مفيش أي حاجة مضمونة 100%
الحياة تجارب
إنت نفسك ممكن تدخلي تجربة الزواج= وبعد شهر أو اتنين تكتشفي إنه شخص مش مناسب ليك ومش هتقدري تكمّلي معاه
يعني دا حقك، زي ما هو حقه كمان
لكن المفروض إنت عندك نضج يكفي إنك تقدري تحكمي عل العلاقة بصورة مبدئية وتقولي دا راجل شاريك، وجاي ليك مش بيلعب ولا بيتسلّى بيك ، المفروض تكون عندك الدرجة دي من الوعي ولو بشكل مبدئي
ودا بيتشكّل عندك من التجارب وتراكم الخبرات
وكمان بيكون فيه مؤشرات أوليّة تقدري تحكمي بيها على الشخص، يعني في فترةالخطوبة أو التعارف الأولى أظن بإمكان تكتشفي إنه شخص كريم أو بخيل ولو بنسبة 85%
وهكذا
ممكن تقدري تحكمي على شخصيته، ورجولته، وشهامته ومروءته وحاجات كتيرة - هي دعائم في أركان الزواج الصحيح

طيّب، دلوقتي احنا عندنا تجربتين
خلّينا نحللهم سوا، أو ع الأقل أنا هتكلم من وجهة نظري من خلال قراءتي وتحليلي للتجارب دي
أولا: إمام مسجد، أو قارئ قرآن ..إلخ كل دي مش تديني فكرة كاملة في الحكم ع الشخص دا
النقطة التانية - وهي مشتركة في التجربتين- ثناء شخص أو إنه جاي من طرف حد يعرفك= مش مبرر إنه شخص كويس
لازم يكون فيه بحث وتحرّي أكتر
يعني: قارئ القرآن دا تعامله مع الناس ازاي؟ تعامله مع أهله جيرانه،زملائه في العمل؟
سبق له الزواج؟ ولو سبق الزواج وحصل طلاق تعامله مع أولاده أو طليقته ازاي بالعدل والمعروف؟
طيب لو سبق له الطلاق، ما السبب؟ كان مشاكل عنده ولا عندها..
إلخ
ورقة وقلم وممكن نقعد أنا وانت نكتب خمسين سؤال
الإجابة كفيلة إنها ترسم لك شخصية العريس دا

وخليني أكمل لك كلامي في التجربة التانية:
دا شخص متزوج وله زوجة وأولاد:
لمّا تقدم ليك، قعدت معاه؟ وسألتيه بتتزوج ليه؟ أسبابك؟
طيب، زوجتك الأولى عارفة بالزواج الثاني ولا في السر؟
ولو عرفت ايه هيحصل؟ هتضحي بيا باعتباري الخانة الأضعف ولا هتتمسك بيا وتكمل مهما كانت الأسباب.
صدقيني والله احنا دايما بنقول الزواج زي البطيخة مقفولة ممكن تطلع حلوة وممكن تطلع وحشة
بس مع ذلك بيكون فيه حاجات واضحة من الأول سهل علينا نحكم وصدقيني حكمنا في الغالب بيكون صح بنسبة 80% ع الأقل
بس المهم نقرأ الشخص كويس، ونحط الأسئلة اللي من خلالها أقدر أوصل لإجابات تنور ليا الطريق وتخليني أشوف المستقبل معاه هيكون شكله ايه

التجارب السابقة استفيدي منها
وكملي
وإن شاء الله الجاي هيكون أحسن وربنا هيرزقك باللي يسعدك