتحدد الخريطة اللي افكارنا مبنية عليها
فطبيعي لما تلاقي تضارب في المفاهيم
هتلاقي كتير مش هيتقبل ان
خدمة الزوجة لاهل زوجها فيه نوع من التطوع
لأن الزوجة مش ملزمة في الدين بده ..
وبالتالي الاكراه هنا ليس الحل ..

وهنا لازم تسأل
ايه هو الارث المجتمعي والاسري اللي جعل من تطوع الزوجة
لخدمة اهل زوجها فيه نوع من التشرط قبل الزواج
وفيه نوع من رفض الفكرة لغالبية البنات حاليا ؟

في افكار بتتنقل من خلال الام للبنت
بتقول فيها الام لبنتها ان زوجها ماقدرش تضحيتها
في خدمة امه وابوه في مرضهم ..
الزوج ده جحد بحقها .. وشاف غيرها مثلا
او اهملها .. او يعاملها ببرود لا يناسب تضحياتها
عالرغم ان في روايتها مافيش تقصير منها

وبالتالي البنت هنا
بتحس انها مش عاوزة تعيش في دراما امها مرة تانية
وبتحط دروع علي عاطفتها خوفا انها تكون ضحية
لأن الافكار اتنقلت من امها ليها ..
والبنت بتكون في الغالب اناء بيتملي
بمشاعر احباط او سوء تجربة أمها

وبالتالي مهما جوزها اشعرها بالأمان ..
فهي مش مستعدة انها تخطي خطوة هتخليها
في نفس طريق امها في نهاية عمرها ..

ده تصور بتبنيه البنت في عقلها خاصة
لما تكون في اول سنين جوازها
الزوج هنا بيكون عليه عبئ اكبر
وانه يقدم في حياته اللي يخليها تغير نظرتها للواقع ده
وانها تتنازل عن الارث اللي الام تركته ..

ومش لما هيأمرها هتنفذ .. مستحيل ..
مش لما يشكيها لأهلها .. هتخنع ..
ولو خدمت وهي متضررة.. فباب المشاكل عمره ما هيتقفل
وده الواقع ..

وفي ثقافة سمعية وبصرية اخترقت عقول البنات
الثقافة في الافلام في القصص اللي بتسمعها
في جروبات المشاكل علي السوشيال ميديا ..

البنات عامة في سن معين بتتشبع بأفكار
انها لازم ماتقبلش تكون ضحية للذكورية زي ما بيقولوا كدا
فكله بيخلط النوايا .. وكله داخل الزواج مثلا
وكأنه داخل علي معركة فرض نفوذ
وفرض أفكار وفرض حياة ...
قبل ما يفرض مودة واحسان..

وبالتالي لازم الارث ده يتغير عن طريق نشر الوعي..
عن طريق زراعة افكار الود من جديد ..
وده مش واضح حاليا .. بدليل تزايد حالات الطلاق
وجزء من اسباب الطلاق هو التصادم بسبب
توزيع الواجبات بين الطرفين .


عشان كدا المعطيات اللي بتصنع الارث للجيل الجاي
بيتبني حاليا و بيتحول من فكرة
عدم التطوع لخدمة حماها وحماتها
الي فكرة الانفصال بشكل تام ..

و ده فعليا موجود بشكل جزئي حاليا ..
لأن الثقافة الامريكية بتفرض وجودها
و هي المتحكم في المسار ...

وبالتالي احنا في خضم تحديات كبيرة جدا
في المستقبل ..